অন্ধ্র প্রদেসকী রাজ্যপাল সয়েদ অবদুল নাজির জি, রাজ্য অসিগী চীফ মিনিস্তর, ঐগী নুংশিরবা মরুপ চন্দ্রবাবু নাইদু গারু, কেন্দ্রগী মন্ত্রীমন্দলগী ঐগী মরুপশিং, কে. রামমোহন নাইদু জি, প্রাতাপ্রাউ যদব জি, চন্দ্রসেখর জি ভুপাতি রাজু শ্রীনিভাস ভর্মা জি, রাজ্য অসিগী দিপুতি চীফ মিনিস্তর পৱান কলয়ান গারু, অতোপ্পা শক্নাইরবশিং অমসুং ঐগী নুংশিরবা ইনাওশিং অমসুং ইচলশিং! ময়াম পুম্নমক খুরুমজরি!

মালেমগী য়োগ নুমিৎ লাকপদা লৈবাক অসিগী অমসুং মালেম শীনবা থুংবগী মীয়ামদা য়াইফ পাউজেল পীজরি। ঙসি জুন ২১ দা মালেম শীনবা থুংনা ১১ শুবা মালেমগী য়োগ নুমিৎ পাংথোক্লি। য়োগ হায়বসি শম্নবা হায়বনি অমসুং কমদৌনা য়োগনা মালেম অসি শম্নবগে হায়বা উবদা অঙকপা অমনি। হৌখিবা চহি ১০ দা লৈখিবা য়োগগী খোঙচৎ ঐনা উবদা, ঐনা থবক কয়া নিংশিংলি। জুনা ২১ অসি মালেমগী য়োগ নুমিৎ হায়না পাংথোক্নবা ভারতনা য়ু.এনদা পুখৎখি অমসুং মতম অদুদা অতেনবা মতমগী মনুংদা মালেমগী লৈবাক ১৭৫ না ঐখোয়গী ৱাফম অদু শৌগৎখি। অসিগুম্বা অমতা ওইনা শৌগৎপা অসি ঙসিগী মালেম অসিদা য়াম্না তোইনা থোকপা অমা নত্তে। পুখৎলকপা ৱাফম অমা শৌগৎপা খক নত্তনা, মসি মীওইবা খুন্নাইগী য়াইফনবা মালেমগী অপুনবা থবক অমনি। ঙসি, চহি ১১ গী মতুংদা, য়োগ অসি মালেম শীনবা থুংবগী মীওই মিল্লিয়ন কয়াগী পুন্সি মহিংগী শরুক অমা ওইবা ঐখোয়না উরে। ঐখোয়গী দিবয়াং মরুপশিংনা ব্রাইলদা য়োগ সাস্ত্রাশিং পাবা, স্পেসতা সাইন্তিস্তশিংনা য়োগা পাংথোকপা, খুঙ্গংশিংগী নহারোলশিংনা য়োগ ওলেম্পিয়াদ শরুক য়াবা উবদা ঐ চাউথোকচৈ। মফম অসিদা য়েংউ, নেভিগী জহাজশিংদা অঙকপা য়োগগী থৌরম অমা পাংথোক্লি। মসি সিদনি ওপেরাগী থাকশিংদা ওইবা য়াই, নত্ত্রগা ইভরেস্তকী মতোন্দা ওইবা য়াই, নত্ত্রগা পাক্লবা সমুদ্রদা ওইবা য়াই, মফম খুদিংমক্ত পাউজেল অসি চপ মান্নৈ-য়োগ অসি মীওই খুদিংমক্কীনি। ঙমখৈশিং, হৌরকফমশিং অমসুং চহি নত্ত্রগা পাঙ্গলগী খেন্নবা লৈতনা য়োগ অসি মীওই খুদিংমক্কীনি।

মরুপশিং,

ঙসি ঐখোয় ময়াম ভিশাখাপত্নমদা পুনবদা ঐ হরাওই। সহ অসি মহৌশা অমসুং চাউখৎপগী ইতিনফম অমনি। মফম অসিগী মীয়াম্না থৌরম অসি ফজনা শীল্লে। ঐনা চন্দ্রবাবু নাইদু গারু অমসুং পৱান কলয়ান গারু থাগৎপা ফোঙদোকচরি, অদোমগী লমজিং মখাদা অন্ধ্র প্রদেসনা য়োগঅন্ধ্র অভিয়ানগী অচৌবা থবক অমা পাংথোক্লে। নারা লোকেস গারুগী থবকশিং অখন্নবা ওইনা ঐনা থাগৎচরি। কমদৌনা মীয়াম্না য়োগগী থৌরম পাংথোক্কনি, কমদৌনা খুন্নাইগী কাংলুপ খুদিংমক শরুক য়াহনগনি, হৌখিবা থা অমা মখাই অসিদা মসি মহাকআন য়োগঅন্ধ্র অভিয়ান্দা উৎলে অমসুং মসিগীদমক ইনাও লোকেস থাগৎফম থোকই। অসিগুম্বা খুদোংচাবশিং কমদৌনা মীয়ামদা ফংহনগনি হায়বগী খুদম অমা লোকেসনা পায়খৎলিবা থবক অসিনা খুদম অমা ওইরে হায়না ঐনা মীয়ামদা হায়নিংই।

মরুপশিং,

য়োগঅন্ধ্র অভিয়ান অসিদা মীওই করোর ২ হেন্না শরুক য়ারি হায়বা ঐ খঙলে। মীয়াম শরুক য়াবগী ৱাখল্লোন অসি বিকসিত ভারতকী য়ুম্ফমনি। মীয়াম থোক্লক্তুনা অমসুং খোঙজং অমা শরুক য়াবা মতমদা, মশাগী পান্দম অমা থম্বদা, পান্দম অদু ফংনবা হোৎনবদা কনা অমতনা ঐখোয় থিংবা ঙম্লোই। মসি মীয়ামগী অফবা ৱাখলনি অমসুং থৌরম অসিদা অদোমগী থবকশিং মফম খুদিংমক্ত উবা ফংলে।

মরুপশিং,

চহি অসিগী মালেমগী য়োগ নুমিৎকী থিম অসি ‘মালেম অমা, হকশেল অমগীদমক য়োগ’ হায়বনি। থিম অসিদা অচুম্বা অমা মমি তারে। মালেমদা লৈরিবা পোৎশক খুদিংমক্কী হকশেল অসি অমগা অমগা মরী লৈনৈ। মীওইবা অসি ঐখোয়গী চীঞ্জাক হৌরিবা লৈবাক লৈহাওগী হকশেল, ঐখোয়গী ঈশিং পীরিবা তুরেলশিং, ঐখোয়গী অকোয়বদা লৈরিবা শাশিংগী হকশেল, ঐখোয় য়োক্লিবা পাম্বীশিংগী মখা পোল্লি। মসিগী অমগা অমগা মরী লৈনবা অসি য়োগনা ঐখোয়দা মিকপ থোকহল্লে। মালেম অসি অমতা ওইবগী খোঙচৎ অমগী মাইকৈদা য়োগনা ঐখোয় লমজিংলি। ঐখোয় নাইতোম লৈবা নত্তে, মহৌশাগী শরুক অমনি হায়না য়োগনা ঐখোয়দা তম্বীরি। অহানবদা, ঐখোয়না ঐখোয় ইশাগী হকশেল অমসুং নুংঙাইবা খক্তগী চেকশিল্লম্মী। তপ্না তপ্না, ঐখোয়না ঐখোয়গী মহৌশা, খুন্নাই অমসুং গ্রহ অসিগী খনবা হৌরকখি। য়োগ অসি মীওই অমগী অফবা থকশি-খাসিনি। মসিগা লোয়ননা, মসি ঐদগী ঐখোয়দা লাক্নবা থবক অমনি।

মরুপশিং,

‘ঐদগী ঐখোয়’ হায়বা ৱাখল্লোন অসি ভারতকী থৱায়নি। মীওই অমনা মশাগী য়াইফনবা খন্দনা খুন্নাইগী খল্লবদি, মতম অদুদা মীওইবা খুন্নাই কান্নবা ফংগনি। ভারতকী চৎনবীনা ঐখোয়দা তম্বীরি, सर्वे भवन्तु सुखिनः, মসিনা হায়রি মদুদি, মীওই খুদিংমক নুংঙাইহনবা হায়বসি ঐগী থৌদাংনি। ‘ঐ’ দগী ‘ঐখোয়’ লাকপা খোঙচৎ অসি থবক, কৎথোকপা অমসুং পুন্না হিংমিন্নবগী য়ুম্ফমনি। মসিগী ৱাখল্লোন অসিনা খুন্নাইগী নুংশিনবা হেনগৎহল্লি।

মরুপশিং,

লাইবক থিবদি, ঙসিগী মালেম অসি মখল অমগী উংখৎনবা ঙাক্ত ঙাইরে। মফম কয়াদা লৈতাদবা অমসুং মুক্নবা হেনগৎলক্লি। অসিগুম্বা ফিবম অমদা, য়োগনা ঐখোয়দা শান্তিগী লম্বী তাক্লি। য়োগ অসি মীওইবা খুন্নাইনা শ্বর হোন্নবা, মান্নবা অমসুং য়াইফনবা পোজ বত্তন অমনি।

মরুওইবা থৌরম অসিদা ঐনা মালেমগী মীয়ামদা ৱাফম অমা হায়জনিংই। চহি অসিগী মালেমগী য়োগ নুমিৎ অসিদগী মীওইবা খুন্নাইগীদমক য়োগ ২.০ হৌরসি, নুঙগী শান্তি লৈবা অসি মালেমগী থৌশিল অমা ওইহল্লসি। য়োগা অসি শুপ্নগী শাজেল অমা খক নত্তে, য়াংনা চৎলিবা মালেম অমদা শান্তি পুরক্নবা লম্বী অমনি। নুঙগী পাঙ্গল অমসুং অকোয়গী শান্তিগা অমুক হন্না শম্নরসি। লৈবাক খুদিংমক, খুন্নাই খুদিংমক য়োগ অসি পুন্সি মহিং অমসুং মীয়ামগী থৌশিলগী শরুক অমা ওইরে। ঐখোয়না অমতা ওইনা শান্তি লৈবা, থোং মান্নবা অমসুং তুংকোইনা চাউখৎপা মালেম অমগী ইথিল পীরে। য়োগনা মালেম অসি মুক্নবদগী মতেং পাংনবা অমসুং উংখৎনবদগী শান্তাইনবদা পুরক্লে।

মরুপশিং,

মালেমদা য়োগ শন্দোক্নবা, মতমগী অনৌবা থিজিনবগী খুৎথাংদা ভারতনা মখা তানা য়োগ সাইন্স মপাঙ্গল কনখৎহল্লে। লৈবাক অসিগী মরুওইবা মেদিকেল ইন্সতিতুসনশিংদা য়োগগী মরমদা থিজিল্লে। অনৌবা মতমগী মেদিকেলগী থবকশিংদা সাইন্তিফিক ওইবা য়োগগী কান্নবগী মফম অমা কনবা হায়বসি ঐখোয়গী থবক্নি। লৈবাক অসিগী মেদিকেল অমসুং রিছার্স ইন্সতিতুসনশিংদা য়োগগী লমদা খুদম চাংদম লৈবা লায়য়েংবগী থবক ঐখোয়না পুক্নিং থৌগৎলি। হিরম অসিদা এ.আই.আই.এম.এস দিল্লিশু অফবা থবক কয়া পায়খৎলে। এ.আই.আই.এম.এসনা থিজিনবদগী থম্মোয় অমসুং শিংলিগী অনাবশিং লায়েংবদা অমসুং নুপীশিংগী হকশেল অমসুং পুক্নিং-ৱাখল ফহনবদা য়োগনা লৌরিবা মরুওইবা থৌদাং খঙলে।

মরুপশিং,

য়োগগী লাইৱা অমসুং নুংঙাইবা অসি নেসন অয়ুস মিসনগী খুৎথাংদা পুক্নিং থৌগৎলে। মসিদা দিজিতেল তেক্নোলোজিনা মরুওইবা থৌদাং অমা লৌরে। য়োগা পোর্তেল অমসুং য়োগঅন্ধ্র পোর্তেলগী খুৎথাংদা, লৈবাক শীনবা থুংনা থৌরম লাখ ১০ হেন্না রেজিস্তার তৌরে। ঙসি, লৈবাক অসিগী মফম কয়াদা থৌরমশিং পাংথোক্লে। য়োগগী কান্নবা কয়া য়াম্না মশা মরেং ফন্দোক্লবগে হায়বা মসিনা তাক্লে।

মরুপশিং,

ভারত্ত লায়য়েংবা হায়বা লাইৱা অসি মালেমদা য়াম্না পাম্নরে হায়বা ঙসি ঐখোয়না খঙলে। ভারত অসি মালেমদা খ্বাইদগী পাম্নবা হিলিংগী মফম অমা ওইরক্লে। মসিদা য়োগনা মরুওইবা থৌদাং অমা লৌরি। য়োগীদমক কম্মন য়োগ প্রোতোগোল অমা শেম্বদা ঐ হরাওই। য়োগ সর্তিফিকেসন বোর্দকীদমক ত্রেন তৌরবা ভোলুন্তিয়ার লাখ ৬.৫ হেন্না লৈরে, মশক খঙলবা ইন্সতিতুৎশিং অমসুং মেদিকেল কলেজ ১৩০ দা নুমিৎ ১০ গী য়োগ মোদুল পাংথোক্লে। লৈবাক শীনবা থুংবগী ঐখোয়গী অয়ুস্মান অরোগ্যা মন্দিরশিংদা ত্রেন তৌরবা য়োগ ওজাশিং থম্লে। মালেম শীনবা থুংবগী মীয়াম্না হকচাং নুংঙাইনা লৈনবা থবকশিংগী কান্নবা লৌনবা মালেম শীনবা থুংবগী মীয়ামদা ই-অয়ুস ভিসা পীরে।

মরুপশিং,

ঙসি য়োগ নুমিৎ অসিদা, ঐনা অমুক হন্না নোইবগী মতাংদা মীয়ামগী পুক্নিং চিংশিঞ্জরি। নোইবা হেনগৎলকপা অসি মালেম শীনবা থুংবগী অচৌবা শিংনবা অমনি। মসি ঐনা মন কি বাত থৌরমদশু য়াম্না কুপ্না খন্নখ্রে। মসিগীদমক, ঐখোয়গী চীঞ্জাক্ত থাউ চাদা ১০ হন্থহন্নবা শিংনবা অমসু ঐনা হৌদোকখ্রে। মসিগী শিংনবা অসি শরুক য়ানবা ঐনা মালেম শীনবা থুংবগী মীয়াম অমসুং লৈবাক অসিগী মীয়ামদা অমুক হন্না হায়জরি। কমদৌনা ঐখোয়গী নোংমগী চাবদা য়ামদ্রবদা থাউ চাদা ১০ হন্থহনগনি হায়বগী মতাংদা মীয়ামদা ৱাখল তাহনবা দরকার ওই। থাউ চাবা হন্থহনবা, হকচাং শোক্নিংঙাই ওইবা চীঞ্জাক চাদবা অমসুং য়োগ শান্নবা অসি হকচাং ফনা হিংনবা য়াম্না মরুওই।

মরুপশিং,

ঐখোয় অমতা ওইনা পুন্না য়োগ অসি মীয়ামগী খোঙজং অমা ওইহল্লসি। মালেম অসি শান্তি, হকচাং ফবা অমসুং নুংশিন্না হিংমিন্নবা পুরক্নবা ইহৌ অমা ওইহল্লসি। মীওই খুদিংমক নোংমগী অহানবা ওইনা য়োগ শান্নবদা নুংঙাইবা পুন্সি অমা ফংগনি। খুন্নাই খুদিংমক য়োগ শান্নবা মতমদা লাংতক্নবা লৈরোই। য়োগ অসি মীওইবা খুন্নাই অমতা ওইনবা পাম্বৈ অমনি। মালেম অমগী, হকশেল অমগী য়োগ অসি মালেমগী ৱারেপ অমা ওইরসি। ঐনা অমুক হন্না, অন্ধ্র প্রদেসকী লুচিংবশিং, অন্ধ্র প্রদেসকী মীয়াম থাগৎপা ফোঙদোকচরি অমসুং মালেম শীনবা থুংনা লৈরিবা য়োগ শান্নরোয়শিং অমসুং য়োগ পামজবশিং থাগৎপা ফোঙদোকচরি। য়াম্না নুংঙাইবা মালেমগী য়োগ নুমিৎ অমগীদমক ঐনা য়াইফ পাউজেল পীজরি। অদোম থাগৎচরি!

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা পীখি।

****