“Ki jingïatreilang ha ka pyrthei ban kyntiew ïa ka jingsaindur ka dei ka lynti ban ïaid shakhmat, katba dang sngewthuh ïa ki jingsngewthuh jong ki kolshor bapher bapher jong uwei pa uwei.” Kane ka dei kawei na ki jingmih kiba bun na ka Global Media Dialogue kaba la pynlong ha Mumbai ha ka World Audio Visual and Entertainment Summit (WAVES 2025) kaba dang ïaid mynta. Ka jingpyniar ia ki jaka saindur ha ki ri namarkata ka bat ia u shabi jong ka jingkiew stet jong ngi katba ngi baroh ngi iaid ha ka lynti ban pyndap ia ka jingduna ha kaba iadei bad ka kam digital, la pynsngew ki ri kiba la iashim bynta ha ka jingiakren. Ka jingiakren ka la pynleit jingmut ha ka bynta jong ki sorkar ban kyntiew ia ka shongsuk shongsain bad jingiatylli ha ka pyrthei hapdeng ka jinglong jingman jong ka kam media kaba iaid sha kylleng ka pyrthei, kaba la pynkut ha ka jingpdiang ia ka WAVES Declaration da ki ri kiba long dkhot.

Ka Global Media Dialogue ka la pynpaw ïa ka jingsngew ba ki phlim, kiba pyni ïa ki kolshor ha kylleng ka pyrthei, ki don ka bor kaba khraw ha kaba pynïajan ïa ki briew, bad ki ri kiba ïashim bynta ki la sngewnguh ïa ka bynta jong ki phlim jong ka India ha kane ka bynta. Kum ka rukom iathuhkhana kaba pynbyrngia, ki phlim ki long kum ka bor kaba khlain ban iatreilang. Ki khana jong ki briew ruh ki mih stet kum ka bor kaba khlain ha ka ioh ka kot jong u nongsaindur ryngkat bad ka jingiasoh lang jong ka teknoloji ha ka jingsaindur ia ka jingiathuhkhana kaba pynkylla dur biang ia ka kam pynbyrngia. Katto katne ki ri kiba long dkhot ki la ïasam ïa ki jingsngewkhia halor ka jingdonkam ban kyntiew ïa ka “jingthoh khubor kaba don ka jingkitkhlieh”, kaba ki sngew ba lah ban pynbeit da ka jingïatreilang ha ka rynsan jong ka WAVES.

Haba khot ia ka WAVES 2025 kum ka nuksa kaba rit jong ka pyrthei, u Dr. S. Jaishankar, Myntri kam bar ri jong ka sorkar India u la ong ba kane ka Summit ka wanrah lang ia ki nongshna prokram, ki nongthaw polisi, ki aktor, ki nongpynmih bad ki visual artist ha kawei ka rynsan ban iakren ia ka lawei jong ka kam Media bad Jingpynbyrngia.

Ha ka jingai jingkren jong u, u Dr. Jaishankar u la kren shaphang ki kam kiba iar kiba dang peit ha ka Global Media Dialogue 2025. U la ong ba ka rukom synshar pyrthei kaba don ia ka kolshor kaba khlain, ka don hapoh ka jingkylla mynta. “Ka long kaba donkam eh ba ngin ai sur ia ki riti dustur, ki pateng, ki jingmut jingpyrkhat, ki rukom treikam bad ki jingsaindur jong ngi”, u la ong

U Myntri Kam bar ri u la pynpaw ba ka teknoloji bad ka dustur ki dei ban iaid ryngkat ryngkat, namar ka teknoloji ka lah ban pynkhlain ia ka jingsngewthuh shaphang ka pateng kaba iar jong ngi bad pynjylliew ia ka jingsngewthuh shaphang jong ka, khamtam eh ia ki pateng kiba dang khynnah. "Ka long kaba kongsan ba ki samla kiba don sap kin long kiba la pynkhreh na ka bynta ka juk jong ki jingïatreilang kiba thymmai lyngba ka jingkyntiew ïa ki sap. Ka jingsaindur thymmai ka long u shabi sha ka jingkiew ka ban tei ïa ka Viksit Bharat”, u la pynpaw.

Ha ka juk kaba dang mih jong ka AI, u Dr. Jaishankar u la ong, ki lad ki lynti ki long palat ïa ka jingmutdur, hynrei ka donkam ban don ka jingpyndonkam da ka jingkitkhlieh ïa ki teknoloji kiba dang mih, katba dang pynduna ïa ka jinglah shiliang, plie lad ia baroh ban ioh ia ki prokram bad buh hakhmat eh ïa ka akor ka burom jong ka. “Na ka bynta ka jaka trei ha ka pyrthei bad ka bor treikam ha ka pyrthei, ka donkam ïa ki jingkylla ha ka jingmut jingpyrkhat, ki rukom treikam, ki polisi”, u la pynkut bad pynpaw ïa ka jingshaniah ha ka WAVES kum ka rynsan ban ïamir jingmut halor ki mat ba kongsan ha khmat ka kam media bad jingpynbyrngia ha ka pyrthei.

Haba buh ia ka sur jong ka jingiakren ha ka jingkren pdiang burom jong u, u Myntri sorkar pdeng ba dei khmih ia ka tnad Information & Broadcasting, Ashwini Vaishnaw, ha ka jingkren plie jong u u la ong ba ka kolshor ka ai mynsiem ia ka jingsaindur kaba pyniasoh ia ki briew sha shiliang ki pud. U la bynrap ba ka jingshna prokram bad jingpyndonkam ka la kylla stet bha namar ka teknoloji ka pynkylla dur ïa ka rukom ïathuhkhana jong ngi. Ngi don ha ka por jong ka jingkylla ha kaba ngi donkam ban pynshlur ia ka jingshna ia ki prokram ha ka thain.

Haba pdiang sngewbha ïa ki delegate na ki 77 tylli ki ri sha ka nongbah jong ki jingphohsniew, Mumbai, u Vaishnaw u la ban jur ïa ka bynta ba kongsan jong ki jingïatreilang bad pynskhem ba na ka bynta ka jingjop lang, ngi donkam ban pynleit jingmut ha ki jingïateh kular ba ïatreilang, ka pisa ba pynbiang lang bad ka Declaration kaba ïarap ïa ngi ban pyndap ïa ki jing duna ha kaba iadei bad ki kam digital, kyntiew ia ka jingïasuk ha ka pyrthei. Ngi donkam kumta ban pyniar ia ka kam saindur sha ka lynti kaba stet jong ki jingmut jingpyrkhat, u la ong.

Ha ki jingïamir jingmut, ha kaba ki kynhun ha ki kyrdan Myntri ki la pynpaw ïa ki jingmut jong ki, ka India ka la pyntip sha ki ri kiba ïashim bynta shaphang ki 32 tylli ki jingiakop Create ha India, kaba la pynlong ïa ka jingithuh ïa palat 700 ngut ki nongsaindur na kylleng ka pyrthei ha ka season ba nyngkong jong ka WAVES. Ka India ka la pyntip sha ki dkhot ba naduh ka bynta ban wan, yn pynlong ïa kine ki jingïakhun ha 25 tylli ki ktien ha ka pyrthei khnang ba yn lah ban ithuh ïa ki sap shna jingshna na kylleng ka pyrthei ha ki ktien bapher bapher. Kane kan iarap ia ki ban pyni ia ki jingsaindur jong ki ha ka rynsan jong ka WAVES.

Kiwei kiwei ki kynrem ki lyndan kiba la plie pyrda ia kane ka jingialang kilong u Dr. L. Murugan, Myntri Khynnah ba dei khmih ia ka Tnad Information & Broadcasting, Sorkar India, ryngkat bad u Sanjay Jaju, Secretary (I&B), nalor kiwei kiwei ki ophisar jong ka sorkar India.

Na ka bynta ki jingpynbna, sngewbha bud ia ngi

Ha ka X :

https://x.com/WAVESummitIndia

https://x.com/MIB_India

https://x.com/PIB_India

https://x.com/PIBmumbai

Ha ka Instagram:

https://www.instagram.com/wavesummitindia

https://www.instagram.com/mib_india

https://www.instagram.com/pibindia

* * *