প্রধান মন্ত্রী শ্রী নরেন্দ্র মোদীনা ঙসি নেস্নেল পঞ্চায়তি রাজ দেগী থৌরমদা বিহারগী মধুবানিদা লুপা করোর 13,480হেনবগী মখল কয়াগী চাউখৎ-থৌরাংগী প্রোজেক্তশিং শঙ্গাখ্রে, উরেপ-উয়ুং তমখ্রে অমসুং জাতিদা কত্থোকখ্রে। প্রধান মন্ত্রীনা থৌরম অদুদা শরুক য়াখিবা মীপুম খুদিংমক্তা 2025গী এপ্রিল 22দা পহলগাম এতেকতা লৈখিদ্রবশিংগীদমক মীকুপ খরা তুমিন্না লৈনবা অমসুং লাই থৌনিনবা অপিল তৌখি। থৌরম অদুগী মীয়াম তিনখিবা অদুদা ৱা ঙাংলদুনা মহাক্না হায়খি মদুদি পঞ্চায়তি রাজ দেগী থৌরম অসিদা লৈবাক পুম্বনা মিথিলা অমসুং বিহারগা শম্নরি। বিহারগী চাউখৎ-থৌরাংগীদমক লুপা করোর লিশিং কয়াগী প্রোজেক্তশিং শঙ্গাখ্রে অমসুং উরেপ উয়ুং তমখ্রে হায়না মহাক্না ফোংদোকখি। বিহারদা ইলেক্ত্রিসিতী, রেলৱেজ অমসুং ইনফ্রাস্ত্রকচরগী লমদা পায়খৎলিবা থবকশিং অসিনা অনৌবা থবক ফংবগী খুদোংচাবশিং লৈহল্লগনি হায়না মহাক্না অকনবা ৱাফম থমখি। মহাক্না শক্নাইরবা কবি অমসুং নেস্নেল আইকোন, রামধারী সিংহ দিনকরজীগী লৈখিদবগী কুমওন্না লাকপদা মহাক্কী মফমদা ইকায় খুম্নবা উৎখি।

বিহার অসি মহাত্মা গান্ধীনা সত্যাগ্রহগী মন্ত্র শন্দোকখিবা লমদমনি হায়না পল্লদুনা শ্রী মোদীনা মহাত্মা গান্ধীগী অচেৎপা থাজবা অদু পনখি মদুদি ভারতকী খোঙজেল য়াংনা চাউখৎপা অসি খুঙ্গংশিং মপাঙ্গল লৈরবা মতমদা খক্তদা ওইথোকপা য়াই। পঞ্চায়তি রাজকী ৱাখল্লোন অসি ৱাখল্লোন অসিদা য়ুম্ফম ওই হায়না মহাক্না অকনবা ৱাফম থমখি। “হৌখিবা চহি তরা অসিদা, পঞ্চায়ৎশিংবু মপাঙ্গল কনখৎহন্নবা লেপ্তনা খোঙথাংশিং লৌখৎলি। তেক্নোলোজীনা পঞ্চায়ৎশিংবু মপাঙ্গল কনখৎহনবদা মরু ওইবা থৌদাং লৌরি। হৌখিবা চহি তরা অসিদা গ্রাম পঞ্চায়ৎ লাখ 2 হেনবনা ইন্তর্নেৎকা শম্নখ্রে”। শ্রী মোদীনা হায়খি মদুদি খুঙ্গংশিংদা কম্মন সর্বিস সেন্তর লাখ 5.5 হেন্না লিংখৎখ্রে। মহাক্না হায়খি মদুদি পঞ্চায়ৎশিং দিজিতেলাইজ তৌবা অসিনা অহেনবা কান্নবা কয়া অমা ফংহল্লে, খুদম ওইনা পোকপা অমসুং লৈখিদবগী সর্তিফিকেৎ, অমসুং লমগী সর্তিফিকেৎকুম্বা দোক্যুমেন্তশিং লায়না এক্সেস তৌবা ঙমহল্লে। লৈবাক অসিনা নীংতম্বা ফংলবা মতুং দিকেদ কয়াগী মতুংদা অনৌবা পার্লিয়ামেন্ত বিল্দিং অমা ফংলবসু লৈবাক শিনবা থুংনা অনৌবা পঞ্চায়ৎ ভবন 30,000সু শাখ্রে হায়না মহাক্না ফোংদোকখি। পঞ্চায়ৎশিংগীদমক মতিক চাবা শেনফম ফংহনবা অসি সরকারগী মরুওইবা অমনি হায়নসু মহাক্না ফোংদোকখি। মহাক্না হায়খি, “হৌখিবা চহি তরা অসিদা, পঞ্চায়ৎশিংনা লুপা করোর লাখ 2হেন্না ফংখ্রে। মসি পুম্নমক খুঙ্গংগী চাউখৎ থৌরাংগীদমক শিজিন্নখি”।

গ্রাম পঞ্চায়ৎশিংনা থেংনরিবা মরুওইবা ইসুশিংগী মরক্তা অমা অসি লমগী ৱাথোকশিংগা মরী লৈনৈ হায়না পল্লদুনা প্রধান মন্ত্রীনা হায়খি মদুদি লম অসি রেসিদেন্সিএল, এগ্রিকলচরেল, পঞ্চায়ৎনা মপু ওইগেরা নৎত্রগা সরকারনা মপু ওইগেরা লমগী মতাংদা তোইনা য়ানদবা লৈ। মহাক্না অকনবা ৱাফম থমখি মদুদি হীরম অসি কোকহন্নবা, লমগী রেকোর্দশিং দিজিতেলাইজ তৌনবা থবক পায়খৎলি, মসিনা দরকার লৈতবা ৱাথোকশিং লোইশিন্নবা মতেং পাংলি।

শ্রী মোদীনা হায়খি মদুদি পঞ্চায়ৎশিংনা খুন্নাইগী শরুক য়াবা হেনগৎহল্লে, মহাক্না হায়খি মদুদি বিহার অসি পঞ্চায়ৎশিংদা নুপীশিংগীদমক 50% রিজার্বেসন পীরবা লৈবাক অসিগী অহানবা রাজ্যনি। ঙসিদি, শেন্মিৎলোনগী ওইনা শোত্থরবা কাংলুপ, দলিত, মহাদলিত, শোত্থরবা অমসুং কা হেন্না শোত্থরবা কাংলুপকী নুপী মশীং য়াম্না বিহারদা মীয়ামগী মীহুৎ ওইনা থবক তৌরি হায়না মহাক্না অকনবা ৱাফম থমখি। মসিনা তশেংবা সোসিএল জস্তিস অমসুং তশেংবা সোসিএল পার্তিসিপেসননি হায়না মহাক্না হায়খি। মহাক্না হায়খি মদুদি দেমোক্রেসীনা চাউখৎলি অমসুং শরুক য়াবা হেনগৎলকপগা লোয়ননা হেন্না মপাঙ্গল কনখৎলি। মসিগী ৱাখল্লোন অসিবু ফোংদোক্লদুনা শ্রী মোদীনা হায়খি মদুদি লোক সভা অমসুং রাজ্যগী এসেমব্লীশিংদা নুপীশিংগীদমক 33% রিজার্বেসন পীনবা আইন অমসু শেমখ্রে। মহাক্না হায়খি মদুদি মসিনা রাজ্য খুদিংমক্কী নুপীশিংদা কান্নবা ফংহল্লগনি, মসিনা ঐখোয়গী ইচে-ইচল অমসুং ইচানুপীশিংদা হেন্না চাউনা মীৎয়েং থমগনি।

সরকারনা নুপীশিংগী শেন্থোক হেনগৎহন্নবা অমসুং থবক ফংহন্নবা অমসুং মশাগী থবক ফংহন্নবা অনৌবা খুদোংচাবশিং ফংহন্নবা মিসন মোদতা থবক তৌরি হায়না পল্লদুনা শ্রী মোদীনা বিহারদা নুপী কয়াগী পুন্সিদা অহোংবা পুরকখিবা 'জীবিকা দিদী' প্রোগ্রামগী অহোংবা পুরকপা ইথিল অদু পনখি। ঙসি বিহারদা নুপীশিংগী সেল্ফ হেল্প গ্রুপশিংদা চাউরাক্না লুপা করোর 1,000গী শেল-থুমগী তেংবাং পীখ্রে হায়না মহাক্না ফোংদোকখি। মসিনা নুপীশিংগী শেন্মিৎলোনগী মপাঙ্গল কনখৎহল্লগনি অমসুং লৈবাক শিনবা থুংনা লাখপতি দিদি 3 শেমগৎনবা পান্দমদা মতেং পাংগনি হায়না মহাক্না ফোংদোকখি। মহাক্না হায়খি মদুদি হৌখিবা চহি তরা অসিদা খুঙ্গংগী শেন্মিৎলোনদা অনৌবা খোংজেল লাকখ্রে। মহাক্না হায়খি মদুদি খুঙ্গংশিংদা লায়রবশিংগীদমক য়ুমশিং, লম্বী-থোংশিং, গ্যাস কনেক্সনশিং, ঈশিং কনেক্সনশিং অমসুং তোইলেৎশিং শাবগী থবকশিং পায়খৎলি। মসিনা খুঙ্গংগী লমদমশিংদা লুপা করোর লাখ কয়া ফংহল্লি। প্রধান মন্ত্রীনা হায়খি মদুদি অনৌবা থবক ফংবগী খুদোংচাবশিং শেমগৎলে, মসিনা শিন্মীশিং, লৌমীশিং, ভেহিকল ওপরেতরশিং অমসুং দুকান ফম্লিবশিংদা কান্নবা ফংহল্লে অমসুং মখোয়গীদমক্তা শেন্মিৎলোনগী অনৌবা লম্বীশিং ফংহল্লে। মসিনা মরুওইনা চহি কয়াগী মমাংদগী লায়রবা কম্ম্যুনিতীশিংদা কান্নবা ফংহল্লে হায়না মহাক্না অকনবা ৱাফম থমখি। মহাক্না পি.এম. আৱাস য়োজনাগী খুদম পনখি। মসিগী পান্দমদি লৈবাক অসিদা ইমুং অমত্তা য়ুম লৈতনা লৈহন্দনবা অমসুং মীপুম খুদিংমক্না মখোয়গী মকোক্কী মথক্তা মতম চুপ্পগী ওইবা য়ুম লৈহননি। মহাক্না হায়খি মদুদি হৌখিবা চহি তরা অসিদা স্কিম অসিগী মখাদা পর্মিনেন্ত হাউস করোর 4 হেন্না শাখ্রে। বিহার খক্তদা লায়রবা ইমুং লাখ 57না মতম চুপ্পগী ওইবা য়ুম ফংলে হায়না মহাক্না ফোংদোকখি। অসিগুম্বা য়ুমশিং অসি শেন্মিৎলোনগী ওইনা শোত্থরবা কাংলুপশিং, দলিতশিং অমসুং পসমান্দা ইমুংশিংগুম্বা শোত্থরবা অমসুং কা হেন্না শোত্থরবা -কম্ম্যুনিোতীশিংদা ফংহল্লি হায়না মহাক্না ফোংদোকখি। লাক্কদৌরিবা চহিশিংদা লায়রবশিংদা অহেনবা য়ুম করোর 3 ফংহল্লগনি হায়না শ্রী মোদীনা ফোঙদোকখি। মহাক্না হায়খি মদুদি ঙসি বিহারদা চাউরাক্না ইমুং লাখ 1.5না মখোয়গী অনৌবা য়ুমদা হোংলক্লি। মহাক্না হায়খি মদুদি লৈবাক শিনবা থুংনা লায়রবা ইমুং লাখ 15দা অনৌবা য়ুমশিং শাবগী অয়াবা পীখ্রে। বিহারদগী কান্নবা ফংলবা মীওই লাখ 3.5 য়াওরি। মহাক্না হায়খি মদুদি ঙসিদি, বিহারগী খুঙ্গংগী ইমুং 80,000 অমসুং অর্বানগী ইমুং লাখ 1 য়াওনা চাউরাক্না লায়রবা ইমুং লাখ 10দা মখোয়গী য়ুমগীদমক শেলগী তেংবাং পীখ্রে।

প্রধান মন্ত্রীনা হায়খি, "হৌখিবা চহি তরা অসি ভারতকী ইনফ্রাস্ত্রকচর দিবেলপমেন্তকী চহি তরা অমনি।" মসিগী মোদর্ন ইনফ্রাস্ত্রকচর অসিনা চাউখৎলবা ভারত অমগী য়ুম্ফম অদু মপাঙ্গল কনখৎহল্লি। মহাক্না পনখি মদুদি অহানবা ওইনা, খুঙ্গংগী ইমুং করোর 12 হেনবনা মখোয়গী য়ুমশিংদা তেপ ৱাতর কনেক্সন ফংখ্রে। ইমুং করোর 2.5 হেনবনা ইলেক্ত্রিফাই তৌখ্রে অমসুং গ্যাস স্তোভতা চাক থোংবগী ৱাখল্লোন লৈরমদবা মীওইশিংনা গ্যাস সিলিন্দর ফংখ্রে।  লাদাখ অমসুং সিয়াচেনগুম্বা খুদোংচাদবা মফমশিংদা, তঙাই ফদবা খুদোংচাবশিং ফংহনবদা অৱাবা লৈরবসু, লৈবাক অসিগী হৌজিক্কী মরুওইবশিং অদু উৎতুনা, 4G অমসুং 5G মোবাইল কনেক্তিবিতীশিং হৌজিক লৈরে হায়না মহাক্না ফোংদোকখি। প্রধান মন্ত্রীনা হেল্থকেয়রদা খুমাং চাউশিল্লকপগী মতাংদা পনখি। মহাক্না হায়খি মদুদি মতম অমদা দিল্লীগুম্বা মরুওইবা শহরশিংদা AIIMSগুম্বা ইন্সতিত্যুসনশিং অসি লৈরম্মি। মহাক্না AIIMS অসি হৌজিক দরভঙ্গাদা লিংখৎলে হায়না লাউথোকখি, অমসুং লৈবাক অসিদা মেদিকেল কোলেজশিংগী মশিং হৌখিবা চহি তরা অসিদা শরুক অনি হেনগৎলে হায়না ফোঙদোকখি অমসুং ঝনঝরপুরদা অনৌবা মেদিকেল কোলেজ অমা শাগৎপগী ৱাফমসু পনখি। খুঙ্গংশিংদা মগুন লৈবা হকশেলগী সেবা ফংহন্নবা, লৈবাক শীনবা থুংনা আয়ুশ্মান আরোগ্য মন্দির লাখ 1.5 হেন্না লিংখৎখ্রে, বিহারদা 10,000 হেন্না লিংখৎখ্রে হায়না মহাক্না অকনবা ৱাফম থমখি। মহাক্না হায়খি মদুদি জন ঔশধী কেন্দ্রশিংনা লায়রবশিং অমসুং মিদল ক্লাসকী মীওইশিংগীদমক চাউনা মতেং পাংলি। মখোয়না চাদা 80গী চাংদা দিস্কাউন্ত পীদুনা হিদাক-লাংথকশিং ফংহল্লি। বিহারদা হৌজিক জন ঔশধি কেন্দ্র 800 হেনখ্রে, মসিনা মীয়ামদা লুপা করোর 2,000গী মেদিকেলগী শেনফম কনবা ঙম্লে হায়না মহাক্না পনখি। আয়ুশ্মান ভারত স্কিমগী মখাদা বিহারদা ইমুং লাখ কয়ানা লেম্না লায়েংলি, মসিনা ইমুংশিং অসিগী লুপা করোর লিশিং কয়া কনবা ঙম্লে হায়না প্রধান মন্ত্রীনা ফোংদোকখি।

শ্রী মোদীনা হায়খি, ভারতনা রেলৱেজ, লম্বী অমসুং এয়রপোর্তকুম্বা ইনফ্রাস্ত্রকচরগী খুত্থাংদা কনেক্তিবিতী য়াম্না থুনা চাউখৎহল্লি। মহাক্না পতনাদা মেত্রো প্রোজেক্ত কয়া পায়খৎলি অমসুং লৈবাক অসিগী কুন মরি হেনবদা নমো ভারত রেপিদ রেল" সার্বিস হৌদোকখিবগী পাউজেল পীখি। মসিনা মফম অনি অসিগী মরক্তা চৎথোক-চৎশিন তৌবগী মতম য়াম্না হন্থহল্লগনি। মসিগী চাউখৎ-থৌরাং অসিনা সমস্তিপুর, দরভঙ্গা, মধুবানি অমসুং বেগুসরাইগী মীওই লাখ কয়াদা কান্নবা ফংহল্লগনি হায়না মহাক্না ফোংদোকখি।

প্রধান মন্ত্রীনা বিহারদা অনৌবা রেলৱে লাইন কয়া শঙ্গাবা অমসুং উরেপ উয়ুং তমখিবগী মতাংদসু পনখি। মহাক্না সহরসা অমসুং মুম্বাইগী মরক্তা মোদর্ন অমৃত ভারত ত্রেন সর্বিস হৌদোকখিবগী মতাংদসু পনখি। মসিনা শিন্মীশিংগী ইমুংশিংদা চাউনা কান্নবা পীগনি। মহাক্না হায়খি মদুদি সরকারনা বিহারগী মধুবানি অমসুং ঝনঝরপুর য়াওনা রেলৱে স্তেসন কয়া মোদর্নাইজ তৌরি।  মহাক্না মিথিলা অমসুং বিহারদা এয়র কন্নেক্তিবিতী অসি দরভঙ্গা এয়রপোর্তকা লোইননা য়াম্না ফগৎলে অমসুং পতনা এয়রপোর্ত পাকথোক চাউথোকহনবগী থবক চত্থরি হায়খি। মহাক্না হায়খি, "মসিগুম্বা চাউখৎ-থৌরাংগী প্রোজেক্তশিং অসিনা বিহারদা অনৌবা থবক পীবগী খুদোংচাবা পীরি।"

শ্রী মোদীনা হায়খি, লৌমীশিং অসি খুঙ্গংগী শেন্মিৎলোনগী মপাঙ্গলনি, মপাঙ্গল অসি হেন্না মপাঙ্গল কনখৎলক্লিবমখৈ খুঙ্গংশিং অদু হেন্না মপাঙ্গল কনখৎলগনি অমসুং মসিনা মরম ওইদুনা লৈবাক অসিসু মপাঙ্গল কনখৎলগনি। মহাক্না মিথিলা অমসুং কোসিগী লমদমশিংদা ঈশিং-ঈচাউনা মরম ওইদুনা থেংনরিবা খুদোংচাদবশিং অদু পনখি। বিহারদা ঈশিং-ঈচাউগী শাফু হন্থহন্নবা সরকারনা লুপা করোর 11,000 থাদনবা শেম-শারি হায়না মহাক্না ফোংদোকখি। মহাক্না হায়খি মদুদি ইনভেস্তমেন্ত অসিনা বাগমতি, ধার, বুধি গন্দক অমসুং কোসীগুম্বা তুরেলশিংদা দামশিং শেমগৎপদা মতেং পাংগনি। মহাক্না মখা তাখি মদুদি তুরেলগী ঈশিংগী খুত্থাংদা ইরিগেসনগী এরেঞ্জমেন্তশিং লৈহন্দুনা, কেনেলশিং শেমগৎকনি। মহাক্না মখা তাখি, "মসিগী খোংথাং অসিনা ঈশিং-ঈচাউগা মরী লৈনবা ইশুশিং হন্থহনবতা নত্তনা লৌমী খুদিংমক্কী লৌফমদা মতিক চাবা ঈশিং ফংহনগনি।"

শ্রী মোদীনা হায়খি, মিথিলাগী চৎনবীগী মরু ওইবা পোৎলম অমা ওইরিবা মখানা হৌজিক মালেমগী ওইনা সুপরফুদ অমা ওইনা শকখঙনরক্লি। মহাক্না হায়খি মদুদি মিথিলাগী পোৎলম অমা ওইনা মখানা GI তেগ, লমদম অসিগী প্রদক্ত অমা ওইনা ওফিসিএল সর্তিফিকেৎ পীখ্রে। মহাক্না মখা তাখি মদুদি মাখানা রিসর্চ সেন্তর অসি নেস্নেল স্তেতস পীখ্রে। মহাক্না মখানা বোর্দকী বজেৎ লাউথোকখিবা অদুসু পনখি। মসিনা মখানা লৌমীশিংগী পুন্সিদা অহোংবা পুরক্লগনি হায়না পানরি। বিহারগী মখানা অসি সুপরফুদ অমা ওইনা মালেমগী কৈথেলশিংদা য়ৌরগনি হায়না মহাক্না অকনবা ৱাফম থমখি। বিহারদা নেস্নেল ইন্সতিত্যুৎ ওফ ফুদ তেক্নোলোজী এন্দ মেনেজমেন্ত লিংখৎলি হায়না মহাক্না পনখি। মসিনা নহারোলশিংদা ফুদ প্রোসেসিংগা মরী লৈনবা অপীকপা ইন্তর্প্রাইজশিং লিংখৎপদা মতেং পাংগনি। বিহারনা লৌউ-শিংউগা লোয়ননা ঙা য়োকপগী লমদসু লেপ্পা লৈতনা খুমাং চাউশিল্লি হায়না মহাক্না অকনবা ৱাফম থমখি। ঙা য়োকপশিংনা হৌজিক্তি কিসান ক্রেদিৎ কার্দকী কান্নবা ফংলি, মসিনা ঙা য়োকপগী লমদা থবক তৌরিবা ইমুং কয়াদা কান্নবা ফংহল্লি। পি.এম. মতস্য সমপদা য়োজনাগী মখাদা বিহারদা লুপা করোর চাম্মরোমগী প্রোজেক্তশিং পায়খৎলে হায়না মহাক্না ফোংদোকখি।

এপ্রিল 22দা জম্মু অমসুং কাশ্মীরগী পহলগামদা তেরোরিস্তশিংনা মীচম মীয়ামবু তমথিনা হাৎখিবগী মতাংদা অৱাবা ফোঙদোক্লদুনা শ্রী মোদীনা হায়খি মদুদি লৈবাক পুম্বনা অৱাবা ফোংদোক্লি অমসুং অৱাবা তারিবা ইমুং মনুংগা লোয়ননা অমত্তা ওইনা লেপ্লি। মহাক্না থাজবা পীখি মদুদি সরকারনা লায়েংলিবা মীওইশিং অদু অথুবা মতমদা ফগৎহন্নবা হোৎনরি। মখোয়গী মচানুপাশিং, মচিন মনাওশিং, নৎত্রগা লাইফ পার্তনরশিং লৈখিদবা ইমুং মনুংগী অৱাবদা শরুক য়াখি। ভিক্তিমশিং অসি তোঙান তোঙানবা লোল অমসুং লমদমগী ওইবা বেকগ্রাউন্দদগী লাকপনি হায়না পল্লদুনা হায়খি। মখোয় খরনা বেঙ্গালী, কন্নরা, মরাথী, ওরিয়া, গুজরাতি ঙাংই অমসুং খরনা বিহারদগীনি। কারগিলদগী কন্যাকুমারী ফাওবদা, লৈবাক শীনবা থুংনা হায়রিবা লানফম অসিগী মতাংদা অৱাবা অমসুং অশাওবা অসি মান্ননা লৈ হায়না পল্লদুনা শ্রী মোদীনা হায়খি মদুদি হায়রিবা এতেক অসি খুৎলায় পায়দবা তুরিস্ত খক্তদা নত্তে, মসি ভারতকী থম্মোয়দা তৌবা এতেক অমনি। "এতেক অসিগী থৌদাং লৌরিবা তেরোরিস্তশিং অমসুং মসিদা থৌদাং লৌরিবা মীওইশিং অসি মখোয়গী ৱাখল শাগৎপা ঙমদবা মওংদা চৈরাক ফংলগনি।" হায়না মহাক্না অকনবা মওংদা ফোংদোকখি। মহাক্না হায়খি মদুদি তেরোরিজমগী লেমহৌরিবা স্ত্রোংহোল্দশিং মুত্থৎনবা মতম অদু য়ৌরে। মহাক্না হায়খি, " ভারত মচা করোর 140গী ৱিলপাৱরনা অকি তুজুংবা চত্থরিবা মীওইশিংবু হৌজিক মাইথিবা পীরগনি ।"

প্রধান মন্ত্রীনা বিহারগী লৈহাওদগী ভারতনা তেরোরিস্ত খুদিংমক, মখোয়গী হেন্দলরশিং অমসুং মখোয়গী শৌগৎপশিং মশক খঙদোক্কনি, ত্রেক তৌগনি অমসুং চৈরাক পীরগনি হায়না ফোঙদোকখি। ভারতনা মখোয়বু মালেমগী অরোইবা ফাওবা তানগনি হায়না মহাক্না অকনবা ৱাফম থমখি। তেরোরিজম্না ভারতকী স্পিরিত অসি কৈদৌঙৈদা কায়হল্লরোই অমসুং তেরোরিজম্না চৈরাক ফংদনা তোক্লোই। জস্তিস ফংহন্নবা হোৎনবা য়াবা খুদিংমক পাংথোক্কনি অমসুং লৈবাক পুম্বনা তেরোরিজমগী মায়োক্তা লেপ্পা অসিদা অচেৎপা থাজবা থম্লি।" মহাক্না মখা তারদুনা হায়খি মদুদি মীওইবা খুন্নাইদা থাজবা থম্বা মীওই খুদিংমক্না অসিগুম্বা মতম অসিদা ভারতকা লোয়ননা লেপ্লি। মহাক্না লৈবাক কয়াগী মীয়াম অমসুং লুচিংবশিংবু অৱাবা মতমদা ভারতকীদমক লেপ্পিবা অমসুং শৌগৎপগীদমক থাগৎপা ফোংদোকখি।

শ্রী মোদীনা হায়খি, শান্তি অমসুং সেক্যুরিতী অসি য়াম্না থুনা চাউখৎনবা খ্বাইদগী মরুওইবা মথৌ তাই। চাউখৎলবা ভারত অমগীদমক চাউখৎলবা বিহার অমা মথৌ তাই। বিহারদা চাউখৎপা পুরক্নবা অমসুং রাজ্য অসিগী সেক্সন খুদিংমক্তা অমসুং মফম খুদিংমক্তা চাউখৎ-থৌরাংগী কান্নবা ফংহন্নবা হোৎনরি হায়না মহাক্না ফোংদোকখি। মহাক্না পঞ্চায়তি রাজ নুমিৎকী থৌরম অসিদা শরুক য়াবগীদমক্তা মীপুম খুদিংমক্তা থাগৎপা ফোংদোকখি।

বিহারগী গভর্নর, শ্রী আরিফ মোহম্মদ খান, বিহারগী মুখ্য মন্ত্রী, শ্রী নিতিশ কুমার, কেন্দ্রগী মন্ত্রীশিং শ্রী রাজীব রঞ্জন সিংহ, শ্রী জিতেন রাম মঞ্জি, শ্রী গিরিরাজ সিংহ, শ্রী চিরাগ পাসৱান, শ্রী নিতিয়ানন্দ রাই, শ্রী রাম নাথ থাকুর, দোক্তর রাজ ভুশন চৌধরী অমসুং অতৈ মকোক থোংবা মীওইশিংসু থৌরম অদুদা শরুক য়াখি।

বেকগ্রাউন্দ

প্রধান মন্ত্রীনা বিহারগী মধুবানিদা পাংথোক্কদৌরিবা নেস্নেল পঞ্চায়তি রাজ দেগী থৌরমদা শরুক য়াখ্রে। মহাক্না নেস্নেল পঞ্চায়ৎ এৱার্দসু পীখ্রে, মসিনা খ্বাইদগী ফবা থবক তৌরিবা পঞ্চায়ৎশিংবু মশক খঙহল্লগনি অমসুং থৌনা পীরগনি।

প্রধান মন্ত্রীনা বিহারগী গোপালগঞ্জ দিস্ত্রিক্তকী হাথুয়াদা চাউরাক্না লুপা করোর 340 রোম ওইগদবা রেল অনলোদিং ফেসিলিতীগা লোয়ননা LPG বোতলিং প্লান্ত অমগী উরেপ-উয়ুং তমখ্রে। মসিনা সপ্লাই চেন অসি স্ত্রীমলাইন তৌবদা অমসুং বাল্ক LPG ত্রান্সপোর্তেসনগী ইফিসেন্সী হেগৎহনবদা মতেং পাংগনি।

লমদম অসিদা পাৱর ইনফ্রাস্ত্রকচর হেনগৎহন্নবা প্রধান মন্ত্রীনা লুপা করোর 1,170গী প্রোজেক্তশিংগী উরেপ উয়ুং তমখহরে অমসুং রিভেম্প দিস্ত্রিব্যুসন সেক্তর স্কিমগী মখাদা বিহারদা পাৱর সেক্তরদা লুপা করোর 5,030গী প্রোজেক্ত কয়া অমসু শঙ্গাখ্রে।

লৈবাক শীনবা থুংনা রেল কন্নেক্তিবিতী হেনগৎহন্নবা মহাক্কী অচেৎপা ফিরেপ অদুগী মতুং ইন্না প্রধান মন্ত্রীনা সাহারসা অমসুং মুম্বাইগী মরক্তা অমৃত ভারত এক্সপ্রেস, জয়নগর অমসুং পতনাগী মরক্তা নমো ভারত রেপিদ রেল অমসুং পিপ্রা অমসুং সাহারসা অমসুং সাহারসা অমসুং সমস্তিপুরগী মরক্তা ত্রেনশিং লমথাখ্রে। মহাক্না সুপৌল পিপ্রা রেল লাইন, হাসানপুর বিথান রেল লাইন অমসুং চাপ্রা অমসুং বগাহাদা লেন অনিগী রেল ওভর ব্রিজ অনিসু উরেপ উয়ুং তমখ্রে। মহাক্না খাগরিয়া-আলাউলি রেল লাইন জাতিদা কত্থোকখহরে। প্রোজেক্তশিং অসিনা কন্নেক্তিবিতী ফগৎহল্লগনি অমসুং লমদম অসিগী অপুনবা সোসিও-ইকনোমিক দিবেলপমেন্ত পুরক্কনি।

প্রধান মন্ত্রীনা কম্ম্যুনিতী ইনভেস্তমেন্ত ফন্দগী মখাদা বিহারগী SHG লাখ 2 হেনবদা লুপা করোর 930গী কান্নবশিং দীনদয়াল অন্ত্যোদয়া য়োজনা - নেস্নেল রুরেল লাইবলিহুদস মিসন (DAY-NRLM) গী মখাদা য়েন্থোকখ্রে।

প্রধান মন্ত্রীনা PMAY-গ্রামিনগী অনৌবা কান্নবা ফংলবা মীওই লাখ 15দা সেংসন লেত্তরশিংসু খুৎশিন্নখ্রে অমসুং লৈবাক শীনবা থুংনা PMAY-Gগী কান্নবা ফংলবা মীওই লাখ 10দা ইন্সতোলমেন্ত পীখহরে। মহাক্না বিহারদা PMAY-Gগী য়ুম লাখ 1 অমসুং PMAY-Uগী য়ুম 54,000গী গ্রীহ প্রবেস তৌদুনা কান্নবা ফংলবা মীওই খরদা সোশিং খুৎশিন্নখ্রে।

National Panchayati Raj Day programme in Madhubani, Bihar. https://t.co/cM06fBSkvY

— Narendra Modi (@narendramodi) April 24, 2025

बीते दशक में पंचायतों को सशक्त करने के लिए एक के बाद एक कदम उठाए गए हैं: PM @narendramodi pic.twitter.com/9QDhHcQCxw

— PMO India (@PMOIndia) April 24, 2025

बीते दशक में ग्रामीण अर्थव्यवस्था को नई गति मिली है: PM @narendramodi pic.twitter.com/us591MzE2w

— PMO India (@PMOIndia) April 24, 2025

बीता दशक, भारत के इंफ्रास्ट्रक्चर का दशक रहा है: PM @narendramodi pic.twitter.com/b013LVojl2

— PMO India (@PMOIndia) April 24, 2025

मखाना, आज देश और दुनिया के लिए सुपरफूड है, लेकिन मिथिला की तो ये संस्कृति का हिस्सा है।

इसी संस्कृति को ही हम यहां की समृद्धि का भी सूत्र बना रहे हैं: PM @narendramodi pic.twitter.com/LeAiQKv5km

— PMO India (@PMOIndia) April 24, 2025

140 करोड़ भारतीयों की इच्छाशक्ति अब आतंक के आकाओं की कमर तोड़कर रहेगी: PM pic.twitter.com/kKlxlazkAU

— PMO India (@PMOIndia) April 24, 2025

Terrorism will not go unpunished.

Every effort will be made to ensure that justice is done.

The entire nation is firm in this resolve: PM pic.twitter.com/ojdN6fcEpD

— PMO India (@PMOIndia) April 24, 2025

***