સાયપ્રસના રાષ્ટ્રપતિ, મહામહિમ શ્રી નિકોસ ક્રિસ્ટોડોલિડ્સના આમંત્રણ પર, પ્રધાનમંત્રી શ્રી નરેન્દ્ર મોદી 15-16 જૂન, 2025ના રોજ સાયપ્રસની સત્તાવાર મુલાકાત લેશે. બે દાયકાથી વધુ સમયમાં ભારતીય પ્રધાનમંત્રીની આ સાયપ્રસની પ્રથમ મુલાકાત હશે. નિકોસિયામાં, પ્રધાનમંત્રી રાષ્ટ્રપતિ ક્રિસ્ટોડોલિડ્સ સાથે વાતચીત કરશે અને લિમાસોલમાં વ્યાપારી નેતાઓને સંબોધિત કરશે. આ મુલાકાત દ્વિપક્ષીય સંબંધોને વધુ ગાઢ બનાવવા અને ભૂમધ્ય ક્ષેત્ર અને યુરોપિયન યુનિયન સાથે ભારતના જોડાણને મજબૂત બનાવવા માટે બંને દેશોની સહિયારી પ્રતિબદ્ધતાની પુનઃપુષ્ટિ કરશે.

તેમની મુલાકાતના બીજા તબક્કામાં, કેનેડાના પ્રધાનમંત્રી, મહામહિમ શ્રી માર્ક કાર્નીના આમંત્રણ પર, પ્રધાનમંત્રી 16-17 જૂને G-7 સમિટમાં ભાગ લેવા માટે કેનેડાના કનાનાસ્કિસ જશે. G-7 સમિટમાં પ્રધાનમંત્રીની આ સતત છઠ્ઠી ભાગીદારી હશે. સમિટમાં, પ્રધાનમંત્રી G-7 દેશોના નેતાઓ, અન્ય આમંત્રિત દેશો અને આંતરરાષ્ટ્રીય સંગઠનોના વડાઓ સાથે ઊર્જા સુરક્ષા, ટેકનોલોજી અને નવીનતા, ખાસ કરીને AI-ઊર્જા જોડાણ અને ક્વોન્ટમ-સંબંધિત મુદ્દાઓ સહિત મહત્વપૂર્ણ વૈશ્વિક મુદ્દાઓ પર વિચારોનું આદાન-પ્રદાન કરશે. પ્રધાનમંત્રી સમિટની સાથે અનેક દ્વિપક્ષીય બેઠકો પણ યોજશે.

તેમના પ્રવાસના અંતિમ તબક્કામાં, ક્રોએશિયાના પ્રધાનમંત્રી, મહામહિમ શ્રી આન્દ્રેજ પ્લેન્કોવિકના આમંત્રણ પર, પ્રધાનમંત્રી 18 જૂન 2025ના રોજ ક્રોએશિયાની સત્તાવાર મુલાકાત લેશે. દ્વિપક્ષીય સંબંધોમાં એક મહત્વપૂર્ણ સીમાચિહ્નરૂપ, ભારતીય પ્રધાનમંત્રી દ્વારા ક્રોએશિયાની આ પ્રથમ મુલાકાત હશે. શ્રી મોદી પ્રધાનમંત્રી પ્લેન્કોવિક સાથે દ્વિપક્ષીય ચર્ચા કરશે અને ક્રોએશિયાના રાષ્ટ્રપતિ, મહામહિમ શ્રી ઝોરાન મિલાનોવિકને મળશે. ક્રોએશિયાની મુલાકાત યુરોપિયન યુનિયનમાં ભાગીદારો સાથે તેના જોડાણને વધુ મજબૂત બનાવવાની ભારતની પ્રતિબદ્ધતાને પણ રેખાંકિત કરશે.

AP/IJ/GP/JD