آندھرا پردیش کے گورنر سید عبدالنذیر جی، یہاں کے مقبول وزیر اعلیٰ، میرے انتہائی قریبی دوست چندرابابو نائیڈو گارو، مرکزی کابینہ کے میرے ساتھی، کے. رام موہن نائیڈو جی، پرتاپ راؤ جادھو جی، چندر شیکھر جی، بھوپتی راجو سرینواس ورما جی، ریاستی نائب وزیر اعلیٰ پون کلیان گارو، دیگر معززین اور میرے پیارے بھائیوں اور بہنوں! آپ سب کو نمسکار!

ملک اور دنیا بھر کے تمام لوگوں کو عالمی یوگا دن کی بہت بہت مبارکباد۔ آج 11ویں بار پوری دنیا 21 جون کو ایک ساتھ یوگا کر رہی ہے۔ یوگا کا سیدھا سادہ مطلب ہے جڑنا اور یہ مشاہدہ  کرنا خوشی کی بات ہے کہ یوگا نے پوری دنیا کو کس طرح جوڑا ہے۔ جب میں پچھلے ایک دہائی میں یوگا کے سفر کو دیکھتا ہوں تو بہت کچھ یاد آتا ہے۔ وہ دن جب اقوام متحدہ میں بھارت نے تجویز پیش کی کہ 21 جون کو عالمی یوگا ڈے کے طور پر تسلیم کیا جائے اور تب کم سے کم وقت میں دنیا کے 175 ممالک ہماری اس تجویز کے ساتھ کھڑے ہوئے۔ آج کی دنیا میں ایسی یکجہتی، ایسی حمایت کوئی معمولی واقعہ نہیں ہے۔ یہ صرف ایک تجویز کی حمایت نہیں تھی، یہ انسانیت کے بھلے کے لیے دنیا کی اجتماعی کوشش تھی۔ آج 11 سال بعد، ہم دیکھ رہے ہیں کہ یوگا دنیا بھر میں کروڑوں لوگوں کے طرز زندگی کا حصہ بن چکا ہے۔ مجھے فخر ہوتا ہے جب میں دیکھتا ہوں کہ ہمارے معذور ساتھی بریل میں یوگا شاستر پڑھتے ہیں، سائنسدان خلاء میں یوگا کرتے ہیں، گاؤں گاؤں میں نوجوان ساتھی یوگا اولمپیاڈ میں حصہ لیتے ہیں۔ یہاں سامنے دیکھیں، یہ نیوی کے تمام جہازوں میں بھی اس وقت بہت شاندار یوگا پروگرام چل رہا ہے۔ چاہے سڈنی اوپیرا ہاؤس کی سیڑھیاں ہوں، یا ایورسٹ کی چوٹی ہو، یا پھر سمندر کا پھیلاؤ ہو، ہر جگہ سے ایک ہی پیغام آتا ہے— یوگا سبھی کا ہے، اور سبھی کے لیے ہے۔ یوگا سب کے لیے ہے، سرحدوں سے ماورا، پس منظر سے ماورا، عمر یا صلاحیت سے ماورا۔

ساتھیو،

آج مجھے اس بات کی خوشی ہے کہ ہم سب وشاکھاپٹنم میں ہیں۔ یہ شہر فطرت اور ترقی، دونوں کا سنگم ہے۔ یہاں کے لوگوں نے اتنا اچھا اہتمام کیا ہے۔ میں چندرابابو نائیڈو گارو اور پون کلیان گارو کو مبارکباد دیتا ہوں، آپ کی قیادت میں آندھرا پردیش نے یوگاندھرا مہم کا ایک شاندار اقدام کیا۔ میں خاص طور پر نارا لوکیش گارو کی کوششوں کی بھی خاص تعریف کرنا چاہتا ہوں۔ یوگا کا سماجی جشن کیسے منانا چاہیے، معاشرے کے ہر طبقے کو کیسے جوڑنا چاہیے، یہ انہوں نے پچھلے ڈیڑھ ماہ کی اس یوگاندھرا مہم میں کر کے دکھایا ہے، اور اس کے لیے بھائی لوکیش بہت بہت مبارکباد کے مستحق ہیں۔ اور میں تو ہم وطنوں سے بھی کہوں گا کہ ایسے مواقع کو آپ کس طرح سماجی سطح پر گہرائی سے لے جا سکتے ہیں، بھائی لوکیش نے جو کام کیا ہے، اسے ایک نمونے کے طور پر دیکھنا چاہیے۔

ساتھیو،

مجھے بتایا گیا ہے کہ یوگاندھرا مہم سے دو کروڑ سے زیادہ لوگ جڑے ہیں۔ عوامی شرکت کا یہی وہ جذبہ ہے، جو ترقی یافتہ بھارت کی بنیادی اساس ہے۔ جب عوام خود آگے بڑھ کر کسی مہم کو تھام لیتی ہے، کسی ہدف کو اپنا لیتی ہے، تو اس ہدف کے حصول سے ہمیں کوئی روک نہیں پاتا۔ عوام کی یہ نیک خواہش اور آپ کے یہاں اس اہتمام میں ہر طرف نظر آ رہے ہیں۔

ساتھیو ،

اس سال کے عالمی یوگا ڈے کا تھیم ہے ‘یوگا فار ون ارتھ، ون ہیلتھ’۔ یہ تھیم ایک گہری حقیقت کی عکاسی کرتا ہے۔ زمین پر ہر وجود کی صحت آپس میں جڑی ہوئی ہے۔ انسانی بہبود اس مٹی کی صحت پر منحصر ہے جو ہمارا کھانا اگاتی ہے، ان دریاؤں پر جو ہمیں پانی دیتے ہیں، ان جانوروں کی صحت پر جو ہمارے ماحولیاتی نظام کا حصہ ہیں، ان پودوں پر جو ہمیں غذا دیتے ہیں۔ یوگا ہمیں اس باہمی ربط سے آگاہ کرتا ہے۔ یوگا ہمیں دنیا کے ساتھ یکجہتی کی طرف لے جاتا ہے۔ یہ ہمیں سکھاتا ہے کہ ہم الگ تھلگ افراد نہیں ہیں بلکہ فطرت کا حصہ ہیں۔ ابتدا میں ہم اپنی صحت اور تندرستی کا خیال رکھنا سیکھتے ہیں۔ آہستہ آہستہ، ہماری فکر اور توجہ ہمارے ماحول، معاشرے اور سیارے تک پھیلتی ہے۔ یوگا ایک عظیم ذاتی نظم و ضبط ہے۔ اسی وقت، یہ ایک نظام ہے جو ہمیں ‘میں’ سے ‘ہم’ کی طرف لے جاتا ہے۔

ساتھیو،

‘میں سے ہم’ کا یہ جذبہ ہی بھارت کی روح کا خلاصہ ہے۔ جب فرد اپنے مفاد سے بلند ہو کر معاشرے کے بارے میں سوچتا ہے، تب ہی پوری انسانیت کا مفاد ہوتا ہے۔ بھارت کی ثقافت ہمیں سکھاتی ہے، سروے بھونتو سکھینہ، یعنی سب کا بھلا ہی میرا فرض ہے۔ ‘میں’ سے ‘ہم’ کا یہ سفر ہی خدمت، ایثار اور ہم آہنگی کی بنیاد ہے۔ یہی سوچ سماجی ہم آہنگی کو فروغ دیتی ہے۔

ساتھیو،

بدقسمتی سے آج پوری دنیا کسی نہ کسی تناؤ سے گزر رہی ہے۔ کئی علاقوں میں بدامنی اور عدم استحکام بڑھ رہا ہے۔ ایسی صورتحال میں یوگا ہمیں امن کی سمت دیتا ہے۔ یوگا وہ توقف کا بٹن ہے جس کی انسانیت کو سانس لینے، توازن قائم کرنے اور مکمل ہونے کے لیے ضرورت ہے۔

میں عالمی برادری سے آج کے اس اہم موقع پر ایک گزارش کروں گا۔ آئیے اس یوگا ڈے کو یوگا فار ہیومینٹی 2.0 کا آغاز بنائیں، جہاں اندرونی سکون عالمی پالیسی بن جائے۔ جہاں یوگا صرف ذاتی عمل نہ رہے، بلکہ عالمی شراکت کا ذریعہ بنے۔ جہاں ہر ملک، ہر معاشرہ، یوگا کو طرز زندگی اور عوامی پالیسی کا حصہ بنائے۔ جہاں ہم مل کر ایک پرامن، متوازن اور پائیدار دنیا کو رفتار دیں۔ جہاں یوگا، دنیا کو تصادم سے تعاون، اور تناؤ سے حل کی طرف لے جائے۔

ساتھیو،

دنیا میں یوگا کے فروغ کے لیے بھارت، یوگا کی سائنس کو جدید تحقیق سے مزید مضبوط کر رہا ہے۔ ملک کے بڑے بڑے طبی ادارے یوگا پر تحقیق میں مصروف ہیں۔ یوگا کی سائنسی حیثیت کو جدید طبی نظام میں جگہ ملے، یہ ہماری کوشش ہے۔ ہم ملک کے طبی اور تحقیقی اداروں میں، یوگا کے شعبے میں شواہد پر مبنی تھراپی کو بھی فروغ دے رہے ہیں۔ اس سمت میں دہلی کے ایمس نے بھی بہت اچھا کام کیا ہے۔ ایمس کی تحقیق سے سامنے آیا ہے کہ یوگا کی دل کے امراض اور دماغی عوارض کے علاج، خواتین کی صحت اور ذہنی بہبود میں اہم کردار ہے۔

ساتھیو،

نیشنل آیوش مشن کے ذریعے بھی یوگا اور تندرستی کے منتر کو آگے بڑھایا جا رہا ہے۔ ڈیجیٹل ٹیکنالوجی نے بھی اس میں بڑا کردار ادا کیا ہے۔ یوگا پورٹل اور یوگاندرا پورٹل کے ذریعے، ملک بھر میں 10 لاکھ سے زیادہ پروگراموں کا اندراج ہوا ہے۔ آج ملک کے کونے کونے میں اتنے سارے مقامات پر پروگرام ہو رہے ہیں۔ یہ بھی دکھاتا ہے کہ یوگا کا دائرہ کتنا بڑھ رہا ہے۔

ساتھیو،

ہم سب جانتے ہیں، آج ہیل ان انڈیا کا منتر بھی دنیا میں کافی مقبول ہو رہا ہے۔ بھارت دنیا کے لیے شفا یابی کا بہترین مقام بن رہا ہے۔ یوگا کا اس میں بھی بڑا کردار ہے۔ مجھے خوشی ہے کہ یوگا کے لیے کامن یوگا پروٹوکول بنایا گیا ہے۔ یوگا سرٹیفیکیشن بورڈ کے ساڑھے چھ لاکھ سے زیادہ تربیت یافتہ رضاکار، تقریباً 130 تسلیم شدہ ادارے اور میڈیکل کالجوں میں 10 روزہ یوگا ماڈیول، ایسے متعدد اقدامات، ایک جامع ماحولیاتی نظام تیار کر رہے ہیں۔ ملک بھر میں ہمارے جو آیوشمان آروگیہ مندر ہیں، وہاں تربیت یافتہ یوگا اساتذہ تعینات کیے جا رہے ہیں۔ دنیا بھر کے لوگوں کو بھارت کے اس تندرستی کے ماحولیاتی نظام کا فائدہ ملے، اس کے لیے خصوصی ای-آیوش ویزا دیے جا رہے ہیں۔

ساتھیو،

آج یوگا ڈے پر میں موٹاپے کی طرف بھی ایک بار پھر سب کی توجہ مبذول کرانا چاہوں گا۔ بڑھتا ہوا موٹاپا پوری دنیا کے لیے ایک بڑا چیلنج ہے۔ میں نے من کی بات پروگرام میں بھی، اس پر تفصیل سے بات کی تھی۔ اس کے لیے اپنی خوراک میں 10 فیصد تیل کم کرنے کا چیلنج بھی شروع کیا تھا۔ میں ایک بار پھر ہم وطنوں سے، دنیا بھر کے لوگوں سے اس چیلنج سے جڑنے کی اپیل کرتا ہوں۔ اپنی خوراک میں کیسے ہم کم از کم 10 فیصد تیل کی کھپت کم کریں، اس کے لیے شعور پھیلانا ہے۔ تیل کی کھپت کم کرنا، غیر صحت مند خوراک سے بچنا اور یوگا کرنا، یہ بہتر فٹنس کی جڑی بوٹی ہے۔

ساتھیو،

آئیے، ہم سب مل کر یوگا کو ایک عوامی تحریک بنائیں۔ ایسی تحریک، جو دنیا کو امن، صحت اور ہم آہنگی کی طرف لے جائے۔ جہاں ہر فرد دن کا آغاز یوگا سے کرے اور زندگی میں توازن پائے۔ جہاں ہر معاشرہ یوگا سے جڑے اور تناؤ سے آزاد ہو۔ جہاں یوگا انسانیت کو ایک دھاگے میں پرونے کا ذریعہ بنے۔ اور جہاں ‘یوگا فار ون ارتھ، ون ہیلتھ’ ایک عالمی عزم بن جائے۔ ایک بار پھر آندھرا کی قیادت کو مبارکباد دیتے ہوئے، آندھرا کے لوگوں کو مبارکباد دیتے ہوئے اور دنیا بھر میں پھیلے ہوئے یوگا پریکٹیشنرز اور یوگا کے شائقین کو مبارکباد دیتے ہوئے، آپ سب کو عالمی یوگا ڈے کی میں بہت بہت مبارکباد دیتا ہوں۔ شکریہ!

************

ش ح ۔   م  د ۔  م  ص

(U : 1966 )