ഭാരതത്തിന്റെ ചീഫ് ജസ്റ്റിസ്, ജസ്റ്റിസ് സഞ്ജീവ് ഖന്ന ജി, ജസ്റ്റിസ് ബി.ആർ. ഗവായ് ജി, ജസ്റ്റിസ് സൂര്യകാന്ത് ജി, കേന്ദ്ര മന്ത്രിസഭയിലെ എന്റെ സഹപ്രവർത്തകൻ ശ്രീ അർജുൻ റാം മേഘ്‌വാൾ ജി, അറ്റോർണി ജനറൽ ശ്രീ വെങ്കിട്ടരമണി ജി, ബാർ കൗൺസിൽ ചെയർമാൻ മനൻ കുമാർ മിശ്ര ജി, സുപ്രീം കോടതി ബാർ അസോസിയേഷൻ പ്രസിഡന്റ് ശ്രീ കപിൽ സിബൽ ജി, സുപ്രീം കോടതി ജഡ്ജിമാർ, മുൻ ചീഫ് ജസ്റ്റിസ്മാർ, മറ്റ് വിശിഷ്ടാതിഥികളേ, സ്ത്രീകളേ, മാന്യരേ!

ഭരണഘടനാ ദിനത്തിൽ നിങ്ങൾക്കും എല്ലാ പൗരന്മാർക്കും ആശംസകൾ. ഭാരതത്തിന്റെ ഭരണഘടനയുടെ 75-ാം വർഷം രാജ്യത്തിനു മുഴുവനും അഭിമാനകരമായ കാര്യമാണ്. ഇന്ന്, ഭാരതത്തിന്റെ ഭരണഘടനയ്ക്കും ഭരണഘടനാ അസംബ്ലിയിലെ എല്ലാ അംഗങ്ങൾക്കും ഞാൻ വിനയപൂർവ്വം ശ്രദ്ധാഞ്ജലി അർപ്പിക്കുന്നു.

സുഹൃത്തുക്കളേ,

ഈ സുപ്രധാന ജനാധിപത്യ ഉത്സവത്തെ നാം അനുസ്മരിക്കുന്ന വേളയിൽ, ഇന്ന് മുംബൈ ഭീകരാക്രമണത്തിന്റെ വാർഷികം കൂടിയാണ് എന്ന കാര്യം നാം മറക്കരുത്. ഈ ആക്രമണത്തിൽ ജീവൻ നഷ്ടപ്പെട്ടവർക്ക് ഞാൻ ശ്രദ്ധാഞ്ജലി അർപ്പിക്കുകയും ഭാരതത്തിന്റെ സുരക്ഷയെ വെല്ലുവിളിക്കുന്ന ഏതൊരു തീവ്രവാദ സംഘടനയ്ക്കും എതിരെ നിർണ്ണായകമായി പ്രതികരിക്കാനുള്ള രാജ്യത്തിന്റെ ദൃഢനിശ്ചയം ആവർത്തിക്കുകയും ചെയ്യുന്നു.

സുഹൃത്തുക്കളേ,

ഭരണഘടനാ അസംബ്ലിയിൽ നടന്ന വിപുലമായ ചർച്ചകളിൽ ഭാരതത്തിന്റെ ജനാധിപത്യ ഭാവിയെക്കുറിച്ച് ഗൗരവമേറിയ ചർച്ചകൾ നടന്നു. ആ സംവാദങ്ങളെക്കുറിച്ച് നിങ്ങൾക്കെല്ലാവർക്കും നല്ല അറിവുണ്ട്. ആ സമയത്ത്, ഡോ. ബാബാസാഹേബ് അംബേദ്കർ പറഞ്ഞു, "ഭരണഘടന വെറും അഭിഭാഷകരുടെ രേഖയല്ല... അതിന്റെ ആത്മാവ് എല്ലായ്പ്പോഴും കാലഘട്ടത്തിന്റെ ആത്മാവാണ്." ബാബാസാഹേബ് പരാമർശിച്ച ചൈതന്യം പരമപ്രധാനമാണ്. മാറുന്ന കാലത്തിനും സാഹചര്യങ്ങൾക്കും അനുസൃതമായി അതിനെ വ്യാഖ്യാനിക്കാൻ നമ്മുടെ ഭരണഘടനയിലെ വ്യവസ്ഥകൾ നമ്മെ അനുവദിക്കുന്നു. ഭാരതത്തിന്റെ അഭിലാഷങ്ങളും സ്വപ്നങ്ങളും കാലക്രമേണ പുതിയ ഉയരങ്ങളിലെത്തുമെന്നും സ്വതന്ത്ര ഭാരതത്തിന്റെയും ഭാരതത്തിലെ പൗരന്മാരുടെയും ആവശ്യങ്ങളും വെല്ലുവിളികളും പരിണമിക്കുമെന്നും നമ്മുടെ ഭരണഘടനാ ശിൽപികൾ തിരിച്ചറിഞ്ഞു. അങ്ങനെ, അവർ നമ്മുടെ ഭരണഘടനയെ വെറും ഒരു നിയമരേഖയായി വിടാതെ, അതിനെ ചലനാത്മകവും തുടർച്ചയായി ഒഴുകുന്നതുമായ ഒരു പ്രവാഹമാക്കി മാറ്റി.

സുഹൃത്തുക്കളേ,

നമ്മുടെ ഭരണഘടന നമ്മുടെ വർത്തമാനകാലത്തിനും ഭാവിക്കും ഒരു വഴികാട്ടിയായി വർത്തിക്കുന്നു. കഴിഞ്ഞ 75 വർഷമായി, രാജ്യം എന്ത് വെല്ലുവിളികൾ നേരിട്ടാലും, നമ്മുടെ ഭരണഘടന ഉചിതമായ പരിഹാരങ്ങൾ നൽകി. ജനാധിപത്യത്തിന് കാര്യമായ വെല്ലുവിളികൾ നേരിട്ട ഒരു കാലഘട്ടമായ അടിയന്തരാവസ്ഥയിൽ പോലും, നമ്മുടെ ഭരണഘടന ശക്തമായി ഉയർന്നുവന്നു. നമ്മുടെ ഭരണഘടന രാജ്യത്തിന്റെ എല്ലാ ആവശ്യങ്ങളും പ്രതീക്ഷകളും നിറവേറ്റിയിട്ടുണ്ട്. ഭരണഘടനയുടെ ഈ ശക്തി ഇന്ന് ബാബാസാഹേബിന്റെ ഭരണഘടന ജമ്മു കശ്മീരിലും പൂർണ്ണമായും നടപ്പിലാക്കുന്നുവെന്ന് ഉറപ്പാക്കി. ആദ്യമായിട്ടാണ് അവിടെ ഭരണഘടനാ ദിനം ആഘോഷിക്കുന്നത്.

സുഹൃത്തുക്കളേ,

ഭാരതം വലിയൊരു പരിവർത്തനത്തിന്റെ കാലഘട്ടത്തിലൂടെ കടന്നുപോകുകയാണ്, അത്തരം നിർണായക സമയങ്ങളിൽ, നമ്മുടെ ഭരണഘടന നമുക്ക് വഴികാട്ടിയായി നിലകൊള്ളുന്നു, നമുക്ക് ഒരു വഴികാട്ടിയായി തുടരുന്നു.

സുഹൃത്തുക്കളേ,

ഭാരതത്തിന്റെ മുന്നോട്ടുള്ള പാത മഹത്തായ സ്വപ്നങ്ങളും പ്രതിജ്ഞകളും നിറവേറ്റുക എന്നതാണ്. ഇന്ന്, ഓരോ പൗരനും ഒരൊറ്റ ലക്ഷ്യത്താൽ ഐക്യപ്പെടുന്നു - ഒരു 'വികസിത് ഭാരത്' (വികസിത ഇന്ത്യ) സൃഷ്ടിക്കൽ. 'വികസിത് ഭാരത്' എന്നാൽ ഓരോ പൗരനും ജീവിത നിലവാരവും അന്തസ്സും ആസ്വദിക്കുന്ന ഒരു രാഷ്ട്രം എന്നാണ്. ഭരണഘടനയുടെ കാതലായ ഒരു ആശയമായ സാമൂഹിക നീതിക്കുള്ള ഒരു പ്രധാന വാഹനമാണിത്. അതിനാൽ, സമീപ വർഷങ്ങളിൽ സാമ്പത്തികവും സാമൂഹികവുമായ സമത്വം പ്രോത്സാഹിപ്പിക്കുന്നതിന് നിരവധി നടപടികൾ സ്വീകരിച്ചിട്ടുണ്ട്. കഴിഞ്ഞ ദശകത്തിൽ, മുമ്പ് ബാങ്കുകളിലേക്ക് പ്രവേശനം ലഭിക്കാതിരുന്ന, 53 കോടിയിലധികം ഇന്ത്യക്കാർ ബാങ്ക് അക്കൗണ്ടുകൾ തുറന്നു. കഴിഞ്ഞ പത്ത് വർഷത്തിനിടെ, തലമുറകളായി വീടില്ലാത്ത നാല് കോടി ഭവനരഹിതരായ പൗരന്മാർക്ക് സ്ഥിരമായ വീട് നൽകി. കഴിഞ്ഞ 10 വർഷത്തിനിടെ, നിരവധി വർഷങ്ങളായി വീടുകളിൽ ഗ്യാസ് കണക്ഷനുകൾക്കായി കാത്തിരുന്ന 10 കോടിയിലധികം സ്ത്രീകൾക്ക് സൗജന്യ ഗ്യാസ് കണക്ഷൻ ലഭിച്ചു. ഇന്നത്തെ ജീവിതത്തിൽ, വീട്ടിൽ ഒരു ടാപ്പ് തുറന്ന് വെള്ളം ഒഴുകുന്നത് വളരെ ലളിതമായി തോന്നുന്നു. എന്നിരുന്നാലും, രാജ്യം സ്വാതന്ത്ര്യം നേടി 75 വർഷങ്ങൾക്ക് ശേഷവും, 3 കോടി കുടുംബങ്ങൾക്ക് മാത്രമേ പൈപ്പ് വെള്ളം ലഭ്യമായിരുന്നുള്ളൂ. ദശലക്ഷക്കണക്കിന് ആളുകൾ ഇപ്പോഴും വീടുകളിൽ പൈപ്പ് വെള്ളത്തിനായി കാത്തിരിക്കുകയായിരുന്നു. 5-6 വർഷത്തിനുള്ളിൽ നമ്മുടെ ​ഗവൺമെന്റ് 12 കോടിയിലധികം കുടുംബങ്ങൾക്ക് പൈപ്പ് വെള്ളം നൽകിയതിൽ ഞാൻ സംതൃപ്തനാണ്, ഇത് പൗരന്മാരുടെ, പ്രത്യേകിച്ച് സ്ത്രീകളുടെ ജീവിതം എളുപ്പമാക്കുകയും ഭരണഘടനയുടെ ആത്മാവിനെ ശക്തിപ്പെടുത്തുകയും ചെയ്തു.

സുഹൃത്തുക്കളേ,

നിങ്ങൾക്ക് അറിയാവുന്നതുപോലെ, നമ്മുടെ ഭരണഘടനയുടെ യഥാർത്ഥ കൈയെഴുത്തുപ്രതിയിൽ ഭാരതത്തിന്റെ സംസ്കാരത്തിന്റെ പ്രതീകങ്ങളായ ശ്രീരാമൻ,  സീത മാതാവ്, ഹനുമാൻ ജി, ബുദ്ധൻ, മഹാവീരൻ, ഗുരു ഗോവിന്ദ് സിംഗ് ജി എന്നിവരുടെ ചിത്രീകരണങ്ങളുണ്ട്. ഭരണഘടനയിലെ ഈ ചിത്രീകരണങ്ങൾ മാനുഷിക മൂല്യങ്ങളുടെ പ്രാധാന്യത്തെക്കുറിച്ച് നമ്മെ ഓർമ്മിപ്പിക്കുന്നു. ഈ മൂല്യങ്ങളാണ് ആധുനിക ഭാരതത്തിന്റെ നയങ്ങളുടെയും തീരുമാനങ്ങളുടെയും അടിസ്ഥാനം. ഇന്ത്യക്കാർക്ക് വേഗത്തിലുള്ള നീതി ലഭിക്കുന്നുണ്ടെന്ന് ഉറപ്പാക്കാൻ, ഒരു പുതിയ ജുഡീഷ്യൽ കോഡ് നടപ്പിലാക്കിയിട്ടുണ്ട്. ശിക്ഷാധിഷ്ഠിത സംവിധാനം ഇപ്പോൾ നീതി അടിസ്ഥാനമാക്കിയുള്ള ഒരു സംവിധാനമായി രൂപാന്തരപ്പെട്ടിരിക്കുന്നു. സ്ത്രീകളുടെ രാഷ്ട്രീയ പങ്കാളിത്തം വർദ്ധിപ്പിക്കുന്നതിനായി നാരി ശക്തി വന്ദൻ അധിനിയത്തിലൂടെ ഒരു ചരിത്രപരമായ തീരുമാനം എടുത്തിട്ടുണ്ട്. മൂന്നാം ലിംഗക്കാർക്ക് അംഗീകാരവും അവകാശങ്ങളും ഉറപ്പാക്കുന്നതിനുള്ള നടപടികളും ഞങ്ങൾ സ്വീകരിച്ചിട്ടുണ്ട്. കൂടാതെ, ഭിന്നശേഷിക്കാരുടെ ജീവിതം എളുപ്പമാക്കുന്നതിനുള്ള നടപടികളും ഞങ്ങൾ നടപ്പിലാക്കിയിട്ടുണ്ട്.

സുഹൃത്തുക്കളേ,

ഇന്ന്, രാജ്യം പൗരന്മാരുടെ ജീവിതസൗഖ്യം മെച്ചപ്പെടുത്തുന്നതിൽ വളരെയധികം ശ്രദ്ധ കേന്ദ്രീകരിക്കുന്നു. പെൻഷൻ വാങ്ങുന്ന മുതിർന്ന പൗരന്മാർക്ക് തങ്ങൾ ജീവിച്ചിരിപ്പുണ്ടെന്ന് തെളിയിക്കാൻ ബാങ്കുകൾ സന്ദർശിക്കേണ്ടി വന്ന ഒരു കാലമുണ്ടായിരുന്നു. ഇപ്പോൾ, മുതിർന്ന പൗരന്മാർക്ക് അവരുടെ വീടുകളുടെ സുഖസൗകര്യങ്ങളിൽ നിന്ന് ഡിജിറ്റൽ ലൈഫ് സർട്ടിഫിക്കറ്റുകൾ സമർപ്പിക്കാനുള്ള സൗകര്യം ലഭിക്കും. ഇതുവരെ ഏകദേശം 1.5 കോടി മുതിർന്ന പൗരന്മാർക്ക് ഈ സൗകര്യം പ്രയോജനപ്പെട്ടു. ഇന്ന്, എല്ലാ ദരിദ്ര കുടുംബങ്ങൾക്കും 5 ലക്ഷം രൂപ വരെ സൗജന്യ ചികിത്സ നൽകുന്ന ഒരു രാജ്യമാണ് ഭാരതം. 70 വയസ്സിനു മുകളിലുള്ള എല്ലാ വൃദ്ധർക്കും സൗജന്യ ആരോഗ്യ സംരക്ഷണം വാഗ്ദാനം ചെയ്യുന്ന ഒരു രാജ്യം കൂടിയാണിത്. രാജ്യത്തുടനീളമുള്ള ആയിരക്കണക്കിന് ജൻ ഔഷധി കേന്ദ്രങ്ങളിലൂടെ 80 ശതമാനം വിലക്കുറവിൽ, താങ്ങാനാവുന്ന മരുന്നുകൾ ലഭ്യമാണ്. നമ്മുടെ രാജ്യത്ത് രോഗപ്രതിരോധ കവറേജ് 60 ശതമാനത്തിൽ താഴെയായിരുന്നു, ഓരോ വർഷവും ദശലക്ഷക്കണക്കിന് കുട്ടികൾക്ക് വാക്സിനേഷൻ നഷ്ടപ്പെട്ടു. ഇന്ന്, മിഷൻ ഇന്ദ്രധനുഷിന് നന്ദി, ഭാരതത്തിന്റെ രോഗപ്രതിരോധ കവറേജ് 100 ശതമാനത്തിലെത്തുന്നത് കാണുന്നതിൽ ഞാൻ സംതൃപ്തനാണ്. വിദൂര ഗ്രാമങ്ങളിൽ പോലും കുട്ടികൾക്ക് ഇപ്പോൾ കൃത്യസമയത്ത് വാക്സിനേഷൻ നൽകുന്നുണ്ട്. ഈ ശ്രമങ്ങൾ ദരിദ്രരുടെയും മധ്യവർഗത്തിന്റെയും ആശങ്കകൾ ഗണ്യമായി കുറച്ചിട്ടുണ്ട്.

സുഹൃത്തുക്കളേ,

ഇന്ന് രാജ്യം എങ്ങനെ പ്രവർത്തിക്കുന്നു എന്നതിന്റെ ഒരു ഉദാഹരണമാണ് ആസ്പിരേഷണൽ ഡിസ്ട്രിക്റ്റ്സ് കാമ്പെയ്ൻ. ഒരുകാലത്ത് പിന്നോക്കമായി കണക്കാക്കപ്പെട്ടിരുന്ന 100-ലധികം ജില്ലകളെ ആസ്പിരേഷണൽ ഡിസ്ട്രിക്റ്റുകളായി പുനർനിർവചിച്ചു, അവിടെ എല്ലാ മാനദണ്ഡങ്ങളിലും വികസനം ത്വരിതപ്പെടുത്തി. ഇന്ന്, ഈ അഭിലാഷ ജില്ലകളിൽ പലതും മറ്റ് ജില്ലകളേക്കാൾ വളരെ മികച്ച പ്രകടനം കാഴ്ചവയ്ക്കുന്നു. ഈ മാതൃകയിൽ, ഞങ്ങൾ ഇപ്പോൾ ആസ്പിരേഷണൽ ബ്ലോക്ക് പ്രോഗ്രാം ആരംഭിച്ചു.

സുഹൃത്തുക്കളേ,

ജനങ്ങൾ നേരിടുന്ന ദൈനംദിന വെല്ലുവിളികൾ ഇല്ലാതാക്കുന്നതിൽ രാജ്യം ഇപ്പോൾ വലിയ ഊന്നൽ നൽകുന്നു. ഏതാനും വർഷങ്ങൾക്ക് മുമ്പ്, വൈദ്യുതി കണക്ഷനുകൾ ഇല്ലാത്തതിനാൽ എല്ലാ വൈകുന്നേരവും ഇരുട്ടിൽ മുങ്ങുന്ന 2.5 കോടി കുടുംബങ്ങൾ ഭാരതത്തിൽ ഉണ്ടായിരുന്നു. എല്ലാവർക്കും സൗജന്യ വൈദ്യുതി കണക്ഷനുകൾ നൽകുന്നതിലൂടെ, രാഷ്ട്രം അവരുടെ ജീവിതത്തെ പ്രകാശിപ്പിച്ചു. സമീപ വർഷങ്ങളിൽ, 4G, 5G കണക്റ്റിവിറ്റി ആളുകൾക്ക് ലഭ്യമാകുന്നുവെന്ന് ഉറപ്പാക്കാൻ വിദൂര പ്രദേശങ്ങളിൽ പോലും ആയിരക്കണക്കിന് മൊബൈൽ ടവറുകൾ സ്ഥാപിച്ചിട്ടുണ്ട്. മുമ്പ്, നിങ്ങൾ ആൻഡമാൻ അല്ലെങ്കിൽ ലക്ഷദ്വീപ് ദ്വീപുകൾ സന്ദർശിച്ചാൽ, ബ്രോഡ്‌ബാൻഡ് കണക്റ്റിവിറ്റി ലഭ്യമല്ലായിരുന്നു. ഇന്ന്, കടലിനടിയിലെ ഒപ്റ്റിക്കൽ ഫൈബർ കേബിളുകൾ ഈ ദ്വീപുകളിലേക്ക് അതിവേഗ ഇന്റർനെറ്റ് കൊണ്ടുവന്നിട്ടുണ്ട്. ഗ്രാമപ്രദേശങ്ങളിലെ വീടുകളെയും ഭൂമിയെയും ചൊല്ലി ഉണ്ടാകുന്ന നിരവധി തർക്കങ്ങളെക്കുറിച്ചും നമുക്ക് നന്നായി അറിയാം. ലോകമെമ്പാടുമുള്ള വികസിത രാജ്യങ്ങൾ പോലും ഭൂമി രേഖകളുടെ കാര്യത്തിൽ കാര്യമായ വെല്ലുവിളികൾ നേരിടുന്നു. എന്നിരുന്നാലും, ഇന്നത്തെ ഭാരതം ഈ പ്രശ്നം പരിഹരിക്കുന്നതിൽ നേതൃത്വം വഹിക്കുന്നു. പ്രധാനമന്ത്രി സ്വാമിത്വ യോജനയ്ക്ക് കീഴിൽ, ഗ്രാമീണ വീടുകളുടെ ഡ്രോൺ മാപ്പിംഗ് നടക്കുന്നുണ്ട്, കൂടാതെ താമസക്കാർക്ക് നിയമപരമായ രേഖകൾ നൽകുകയും ചെയ്യുന്നു.

സുഹൃത്തുക്കളേ,

രാജ്യത്തിന്റെ പുരോഗതിക്ക് ആധുനിക അടിസ്ഥാന സൗകര്യങ്ങളുടെ ദ്രുതഗതിയിലുള്ള വികസനം ഒരുപോലെ അത്യാവശ്യമാണ്. അടിസ്ഥാന സൗകര്യ പദ്ധതികൾ സമയബന്ധിതമായി പൂർത്തിയാക്കുന്നത് രാജ്യത്തിന്റെ വിഭവങ്ങൾ ലാഭിക്കുക മാത്രമല്ല, ഈ പദ്ധതികളുടെ ഉപയോഗക്ഷമത ഗണ്യമായി വർദ്ധിപ്പിക്കുകയും ചെയ്യുന്നു. ഈ ദർശനത്തോടെ, പ്രഗതി എന്ന പേരിൽ ഒരു പ്ലാറ്റ്‌ഫോം സൃഷ്ടിച്ചിട്ടുണ്ട്, അവിടെ അടിസ്ഥാന സൗകര്യ പദ്ധതികളുടെ പതിവ് അവലോകനങ്ങൾ നടത്തുന്നു. ഈ പദ്ധതികളിൽ ചിലത് 30-40 വർഷമായി മുടങ്ങിക്കിടക്കുകയായിരുന്നു. ഞാൻ നേരിട്ട് ഈ മീറ്റിംഗുകൾക്ക് നേതൃത്വം നൽകുന്നു. 18 ലക്ഷം കോടി രൂപയുടെ പദ്ധതികൾ ഇതുവരെ അവലോകനം ചെയ്‌തിട്ടുണ്ടെന്നും അവയുടെ പൂർത്തീകരണത്തിന് വിഘാതമാകുന്ന തടസങ്ങൾ പരിഹരിച്ചിട്ടുണ്ടെന്നും അറിയുന്നതിൽ നിങ്ങൾക്ക് സന്തോഷമുണ്ടാകും. സമയബന്ധിതമായി പൂർത്തീകരിക്കുന്ന പദ്ധതികൾ ജനങ്ങളുടെ ജീവിതത്തിൽ വളരെയധികം നല്ല സ്വാധീനം ചെലുത്തുന്നു. ഈ ശ്രമങ്ങൾ രാജ്യത്തിന്റെ പുരോഗതിയെ ത്വരിതപ്പെടുത്തുകയും ഭരണഘടനയുടെ അടിസ്ഥാന മൂല്യങ്ങളെ ശക്തിപ്പെടുത്തുകയും ചെയ്യുന്നു. 

സുഹൃത്തുക്കളേ,

ഡോ. രാജേന്ദ്ര പ്രസാദിന്റെ വാക്കുകളോടെ എന്റെ പ്രസംഗം അവസാനിപ്പിക്കാൻ ഞാൻ ആഗ്രഹിക്കുന്നു. 1949 നവംബർ 26 ന്, ഭരണഘടനാ അസംബ്ലിയിൽ സമാപന പ്രസംഗത്തിനിടെ ഡോ. രാജേന്ദ്ര പ്രസാദ് പറഞ്ഞു, "രാജ്യത്തിന്റെ താൽപ്പര്യങ്ങൾക്ക് മുൻതൂക്കം നൽകുന്ന സത്യസന്ധരായ ആളുകളുടെ ഒരു കൂട്ടം മാത്രമേ ഇന്ന് ഭാരതത്തിന് ആവശ്യമുള്ളൂ". 'രാഷ്ട്രം ആദ്യം, എല്ലാറ്റിനുമുപരി രാഷ്ട്രം' എന്ന ആശയം വരും നൂറ്റാണ്ടുകളിൽ ഭാരതത്തിന്റെ ഭരണഘടനയെ സജീവമായി നിലനിർത്തും. ഭരണഘടന എനിക്ക് നൽകിയിട്ടുള്ള കർത്തവ്യം, അതിന്റെ ചട്ടക്കൂടിനുള്ളിൽ തന്നെ തുടരാൻ ഞാൻ ശ്രമിച്ചു, ഒരു കടന്നുകയറ്റത്തിനും ഞാൻ ശ്രമിച്ചിട്ടില്ല. ഭരണഘടന ഈ കർത്തവ്യം എന്നെ ഏൽപ്പിച്ചതിനാൽ, എന്റെ പരിധികൾ പാലിച്ചുകൊണ്ട് ഞാൻ എന്റെ ചിന്തകൾ അവതരിപ്പിച്ചു. ഇവിടെ, ഈ ഒരു സൂചന മാത്രം മതി, കൂടുതലൊന്നും പറയേണ്ടതില്ല.

വളരെ നന്ദി.

***

SK