Ka kam Khadi bad Village Industries, kaba ai bor ïa ka jingngeit jong ka jinglah kyrshan dalade ha ka ri, ym tangba ka la kot sha ki kyrdan ba thymmai ha kine ki 11 snem ba la dep hapoh ka jingïalam jong u Myntri Rangbah duh Narendra Modi bad ka jingïalam jong ka tnad Micro, Small and Medium Enterprises (MSME), hynrei ka la wanrah jingkyrmen ruh ia ki klur ngut ki briew kiba sah ha ki jaka nongkyndong. Ka Khadi, ka pateng jong u Pujya Bapu, kam dei shuh tang ka jain, hynrei ka la long ka dak jong ka jingthaw ia ka ‘Ek Bharat, Shreshtha Bharat’. La ong u Manoj Kumar, Chairman ka KVIC haba pyllait paidbah ïa ki jingkheiñ jingdiah ba shipor jong ka Khadi and Village Industries na ka bynta u snem mang tyngka 2024-25 ha ka ophis kaba don ha Rajghat, New Delhi ha ka sngi Nyngkong. U la pyntip ba ka KVIC ka la thaw rekod thymmai ha ka jingpynmih mar, jingdie bad jingpynmih lad ioh kam ba thymmai ha u snem mang tyngka 2024-25. Ha kine ki 11 snem ba la dep, ka la don ka jingkiew kaba 447 percent ha ka jingdie, 347 percent ha ka jingpynmih mar bad 49.23 percent ha ka jingpynmih lad ioh kam. Kumba la ong, ha u snem mang tyngka 2023-24, ka la don ka jingkiew kaba 399.69% ha ka jingdie bad 314.79% ha ka jingpynmih haba ianujor bad u snem 2013-14, u la bynrap.

U Chairman Manoj Kumar u la ong shuh shuh ba kane ka jingtreikam bha jong ka KVIC ka la noh synniang shibun ban pynurlong ïa ka jingkut jingmut na ka bynta ka ‘Viksit Bharat’ shuwa u snem 2047 bad ban pynlong ïa ka India kum ka ri kaba lai ha ka ïoh ka kot jong ka pyrthei. U la pynshong nongrim ïa kane ka jingjop ha ka jingai mynsiem jong u Pujya Bapu, ka jingkular jong u Myntri Rangbah duh Narendra Modi, ka jingïalam jong ka Tnad MSME bad ka jingtrei shitom jong ki klur ngut ki nongtrei kti kiba don ha ki shnong ba jngai jong ka Ri. U Chairman ka KVIC u la iasam ba katba ka jingpynmih ia ki mar Khadi and Village Industry ka long T. 26109.07 klur ha u snem mang tyngka 2013-14, ka la kiew haduh saw shah sha ka T. 116599.75 klur ha u snem mang tyngka 2024-25 da ka jingkiew kaba 347 percent. Katba ka jingdie ka long T. 31154.19 klur ha u snem mang tyngka 2013-14, ka la kiew haduh san shah da ka jingkiew ka bym pat ju jia mynno mynno kaba long 447 percent ban poi sha ka T. 170551.37 klur ha u snem mang tyngka 2024-25, kaba dei ka jingdie kaba heh tam haduh mynta.

Haba ai jingkren sha ki lad pathai khubor, u la ai jingmut ba la iohi ruh ia ka jingkiew ka bym pat ju jia mynno mynno ha ka jingpynmih ia ki jain Khadi ha kine ki 11 snem ba la dep. Katba ka jingpynmih ia ki jain Khadi ka long T. 811.08 klur ha u snem mang tyngka 2013-14, ka la kiew da 366 percent bad ka la kiew saw shah shiteng sha ka T. 3783.36 klur ha u snem mang tyngka 2024-25, kaba dei ka jingtreikam kaba bha tam haduh mynta. Ka la don ruh ka jingkiew kaba khraw ha ka jingdie ia ki jain Khadi. Katba ka jingdie jong ka long tang T. 1081.04 klur ha u snem mang tyngka 2013-14, ka la kiew kumba hynriew shah shiteng sha ka T. 7145.61 klur ha u snem mang tyngka 2024-25 ryngkat ka jingkiew kaba 561 percent. Ka jingkyntiew ia ka Khadi da u Myntri Rangbah duh Narendra Modi na ka rynsan kaba kham heh ka la ktah shibun ia ka jingdie ia ki jain Khadi, u la ong.

Haba kren halor ka jingthmu jong ka Khadi bad Village Industries Commission u la ong ba ka jingthmu ba kongsan jong ka KVIC ka long ban plie ki lad ioh kam ha ki jaka nongkyndong. Ha kane ka bynta ruh ka KVIC ka la thaw rekod ha kine ki 11 snem ba la dep. Katba ka jingioh kam baroh ka long 1.30 klur ha u snem mang tyngka 2013-14, ka la kiew sha ka 1.94 klur ha u snem 2024-25 da ka jingkiew kaba 49.23 percent. Ka la don ruh ka jingkiew ka bym pat ju jia ha ka kam khaii pateng jong ka Khadi bad Village Industries Bhawan, New Delhi. Katba ka kam khaii pateng jong u Bhavan ka long T. 51.02 klur ha u snem mang tyngka 2013-14, ka la kiew la jan 2 shah bad ka la kot sha ka T.110.01 klur ha u snem mang tyngka 2024-25 da ka jingkiew kaba 115 percent. Naduh ba la sdang ia ka skhim Pradhan Mantri Employment Generation Programme (PMEGP) la seng haduh 1018185 tylli ki unit, na ka bynta kane ka sorkar India ka la sam ia ka subsidy kaba long T. 27166.07 klur pyrshah ia ka ram kaba T. 73348.39 klur. Haduh mynta 90,04,541 ngut ki briew ki la ioh kam lyngba ka PMEGP.

U la ong ba da ka jingthmu ban ai kam ai jam ia ki briew ha ki jaka nongkyndong hapoh ka Gramodyog Vikas Yojana Scheme, ka KVIC ka la pynkiew palat ar shah ia ka mang tyngka kaba T.25.65 klur ha u snem mang tyngka 2021-22 da 134 percent sha ka T.60 klur ha u snem mang tyngka 2025-26. Haduh mynta, ki don 39244 tylli ki kor shna khiew kiba pyniaid da ka bording, 227049 tylli ki synduk ri ngap bad ki jaka buh ngap, 2344 tylli ki kor shna dieng pyniwbih kiba treikam hi bad kiba lah ban pyndonkam da ki kjat, 7735 tylli ki tiar shna juti bad maramot, 964 tylli ki kor shna ia ki pliang da ki kot, 3494 ki mar kiba iadei bad ki AC, mobile, kam suh jain, kam shna ia ki tiar eletrik, kam shna ia ki kor um, 4555 tylli ki turnwood, ki wastewood craft, ki kor shna jinglehkai dieng bad kumjuh ruh 2367 tylli ki kor shna gur na u snepkor, umphniang ghani bad sohkyntoi la sam hapoh ka skhim Gramodyog Vikas Yojana. Lada ngi kren shaphang ki lai tylli ki snem mang tyngka ba la dep, la sam 22284 tylli ki kor bad ki tiar ha u snem 2022-23, 29854 tylli ha u snem mang tyngka 2023-24 bad kaba bun tam ka long 37218 tylli ki kor bad ki tiar ha u snem mang tyngka 2024-2025. Hapoh ka Gramodyog Vikas Yojana, ka KVIC ka la noh synniang shibun ha kaba thaw ia ka India kaba lah ban kyrshan dalade da kaba sam haduh 287752 tylli ki machine, ki tiar haduh mynta.

Haba kren halor ka jingnoh synniang kaba khraw sha ka jingpynkupbor ïa ki kynthei u la ong shuh shuh ba ha kine ki 10 snem ba la dep, 7,43,904 ngut ki shah hikai ki la ioh ka jinghikai pyntbit lyngba 18 tylli ki tnad bad 17 tylli ki jaka ai jinghikai bym dei jong ka KVIC, ha kaba 57.45 percent kata, 4,27,370 ngut ki dei ki kynthei. Lait na kane, 80 percent na ki 5 lak ngut ki nongshna tiar Khadi ki dei ruh ki kynthei. Ha kine ki 11 snem ba ladep, la pynkiew ia ka jingsiew jong ki nongshna tiar Khadi da 275 percent katba ha kine ki lai snem ba ladep la pynkiew da 100 percent.

****