U Myntri kam pohiing jong ka sorkar pdeng uba dei ruh u Myntri ka tnad iatreilang, u Amit Shah u plie paidbah ia ka Multi Agency Centre (MAC) kaba thymmai ha North Block ha New Delhi, mynta ka sngi. Ha kane ka sngi, u Myntri kam poh iing jong ka sorkar pdeng u Amit Shah u la ong ba ka Operation Sindoor ka dei ka dak kaba kyrpang jong ka mon sain pyrthei kaba skhem jong u Myntri Rangbah duh Narendra Modi, ki jingtip kiba thikna jong ki kynhun syntiat bad ka jinglah ban ther khlem jingbakla jong ki lai tylli ki shipai jong ngi. U la ong ba ka India ka sngew sarong ia ki lai tylli ki kynhun shipai jong ka, kata ka Border Security Force bad baroh ki kynhun pahara.

Haba kren shaphang ki kam pyrshah Naxal ba la pynlong da ki kynhun Central Armed Police Forces (CAPF) ha Karregattalu Hills (KGH) ha khappud Chhattisgarh-Telangana dang shen, u Myntri kam pohïing ka sorkar pdeng u la ong ba kine ki kam ba kongsan pyrshah ïa ki Naxalite ki pyni ïa ka jingïatreilang ba tbit hapdeng ki kynhun pahara jong ngi. U Shah u la ong ba kum kane ka jingiatreilang la iohi ruh ha ka por jong ka Operation Sindoor, kaba pyni ba ka don ka jingiatreilang kaba bha ha ka rukom treikam bad ka jingpyrkhat jong ki kynhun syntiat jong ngi bad ki lai tylli ki kynhun shipai ha kaba pyntreikam ia ka kam.

U Myntri kam pohïing ka sorkar pdeng u Amit Shah u la ong ba ka MAC kaba thymmai kan ai ka rynsan kaba ryntih bad kaba ïatylli na ka bynta ban pyniasohlang ïa ki jingpyrshang jong baroh ki kynhun ha kaba pynbeit ïa ki jingeh kiba iasoh lang ha kaba iadei bad ka jingshngain jong ka ri kiba ïakynduh ha ka jinglong jingman mynta. U la pynpaw ka jingkyrmen ba kane ka network kaba thymmai kan pynkhlain ia ki jingpyrshang jong ka ri ban ialeh pyrshah ia ki jingma kiba khraw kum ki kam lehnoh, ki kam pyntriem, ki jingiatrei lang ha ki kam beain bad ki jingthombor lyngba ki lad cyber.

U Amit Shah u la iaroh ia kane ka rynsan MAC kaba thymmai bad pynpaw ka jingsngewhun halor ka jinglah ban pyndep ia ki kam kiba iadei bad ka hardware bad software ha ka por kaba la buh. U la ong ba ka pynrung ia ki lad kiba thymmai kum ki lad AI/ML ban pyndonkam ia ki jingtip kiba iar ha ryngkat ki jingshakri MAC bad GIS. U la batai ruh ia ki kam ki ban wan da kaba ban jur ia ka jingdonkam ban pyniasoh lang ia kiwei pat ki jingtip kiba don ha ki jaka bapher bapher ha kane ka rynsan na ka bynta ban pyndonkam ia ki jingtip ba kham bha kiba la pynbiang ryngkat bad ka MAC ba thymmai. U Shah u la ong ba kane ka rynsan ba thymmai la khmih lynti ba kan kyntiew ia ka jingbha jong ka jingpeit bniah ia ki jingtip ba la pynmih ha ka rynsan MAC sha ka kyrdan kaba kham shalor, kaba iarap ban bishar bniah ia ka jinglong jingman kaba thikna, ka jingpeit ia ki jaka ba kham kyrpang bad ka jingpeit ia ka por ban ioh ia ki jingseisoh kiba la sngewthuh lypa. Ka MAC kaba thymmai kan iarap bha ha kaba ialeh pyrshah ia ka jinglong jingman jong ki kam lehnoh kaba don ia ki jingiadei kiba jylliew bad ki jingiatreilang ha ki kam beain.

Kum ka jaka ba halor tam jong ka ri India ban pynïasoh ïa ki jingtip, ka Multi Agency Centre (MAC) ka la don naduh u snem 2001 bad u Myntri kam Pohïing ka Sorkar Pdeng u la ïalam lynti ïa ka jingkyntiew jong ka MAC man ka por ha kaba iadei bad ka teknoloji. Kane ka MAC ka don ha ka Intelligence Bureau, bad ka la pyniasoh ia baroh ki kynhun wad bniah, ki tnad pahara, ki tnad pyntreikam ia ka ain bad ki tnad tohkit. La pyntreikam ha ka jinglut kaba palat 500 Klur, ka rynsan thymmai jong ka MAC ka la mad ïa ka jingkylla. Ka rynsan MAC kaba thymmai kaba don ha kylleng ka ri ka la pynïasoh ïa ki jaka ba la ktah da ki lehnoh, ki jaka ba shah ktah ha ki kam lehnoh bad ki jaka lum kaba pynthikna ïa ka jingpynpoi kam sha baroh ki bynta jong ka ri bad kaba poi wat sha ki SP jong ki distrik kiba don ha ki jaka kiba jngai tam kiba lah ban pyndonkam ia ka rynsan kaba shngain bad kaba sted.

.

*****