প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা করাকত, বিহারদা লুপা করোর ৪৮,৫২০ হেনবগী চাওখৎ থৌরাংগী প্রোজেক্ত কয়াগী উরেপ উয়ুং তমখ্রে, অমদি লৈবাক্কী মফমদা কত্থোকখ্রে
পাকিস্তান্দা ফমদুনা ঐখোয়গী ইচে ইচলশিংগী সিন্দুর মাঙহন তাকহল্লিবশিংবু ঐখোয়গী লান্মীনা মখোয়গী লোৎফমশিং মাঙহন তাকহনখ্রে: প্রধান মন্ত্রী
ভারতকী মমোমশিংগী সিন্দুরগী মতিক পাকিস্তান্না লোয়ননা মালেম অসিনা উখ্রে!: প্রধান মন্ত্রী
মাওইস্ত হিংসা মপুং ফানা লোইগদবা নুমিৎ অদু কুইদ্রে, ইং-তপ্পা, ঙাকশেল, মহৈ মশিং অমদি চাওখৎপনা খুঙ্গং খুদিং অপনবা অমত্তা লৈতনা য়ৌরগনি: প্রধান মন্ত্রী
বিহার মীয়াম্না মতম শাংনদগী তান্দুনা লাকপা পত্না এয়রপোর্তকী তর্মিনেল মতমগা চুননা শেমগৎনবা ৱাফম হৌজিক্তি ফংবা ঙম্লে: প্রধান মন্ত্রী
ঐখোয়গী লৈঙাক্না মখন বোর্দ লাউথোকখি, বিহারগী মখনদা জি.আই. তেগ ফংহন্দুনা মখন পুথোকপা লৌমীশিংদা চাউনা কান্নহল্লে: প্রধান মন্ত্রী
Posted On:
30 MAY 2025 1:11PM by PIB Imphal
প্রধান মন্ত্রী শ্রী নরেন্দ্র মোদীনা ঙসি করাকত, বিহারদা লুপা করোর ৪৮,৫২০ হেনবগী চাওখৎ থৌরাংগী প্রোজেক্ত কয়াগী উরেপ উয়ুং তমখ্রে, অমদি লৈবাক্কী মফমদা কত্থোকখ্রে। তিল্লিবা মীয়ামগী মফমদা ৱা ঙাংলদুনা, মহাক্না শেংলবা লমদম অসিদা বিহারগী চাওখৎ খোঙজেল য়াংখৎহন্নবা খুদোংচাবা ফংলি হায়খি অমদি লুপা করোর ৪৮,০০০ হেনবগী প্রোজেক্তশিং উরেপ উয়ুং তম্বা অমদি শঙ্গাবগী ৱাফম থমখি। প্রধান মন্ত্রীনা মহাকপু থৌজানবিনবগীদমক তিনখিবা য়াম্লবগী মীয়ামগী থৌজালবু শকখঙখি অমদি বিহারনা মঙোন্দা পীবিরিবা মীনুংশিগীদমক তৌবিমল খঙবা ফোঙদোক্লদুনা, মহাক্না মতম চুপ্পদা শৌগৎপিরিবা অসিবু খ্বায়দগী অৱাংবা থাক্তা ঙাক্তুনা থমগনি হায়খি। মহাক্না বিহারগী ইমা অমদি ইচে ইচলশিংগী মফমদা তৌবিমল খঙবা ফোঙদোকখি।
সাসারামগী মরুওইবা ৱাফমশিং পল্লদুনা, অমদি মমিং অসিমক্তা প্রভু রামগী মিংথোল য়াওরি হায়রদুনা, শ্রী মোদীনা খোঙফম হন্দবা হায়বা প্রভু রামগী মরা তাদুনা লৈখ্রবা ৱাখল্লোনগী মতাঙদা ৱা ঙাংহখি, অমদি ৱাশক অমবু শকখ্রবদি মদুমক ফংহনগনি হায়খি। হায়রিবা লমজিংগী হৌজিক্তি অনৌবা ভারতকী থৌরাং ওইরে হায়খি।
শ্রী মোদীনা হন্দক্তা থোকখিবা পহলগামদা তেরোরিস্তকী লান্দাদা মরাল লৈজদ্রবা মীচমশিংগী পুন্সি পীখম্নখিববু নীংশিংখি। তমথিরবা লান্দা অদুগী নোংমা লৈরগা, মহাক্না বিহারদা লাকখি অমদি অকি তুংজুংলবা থৌদোক অদুবু শিন-লাংলিবা মীওইশিংগী মফমদা মখোয়না ৱাখলনা লাম্বা ফংলোইদবা চৈরাক অমা পীগনি হায়না লৈবাক্কী মফমদা ৱাশকখি। ঙসিদি, মহাক্না বিহারগী লৈমায়দা অমুক হন্না লেপ্লবা মীৎকুপ অসিদা, মহাক্না ৱাশক অদু ঙাক্লে হায়খি। “পাকিস্তান্দা ফমদুনা ঐখোয়গী ইচে ইচলশিংগী সিন্দুর মাঙহন তাকহল্লিবশিংবু ঐখোয়গী লান্মীনা মখোয়গী লোৎফমশিং মাঙহন তাকহনখ্রে,” হায়না শ্রী মোদীনা হায়খি। “ভারতকী মমোমশিংগী সিন্দুরগী মতিক পাকিস্তান্না লোয়ননা মালেম অসিনা উখ্রে,” হায়না মহাক্না মখা তারদুনা মতম অমদা পাকিস্তানী লান্মীনা ঙাক শেন্দুনা শাফনা লৈ খল্লম্বা তেরোরিস্তশিং ভারতকী লান্মীনা ফিরেপ চেৎপা থৌওং অমদা খুউ কুলহনখ্রে হায়খি। শ্রী মোদীনা পাকিস্তানগী এয়রবেজ অমদি মিলিতরী ইন্সতোলেসনশিং মিনৎ খরগী মনুংদা থুগাইখি হায়রদুনা, “মসি অনৌবা ভারত অদুনি – মতিক লৈরবা অমদি খাঙবা কনবা ভারত অমনি,” হায়খি।
বিহার অসি মহাক্কী মথৌনা মরিংজেলগীদমক খঙনবা বিবর কুৱর সিংহগী পোক্নফম লমদম্নি হায়রদুনা, প্রধান মন্ত্রীনা বিহারগী নহাশিংনা ভারত লান্মীদা অমদি বোর্দর সিক্যুরিতী ফোর্স (বি.এস.এফ.)তা য়াওদুনা লৈবাক ঙাকপদা লৌরিবা থৌদাংবু শিংথাখি। ওপরেসন সিন্দুর মনুংদা বি.এস.এফ.না উৎখিবা তোপ তোপ্পা মথৌনা অমদি নমথবা ঙমদ্রবা মরিংজেলবু শিংথারদুনা, মালেম অসিনা লম্বা লৈত্রবা মথৌনা উবা ফংখি হায়খি। ভারতকী ঙমখৈদা লৈরিবা বি.এস.এফ. পর্সনেলশিং অসি ইমা ভারতকী খ্বায়দগী মাঙজিল থানা থৌদাং পাঙথোক্তুনা ঙাকশেলগী থুগাই য়ৈখায়বা ঙমদ্রবা চুঙ্গোয় অমনি হায়না প্রধান মন্ত্রীনা ফোঙদোকখি। মহাক্না ঙমখৈদা মথৌ তৌরিঙৈদা মে ১০ দা মথৱায় কৎখ্রবা বি.এস.এফ. সব-ইন্সপেক্তর শ্রী ইমতিয়াজকী মফমদা শ্রদ্ধাঞ্জলি কৎলদুনা, বিহারগী অথৌবা মপারীশিংগী মফমদা ইকায়খুম্নবা উৎখি। ওপরেসন সিন্দুরদা ভারতনা উৎখিবা মতিক অদু তেন্দোংদগী শত্তোরকপা তেঞ্জৈ অমখক্তনি হায়না প্রধান মন্ত্রীনা বিহারগী লৈমায়দগী ফোঙদোকখি।
“ভারতনা থেংনরিবা লান্থেং অসি লৈবাক অসিগী য়েক্নবা খুদিংমক্কনি, মখোয়না ঙমখৈ ৱাংমদা লৈবা ওইসনু নৎত্রগা লৈবাক মনুংদা লৈবসু ওইসনু,” হায়রদুনা শ্রী মোদীনা চহি কয়া চঙনা মুত্থৎখ্রবা হিংশা অমদি খোঙলৌ পল্লৌবশিংনা কমদৌখি হায়বা বিহারনা উদুনা লাকখ্রবনি হায়খি। মহাক্না সাসারাম, কাইমুর, অমদি অকোয়বগী দিস্ত্রিক্তশিংদা মমাঙদা কমদৌরম্মি হায়বা নীংশিংলদুনা, মতৌ করম্না নক্সলিজম্না লমদম অসিবু মতম অমদা খুদুম চল্লদুনা মমায় খুম্বা নোংমৈ পায়বা মিলিতেন্তশিংগী অকিবনা মীয়ামগী পুন্সিদা মতম চুপ্পদা শিংনদুনা লৈরম্মি হায়খি। লৈঙাক্কী স্কীমশিং লাউথোকপা মতমদা, মখোয়না নক্সলনা শোকহল্লবা লায়েংশঙ, নৎত্রগা মোবাইল তৱার লৈরমদবা, অমদি মহৈ তম্ফমশঙশিং মৈ থাদোক্লম্বা খুঙ্গংশিংগী মীয়ামদা য়ৌবা হেক হেক ঙম্লমদেয় হায়না শ্রী মোদীনা মখা তাখি। লম্বী শেম্বগী থবক শুবা মীওইশিং তোয়না হাৎলম্মি। হায়রিবা মীওইশৎং অসিনা বাবাসাহেব অম্বেদকরগী সংবিধান্দা থাজবা অমত্তা থম্লমদে। অসিগুম্বা শিংনবা কয়া লৈরবসু, নিতিস কুমারনা চাওখৎপা পুরক্নবা থবক পায়খৎখি, অদুগা ২০১৪ গীম তুংদগী মায়কৈ অসিদা থাংজিল্লক্লিবা খোঙথাং খোঙজেল য়াঙ্খৎলকখি। মাওইস্তশিং মখোয়না তৌরুবা থবক্কী ৱায়েল ফংহনখি, অমদি নহাশিং চাওখৎপগী মহৌশাগী পুন্সিদা হঞ্জিলহল্লক্নবা থৌরাংশিং পায়খৎখি হায়না শ্রী মোদীনা ফোঙদোকখি। চহি ১১ চঙনা খোঙফম হন্দনা হোৎনরকপগী মহৈ হৌজিক্তি উবা ফংলে হায়না মহাক্না ফোঙদোকখি। ২০১৪ গী মমাঙদা দিস্ত্রিক্ত ১২৫ হেন্না নক্সলিজম্না শোকহল্লমখি, অদুবু ঙসিদি দিস্ত্রিক্ত ১৮ খক্তমক ঙায়রে। “ঐখোয়গী লৈঙাক্না লম্বী থোংখক্তা নত্তনা থবক্কী খুদোংচাবসু পীরি, অদুগা মাওইস্তকী হিংশাগী থৌওংশিং মপুং ফানা মুত্থত্তুনা, খুঙ্গং পুম্বদা অপনবা লৈতবা ইং-তপ্পা, ঙাকশেল, মহৈ মশিং, অমদি চাওখৎ থৌরাং পুরক্কদবা নুমিৎ অদু কুইদ্রে,” হায়না শ্রী মোদীনা হায়খি। ভারতনা তেরোরিজমগী মায়োক্তা থেংনরিবা লান্থেং অসি লেপ্পসু লৈতে অদুগা তপথবসু লৈতে হায়রদুনা, “করিগুম্বা তেররনা মকোক অমুক লিৎখৎলক্লবদি, ভারতনা মখোয়গী লোৎফমদগী চিংথোক্কনি অমদি মাঙহন তাকহনগনি,” হায়না শ্রী মোদীনা হায়খি।
ঙাকশেল অমদি ইং তপ্পনা চাওখৎপগী অনৌবা লম্বী য়াৎলি হায়রদুনা, নিতিস কুমারগী লুচিং মখাদা, ‘জঙ্গল রাজ’ লৈঙাক চৎখিবনা বিহারবু নুংঙাই য়াইফবগী লম্বীদা খোঙজেল য়াংখৎহল্লি হায়না প্রধান মন্ত্রীনা ফোঙদোকখি। অকায়বা হায়ৱে, মন্থরবা রেলৱে, অমদি মশিং য়ামদবা ফ্লাইত কন্নেক্তিবিতীগী মতম হৌজিক্তি মমাঙঙৈগী ওইরে। বিহারদা পত্না এয়রপোর্তখক্তমক লৈরম্মি, অদুগা ঙসিদি দরভঙ্গ এয়রপোর্তসু মথৌ তৌদুনা দিল্লী, মুম্বাই, অমদি বেঙ্গলুরুনচিংবা ময়োল্লমশিংগা দাইরেক্ত ফ্লাইত ফংহল্লি হায়রদুনা, প্রধান মন্ত্রীনা বিহারগী মীয়াম্না পত্না এয়রপোর্তকী তর্মিনেল মতমগা চুননা শেমগৎনবা মতম শাংনবগী তান্দুনা লাকপা ৱাফম হৌজিক্তি ফংহল্লে হায়খি। হৌখিবা নুমিদাংৱাইরমদা, মহাক্না পত্না এয়রপোর্তকী অনৌবা তর্মিনেল বিল্দিং শঙ্গানবা খুদোংচাবা ফংখি, মসি হৌজিক্তি পেসেঞ্জর করোর অমা হেন্দল তৌবা ঙমবগী মতিং লৈরে হায়খি। বিহতা এয়রপোর্ত্তা লুপা করোর ১,৪০০ গী শেনফম থাদরি হায়নসু মহাক্না ফোঙদোকখি।
বিহার থুংনা লেন মরি অমদি তরুক্কী লম্বীশিং শেমগৎলি হায়রদুনা, শ্রী মোদীনা পত্নাদগী বক্সার, গয়াদগী দোভি, অমদি পত্নাদগী বোধ গয়া ফাওবা শম্নহল্লিবা হায়ৱেশিং য়াওনা মরুওইবা ইনফ্রাস্ত্রকচর প্রোজেক্তশিং খোঙজেল য়াঙনা চঙশিল্লি হায়খি। খোঙজেল য়াঙনা থবক পায়খৎলিবা পত্না-অরা-সাসারাম গ্রীনফিল্দ কোরিদোরগী মতাঙদসু মহাক্না পনখি। গঙ্গা, সোন, গন্দক, অমদি কোসিনচিংবা অচৌবা তুরেলশিংগী মথক্তা শারিবা অনৌবা থোংশিংগী মরমদা পল্লদুনা, মখোয়না বিহারদা অনৌবা খুদোংচাবা অমদি ওইথোকপশিং পুরক্কনি হায়না শ্রী মোদীনা ফোঙদোকখি। হায়রিবা লুপা করোর লিশিং কয়াগী প্রোজেক্তশিং অসিনা নহা লিশিং কয়াদা থবক পীরি অমদি লমদম অসোমদা তুরিজম অমদি লল্লোন ইতিক হেনগৎহল্লি হায়না মহাক্না মখা তাখি।
বিহারগী রেলৱে ইনফ্রাস্ত্রকচরদা লাক্লিবা অওনবা অসিগী মতাঙদা পল্লদুনা, শ্রী মোদীনা বিহারদা মালেমগী থাক্কী বন্দে ভারত ত্রেন হৌদোকপা অমদি রেলৱে লাইনশিং দব্লিয়ং অমসুং ত্রিপ্লিং তৌবগী থবকশিংগী মতাঙদা ৱাফম কয়া থমখি। ছপ্রা, মুজফ্ফরপুর, অমদি কাতিহারনচিংবা মফমশিংদা থবক খোঙজেল য়াঙনা চঙশিল্লি হায়খি। সোন নগর অমদি অন্দলগী মরক্তা মল্তি-ত্রেক্কিংগী থবক পায়খৎলি হায়রদুনা, মসিনা ত্রেন চেনবগী ফীভম মশক থোক্না ফগৎহল্লগনি হায়খি। হৌজিক্তি ত্রেন ১০০ হেনবনা সাসারামদা খামদুনা লমদম অসিগী হেনগৎলক্লিবা কন্নেক্তিবিতীগী শক্তম উৎলি হায়নসু শ্রী মোদীনা ফোঙদোকখি। মতম শাংনা লৈরকপা শিংনবশিংগী পাম্বৈ পুথোকপগা লোয়ননা রেলৱে নেতৱর্ক মোদর্নাইজ তৌনবা থৌরাংসু পায়খৎলি হায়খি।
হায়রিবা চাওখৎ থৌরাংগী থবকশিং অসি হান্ননা পায়খৎলম্বা য়ারবনি, অদুবু বিহারগী রেলৱে সিস্তেম মতমগা চুনহন্নবা থৌদাং পুরম্বা মীওইশিংদুনা মরন্নাই কান্ননবগীদমক থবক লৌবগী থৌওংবু লান্না শীজিন্নরমখি, মীয়ামবু মখোয়গী ফংফম থোকপা মঙম ফংহল্লমদে হায়না প্রধান মন্ত্রীনা হায়খি। মহাক্না বিহারগী মীয়ামদা মমাঙদা ‘জঙ্গল রাজ’কী মখাদা লৈঙাক্লম্বা মীওইশিংনা পীবা লৌথুপ লৌকোয় অমদি অরানবা ৱাশকশিংদগী চেকশিন্না লৈনবা ৱাফম থমখি। মৈ য়াওদনা চাউখৎপা মপুং ফাদেো অমদি ইন্দস্ত্রী চাওখৎপা অমসুং পুন্সি নুংঙাইনা হিংবা হায়বসি পৱার সপ্লাইগী মখা পোল্লি হায়রদুনা, প্রধান মন্ত্রীনা বিহারনা হৌখিবা চহি খরসিদা মৈ পুথোকপদা অখন্নবা মীৎয়েঙ থমদুনা লাকখি হায়খি। দেকেদ অমগী মমাঙদা য়েংনবদা বিহারগী মৈ শীজিন্নবগী চাং শরুক মরি থোক্না হেনগৎলে হায়খি। লুপা করোর ৩০ থাদদুনা নবিনগরদা অচৌবা এন.তি.পি.সি. পৱার প্রোজেক্ত অমা পায়খৎলি অমদি প্রোজেক্ত অসিনা বিহারদা মৈ মেগাৱাত ১,৫০০ ফংহনগনি হায়না প্রধান মন্ত্রীনা লাউথোকখি। মহকা্না বক্সার অমদি পিরপেন্তীদা অনৌবা থর্মেল পৱার প্লান্তশিং পায়খৎপা হৌবগী মতাঙদসু ফোঙদোকখি
লৈঙাক্না তুংলমচত্তা, মরুওইনা বিহারবু গ্রীন ইনর্জীগী লমদা খুমাঙ চাওশিলহনবদা থম্লিবা মীৎয়েঙ পল্লদুনা, শ্রী মোদীনা স্তেত অসিগী রিনিউএবল ইনর্জী থৌশিলগী মনুং চন্না কজ্রাদা সোলার পার্ক অমা শাগৎলিবগী মতাঙদা ফোঙদোকখি। পি.এম.-কুসুম স্কীমগী মখাদা, লৌমীশিংদা সোলার ইনর্জীগী খুত্থাঙদা শেন্থোক লৈহন্নবা খুদোংচাবশিং ফংহল্লি, অদুগা রিনিউএবল এগ্রিকলচর ফীদরশিংনা ফার্মশিংদা মৈ ফংহন্দুনা, লৌউ-শিংউগী পোত্থোক হেনগৎহল্লি হায়খি। হোৎনরিবশিং অসিগী মহৈনা, মীয়ামগী পুন্সি মহিং ফগৎলে, অমদি নুপীশিং হেন্না শাফনা লৈরে হায়খি। মতমগা চুনবা ইনফ্রাস্ত্রকচরনা খুঙ্গং, লায়রবা, লৌমী, অমদি অপীকপা ইন্দস্ত্রীশিংদা খ্বায়দগী হেন্না চাউনা কান্নবা পী মরমদা মসিনা মখোয়বু অচৌবা লৈবাক্কী অমদি মালেমগী কৈথেলশিংগা শম্নহনবা ঙম্মি হায়না শ্রী মোদীনা ফোঙদোকখি। স্তেত অসিদা অনৌবা ইনভেস্তমেন্ত লাকপনা অনৌবা খুদোংচাবশিং শেমগৎলি, অমদি শেন্মিৎলোন চাওখৎহল্লি হায়খি। মমাঙ চহিদা পাঙথোকখিবা বিহার বিজিনেস সম্মিত্তা কম্পেনী ময়াম অমনা স্তেত অসিদা শেল থাদনবা থোক্লকখিববু নীংশিংলদুনা, শ্রী মোদীনা স্তেত অসিদা ইন্দস্ত্রী চাওখৎপনা শিন্মীশিং লংফৈ চৎপগী মথৌ তাবা হন্থহন্দুনা, মীয়ামবু ময়ুম নক্না থবক ফংবা ঙমহল্লি হায়খি। চত্থোক চৎশিনগী পাম্বৈ ফগৎলকপনা লৌমীশিংদা মখোয়গী পোত্থোকশিং হেন্না লাপ্পা মফমদা য়োনবা ঙমহন্দুনা লৌউ-শিংউ সেক্তর হেন্না মপাঙ্গল কনখৎহল্লি হায়খি।
বিহারগী লৌমীশিংগী শেন্থোক হেনগৎহন্নবা লৈঙাক্না লেপ্পা লৈতনা হোৎনরিববু শিংথারদুনা, প্রধান মন্ত্রীনা বিহারগী লৌমী লাখ ৭৫ হেনবনা পি.এম.-কিসান সম্মান নিধি স্কীমগী মখাদা শেলগী তেংবাং ফংলি হায়খি। মহাক্না মখন বোর্দ শেমখিবগী মতাঙদসু পাউদম্লদুনা, বিহারগী মখন্দা জি.আই. তেগ পীদুনা, মসিনা মখন পুথোকপা লৌমীশিংদা চাউনা কান্নবা পীরে হায়খি। চহি অসিগী বজেত্তা, বিহারদা নেস্নেল ইন্সতিত্যুৎ ফোর ফুদ প্রোসেসিং অমা লিংখৎনবা ৱাফম লাউথোকখ্রে। নুমিৎ নিনি হুম্নিগী মমাঙদা, মন্ত্রী মন্দলনা ফৌ য়াওনা খারিফ লৌরোক্কী মহৈ মরোর ১৪ গী মিনিমম সপ্পোর্ত প্রাইস (এম.এস.পি.) হেনগৎহনবদা অয়াবা পীখ্রে, অমদি ফিরেপ অসিনা লৌমীশিংগী পোত্থোক্কী মমল হেন্না চুননা ফংহন্দুনা শেন্থোক হেনগৎহল্লগনি।
ওপোজিসন্দা চৈরদুনা, প্রধান মন্ত্রীনা বিহারবু খ্বায়দগী হেন্না নমথাক তৌরম্বা মীওইশিংনা হৌজিক খুন্নাইগী অচুম্বা ৱায়েলগী অরানবা পাউথোক শন্দোক্তুনা লৈঙাক পায়নবা হোৎনরক্লি হায়খি। মখোয়গী লৈঙাক মতমদা, বিহারগী লায়রবা অমদি চাকথুং ফিথুংদ্রবা ফুরুপশিংবু পুন্সি হিংনবা লম্বী থিবদা স্তেত অসি থাদোক্তুনা চৎহল্লম্মি। “দেকেদ কয়া, বিহারগী দলিত, শোত্থহৌরবা কাঙলুপশিং, অমদি ত্রাইবেল ফুরুপশিং তঙায় ফদবা সেনিতেসন ফেসিলিতী ফাওবা ফংলমদে, হায়রদুনা প্রধান মন্ত্রীনা হায়রিবা ফুরুপশিং অসি বেঙ্কিংগী খুদোংচাবা ফংলমদা, বেঙ্কতা চঙবা ফাওবা য়াহল্লমদে, অমদি মীওই মিলিয়ন কয়ানা ময়ুম মকৈ নীংথিনা লৈতনা লেল্লম্মি হায়খি। মমাঙগী লৈঙাক্কী মখাদা বিহারগী মীয়াম্না থেংনরম্বা অৱা-অনা, অমদি অচুম্বা ৱায়েল ফংদবগী ফীভম অদুরা ওপোজিসন পার্তীশিংনা খুন্নাইগী অচুম্বা ৱায়েল হায়রিবসি হায়না মহাক্না হংখি। মসিদগী হেনবা অরানবা ৱায়েল অমত্তা লৈরম্লরোই হায়খি। প্রধান মন্ত্রীনা ওপোজিসন্না দলিত অমসি শোত্থহৌরবা কাঙলুপশিংনা থেংনরিবা অৱাবশিংগী মরমদা কৈদৌঙৈদসু থম্মোয় শেংনা খনখিদে হায়খি, অমদি মখোয়বু বিহারগী চাওখৎনবা হোৎনবগী মহুত্তা মপান লৈবাক্কী মীথুংশিং পুরক্লবা বিহারগী লায়রবশিং য়েংহনবগীদমক চৈখি। হৌজিক্তি, দলিত, চাকথুং ফিথুংদ্রবা কাঙলুপ, অমদি শোত্থহৌরবা কাঙলুপশিংনা ওপোজিসন্দগী মখোয়না তৌরুবা অরানবশিংগীদমক লাপথোরক্লি, অমদি পার্তী অসিনা খুন্নাইগী অচুম্বা ৱায়েল হায়না লাউদুনা মশাবু হিংগৎচননবা হোৎনরি হায়খি।
মখোয়গী লৈঙাক্কী মখাদা, বিহার অমদি লৈবাক অসিনা খুন্নাইগী অচুম্বা ৱায়েলগী অনৌবা য়েন্নিং অমা হুল্লক্লে হায়রদুনা, শ্রী মোদীনা লৈঙাক অসিনা মথৌ তাবা সর্ভিসশিং লায়রবশিংদা ফংহল্লে অমদি হায়রিবা কান্নবশিং অসি ফংফম থোকপা মীওইশিংদা ১০০% ফংহন্নবা থবক পায়খৎলি হায়খি। অনৌবা য়ুম করোর মরি শাখ্রে, অমদি নুপী করোর অহুমবু ‘লাখপতি দিদি’ থৌশিলগী খুত্থাঙদা মপাঙ্গল হাপ্লি। য়ুমথোং করোর ১২ হেনবদা তোতি ঈশিং শমদুনা, লৈবাক থুংনা পুন্সি মহিং ফগৎহল্লি। চহি ৭০ গী মথক্তা লৈবা অহল খুদিংমক লুপা লাখ ৫ ফাওবগী লেম্না অনা লায়েংগী খুদোংচাব ফংহল্লি হায়না শ্রী মোদীনা ফোঙদোকখি। অৱাবা মায়োক্নরিবা মীওইশিংগী ঙাক্লৌ ওইননবা থা খুদিংগী লেম্না চেঙ হৱায় ফংহল্লি। “ঐখোয়গী লৈঙাক্না লায়রবা অমদি চাকথুং ফিথুংদ্রবা মীওই খুদিংমক্কীদমক লেঙদনা লেপ্তুনা মখোয় নুংঙাই য়াইফহন্নবা অমদি ফীভম ফগৎহন্নবা হোৎনরি,” হায়না শ্রী মোদীনা ফোঙদোকখি।
প্রধান মন্ত্রীনা লৈঙাক অসিগী য়াইফ থৌরাংশিংগী মখাদা খুঙ্গং নৎত্রগা ইমুং অমত্তা চিত্থহৌদনবা লৈঙাক্না লেপ্লিবা খোঙফম ফোঙদোকখি অমদি বিহারনা মীৎয়েঙ অসিগী পরিংদা দোক্তর ভিমরাও অম্বেদকর সমগ্র অভিয়ান হৌদোকপগীদমক অপেনবা ফোঙদোকখি। কেম্পেন অসিগী মখাদা, লৈঙাক অসিনা খুঙ্গং অমদি মীয়ামগী মফমদা মথৌ তাবা স্কীম ২২ পুদুনা চৎলি লোয়ননা দলিত, মহাদলিত, শোত্থহৌরবা কাঙলুপশিং, অমদি লায়রবশিংদা হকথেংননা কান্নবা ফংহন্নবা পান্দম থম্লি। হৌজিক ফাওবদা কেম্প ৩০,০০০ হেন্না পাঙথোকখ্রে, অমদি মীওই লাখ কয়া কেম্পেন অসিগা শম্নহনখ্রে হায়না প্রধান মন্ত্রীনা ফোঙদোকখি। লৈঙাক্না বেনিফিসরীশিংদা হকথেংননা য়ৌশিনবা মতমদা, অচান মিরান নাইবা অমদি শেঞ্জা থুমজা মুত্থৎলি হায়খি, অমদি মসিনা খুন্নাইগী অচুম্বা ৱায়েলগী তশেংবা শক্তমদুনি হায়খি।
বিহারবু বাবা সাহেব অম্বেদকর, করপুরি থাকুর, বাবু জগজিবন রাম, অমদি জয়প্রকাস নারায়ন্না শাগৎলম্বা বিহারদা অওনবা পুরক্নবা মঙলানগী মরমদা পল্লদুনা, শ্রী মোদীনা থম্লিবা পান্দমদি চাওখৎপা বিহার অমনা চাওখৎপা ভারত অমগীদমক থৌদাং য়াবা অদুনি হায়খি। বিহারনা চাওখৎলকপা খুদিং ভারতনা মালেমগী ফম্পাক্তা অনৌবা পন্দোল লোমগদৌরিবনি হায়খি। পুন্না হোৎনমিন্নদুনা, মীপুক খুদিংমক্না চাওখৎপগী খোঙজেল য়াঙখৎহনবা ঙমগনি হায়বগী থাজবা ফোঙদোক্লতুনা চাওখৎ থৌরাংগী থবক থৌরমশিং অসিগীদমক মীয়ামগী মফমদা নুংঙাইবা ফোঙদোক্তুনা মহাক্কী ৱারোল লোইশিনখি।
বিহারগী গভর্নর, শ্রী অরিফ মোহম্মদ খান, বিহারগী মুখ্য মন্ত্রী শ্রী নিতিস কুমার, কেন্দ্র মন্ত্রী শ্রী জিতন রাম মাঞ্জি, শ্রী গিরিরাজ সিংহ, শ্রী রাজিব রঞ্জন সিংহ, শ্রী চিরাগ পাস্বান, শ্রী নিত্যানন্দ রাই, শ্রী সতিস চন্দ্র দুবে, দোক্তর রাজ ভুসন চৌধরীসু থৌরমদুদা অতৈ মীথুংশিংগা লোয়ননা শরুক য়ামিন্নখি।
বেকগ্রাউন্দ
লমদম অসিগী পৱার ইনফ্রাস্ত্রকচরদা ইনোৎ হাপ্লদুনা, প্রধান মন্ত্রীনা বিহার অমদি নোংপোক ভারত্তা ইনর্জী সিক্যুরিতী লৈহনগদবা ঔরঙ্গবাদ দিস্ত্রিক্তা লুপা করোর ২৯,৯৩০ হেন্না চঙনা শেমগৎকদবা নবিনগর সুপর থর্মেল পৱার প্রোজেক্ত, স্তেজ-২ (৩x৮০০ মেগাৱাত)কী উরেপ উয়ুং তমখি। মসিনা লমদম অসোমদা ইন্দস্ত্রী চাওখৎহনগনি, থবক্কী খুদোংচাবা শেমগৎকনি, অমদি অতাবা মমলদা মৈ ফংহনগনি।
লমদম অদুগী লম্বী থোংগী ইনফ্রাস্ত্রকচর অমদি কন্নেক্তিবিতীদা অচৌবা ইনোৎ অমা হাপ্তুনা, প্রধান মন্ত্রীনা NH-119A গী পত্না-অরাহ-সাসারাম সেক্সন লেন মরিদা ওন্থোকপা, অমদি বরানসি-রাঞ্চি-কোলকতা হায়ৱে (NH-319B) অমসুং রামনগর-কচ্চি দর্গাহ পরিং (NH-119D) লেন তরুক্তা ওন্থোকপা, অমদি বক্সার অমসুং ভরাউলি মনাক্তা অনৌবা গঙ্গা থোং অমা শাগৎপা য়াওনা লম্বী-থোংগী প্রোজেক্ত কয়াগী উরেপ উয়ুং তমখি। প্রোজেক্তশিং অসিনা স্তেত অসিদা লল্লোন ইতিক অমদি রিজনেল কন্নেক্তিবিতী হেনগৎহনবগা লোয়ননা অপনবা লৈতবা হায়-স্পীদ কোরিদোর শেমগৎকনি। মহাক্না লুপা করোর ৫,৫২০ রোমগী ওইগদবা NH – 22 গী পত্না-গয়া-দোভি সেক্সন লেন মরিদা ওনখৎপা, অমদি এলেভেতেদ হায়ৱে লেন মরি পাকথোকপা, অমসুং NH – 27 গী গোপালগঞ্জ তাউনগী গ্রেদ ইমপ্রুভমেন্ত অমদি অতৈ প্রোজেক্ত কয়াসু শঙ্গাখি।
লৈবাক থুংনা রেল ইনফ্রাস্ত্রকচর ফগৎহন্নবা মহাক্কী খোঙফম পরিংদা, প্রধান মন্ত্রীনা অতৈ প্রোজেক্ত কয়াগা লোয়ননা লুপা করোর ১৩৩০ হেন্না শেমগৎখিবা সোন নগর – মোহম্মদ গঞ্জ মরক্কী ৩শুবা রেল লাইনবুসু লৈবাক্কী মফমদা কত্থোকখি।
***
(Release ID: 2132826)
Read this release in:
Odia
,
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam