২১ জুন, ২০২৫-ত সমগ্ৰ বিশ্বত উদযাপন কৰা ১১ সংখ্যক আন্তঃৰাষ্ট্ৰীয় যোগ দিৱস (IDY 2025)-এ বিশ্বজুৰি অভূতপূৰ্ব অংশগ্ৰহণেৰে বিশাল সফলতা লাভ কৰে। প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত এই দিৱস উদযাপনৰ কাৰ্য্যসূচীসমূহে যোগৰ ক্ৰমবৰ্ধমান বৈশ্বিক আবেদন আৰু সামগ্ৰিক স্বাস্থ্য তথা সুস্থতাৰ প্ৰসাৰৰ ক্ষেত্ৰত ভাৰতৰ গুৰুত্বপূৰ্ণ ভূমিকাতে আলোকপাত কৰিছে।

সমগ্ৰ ভাৰততে যোগ পৰ্টেলত ২১ জুনৰ কাৰ্য্যসূচীৰ বাবে ২০ জুন পৰ্য্যন্ত ১৩.০৪ লাখ যোগ সংগমম অনুষ্ঠানৰ পঞ্জীয়ন সম্পন্ন হৈছিল। ইয়াৰ জৰিয়তে তৃণমূল পৰ্য্যায়ৰ গভীৰ সংযোগ প্ৰদৰ্শিত হয়। বিশ্বজুৰি ভাৰতৰ বাহিৰৰ ১৯১ খন দেশৰ প্ৰায় ১,৩০০ স্থানত যোগাসন প্ৰদৰ্শনৰ ব্যৱস্থা কৰা হৈছিল। ইয়াকে প্ৰমুখ্য কৰি আনুমানিক ২,০০০ এনে বৈশ্বিক অনুষ্ঠান অনুষ্ঠিত হয়। এনে বিশাল আন্তঃৰাষ্ট্ৰীয় প্ৰচাৰে বিশ্ব স্বাস্থ্য, সমন্বয় আৰু মংগলৰ বৰ্ধনত যোগৰ সৰ্বজনীন প্ৰাসংগিকতাকে পুনৰ দৃঢ় কৰি তোলে।

ভাৰতে বিশাখাপট্টনমত দুই উল্লেখযোগ্য গিনিজ ৱৰ্ল্ড ৰেকৰ্ডো অৰ্জনেৰে যোগৰ গভীৰ সংযোগ আৰু ব্যাপক গ্ৰহণযোগ্যতাক উজ্জ্বল কৰি তোলে। ইয়াৰে প্ৰথমটো হৈছে এটা স্থানত যোগাসন অধিবেশনৰ বাবে সৰ্ববৃহৎ সমাৱেশঃ ২০২৫-ৰ ২১ জুনত আকৰ্ষণীয় ৩০২,০০০ (৩.০২ লাখ) অংশগ্ৰহণকাৰীয়ে যোগদান কৰে আৰু দ্বিতীয়টো অভিলেখ হৈছেঃ ২০২৫-ৰ ২০ জুনত ২২,১২২ গৰাকী জনজাতীয় ছাত্ৰ-ছাত্ৰীয়ে অংশগ্ৰহণেৰে সৰ্ববৃহৎ গণ সূৰ্য্য নমস্কাৰ কৰা কাৰ্য্য।

যোগ দিৱসৰ কার্য্যসূচীৰ মাজেৰে ভাৰতৰ চহকী ভৌগোলিক আৰু সাংস্কৃতিক ঐতিহ্য প্রদর্শন কৰিবলৈ আয়ুস মন্ত্রালয়ে সমগ্ৰ চৰকাৰৰ দৃষ্টিভংগীৰ জৰিয়তে উল্লেখযোগ্য সফলতা লাভ কৰে আৰু ইয়াৰ ফলশ্ৰুতিত দেশজুৰি কৌশলগতভাৱে গুৰুত্বপূৰ্ণ আৰু সাংস্কৃতিকভাৱে বৈচিত্ৰ্যময় স্থানত পোন্ধৰ আইকনিক যোগ অনুষ্ঠান অনুষ্ঠিত হয়। এনে কাৰ্য্যসূচীসমূহৰ লক্ষ্য আছিল ভাৰতৰ প্ৰাকৃতিক সৌন্দৰ্য্য, ৰাষ্ট্ৰীয় মনোভাৱ আৰু সভ্যতাবাদী নীতি-নিয়মসমূহক থূপাই প্ৰদৰ্শন কৰা তথা একে সময়তে যোগৰ জৰিয়তে সুস্থতা আৰু ঐক্যৰ বাৰ্তা প্ৰচাৰ কৰা।

এইবাৰৰ যোগ প্ৰদৰ্শনত দেশৰ একাংশ প্ৰত্যাহ্বানমূলক ভূখণ্ড যেনে চিয়াচেন হিমবাহত অক্ষুণ্ণ থকা শাৰীৰিক প্ৰাণোচ্ছলতা আৰু ৰাষ্ট্ৰীয় সেৱাত গুৰুত্ব আৰোপ কৰা হৈছিল। ইয়াৰ অংশ হিচাপে ভাৰতীয় সেনাৰ জোৱানসকলে বিশ্বৰ সৰ্বোচ্চ যুদ্ধক্ষেত্ৰ গালৱান উপত্যকাত ১৫,০০০ ফুটৰো অধিক উচ্চতাত যোগাসনেৰে ভাৰতৰ শান্তি আৰু অভ্যন্তৰীণ শক্তিৰ বাৰ্তা প্ৰদান কৰে। ৰোহটং পাছ, চেলা সুৰংগ আৰু পাংগং লেকত সীমান্ত পথ সংস্থা (BRO) আৰু ভাৰত-তিব্বত সীমান্ত আৰক্ষী (ITBP)-ৰ জোৱানসকলে প্ৰতিকূল বতৰত যোগাসন কৰে, চেনাব ৰেল দলং (জম্মু আৰু কাশ্মীৰ) অৰ্থাৎ বিশ্বৰ সৰ্বোচ্চ ৰেল দলঙত যোগাসন কৰে। এই কাৰ্য্যৰ জৰিয়তে অভিযান্ত্ৰিক উৎকৃষ্টতাৰ সৈতে আধ্যাত্মিক সমন্বয় প্ৰতিফলিত হয়। ৰণ আৰু ক্ৰিক খণ্ড, কচ্ছ (গুজৰাট)-ত ভাৰতীয় সেনাৰ কোনাৰ্ক কৰ্পছে এই দিৱস পালন কৰে। ভাৰতৰ আটাইতকৈ পশ্চিম অঞ্চল ইন্দিৰা পইন্ট (আন্দামান আৰু নিকোবৰ দ্বীপপুঞ্জ)-ত ভাৰতৰ আটাইতকৈ দক্ষিণ টিপত আন্দামান আৰু নিকোবৰ কমাণ্ডে যোগাসন কৰে। মুম্বাই অফশ্ব’ৰ অইল ৰিগ-ত আৰৱ সাগৰৰ মাজত অ’এনজিচিৰ কৰ্মীসকলে অংশগ্ৰহণ কৰে। নিউ পাম্বন দলং (তামিলনাডু)-ত ৰেলৱেৰ বিষয়া, কৰ্মচাৰী, স্কাউট আৰু গাইড তথা ছাত্ৰ-ছাত্ৰীসকলে সামূহিকভাৱে এই দিৱস পালনেৰে ইয়াৰ সংযোগ আৰু প্ৰবাহৰ অনুৰণন ঘটায়।

নমো ঘাট, বাৰাণসীৰ দৰে ঐতিহাসিক আৰু আধ্যাত্মিকভাৱে উল্লেখযোগ্য স্থানসমূহত বিশেষ যোগ অধিবেশনে ভাৰতৰ চহকী সাংস্কৃতিক ঐতিহ্যক উজ্জ্বল কৰি তোলে। এনচিচি-ৰ ৯১ ইউপি বেটেলিয়নে আধ্যাত্মিক স্পন্দনশীলতা আৰু যুৱক-যুৱতীসকলৰ অংশগ্ৰহণ কাৰ্য্যক প্ৰতিফলিতকৰণেৰে গংগাৰ পাৰত অধিবেশনৰ আয়োজন কৰে। কিষাণগড় দুৰ্গ, জয়ছালমেৰ-ত বিএছএফ ৰাজস্থান সীমান্তৰ সীমা প্ৰহৰীয়ে সাংস্কৃতিকভাৱে চহকী অনুষ্ঠানৰ আয়োজন কৰে। পেহেলগাম আৰু সোনমাৰ্গ (জম্মু আৰু কাশ্মীৰ)-ত জম্মু-কাশ্মীৰ স্প'ৰ্টছ কাউন্সিলৰ খেলুৱৈসকলে প্ৰকৃতিৰ মাজত অধিবেশন অনুষ্ঠিত কৰে। ইয়াৰ জৰিয়তে প্ৰকৃতিৰ মাজত সুস্থতাক প্ৰসাৰিত কৰা হয়। বৈনাং কাউন্টি, তিব্বত স্বায়ত্তশাসিত অঞ্চল-ত নাথু লা পথ হৈ কৈলাশ মানস সৰোবৰ যাত্ৰাত ভাৰতীয় তীৰ্থযাত্ৰীসকলে যোগাসন কৰে, এই কাৰ্য্যই সীমান্ত-অতিক্ৰমি আধ্যাত্মিকতাৰ অনুৰণন ঘটায়।

ভাৰতীয় ভূতাত্ত্বিক জৰীপ (GSI)-ৰ সহযোগত বৈজ্ঞানিক, পাৰিপাৰ্শ্বিক আৰু সাংস্কৃতিকভাৱে গুৰুত্বপূৰ্ণ বাৰ ভূতাত্ত্বিক ঐতিহ্য স্থানত যোগাসনৰ আয়োজন কৰা হৈছিল। ইয়াৰ ভিতৰত আছিলঃ ৰাহিওলি ডাইন’ছৰ ফ’চিল পাৰ্ক (গুজৰাট), ভীমবেটকা ৰক শ্বেল্টাৰ (মধ্য প্ৰদেশ), নিঘোজ নেচাৰেল পটহ’ল (মহাৰাষ্ট্ৰ), গংগানি ৰিভাৰ গৰ্জ (পশ্চিম বংগ), ছিৱালিক ফ’চিল পাৰ্ক (হিমাচল প্ৰদেশ), আৰৱাহ-লুমশিন্না কেভ (মেঘালয়), ছেইন্ট থমাছ মাউন্ট চাৰ্নোককাইট (তামিলনাডু), লালবাগ (কৰ্ণাটক), মাংগামপেটা বেৰাইটছ ডিপ’জিট (অন্ধ্ৰ প্ৰদেশ)।

এই পোন্ধৰ আইকনিক কাৰ্য্যসূচীয়ে সামূহিকভাৱে ভাৰতৰ প্ৰাচীন যোগ প্ৰজ্ঞা আৰু ইয়াৰ অনন্য ভূতাত্ত্বিক লিগেছীৰ মাজৰ গভীৰ সংযোগতে আলোকপাত কৰিছিল। ইয়াৰ জৰিয়তে ‘সকলোৰে বাবে যোগ, সকলোতে যোগাসন’ৰ মনোভাৱ প্ৰতিফলিত হয়। ইয়াৰ জৰিয়তে এই প্ৰাচীন প্ৰথাৰ স্পন্দনশীল পৰম্পৰা তথা দেশজুৰি ভিন্ন ভূখণ্ড তথা সমাজৰ মাজত স্থিতিস্থাপকতা, সুস্থতা আৰু ঐক্যৰ প্ৰেৰণা যোগোৱা কাৰ্য্য প্ৰদৰ্শিত হয়।

এই দিৱসক একতা, সুস্থতা আৰু শান্তিৰ এক ঐতিহাসিক উদযাপন কাৰ্য্য কৰি তোলাৰ বাবে আয়ুষ মন্ত্ৰালয়ে ভিন্ন মন্ত্ৰালয় আৰু বিভাগ, ৰাজ্য চৰকাৰ, আন্তঃৰাষ্ট্ৰীয় সমাজ, ভাৰতীয় সশস্ত্ৰ বাহিনী, যোগ প্ৰতিষ্ঠান আৰু সন্থা, শিক্ষানুষ্ঠান, এনজিঅ’ আৰু বিশ্বৰ লক্ষ-লক্ষ যোগ অনুৰাগীলৈ আন্তৰিক কৃতজ্ঞতা জ্ঞাপন কৰিছে।

***

MV/AKS/SB