تخلیق کاروں کی دنیا اور ان کی معیشت ایک بنیادی تبدیلی سے گزر رہی ہے۔ مرکزی وزیر اطلاعات و نشریات اشونی ویشنو نے یہ بات یکم سے 4 مئی کے دوران ممبئی میں ہونے والی پہلی ورلڈ آڈیو ویژول اینڈ انٹرٹینمنٹ سمٹ سے قبل میڈیا سے گفت و شنید کرتے ہوئے کہی۔ اس گفت و شنید میں قومی اور علاقائی میڈیا سے تعلق رکھنے والے تقریبا 20 میڈیا ہاؤسز نے شرکت کی۔ درپیش چیلنجوں پر بات کرتے ہوئے مرکزی وزیر نے کہا کہ ٹکنالوجی کی آمد کے ساتھ ، پرانا ماڈل نئے ماڈل کو راستہ دے رہا ہے ، مواقع پیدا کرنے کے ساتھ ساتھ چیلنج بھی پیدا کررہا ہے۔ انھوں نے کہا کہ میڈیا کی دنیا کی شکل بدل رہی ہے اور انھوں نے ایک ملک کی حیثیت سے نئے ماڈل کا جواب دینے کی اجتماعی ضرورت پر زور دیا۔ مثال دیتے ہوئے انھوں نے کہا کہ وہ دن گئے جب مواد بنانے کے لیے ایک بڑے اسٹوڈیو کی ضرورت ہوتی تھی۔ آج جھارکھنڈ یا کیرالہ کے کسی دور دراز گاؤں کا تخلیق کار اچھا معیار تخلیق کر سکتا ہے اور لاکھوں ویوز حاصل کر سکتا ہے۔

انھوں نے کہا کہ تخلیق کار کی معیشت تیزی سے ترقی کر رہی ہے۔ وزیر موصوف نے کہا کہ ہمارے دور اندیش وزیر اعظم نے عالمی سطح پر بھارت کی سافٹ پاور کو فروغ دے کر تخلیق کاروں کے کام اور معیشت میں ان کے تعاون کو تسلیم کیا۔ انھوں نے مزید کہا کہ ویوز میڈیا اور تفریح کے لیے ایک عالمی پلیٹ فارم کے طور پر خود کو تیار کرنا چاہتا ہے ، جس طرح داووس معاشی پالیسیوں کے لیے ایک عالمی پلیٹ فارم کے طور پر کام کرتا ہے۔.

ویوز 2025 کے لیے ایک لاکھ سے زیادہ رجسٹریشن کے ساتھ بھارت کی تخلیقی معیشت کو زبردست فروغ ملا ہے۔ سرفہرست جدت طرازوں کو ایوارڈز سے نوازا جائے گا، بدلتے ہوئے عالمی میڈیا اور تفریحی منظر نامے میں ان کی خدمات کو سراہا جائے گا۔ جناب ویشنو نے کہا کہ ہم دنیا کو اپنے تخلیق کاروں سے جوڑنے کا ایک طریقہ تلاش کر رہے ہیں۔ وزیر موصوف نے کہا کہ ویوز تخلیق کاروں، خریداروں اور مارکیٹوں کے درمیان اسکیل ایبل تخلیقی حل کے لیے ایک عالمی کڑی کے طور پر ابھر رہا ہے۔ ویوز کے ذریعے خریداروں اور فروخت کنندگان کو ایک ایسا پلیٹ فارم مل رہا ہے، جہاں تخلیق کار اپنا مواد پیش کر سکتے ہیں اور کمپنیاں معیاری تخلیقی کام حاصل کر سکتی ہیں۔

اس گفت و شنید میں حصہ لیتے ہوئے مختلف میڈیا اداروں کے سربراہوں نے ایم اینڈ ای سیکٹر میں پالیسی سازوں، تخلیق کاروں، صنعت کے سرکردہ افراد، ٹیکنالوجی کمپنیوں اور اسٹارٹ اپس کو ایک پلیٹ فارم پر لانے کے لیے ویوز کی شکل میں ایک نئے تصور کو تصور کرنے کے لیے حکومت کو مبارکباد دی۔

وزارت اطلاعات و نشریات کے سکریٹری جناب سنجے جاجو نے تمام شرکا اور معززین کا خیرمقدم کیا اور میڈیا کے منظرنامے کے مستقبل کی تشکیل میں اجتماعی مکالمے کی اہمیت کو اجاگر کیا۔ انھوں نے مختلف پلیٹ فارمز پر اسٹیک ہولڈروں کے ساتھ رابطے کے لیے وزارت کے عزم پر زور دیا اور ویوز 2025 سے قبل میڈیا تنظیموں کی فعال شرکت کو سراہا۔

***

(ش ح – ع ا)

U. No. 54