ନିକଟରେ ଅହମ୍ମଦାବାଦରେ ଏୟାର ଇଣ୍ଡିଆର ଏକ ବିମାନ ସହିତ ଘଟିଥିବା ଦୁର୍ଭାଗ୍ୟଜନକ ଘଟଣାକୁ ଦୃଷ୍ଟିରେ ରଖି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ବିମାନ ସେବା କ୍ଷେତ୍ରର ସୁରକ୍ଷା, ଯାତ୍ରୀ ସୁବିଧା ଏବଂ ବିମାନ ସେବାର କାର୍ଯ୍ୟଦକ୍ଷତାର ଏକ ବ୍ୟାପକ ସମୀକ୍ଷା କରିଛି।

କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଶ୍ରୀ ରାମ ମୋହନ ନାଇଡୁ କିଞ୍ଜାରପୁ ଦେଶର ସମସ୍ତ ବିମାନବନ୍ଦର ନିର୍ଦ୍ଦେଶକମାନଙ୍କ ସହିତ ଭିଡିଓ କନଫରେନ୍ସିଂ ମାଧ୍ୟମରେ ଏକ ବୈଠକ କରି ଭୂମିସ୍ତରୀୟ ପ୍ରସ୍ତୁତି ଏବଂ ଯାତ୍ରୀ ସହାୟତା ବ୍ୟବସ୍ଥାର ସମୀକ୍ଷା କରିଛନ୍ତି । ଦୁର୍ଘଟଣା ପରବର୍ତ୍ତୀ ଯାଞ୍ଚ, ପାଣିପାଗ ପରିବର୍ତ୍ତନ, ଭୂରାଜନୈତିକ ଉତ୍ତେଜନା ଯୋଗୁଁ କିଛି ନିର୍ଦ୍ଦିଷ୍ଟ ଆକାଶପଥ ବନ୍ଦ ହେବା ଇତ୍ୟାଦି କାରଣରୁ ହେଉଥିବା ବିମାନ ଯାତ୍ରାର ପୁନଃନିର୍ଦ୍ଧାରଣକୁ ଦୃଷ୍ଟିରେ ରଖି ଏହି ସମୀକ୍ଷା କରାଯାଇଥିଲା । ବୈଠକ ପରେ ନିମ୍ନଲିଖିତ ନିର୍ଦ୍ଦେଶ ଜାରି କରାଯାଇଥିଲା ..

• ଯାତ୍ରୀମାନଙ୍କ ସମସ୍ୟାର ତୁରନ୍ତ ଓ ଠିକ ସ୍ଥାନରେ ସମାଧାନ ସୁନିଶ୍ଚିତ କରିବା ପାଇଁ ବିମାନସେବା କମ୍ପାନୀଗୁଡ଼ିକ ସହିତ ନିରବଚ୍ଛିନ୍ନ ଯୋଗାଯୋଗ ଉପରେ ଗୁରୁତ୍ବ ଦିଆଯିବ।

• ଟର୍ମିନାଲଗୁଡ଼ିକରେ, ବିଶେଷକରି ଉଡ଼ାଣ ବିଳମ୍ବ କିମ୍ବା ଭିଡ଼ ସମୟରେ, ଖାଦ୍ୟ, ପାନୀୟ ଜଳ ଏବଂ ପର୍ଯ୍ୟାପ୍ତ ଆସନ ସୁବିଧାର ଉପଲବ୍ଧତା ସୁନିଶ୍ଚିତ କରାଯିବ।

• ଯାତ୍ରୀଙ୍କ ଅଭିଯୋଗର ସକ୍ରିୟ ସମାଧାନ ପାଇଁ ପ୍ରମୁଖ ସ୍ଥାନଗୁଡ଼ିକରେ ପର୍ଯ୍ୟାପ୍ତ କର୍ମଚାରୀ ନିୟୋଜିତ କରାଯିବ।

•ଚାଳନାଗତ ସମସ୍ୟାର ସମ୍ମୁଖୀନ ହେଉଥିବା ବିମାନ କମ୍ପାନୀଗୁଡ଼ିକୁ ଗେଟ ପୁନଃନିଯୁକ୍ତି ଏବଂ ଲଜିଷ୍ଟିକ୍ ସହାୟତା ସମେତ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ ବିମାନବନ୍ଦର ନିର୍ଦ୍ଦେଶକମାନଙ୍କୁ କୁହାଯାଇଛି।

• ଏକ ନିରାପଦ ଏବଂ ସୁରକ୍ଷିତ ବିମାନବନ୍ଦର ପରିବେଶ ବଜାୟ ରଖିବା ପାଇଁ, ପକ୍ଷୀ ଏବଂ ବୁଲାପଶୁମାନଙ୍କୁ ରୋକିବା ସମେତ ବନ୍ୟପ୍ରାଣୀ ବିପଦ ପରିଚାଳନାକୁ ସୁଦୃଢ଼ କରିବାକୁ ବିମାନବନ୍ଦର ନିର୍ଦ୍ଦେଶକମାନଙ୍କୁ ନିର୍ଦ୍ଦେଶ ଦିଆଯାଇଛି ।

ବେସାମରିକ ବିମାନ ଚଳାଚଳ ମନ୍ତ୍ରୀ ଏୟାର ଇଣ୍ଡିଆର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକଙ୍କ ସହ ଏକ ଉଚ୍ଚସ୍ତରୀୟ ବୈଠକ କରିଥିଲେ। ବୈଠକରେ ତିନୋଟି ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋଚନା ହୋଇଥିଲା । ସେଗୁଡ଼ିକ ହେଉଛି ଚାଳନା ନିରନ୍ତରତା ବଜାୟ ରଖିବା, ଜନସାଧାରଣଙ୍କ ସହିତ ସ୍ୱଚ୍ଛ ଏବଂ ଦାୟିତ୍ୱପୂର୍ଣ୍ଣ ଯୋଗାଯୋଗ ସୁନିଶ୍ଚିତ କରିବା ଏବଂ ଯାତ୍ରୀ ସୁରକ୍ଷା ଏବଂ ସୁବିଧା ସୁନିଶ୍ଚିତ କରିବା ।

ଏହି ବୈଠକରେ ଉଲ୍ଲେଖ କରାଯାଇଥିଲା ଯେ ମଧ୍ୟପ୍ରାଚ୍ୟର ପରିସ୍ଥିତି, ବର୍ଦ୍ଧିତ ସୁରକ୍ଷା ଯାଞ୍ଚ ଏବଂ ୟୁରୋପରେ ରାତି ଉଡ଼ାଣ ପ୍ରତିବନ୍ଧକ ଯୋଗୁଁ ଏୟାର ଇଣ୍ଡିଆ ବିମାନ ଉପଲବ୍ଧତା ଅଭାବର ସମ୍ମୁଖୀନ ହେଉଛି। ଫଳସ୍ୱରୂପ, ସାମୟିକ ଭାବରେ ବିମାନ ଚାଳନା ହ୍ରାସ କରାଯିବ, ଫ୍ଲାଇଟ ଗୁଡ଼ିକରେ ପରିବର୍ତ୍ତନ କରାଯିବ ଏବଂ ଏସବୁ ପରିବର୍ତ୍ତନଗୁଡ଼ିକ ଗଣମାଧ୍ୟମ ମାଧ୍ୟମରେ ଘୋଷଣା କରାଯିବ। ପ୍ରଭାବିତ ଯାତ୍ରୀମାନଙ୍କ ଟିକେଟ୍ ପୁଣି ବୁକ୍ କରାଯିବ କିମ୍ବା ପୂର୍ଣ୍ଣ ଅର୍ଥ ଫେରସ୍ତ ଦିଆଯିବ। ଏୟାର ଇଣ୍ଡିଆକୁ ବିମାନବନ୍ଦରରେ ଏହାର ଭୂମି ସ୍ତରୀୟ ସମନ୍ୱୟକୁ ମଜବୁତ କରିବା, ବାତିଲ/ବିଳମ୍ବ ସମ୍ପର୍କରେ ଯାତ୍ରୀଙ୍କ ସହିତ ଯୋଗାଯୋଗ ଉନ୍ନତ କରିବା ଏବଂ ଗ୍ରାହକ ସେବା ଦଳଗୁଡ଼ିକ ପ୍ରତିକ୍ରିୟାଶୀଳ ଏବଂ ସହାନୁଭୂତି ଏବଂ ସ୍ପଷ୍ଟତାର ସହିତ ବର୍ଦ୍ଧିତ ଯାତ୍ରୀଙ୍କ ଚିନ୍ତାକୁ ପରିଚାଳନା କରିବାକୁ ପ୍ରସ୍ତୁତ ରହିବାକୁ ଏହି ଅବସରରେ ଅନୁରୋଧ କରାଯାଇଥିଲା। ସ୍ପାଇସ୍ ଜେଟ୍, ଇଣ୍ଡିଗୋ ଏବଂ ଆକାଶର ବରିଷ୍ଠ ପରିଚାଳନା ସହିତ ମଧ୍ୟ ୧୮ ଏବଂ ୧୯ ଜୁନ୍ ବୈଠକ ଅନୁଷ୍ଠିତ ହୋଇଥିଲା। ମାନ୍ୟବର ମନ୍ତ୍ରୀ ଫ୍ଲିଟ୍ କାର୍ଯ୍ୟଦକ୍ଷତା, ସୁରକ୍ଷା ଯାଞ୍ଚ, ଯାତ୍ରୀ ଅଭିଜ୍ଞତା ଏବଂ ସୁବିଧା ଏବଂ ବିମାନ ଯୋଗାଯୋଗ ରଣନୀତି ସମୀକ୍ଷା କରିଥିଲେ। ଉତ୍ତମ ତଦାରଖ ଏବଂ ସମନ୍ୱୟ ପାଇଁ ବିମାନ କମ୍ପାନୀଗୁଡ଼ିକ ସହିତ କାର୍ଯ୍ୟକ୍ଷମ ବିଷୟଗୁଡ଼ିକରେ ସାମୟିକ ସମୀକ୍ଷା ପ୍ରକ୍ରିୟାକୁ ଆନୁଷ୍ଠାନିକ କରାଯିବ ବୋଲି ମଧ୍ୟ ନିଷ୍ପତ୍ତି ନିଆଯାଇଥିଲା।

ଏଏଆଇବି ତଦନ୍ତ ସମ୍ପର୍କରେ ସର୍ବଶେଷ ସୂଚନା

ବିମାନ ଦୁର୍ଘଟଣା ତଦନ୍ତ ବ୍ୟୁରୋ (ଏଏଆଇବି) ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାର ଆନୁଷ୍ଠାନିକ ତଦନ୍ତ ଆରମ୍ଭ କରିଛି।

ଏଏଆଇବିର ଏକ ବିଭିନ୍ନ ବିଷୟରେ ବିଶେଷଜ୍ଞ ଦଳ ୧୨ ଜୁନ୍ ୨୦୨୫ରୁ ତଦନ୍ତ ଆରମ୍ଭ କରିଛି। ଏଏଆଇବିର ମହାନିର୍ଦ୍ଦେଶକଙ୍କ ଦ୍ୱାରା ତଦନ୍ତ ନିର୍ଦ୍ଦେଶ ଦିଆଯାଇଥିଲା। ଆଇସିଏଓ ପ୍ରୋଟୋକଲ୍ ଅନୁଯାୟୀ ଏମଟିଏସବି ଏବଂ ଓଇଏମ ଦଳ ଏଏଆଇବିକୁ ସହାୟତା କରିବା ପାଇଁ ପହଞ୍ଚିଛନ୍ତି।

୧୩ ଜୁନ୍ ୨୦୨୫ରେ ଦୁର୍ଘଟଣାସ୍ଥଳରୁ ଡିଜିଟାଲ୍ ଫ୍ଲାଇଟ୍ ଡାଟା ରେକର୍ଡର୍ ଏବଂ କକପିଟ୍ ଭଏସ୍ ରେକର୍ଡର୍ (ସିଭିଆର) ଉଦ୍ଧାର କରାଯାଇଛି ଏବଂ ୧୬ ଜୁନ୍ ରେ ଦ୍ୱିତୀୟ ସେଟ୍ ମିଳିଛି। ବିମାନର ଏହି ମଡେଲ୍ରେ ଦୁଇଟି ବ୍ଲାକବକ୍ସ ସେଟ୍ ଥିଲା।

ସ୍ଥାନୀୟ କର୍ତ୍ତୃପକ୍ଷ ଏବଂ ଏଜେନ୍ସିଗୁଡ଼ିକଙ୍କଠାରୁ ସମସ୍ତ ଆବଶ୍ୟକ ସହାୟତା ସହିତ ଏଏଆଇବି ତଦନ୍ତ ଭଲଭାବରେ ଅଗ୍ରଗତି କରୁଛି। ସ୍ଥାନ ଡକ୍ୟୁମେଣ୍ଟେସନ୍ ଏବଂ ପ୍ରମାଣ ସଂଗ୍ରହ ସମେତ ପ୍ରମୁଖ ଉଦ୍ଧାର କାର୍ଯ୍ୟ ସମାପ୍ତ ହୋଇଛି ଏବଂ ବର୍ତ୍ତମାନ ଅଧିକ ବିଶ୍ଳେଷଣ ଚାଲିଛି।

ମନ୍ତ୍ରଣାଳୟ ଚାଲୁଥିବା ତଦନ୍ତରେ ସମ୍ପୂର୍ଣ୍ଣ ସ୍ୱଚ୍ଛତା ପାଇଁ ପ୍ରତିବଦ୍ଧ ଏବଂ ଯାତ୍ରୀ ସୁରକ୍ଷା ଏବଂ ଆରାମର ସର୍ବୋଚ୍ଚ ମାନଦଣ୍ଡର ବୃହତର ସ୍ୱାର୍ଥରେ ସମସ୍ତ ବାଧ୍ୟତାମୂଳକ ପ୍ରୋଟୋକଲ୍ ଏବଂ ମାନଦଣ୍ଡ ପାଳନ କରିବ।

କେନ୍ଦ୍ରମନ୍ତ୍ରୀ ଯାତ୍ରୀଙ୍କ ଆତ୍ମବିଶ୍ୱାସ ବଜାୟ ରଖିବା ଏବଂ କାର୍ଯ୍ୟକ୍ଷମ ସ୍ଥିରତା ଆଣିବା ପାଇଁ ଏକ ସମନ୍ୱିତ ଏବଂ ପ୍ରତିକ୍ରିୟାଶୀଳ ଦଳ ଭାବରେ ଏକାଠି କାମ କରିବାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଛନ୍ତି, ଯାହା ବର୍ଷ ବର୍ଷ ଧରି ଭାରତୀୟ ବିମାନ ଚଳାଚଳର ମୂଳଦୁଆ ହୋଇଛି।

କିଛି ଗଣମାଧ୍ୟମରେ ଖବର ପ୍ରକାଶ ପାଇଛି ଯେ ଏଆଇ-୧୭୧ ବିମାନରୁ ସିଭିଆର/ଡିଏଫଡିଆରକୁ ପୁନରୁଦ୍ଧାର ଏବଂ ବିଶ୍ଳେଷଣ ପାଇଁ ବିଦେଶ ପଠାଯାଉଛି। ତେବେ ଏଠାରେ ସ୍ପଷ୍ଟ କରାଯାଉଛି ଯେ ସମସ୍ତ ବୈଷୟିକ, ସୁରକ୍ଷା ଏବଂ ସୁରକ୍ଷା ବିଚାରର ଉପଯୁକ୍ତ ମୂଲ୍ୟାଙ୍କନ ପରେ ଏଏଆଇବି ଦ୍ୱାରା ଫ୍ଲାଇଟ୍ ରେକର୍ଡରଗୁଡ଼ିକୁ ଡିକୋଡ୍ କରିବାର ସ୍ଥାନ ସମ୍ପର୍କରେ ନିଷ୍ପତ୍ତି ନିଆଯିବ। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ସମସ୍ତ ଅଂଶୀଦାରଙ୍କୁ ଏପରି ସମ୍ବେଦନଶୀଳ ବିଷୟ ଉପରେ କୌଣସି କଳ୍ପନାଜଳ୍ପନା କରିବାରୁ ନିବୃତ୍ତ ରହିବାକୁ ଏବଂ ତଦନ୍ତ ପ୍ରକ୍ରିୟାକୁ ଗମ୍ଭୀରତା ଏବଂ ପେସାଦାର ମନୋଭାବ ସହିତ ଆଗକୁ ବଢ଼ିବାକୁ ଅନୁମତି ଦେବାକୁ ଅନୁରୋଧ କରୁଛି।

ବେସାମରିକ ବିମାନ ଚଳାଚଳର ସମସ୍ତ ଦିଗରେ ସୁରକ୍ଷାର ସର୍ବୋଚ୍ଚ ମାନଦଣ୍ଡ ସୁନିଶ୍ଚିତ କରିବା ପାଇଁ ସରକାର ପ୍ରତିବଦ୍ଧ। ଯାତ୍ରୀ ସୁରକ୍ଷା ଏବଂ ସୁବିଧା ହେଉଛି ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ସର୍ବୋଚ୍ଚ ପ୍ରାଥମିକତା।

TKM