তেরোরিস্তকী থবকশিং মখা তানা প্রোক্সি ৱার ওইদ্রে, মপুংফাবা লাল্লোংনি, মরম অদুনা চপ মান্নবা মওং অমদা পাউখুম পীগনি: প্রধান মন্ত্রী

ঐখোয়না বসুধাইবা কুতুম্বকমদা থাজৈ, কনাগুম্বা অমতা য়েক্নবা ঐখোয়না পামদে, ঐখোয়না চাউখৎপা পাম্মি মরম অদুনা মসিনা মালেমগী চাউখৎপদা ঐখোয়না মতেং পাংলি: প্রধান মন্ত্রী

২০৪৭ দা ভারত চাউখৎলবা লৈবাক অমা ওইগদবনি, শন্তাইনবা অমতা লৈতে, মালেম শীনবা থুংবা বিকসিত ভারত হায়না খঙনদুনা ঐখোয়না নিংতম্বা চহি ১০০ শুবা থৌরম পাংথোক্কনি: প্রধান মন্ত্রী

সহরগী মফমশিং ঐখোয়গী চাউখৎনবা মফমশিংনি, ঐখোয়না আর্বান বোদিশিং শেন্মিৎলোন চাউখৎনবা মফমশিং ওইহনগদবনি: প্রধান মন্ত্রী

ঙসি ঐখোয়গী স্তার্দ-অপ লাখ ২ রোম লৈরে, মখোয় অয়াম্বা তয়ার-২ অমসুং তয়ার-৩ সহরশিংদনি অমসুং ঐখোয়গী ইচানুপীশিংনা লুচিংলি: প্রধান মন্ত্রী

অচৌবা অহোংবা অমা পুরক্নবা ঐখোয়গী লৈবাক্কী অকনবা মপাঙ্গল লৈরি, হৌজিক ওপরেসন সিন্দুর অসি মীয়াম করোর ১৪০ গী থৌদাংনি: প্রধান মন্ত্রী

ঐখোয়গী ব্রান্দ মেন ইন ইন্দিয়াগীদমক ঐখোয়না চাউথোকচগদবনি: প্রধান মন্ত্রী

Content:

ঙসি গুজরাতকী গান্ধীনগরদা পাংথোকপা গুজরাত অর্বান গ্রোথ স্তোরিগী চহি ২০ শুবা থৌরমদা প্রধান মন্ত্রী শ্রী নরেন্দ্র মোদী ৱা ঙাংখ্রে। থৌরম অদুদা মহাক্না অর্বান দিবলপমেন্ত এয়র ২০০৫ চহি ২০ মপুংফারকপগী অর্বান দিবলপমেন্ত এয়র ২০২৫ হৌদোকখ্রে। থৌরম অদুদা প্রধান মন্ত্রীনা হায়খি মদুদি হন্দক্কী মহাক্কী গুজরাত খোঙচৎ অসিদা গুজরাত খক নত্তনা ভারতকী মফম শীনবা থুংনা অমসুং ভারতমচা খুদিংমক্কী থম্মোয়দা মরৈবাক নুংশিবগী ইচেল অমা উবা ফংলে। তেরোরিজমগী তিংখঙ হন্দোক্নবা ভারতকী ৱাখল লৈরে অমসুং মসি থাজবা অমগা লোয়ননা পাংথোক্লে।

প্রধান মন্ত্রীনা হায়খি ভারত শরুক অহুম থোক্না খায়দোক্লবা মতুংদা, ১৯৪৭ দা অহানবা ওইনা ভারত্ত তেরোরিস্তনা লান্দারকখি। পি.ও.কে অসি অমুক হন্না লৌশিন্দ্রিবা ফাওবা ভারতকী লান্মী লেপ্লোইদবনি হায়না সরদার পতেলনা পান্দম থমখি। অদুবু পতেলগী পাউতাক লৌখিদে। মসিগী তেরোরিজমগী থবক অসি হৌখিবা চহি ৭৫ চৎথদুনা লাক্লি অমসুং পেহেলগামগী থৌদোক অসি মসিগী অতোপ্পা মওং অমনি। কুতনিতিগী লিলা কয়া শানরবশু, পাকিস্তান্না য়াম্না তোইনা লালদা ভারত লান্মী মায়োক্নরি। তাঙ্কক অহুমদা ভারতকী লান্মীনা পাকিস্তান মাইথিবা পীখ্রে, হকথেংনবা লালদা পাকিস্তান মাইপাকপা ঙম্লোই হায়বা মসিনা তাক্লে। য়ুম্লোন্নরিবা লৈবাক অসিনা প্রোক্সি লাল চৎথখি। অকনবা লান্মীগী ত্রেনিং পীরবা মিলিতেন্তশিং ভারত্ত থাজিল্লকখি, শান্তি ওইনা লাই খুরুম্বা লাকপা মীওইশিং য়াওনা খুৎলায় পায়দবা মীচমশিংদা খুৎ থাখি। 

প্রধান মন্ত্রীনা হায়খি মদুদি ঐখোয়না বসুধাইবা কুতুম্বকমদা থাজৈ, কনাগুম্বা অমতা য়েক্নবা ঐখোয়না পামদে, ঐখোয়না চাউখৎপা পাম্মি মরম অদুনা মসিনা মালেমগী চাউখৎপদা ঐখোয়না মতেং পাংলি। মে ৬ গী থৌদোক অসিগী মতুংদা হৌজিক প্রোক্সি ৱার হায়বা তার্ম অসি লাক্লে। হন্দক ওইরক্লিবা ফিবমশিং অসিদা অসিগুম্বা থবকশিং অসি প্রোক্সি ৱার ওইনা লৌবা অরানবা ওইগনি। মিনিত ২২ গী মনুংদা মশক খঙলবা তেরোরিস্ত মপান হাৎলে, কেমেরা দোকুমেন্তেসনগা লোয়ননা ফজনা খঙলে, মরম অদুনা প্রমান পীনবা হংনিঙাই ওইদ্রে। হন্দক্কী থৌদোকশিং অসিনা ইচম চম্বা প্রোক্সি ৱার অমা নত্তে, অদুবু পাকিস্তান্না ফজনা থৌরাং তৌবনি হায়বা তাক্লে। মে ৬ গী থৌদোক মতুংদা, মপুংফাবা ইকায়খুম্নবা লোয়ননা, মখোয়গী কুশিংদা জাতিগী ফিরালনা কুপতুনা অমসুং পাকিস্তানগী মিলিতরিনা ইকায়খুম্নবা উৎতুনা পাকিস্তান্দা তেরোরিস্তশিংগী অরোইবা মথৌ-মঙম পাংথোকখি। মসিনা তাকপদি থবকশিং অসি মিলিতেন্তশিংগী থবক নত্তে অদুবু শেম শারবা লালগী শরুক অমনি। অসিগুম্বা লাল্লোংশিং অসি চৎথরবদি, চপ মান্নবা পাউখুম পীগনি। 

প্রধান মন্ত্রীনা হায়খি মদুদি চহি কয়া কমদৌনা লৈবাক অসি হন্থনা য়েংদুনা লাকপগে হায়বা নহারোলশিংনা খঙগদবনি। ইন্দস ৱাতর ত্রিতি চৎনহন্দ্রে অমসুং জম্মু অমসুং কাস্মিরদা ঈশিং মরাংকাইনা ফংদবগী অৱাবা কয়া লৈরি, তুরেলশিংদা দাম কয়া শাগৎলবশু, চহি ৬০ রোম য়েংশিন্দনা মীরাইদুনা লাক্লি। ভারতমচাশিংনা ঈশিং শীজিন্নবগী হক ফংগদবনি অমসুং হিরম অসিদা মরুওইবা থবক কয়া পায়খৎতনা লৈরি অমসুং অহানবগী ওইনা থবক খর পায়খৎপা হৌরে।

প্রধান মন্ত্রীনা হায়খি মদুদি ভারতনা য়েক্নবা থমদে অমসুং ভারতনা চাউখৎপদা থাজবা থম্লি অমসুং মালেমগী নুংঙাই য়াইফবদা মতেং পাংলি। মে ২৬ অসি মহাক্না ২০১৪ দা অহানবা ওইনা প্রধান মন্ত্রী ওইনা ৱাশক লৌখিবগী থৌরম থোক্লে। মতম অদুদা ভারত মালেমগী শেন্মিৎলোন্দা ১১শুবা মফমদা লৈখি। কোবি-১৯ য়াওনা খুদোংচাদবা কয়া মায়োক্নি অমসুং মহৌশাগী ওইবা খুদোংথিবা কয়া থেংনখি। হায়রিবা খুদোংচাদবশিং অসি মায়োক্নরবশু, ভারতকী শেন-থুমগী ফিবম য়াংনা চাউখৎলক্তুনা ১১শুবা মফমদগী মালেমগী ওইনা ৪শুবা মফমদা লৈরে। চাউখৎনবগীদমক লৈবাক অসিগী পান্দম থম্লি অমসুং মহাক্না গুজরাত্তগী চাউরকখিবনা পারা কয়া অমসুং গুন কয়া তম্লকখি। মহাক্কী মফমদা থাজবা থম্লিবা মীয়ামগী অনিংবশিং অমসুং মঙলানশিংগীদমক তৌবীমল খঙবা উৎচরি, মখোয়গী য়াইফনবগীদমক মখা তানা থবক তৌগনি।

প্রধান মন্ত্রীনা হায়খি সহর শেমগৎনবা থবক অসি মহাক্না ২০০৫ দা হৌদোকখি অমসুং হৌজিক চহি ২০ মপুংফারে। মাইপাকপশিং হরাওবা ফোঙদোকপগী মথক্ত, হৌখিবা চহি ২০ অসিদা ফংলকপা লৌশিং অসি শীজিন্নদুনা তুংগী মীরোলশিংগীদমক সহর শেমগৎনবা লম্বী অমা শেম্লগনি। হৌজিক লম্বী অসি গুজরাতকী মীয়ামদা শীন্নরে, তুংকোইনা চাউখৎনবা পান্দম অমা থম্লে। সহর চাউখৎনবা লাল্লোং শেম্বগীদমক রাজ্য সরকার, চীফ মিনিস্তর অমসুং মখোয়গী কাংবু প্রধান মন্ত্রীনা থাগৎপা ফোঙদোকখি।

প্রধান মন্ত্রীনা হায়খি মালেমগী ইকোনোমি রেঙ্কিংদা ৬ শুবদগী ৫ শুবদা হাইগৎলকপদা ভারতকী মীয়াম হরাওনখি। ভারতকী হান্নগী লোয়লম মপু ওইরম্বা য়ু.কেগী মথক্ত লৈরকপা অসি পুৱারি ওইরবা মাইপাকপা অমনি। হৌজিক ভারত মালেমদা ৪শুবা খ্বাইদগী চাউবা ইকোনোমি ওইরে, অহুমশুবা মফমদা হাইগৎলক্নবা অকনবা থবক পায়খৎলি। ২০৪৭ দা ভারত চাউখৎলবা লৈবাক অমা ওইগদবনি, শন্তাইনবা অমতা লৈতে, মালেম শীনবা থুংবা বিকসিত ভারত হায়না খঙনদুনা ঐখোয়না নিংতম্বা চহি ১০০ শুবা থৌরম পাংথোক্কনি। নিংতম ইহৌদা ভগৎ সিংহ, রাজগুরু, নেতাজি সুভাস চন্দ্র বোস, বীর সাবারকার, শ্যামজি কৃষ্ণ ভর্মা, মহাত্মা গান্ধী অমসুং সরদার পতেলগুম্বা লুচিংবশিংগী কৎথোকপা ঐখোয়না নিংশিংলি। মতম অদুগী অপুনবা মীশিং করোর ২০-৩০ না নিংতম্নবা লান্থংন্নবা চপ য়ুংনা লেপলমদ্রবদি, ১৯৪৭ দা নিংতম্বা ফংবা ঙম্লমলোই। করিগুম্বা হৌখিবা মীরোলশিংনা চহি ২০-৩৫ দা লোলয়লম লৈঙাকপশিং তান্থোক্লম্বদি, মথং চহি ২৫ দা ঙসিগী মীয়াম করোর ১৪০ না বিকসিত ভারত অমগী মঙলান মঙফাওনরগনি। গুজরাতকী চহি ৭৫শুবা থৌরমগী শেম-শাবা অসি য়াম্না মরুওই। উদ্যোগ, লৌউ-শিংউ, লাইরিক-লাইশু অমসুং শান্নবাগুম্বা হিরমশিংদা রাজ্য অসিগী তুংগী ফিবম  শেম শাবা হৌজিক হৌগদবনি। লৈবাক অসিগী চাউখৎপগী খোঙজেলগা চপ মান্ননা চৎমিন্নবা ঙম্নবা গুজরাত চাউখৎনবা অপুনবা ৱারেপ অমা লৌগদবনি। ২০৩৬ দা ভারতনা ওলেম্পিক্স য়ুম্বু ওইনবা থাজবা থম্লি অমসুং মালেমগী লুচিংবা ওইনবা লৈবাক অসিনা থৌরাং তৌরি।

প্রধান মন্ত্রীনা হায়খি মদুদি থুম পুথোকপগী মীয়াম্না খঙনরম্বা লম অমা দাইমন্দ পুথোকপগী মালেমগী লুচিংবা অমা ওইনা গুজরাত মীয়াম্না খঙনরে। ফজনা থৌরাং তৌবা অমসুং লাল্লোং কয়া শেম্বদগী মসিগী মাইপাকপা অসি পুরকপা ঙম্বনি। সরকারগী ভিবাগশিং পাউ ফাওনদবা অসিনা চাউখৎপদা অপনবা পী। সরকারগী ভিবাগ পুম্নমক হুপ্না থবক তৌবা য়াম্না মরুওই অমসুং তোঙান তোঙানবা মিনিস্ত্রিশিং অপুনবা ওইনা থবক তৌমিন্নগদবনি। গুজরাতকী মোদেল ওইনা অকক্নবা চহিশিংদা থবকশিং মীৎয়েং চঙখি, ২০০৫ দা সহর চাউখৎনবা, অতোপ্পা চহি অমদা নুপীমচাশিংগী লাইরিক তম্নবা অমসুং অতোপ্পা চহি অমদা তুরিজমগী। “কুচ দিন তোহ গুজারো গুজরাত মেন” হায়বা কেম্পেন অসিনা তুরিজম চাউখৎহনবদা মতেং পাংখি। অহমেদবাদতা ত্রান্সপোর্তেসনগী থবক পাকথোক-চাউথোরকপদা অহানবা অথিংবা কয়া পীরকখি। সহর শীনবা থুংনা শেমগৎ-শাগৎনবা লম লৌশিনবদা শিংনবা কয়া থেংনখি অমসুং অহানবা পীরকপা খুদোংচাদবশিং অদু কান্নবশিং উবদগী মীয়াম্না শৌগৎলকখি।

প্রধান মন্ত্রীনা হায়খি গুরাত্ত সহর অমুক শেমগৎনবা থবকশিংদা রাজনিতিগী মাইকৈদগী অথিংবা কয়া অমসুং মেদিয়াগী মরৈ য়েৎপা কয়া লাকখি। অদুবু লুচিংবশিংনা পুকচেল শেংনা অমসুং মীয়ামগী য়াইফনবা ৱারেপশিং লৌরকপা মতমদা, অফবা ফলশিং পুরকখি। সরকারগী সহর শেমগৎনবা থবকশিংগী ফলনা মীখলদা মাইপাকখি অমসুং মীয়াম্না পাক শন্না থাগৎনখি। মখা তানা চাউখৎনবা ভারতনা থবক পায়খৎলি। মরিশুবা খ্বাইদগী চাউবা ইকোনোমিদগী অহুমশুবা খ্বাইদগী চাউবা ইকোনোমি ওইরক্নবা ভারতকী থাজবশিং হেনগৎলক্লি অমসুং অসিগুম্বা পান্দমশিং অসি অচেৎপা অমগা লোয়ননা ফংবা ঙমগনি।

প্রধান মন্ত্রীনা হায়খি মদুদি সহরশিং শেন-থুমগী থবকশিংগী অফবা মফমশিং ওইনা থবক তৌগদবনি অমসুং মখোয়গী অওনবশিং পুরক্নবা ম্যুনিসিপাল বোদিশিংনা ফজনা থৌরাং তৌগদবনি। লৈবাক শীনবা থুংবগী ম্যুনিসিপাল অমসুং মেত্রোপোলিতান ওথোরিতিশিংনা মখোয়গী সহরশিংগীদমক শেন-থুম চাউখৎনবা পান্দমশিং থমগদবনি। মখোয়গী হৌজিক লৈরিবা শেন-থুমগী ফিবম নৈনগদবনি অমসুং চহি অমগী মনুংদা ফিবম ফগৎনবা লাল্লোংশিং য়াৎকদবনি অমসুং পুথোক্লিবা পোৎচৈশিংগী মগুন হেনগৎনবা মীৎয়েং চঙগদবনি অমসুং শেন-থুমগী থবকশিংগী অনৌবা খুদোংচাবশিং মশক খঙদোক্কদবনি। দুকানশিং শাগৎপগী মথক্ত অর্বান বোদিশিংনা এগ্রো-বেজ ইন্দস্ত্রিশিং শৌগৎকদবনি অমসুং মফম অমগী কৈথেলশিংদা পোৎচৈশিংগী মগুন হেনগৎহনবগী থবকশিং পায়খৎকদবনি। তয়ার-২ অমসুং তয়ার-৩ সহরশিংদা স্তার্দঅপ লাখ অনিরোম হেন্না লৈরে। হায়রিবা থবকশিং অসি নুপীশিংনা অয়াম্বা লুচিংবা ওইবদা চাউথোকচৈ। ইজুকেসন অমসুং শান্নবদশু চাউখৎলকপা উরে। মরিশুবা খ্বাইদগী চাউবা ইকোনোমিদগী অহুমশুবা খ্বাইদগী চাউবা ইকোনোমি ওইনবা ভারতকী খোঙচৎ য়াংখৎনবা সহরগী শেন-থুমগী অওনবা পুরক্নবা ভারতনা মীৎয়েং চঙগদবনি অমসুং লোকেলগী ইকোনোমিশিং মপাঙ্গল কনখৎহনবনা মাইপাকপা অসি ফংবা ঙমগনি।

অফবা লৈঙাক অমগী মোদেলগী মরুওইবা পল্লদুনা, প্রধান মন্ত্রীনা হায়খি মদুদি ভারতকী তৌবা ঙম্বা নমথনবা পুৱারিদগী হৌনা ৱাখল্লোন লৈরক্লি। ৱাখল্লোন্দা অপনবা পীবা অসিনা চাউখৎ-থৌরাংগী থৌশিলশিংদা মায়োক্ত লৈ অমসুং থবকশিং মরৈ য়েৎপা অসি চৎনবী অমা ওইদুনা লাকখি। সহর চাউখৎনবা সরকারনা থবক পায়খৎলে অমসুং ফম্নাইবশিংগী থবক্না পীরিবা অপনবশিং কোকহন্নবা এস্পিরেসনেল দিস্ত্রিক প্রোগ্রাম হৌদোক্লে। চাউখৎপগী পেরামিতর ৪০ দা য়ুম্ফম ওইদুনা জিলা ১০০ রোম মশক খঙদোক্লে অমসুং মতম শাংনা চৎনগদবা লাল্লোংগা লোয়ননা কৎথোক্লবা ওফিসারশিং থম্লে। থবক অসি হৌজিক লৈবাক অসি চাউখৎনবা নমুনা  অমা ওইরক্লে অমসুং অফবা লৈঙাক্ত মমল য়াম্লবা ৱাখল্লোলশিং পীরে।

প্রধান মন্ত্রীনা হায়খি মদুদি শেন-থুম চাউখৎহনবদা তুরিজম অসি য়াম্না মরুওই অমসুং গুজরাতকী অওনবা অসি খুদম অমনি। মতম অমদা মরুভুমি ওইরম্বা কুছ হৌজিক মীয়াম্না পাম্নবা লমকোয়ফম অমা ওইরে। গুজরাত্ত মালেমদা খ্বাইদগী ৱাংবা মীতম লৈরে অমসুং মীৎয়েং অমসুং লমদম অসিগী শেন-থুমগী ফিবমদা অহোংবা পুরক্লে। বাদনাগর অসি পুৱারিগী মরুওইবা মফম অমনি অমসুং মসিগী ম্যুজম অসি মালেমদা মশক খঙলবা হেরিতেচ সেন্তর অমা ওইরে। লোথালদা মালেমদা খ্বাইদগী চাউবা মেরিতাইম ম্যুজম অমা হৌজিক লৈরে। অহানবদা গিফ সিতিগী ৱাখল অসি নোক্নরমখি অমসুং হৌজিক মশক থোকপা শেন-থুমগী মফম অমা ওইরক্লে। অহানবা হৌদোকপা অনৌবা ৱাখলশিং মহৈ চানবা থাজবা অমগা লোয়ননা পায়খৎকদবনি। সাবরমাতি রিভরফ্রন্ত, মালেমদা খ্বাইদগী চাউবা স্তদিয়ম শাবা অমসুং স্তেচু ওফ য়ুনিতি য়াওনা অচৌবা প্রোজেকশিং মাইপাক্লে অমসুং অওনবা পুরকপা থবকশিংদা ভারতকী তৌবা ঙম্বা উৎথোক্লে। ভারতকী তৌবা ঙম্বদা মহাক্না চিংনবা লৈতনা থাজবা থম্লি অমসুং লৈবাক অসিগী তৌবা ঙম্বনা শিংথাবা য়ানা চাউখৎকনি।

হৌখ্রবা থবকশিং অমুক হন্না য়েংনবগী খুদোংচাবা পীবগীদমক প্রধান মন্ত্রীনা গুজরাত সরকার থাগৎপা ফোঙদোকখি অমসুং ভারত চাউখৎনবা গুজরাতনা লৌরিবা মরুওইবা থৌদাং পনখি। লৈবাক্কীদমক অৱাংবা থাক্কী পান্দমশিং থম্নবা মহাক্না রাজ্যশিংদা তকশিনখি অমসুং ভারতকী অফবা তুংলমচৎ অমদা মহাক্কী থাজবা অমুক হন্না ফোঙদোকখি।

মে ৬ দগী হৌখিবা ওপরেসন সিন্দুরগী মরুওইবা পল্লদুনা, প্রধান মন্ত্রীনা হায়খি মদুদি ওপরেসন অসিগী পান্দমদগী হেন্না থবক পাংথোক্লে অমসুং লৈবাক অসি চাউখৎনবা পুন্সি চুপ্পগী থাজবা অমা পীবগী খুদম ওইরে। ভারত চাউখৎলবা লৈবাক অমা ওইনবা ৱারেপ লৌরে অমসুং ২০৪৭ দা লৈবাক অসিগী ১০০শুবা নিংতম্বা চহি পাংথোক্কনি। ৪শুবা খ্বাইদগী চাউবা ইকোনোমিদগী ৩শুবা খ্বাইদগী চাউবা ইকোনোমিদা লাক্নবা ভারতকী পান্দম থম্লি অমসুং মপান লৈবাকশিংগী পোৎ-চৈশিংগী মপান তাংবা হন্থহনবা য়াম্না মরুওই। মীয়াম্না মখোয়না নোংমগী শীজিন্নরিবা পোৎলমশিং য়েংশিনগদবনি অমসুং মপান লৈবাকশিংগী পোৎ-চৈশিং মশক খঙদোক্কদবনি অমসুং মখোয়গী মহুৎ লৈবাক অসিদা শাবা পোৎলমশিংনা মহুৎ শীনগদবনি।

ধর্মগী থৌরমশিংগী মীতমশিং ফাওবা মপান লৈবাকশিংদগী লৈরে, মখোয় লৈবাক অসিদা শাজনবা থবক পায়খৎপা দরকার ওইরে। ওপরেসন সিন্দুর অসি ইচম চম্বা মিলিতরি ওপরেসন অমা নত্তে, ভারতকী মীওই খুদিংমক্না শরুক য়াবা থৌদাং অমনি। শেন-থুমগী লমদা মশা মরোমদোম লেপচবা ঙম্বা অসি য়াম্না দরকার ওই অমসুং মফম অমগী মেনুফেকচরিং ফগৎনবা জিলা অমা, পোৎথোক অমা লাল্লোং অসি পায়খৎকদবনি অমসুং লৈবাক অসিগী মশাগী ওইবা উদ্যোগশিং য়োকখৎকদবনি। মতম অমদা মপান  লৈবাকশিংগী পোৎলমশিং য়াম্না পাম্নরমখি, অদুবু ঙসিদি, ভারতনা লৈবাক অসিদা মালেম থাক্কী অফবা পোৎথোকশিং পুথোকপা ঙম্লে।

লৈবাক্কী চাউনা চাউথোকচবা পোক্নবা পুক্নিং থৌগৎলদুনা, প্রধান মন্ত্রীনা হায়খি মদুদি মীয়াম্না ভারত্ত শাবা পোৎথোকশিংগীদমক চাউথোকচবা ফাওগদবনি অমসুং লৈবাক অসিগী মাইপাকপশিং হরাওবা ফোঙদোক্কদবনি। ভারতমচা খুদিংমক্না লৈবাক্কী শেন-থুমগী ফিবম ফগৎনবা মতেং পাংগদবনি অমসুং মালেমগী ওইনা লৈবাক অসিগী ফিবম ফগৎহনগদবনি। মহাক্না গুজরাত সরকার অমসুং সহর চাউখৎনবা মসিগী লুচিংবগী থবকশিং তৌবীমল খঙবা উৎখি অমসুং লৈবাক অসিগী উদ্যোগ চাউখৎনবা লমজিংবা অমা ওইনা লৌরিবা থৌদাং থাগৎপা ফোঙদোকখি।

থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা গুজরাতকী রাজ্যপাল শ্রী অচার্য়া দেবব্রাত, গুজরাতকী চীফ মিনিস্তর শ্রী ভুপেন্দ্রভাই পতেল, য়ুনিয়ন মিনিস্তরশিং শ্রী মনোহর লাল অমসুং শ্রী সি.আর পতিল য়াওখি।

নুঙগীৱারোল

গুজরাত্তা অর্বান দিবেলপমেন্ত ইয়র ২০০৫ অসি মতমদুগী মুখ্য মন্ত্রী শ্রী নরেন্দ্র মোদীনা হৌদোকখিবা মরুওইবা খোঙথাং অমনি। মসিগী পান্দমদি গুজরাতকী অর্বান লেন্দস্কেপপু প্লান তৌরবা ইনফ্রাস্ত্রকচর, হেন্না ফবা লৈঙাক অমসুং অর্বান রেসিদেন্তশিংগী পুন্সি মহিং ফগৎহন্দুনা ত্রান্সফোর্মেসন তৌবনি। অর্বান দিবেলপমেন্ত ইয়র, ২০০৫গী চহি ২০ মপুং ফারকপদা প্রধান মন্ত্রীনা অর্বান দিবেলপমেন্ত ইয়র, ২০২৫, গুজরাতকী অর্বান দিবেলপমেন্ত প্লান অমসুং স্তেত ক্লিন এয়র প্রোগ্রাম গান্ধীনগরদা হৌদোকখ্রে। মহাক্না অর্বান দিবেলপমেন্ত, হেল্থ অমসুং ৱাতর সপ্লাইগা মরী লৈনবা প্রোজেক্ত কয়া শঙ্গাখি অমসুং উরেপ উয়ুং তমখি। মহাক্না পি.এম.এ.ৱাইগী মখাদা য়ুম ২২,০০০ হেন্না মীয়ামদা কত্থোকখ্রে। প্রধান মন্ত্রীনা স্বর্নিম জয়ন্তী মুখ্যমন্ত্রী শাহেরি বিকাস য়োজনাগী মখাদা গুজরাতকী অর্বান লোকেল বোদীশিংদা লুপা করোর ৩,৩০০গী ফন্দসু পীখ্রে।

With over two decades of transformative urban development, Gujarat is setting new benchmarks in building world-class cities. Addressing a programme in Gandhinagar. https://t.co/SY9QY6nqDB

— Narendra Modi (@narendramodi) May 27, 2025

***