ভারতকী চীফ জস্তিস জস্তিস সঞ্জীব খন্না জী, জস্তিস বি.আর. গভইজী, জস্তিস সুর্যকান্তজী, কেন্দ্রগী মন্ত্রীমন্দলদা ঐহাক্কী মরুপ শ্রী অর্জুন রাম মেঘৱালজী, এতোর্নি জেনরেল শ্রী ভেঙ্কতরমানীজী, বার কাউন্সিলগী চেয়রমেন মনন কুমার মিশ্রজী, সুপ্রিম কোর্ত বার এসোসিএসনগী প্রসিদেন্ত শ্রী কপিল সিবলজী, সুপ্রিম কোর্তকী জস্তিসশিং, হান্নগী চীফ জস্তিসশিং, মফম অসিদা শরুক য়াবীরিবা অতৈ মরুওইবা মীওইশিং, নুপীশিং অমসুং নুপাশিং।

ঐহাক্না অদোম অমসুং লৈবাক মীয়াম পুম্নমকপু সম্বিধান নুমিৎকী য়াইফ পাউজেল পীজরি। ভারতকী সম্বিধানগী চহি 75শুবা অসি লৈবাক পুম্বগীদমক্তা চাউথোকচনীংঙাই ওই। ঙসি ঐহাক্না ভারতকী সম্বিধান অমসুং কন্সতিত্যুএন্ত এসেমব্লীগী মীহুৎ পুম্নমকপু ইকায় খুম্নবা উৎচরি।

মরুপশিং,

ঐখোয়না দেমোক্রেসীগী মরুওইবা কুহ্মৈ অসিবু নিংশিংলিবা মতমদা, ঙসি অসি মুম্বাইদা থোকখিবা তেরোরিস্ত এতেক্তকী কুমওনসু ওইরি হায়বসি ঐখোয়না কাউবিরোইদবনি। ঐহাক্না এতেক্ত অসিদা লৈখিদ্রবশিংগী মফমদা ইকায় খুম্নবা উৎচরি। ভারতকী ঙাকশেলদা শীংনরকপা তেরোরিস্তকী লুপ খুদিংমক্না মতিক চাবা পাউখুম পীগনি হায়না ঐনা লৈবাক অসিদা ঐগী ৱারেপ অদু অমুক হন্না ফোংদোকচরি।

মরুপশিং,

কন্সতিত্যুএন্ত এসেমব্লীদা শাংনা দিবেৎশিং তৌখিবা অদুদা, ভারতকী দিমোক্রেসিগী তুংলমচৎকী মতাংদা কুপ্না খন্ন-নৈনখি। ময়াম পুম্নমক্না হায়রিবা দিবেৎ অসি নীংথিনা খঙনরবনি। অদুগা মদুগী মতুংদা বাবা সাহেব অম্বেদকরনা হায়রম্মি- সম্বিধান অসি লোগী দোক্যুমেন্ত খক্তমক নত্তে... মসিগী ৱাখল্লোন অসি মতম পুম্নমক্কী ৱাখল্লোন্নি। বাবা সাহেবনা হায়রম্বা ৱাখল্লোন অসি য়াম্না মরু ওই। ঐখোয়গী সম্বিধান শেম্লিবশিংনা ঐখোয়দা লৈবাক, মতম অমসুং ফীভমগী মতুং ইন্না চুনবা ৱারেপ লৌদুনা মতম মতমগী ওইনা সম্বিধানবু শন্দোক্না তাকপা ঙম্বগী প্রোভিজন অমা পীরি। মতমগী মতুং ইন্না ভারতকী পান্দমশিং, ভারতকী মঙলানশিং অসি অনৌবা অৱাংবা থাক্তা য়ৌরগনি হায়বা ঐখোয়গী সম্বিধান শেম্লিবশিংনা খঙখি। মখোয়না নীংতম ভারত অমসুং ভারতকী প্রজাশিংগী মথৌ তাবশিং অসি হোংলগনি, শীংনবশিং অসি হোংলগনি হায়বা খঙখি। মরম অসিনা মখোয়না ঐখোয়গী সম্বিধান অসি আইনগী লাইরিক অমখক্তমক ওইনা থমখিদে... অদুবু মসি অহিংবা, লেপ্তনা চেনবা ইচেল অমা ওইহনখি।

মরুপশিং,

ঐখোয়গী সম্বিধান অসি ঐখোয়গী হৌজিক্কী অমসুং ঐখোয়গী তুংলমচৎকী লমজিং-লমতাক্নি। হৌখিবা চহি 75 অসিদা লৈবাক অসিনা মায়োক্নরিবা খুদোংচাদবশিং অসি করিনো, ঐখোয়গী সম্বিধান্না খুদোংচাদবা খুদিংমক কোকহন্নবা অচুম্বা লম্বী তাক্লি। হায়রিবা মতম অসিগী মনুংদা, ইমর্জেন্সীগুম্বা মতম অমা লাকখি... অমসুং ঐখোয়গী সম্বিধানসু গনতন্ত্রনা থেংনরিবা শীংনবশিং অসি থেংনখি। ঐখোয়গী সম্বিধান্না লৈবাক অসিগী মথৌ তাবা অমসুং অপাম্বা পুম্নমক মপুং ফাহনখি। মসি সম্বিধান্না পীবা শক্তি অসিনা মরম ওইদুনা... ঙসিদি জম্মু অমসুং কাশ্মীরদসু বাবা সাহেবকী সম্বিধান অসি মপুং ফানা চৎনহনখ্রে। ঙসি অহানবা ওইনা কন্সতিত্যুসনগী নুমিৎ থৌরম পাংথোকখ্রে।

মরুপশিং,

ঙসিদি ভারত অসি অহোংবা লাকপগী অচৌবা তাঙ্কক অমা থেংনরি। অসিগুম্বা মরুওইবা মতম অসিদা, ভারতকী সম্বিধান্না ঐখোয়দা লম্বী তাক্লি, ঐখোয়গী লমজিং মৈরা ওইরে।

মরুপশিং,

ভারতকী তুংলমচৎকী লম্বী অসি অচৌবা মঙলানশিং অমসুং অচৌবা ৱারেপশিং অদু মপুং ফাহন্নবগী লম্বীনি। ঙসিদি, লৈবাক অসিগী প্রজা খুদিংমক্না পান্দম অমখক্তমক থম্লি - চাউখৎলবা ভারত অমা শেমগৎপা। চাউখৎলবা ভারতকী ৱাহন্থোক্তি লৈবাক অসিগী প্রজা খুদিংমক্না পুন্সিগী মগুন লৈহনবা, পুন্সিগী ইকাই খুম্নবা ফংহনবা হায়বনি। মসি খুন্নাইগী অচুম্বা ৱায়েলগীসু অচৌবা পাম্বৈ অমনি। মসিসু সম্বিধানগী স্পিরিৎ অদুনি। মরম অদুনা, হৌখিবা চহিশিংদা লৈবাক অসিগী মীয়ামগী মরক্তা শেন্মিৎলোন অমসুং খুন্নাইগী ওইবা মান্নবা পুরক্নবা খোঙথাং কয়া অমা লৌখৎখি। হৌখিবা চহি 10 অসিদা, বেঙ্ককী থোঙ ফাওবা য়ৌবা ঙমদবা ভারত মচা করোর 53গী বেঙ্ক একাউন্তশিং হাংদোকখ্রে। হৌখিবা চহি 10 অসিদা, চহি কয়াদগী য়ুম লৈতবা ভারত মচা করোর 4না পর্মিনেন্ত য়ুম ফংখ্রে। হৌখিবা চহি 10 অসিদা, চহি কয়াদগী মখোয়গী য়ুমদা গ্যাস ফংনবা ঙাইদুনা লৈরম্বা নুপী করোর 10 হেনবনা লেম্না গ্যাস কন্নেক্সন ফংখ্রে। ঙসিগী পুন্সিদা, ঐখোয়না য়ুমগী পাইপ থাদোক্লগা ঈশিং তারকপা অসি য়াম্না নুংঙাইবা অমনি। অদুবু নীংতম্বা ফংলবা চহি 75গী মতুংদা, লৈবাক অসিদা ইমুং করোর 3 খক্তদা তোতি ঈশিং ফংখি। মীওই করোর কয়া মখোয়গী য়ুমশিংদা তোতি ঈশিং ফংনবগীদমক ঙাইদুনা লৈরি। ঐখোয়গী সরকারনা চহি 5-6 অসিদা ইমুং করোর 12 হেনবদা থক্নবা ঈশিং ফংহন্দুনা প্রজাশিংগী পুন্সিদা মরু ওইনা নুপীশিংগী পুন্সিদা লাইহন্নবা হোৎনরি অমসুং সম্বিধানগী স্পিরিত অসিবু মপাঙ্গল কনখৎহল্লি।

মরুপশিং,

ঐখোয়গী সম্বিধানগী অশেংবা কোপিদা ভগবান শ্রী রাম, মাতা সীতা, হনুমানজী, ভগবান বুদ্ধ, ভগবান মহাবীর, গুরু গোবিন্দ সিংহজীগী মমিশিং য়াওরি হায়বসি অদোম্না খংই। মমিশিং অসি পুম্নমক ভারতকী নাৎকী খুদমশিংনি। মীওইবগী মগুনশিং অসিনা ঙসিগী ভারতকী পোলিসীশিং অমসুং ৱারেপশিংগী য়ুম্ফম ওইরি। ভারত মচাশিংনা অথুবা মতমদা অচুম্বা ৱায়েল ফংহন্নবা অনৌবা জুদিসিএল কোদ অমা চৎনহনখ্রে। পেনালিতীদা য়ুম্ফম ওইবা সিস্তেম অসি হৌজিক্না জস্তিসতা য়ুম্ফম ওইবা সিস্তেম অমদা হোংখ্রে। নুপীশিংগী রাজনিতীদা শরুক য়াবা হেনগৎহন্নবা নারী শক্তি বন্দন অধিনিয়মগী পুৱারী ওইরবা ৱারেপ লৌখ্রে। ঐখোয়না অহুমশুবা জেন্দরবু মখোয়গী শক্তাক অমসুং মখোয়গী হকশিং পীনবা খোঙথাংশিংসু লৌখৎলি। দিব্যাঙ্গজনশিংগী পুন্সিদা লাইথোকহন্নবগীদমক ঐখোয়না থৌরাং কয়া অমসু পায়খৎলি।

মরুপশিং,

ঙসিদি লৈবাক অসিনা লৈবাক অসিগী প্রজাশিংগী পুন্সি মহিং লায়থোকহন্নবা মীৎয়েং চংলি। পেন্সন ফংলবা সেনিয়র সিতিজেনশিংনা মখোয় হিংলি হায়বা প্রমান তৌনবগীদমক বেঙ্কতা চৎপা মথৌ তারম্বা মতম অমা লৈরম্মি। ঙসিদি, সেনিয়র সিতিজনশিংনা য়ুমদগী দিজিতেল লাইফ সর্তিফিকেৎকী খুদোংচাবা ফংলি। হৌজিক ফাওবদা চহি য়াম্লবা মীওই করোর 1.5 রোম্না মসিগী খুদোংচাবা অসি ফংখ্রে। ঙসিদি ভারত অসি লায়রবা ইমুং খুদিংদা লুপা লাখ 5 ফাওবগী লেম্না লায়েংলিবা লৈবাক অমা ওইরে। ঙসিদি, ভারত অসি চহি 70গী মথক্তা লৈবা অহল ওইরবা মীওই খুদিংদা লেম্না হেল্থকেয়র ফেসিলিতী ফংহল্লিবা লৈবাক অমা ওইরে। ঙসিদি, লৈবাক অসিগী জন ঔশধী কেন্দ্র লিশিং কয়াদা মমল হোংবা হিদাকশিং চাদা 80গী দিসকাউন্তদা ফংলি। মতম অমদা, ঐখোয়গী লৈবাক অসিদা ইম্ম্যুনাইজেসনগী কভরেজ অসিসু চাদা 60গী মখাদা লৈরম্মি। চহি খুদিংগী অঙাং করোর কয়া অমা ভেক্সিনেসনগী খুদোংচাবা ফংদ্রি। ঙসিদি, মিসন ইন্দ্রধনুশনা মরম ওইদুনা, ভারত্তা ইম্ম্যুনাইজেসনগী কভরেজ অসি 100% য়ৌরকপা অসিদা ঐহাক্না নুংঙাইবা ফাওই। ঙসিদি, অরাপ্পা খুঙ্গংশিংদা ফাওবা, অঙাংশিং মতম চানা ভেক্সিন কাপ্লি। মসিগী হোৎনবা অসিনা লাইরবশিং অমসুং মিদ্দল ক্লাসকী মীওইশিংগী চাউনা খনবা অমা হন্থহনখ্রে।

মরুপশিং,

ঙসি লৈবাক অসিদা থবক করম্না পাংথোক্লিবগে হায়বগী খুদম অমা হায়রগদি এস্পিরেস্নেল দিস্ত্রিক্ত কেম্পেন অসিনি। লৈবাক অসিগী দিস্ত্রিক্ত 100 হেনববু ঐখোয়না এস্পিরেস্নেল দিস্ত্রিক্তশিং হায়না লৌই অমসুং মফম অসিদা চাউখৎপগী খোঙজেল অসি পেরামিতর খুদিংদা খুমাং চাউশিল্লে। ঙসিদি লৈবাক অসিগী এস্পিরেস্নেল দিস্ত্রিক্ত কয়ানা অতোপ্পা দিস্ত্রিক্তশিংদগী হেন্না ফগৎলক্লি। হৌজিক মসিগী মোদেল অসিগী মতুং ইন্না, ঐখোয়না এস্পিরেস্নেল ব্লোক প্রোগ্রামসু হৌদোক্লে।

মরুপশিং,

ঙসিদি, লৈবাক অসিনা মীয়ামগী পুন্সিদা থোকপা খুদোংচাদবশিং কোকহন্নবা অকনবা মীৎয়েং থম্লি। চহি খরগী মমাংদা, নুমিদাংৱাইরম য়ৌরকপদা পুংমম মম্বা ভারত্তা য়ুম করোর 2.5 লৈরম্মি, য়ুমশিং অসিদা মৈ ফংখিদে। মীপুম খুদিংমক্তা লেম্না ইলেক্ত্রিসিতী কন্নেক্সন পীরদুনা লৈবাক অসিনা মখোয়গী পুন্সিদা মঙাল পীরি। হৌখিবা চহিশিংদা, মীওইশিংনা 4G/5G কন্নেক্তিবিতী ফংবা ঙম্নবগীদমক্তা অথাপ্পা মফমশিংদা ফাওবা মোবাইল তাৱর লিশিং কয়া ইনস্তোল তৌখ্রে। মমাংদা, করিগুম্বা অদোম্না অন্দামান নৎত্রগা লক্ষদ্বীপ চৎলবদি, মফম অদুদা ব্রোদবেন্দ কন্নেক্তিবিতী ফংদে। ঙসিদি, সমুদ্রগী মখাদা লৈবা ওপ্তিকেল ফাইবরনা হায় স্পীদ ইন্তর্নেৎ অসি অসিগুম্বা ইথৎশিংদা পুরক্লি। খুঙ্গংগী য়ুমশিং অমসুং খুঙ্গংগী লমগা মরী লৈনবা চয়েৎনবা কয়া লৈরম্বা অদু ঐখোয়না নীংথিনা খঙই। লমগী রেকোর্দশিং অসি মালেমগী চাউখৎলবা লৈবাকশিংগী অচৌবা শীংনবনি। অদুবু ঙসিগী ভারতনা মসিদসু মাংজিল থানা চংশিল্লি। পি.এম. স্বামীত্ব য়োজনাগী মখাদা, খুঙ্গংগী য়ুমশিংগী দ্রোন মেপ্পিং তৌরি অমসুং লিগেল দোকুমেন্তশিং ইসু তৌরি।

মরুপশিং,

মোদর্ন ইনফ্রাস্ত্রকচর অমা অথুবা মতমদা শেমগৎপা অসি লৈবাক অসিগী চাউখৎ-থৌরাংগীদমক্তা চপ মান্ননা মরু ওই। ইনফ্রাস্ত্রকচর প্রোজেক্তশিং মতম চানা লোইশিনবনা লৈবাক অসিগী শেনফম কনবা ঙমগনি... অমসুং প্রোজেক্তশিংগী কান্নবা হেনগৎহনগনি। ৱাখল্লোন অসিগা লোয়ননা, প্রগতি কৌবা প্লেৎফোর্ম অমা শেমখ্রে। মসিদা ইনফ্রাস্ত্রকচর প্রোজেক্তশিং চাং নাইনা য়েংশিনবা পাংথোক্লি। অমসুং মসিগী প্রোজেক্ত খরদি চহি 30-30, 40-40গী মমাংদগী লেপ্পগা লৈরবনি। ঐহাক ইশামক্না মসিগী মীফমশিং অসিদা চেয়র তৌই। হৌজিক ফাওবদা লুপা করোর লাখ ১৮গী প্রোজেক্তশিং অসি য়েংশিনখ্রে অমসুং মখোয়গী মায়োক্তা লৈরিবা খুদোংচাদবশিং লৌথোকখ্রে হায়বা খঙবদা অদোম নুংঙাইবা ফাওগনি। মতম চানা লোইশিল্লক্লিবা প্রোজেক্তশিং অসিনা মীয়ামগী পুন্সিদা য়াম্না অফবা শাফু অমা পীরি। লৈবাক অসিদা পায়খৎলিবা থবকশিং অসিনা লৈবাক অসিগী চাউখৎপা খোঙজেল য়াংহল্লি অমসুং সম্বিধানগী মপুং ওইবা ৱাখল্লোনসু মপাঙ্গল কনখৎহল্লি।

মরুপশিং,

ঐহাক্না ঐহাক্কী ৱারোল অসি দা. রাজেন্দ্র প্রসাদজীগী ৱাহৈশিংনা লোইশিনবা পাম্মি... নবেম্বর 26... 1989গী ঙসিগী নুমিৎ অসিদা কন্সতিত্যুএন্ত এসেমব্লীদা মহাক্কী অরোইবা ৱারোলদা দা. রাজেন্দ্র প্রসাদজীনা হায়খি... “ঙসিদি ভারতনা লৈবাক অসিগী কান্নবা অসি মাগী কান্নবদগী হেন্না মরুওইনা খনবা পুকচেল শেংবা মীওই কাংলুপ অমা য়াম্না মথৌ তাই। নেসন ফার্স্তকী ৱাখল্লোন অসিনা তুংদা লাক্কদবা চহিচা কয়া ফাওবা ভারতকী সম্বিধানবু হিংহল্লগনি। ঐহাক্না সংবিধান্না পীরিবা থবকশিংগী ঙমখৈগী মনুংদা লৈনবা হোৎনখি। ঐহাক্না করিগুম্বা অমত্তা এনক্রোচ তৌনবা হোৎনখিদে। সম্বিধান্না ঐঙোন্দা থবক অসি তৌনবা হায়জবনা মরম ওইদুনা, ঐহাক্না ঐহাক্কী ঙমখৈশিং ঙাক্লগা ঐহাক্কী ৱাফম অদু ফোংদোকচরি। মসিদা হিন্ত অমখক্তমক পীরি, কয়া অমা হায়বগী মথৌ তাদে।

হন্না-হন্না থাগৎচরি।

****