ವಿಶ್ವದ ಅತಿದೊಡ್ಡ ದೇಶೀಯ ಛಾವಣಿ ಸೌರ ಉಪಕ್ರಮವಾದ ಪ್ರಧಾನಮಂತ್ರಿ ಸೂರ್ಯ ಘರ್: ಉಚಿತ ವಿದ್ಯುತ್ ಯೋಜನೆ (ಪಿ ಎಂ ಎಸ್‌ ಜಿ ಎಂ ಬಿ ವೈ), ಮಾರ್ಚ್ 10, 2025 ರ ವೇಳೆಗೆ ದೇಶಾದ್ಯಂತ 10.09 ಲಕ್ಷ ಸ್ಥಾಪನೆಗಳನ್ನು ಪೂರ್ಣಗೊಳಿಸುವ ಮೂಲಕ ಮಹತ್ವದ ಮೈಲಿಗಲ್ಲನ್ನು ಸಾಧಿಸಿದೆ. ಪ್ರಧಾನಿ ಶ್ರೀ ನರೇಂದ್ರ ಮೋದಿ ಅವರು ಫೆಬ್ರವರಿ 13, 2024 ರಂದು ಚಾಲನೆ ನೀಡಿದ ಈ ಮಹತ್ವಾಕಾಂಕ್ಷೆಯ ಯೋಜನೆಯು 1 ಕೋಟಿ ವಸತಿ ಮನೆಗಳಿಗೆ ಮೇಲ್ಛಾವಣಿ ಸೌರ ವ್ಯವಸ್ಥೆಗಳ ಮೂಲಕ ಉಚಿತ ವಿದ್ಯುತ್ ಒದಗಿಸುವ ಮತ್ತು ಸಾಂಪ್ರದಾಯಿಕ ವಿದ್ಯುತ್ ಮೂಲಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವ ಗುರಿಯನ್ನು ಹೊಂದಿದೆ ಮತ್ತು ನಾಗರಿಕರು ಇಂಧನ ಉತ್ಪಾದಕರಾಗಲು ಅನುವು ಮಾಡಿಕೊಡುತ್ತದೆ. ಈ ಯೋಜನೆಯು 100 ಮರಗಳನ್ನು ನೆಡುವುದಕ್ಕೆ ಸಮಾನವಾದ ಇಂಗಾಲದ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವ ಮೂಲಕ ಹವಾಮಾನ ಬದಲಾವಣೆಯ ತಗ್ಗಿಸುವಿಕೆಗೆ ಕೊಡುಗೆ ನೀಡಲು ಪ್ರತಿ ಮನೆಯನ್ನು ಶಕ್ತಗೊಳಿಸುತ್ತದೆ.

ಸಬ್ಸಿಡಿಗಳು ಮತ್ತು ಪ್ರೋತ್ಸಾಹಕಗಳೊಂದಿಗೆ ಕುಟುಂಬಗಳನ್ನು ಸಬಲೀಕರಣಗೊಳಿಸುವುದು

ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವಾಲಯ (ಎಂ ಎನ್‌ ಆರ್‌ ಇ) ಜಾರಿಗೆ ತಂದಿರುವ ಈ ಯೋಜನೆಯು 47.3 ಲಕ್ಷ ಅರ್ಜಿಗಳನ್ನು ಸ್ವೀಕರಿಸಿದೆ. 6.13 ಲಕ್ಷ ಫಲಾನುಭವಿಗಳು ₹4,770 ಕೋಟಿ ಮೊತ್ತದ ಸಹಾಯಧನ ಪಡೆದಿದ್ದಾರೆ. ಸಂಪೂರ್ಣ ಸ್ವಯಂಚಾಲಿತ ಅರ್ಜಿಯೊಂದಿಗೆ, http://www.pmsuryaghar.gov.in ಮೂಲಕ ಮಾರಾಟಗಾರರ ಆಯ್ಕೆ ಮತ್ತು ಸಬ್ಸಿಡಿ ಪಡೆದುಕೊಳ್ಳುವ ಪ್ರಕ್ರಿಯೆಯೊಂದಿಗೆ ಸಹಾಯಧನವನ್ನು 15 ದಿನಗಳಲ್ಲಿ ಅರ್ಜಿದಾರರ ಬ್ಯಾಂಕ್ ಖಾತೆಗಳಿಗೆ ಜಮಾ ಮಾಡಲಾಗುತ್ತದೆ.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನೇತೃತ್ವದ ಪ್ರಧಾನಮಂತ್ರಿ ಸೂರ್ಯ ಘರ್‌ ಉಚಿತ ವಿದ್ಯುತ್ ಯೋಜನೆಯ ಪ್ರಮುಖ ವೈಶಿಷ್ಟ್ಯವೆಂದರೆ, ಯೋಜನೆಯು 12 ಸಾರ್ವಜನಿಕ ವಲಯದ ಬ್ಯಾಂಕುಗಳ ಮೂಲಕ ಶೇ.6.75 ರಷ್ಟು ರಿಯಾಯಿತಿ ಬಡ್ಡಿ ದರದಲ್ಲಿ ರೂ 2 ಲಕ್ಷದವರೆಗಿನ ಸಾಲಗಳಿಗೆ ಮೇಲಾಧಾರ-ರಹಿತ ಸಾಲವನ್ನು ಒದಗಿಸುತ್ತದೆ, ಮೇಲ್ಛಾವಣಿಯ ಸೌರ ವಿದ್ಯುತ್ ಸ್ಥಾಪನೆಗಳನ್ನು ಸಾಮಾನ್ಯ ಸಾರ್ವಜನಿಕರಿಗೆ ಹೆಚ್ಚು ಸುಲಭವಾಗಿಸುತ್ತದೆ. ಸುಲಭ ಸಾಲ ಸೌಲಭ್ಯದೊಂದಿಗೆ, ಕನಿಷ್ಠ ₹15,000 ಹೂಡಿಕೆಯೊಂದಿಗೆ 3 ಕಿ.ವ್ಯಾ. ಛಾವಣಿಯ ಸೌರ ವ್ಯವಸ್ಥೆಯನ್ನು ಸ್ಥಾಪಿಸಬಹುದು, ಇದು 25 ವರ್ಷಗಳಲ್ಲಿ ₹15 ಲಕ್ಷದವರೆಗೆ ಆದಾಯವನ್ನು ನೀಡುತ್ತದೆ. ಸಾಲದ ಅರ್ಜಿ ಪ್ರಕ್ರಿಯೆಯು ಸಂಪೂರ್ಣವಾಗಿ ಸ್ವಯಂಚಾಲಿತ ಮತ್ತು ಆನ್‌ಲೈನ್ ಆಗಿದೆ. ಇದುವರೆಗೆ 3.10 ಲಕ್ಷ ಸಾಲದ ಅರ್ಜಿಗಳನ್ನು ಸ್ವೀಕರಿಸಲಾಗಿದ್ದು, ಅದರಲ್ಲಿ 1.58 ಲಕ್ಷ ಸಾಲಗಳನ್ನು ಮಂಜೂರು ಮಾಡಲಾಗಿದೆ ಮತ್ತು 1.28 ಲಕ್ಷ ಸಾಲಗಳನ್ನು ವಿತರಿಸಲಾಗಿದೆ, ಸಂಭಾವ್ಯ ಫಲಾನುಭವಿಗಳಿಗೆ ವ್ಯಾಪಕ ತಲುಪುವಿಕೆಯನ್ನು ಖಚಿತಪಡಿಸುತ್ತದೆ. 3 ಕಿ.ವ್ಯಾ. ವರೆಗಿನ ಮೇಲ್ಛಾವಣಿ ಸೌರ ವ್ಯವಸ್ಥೆಗೆ ಫಲಾನುಭವಿಗಳು ₹78000 ವರೆಗೆ ಸಬ್ಸಿಡಿಯನ್ನು ಪಡೆಯುತ್ತಾರೆ, ಇದು ಸೌರ ವ್ಯವಸ್ಥೆಯ ಸ್ಥಾಪನಾ ವೆಚ್ಚವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ.

ಹಲವಾರು ರಾಜ್ಯಗಳಲ್ಲಿ ಗಮನಾರ್ಹ ಪ್ರಗತಿ

ಈ ಯೋಜನೆಯು ಹಲವಾರು ರಾಜ್ಯಗಳಲ್ಲಿ ಗಮನಾರ್ಹ ಪ್ರಗತಿಯನ್ನು ಕಂಡಿದೆ. ಗಮನಾರ್ಹವಾಗಿ, ಚಂಡೀಗಢ ಮತ್ತು ದಮನ್ ಮತ್ತು ಡಿಯು ತಮ್ಮ ಸರ್ಕಾರಿ ಕಟ್ಟಡಗಳ ಮೇಲ್ಛಾವಣಿ ಸೌರಶಕ್ತಿಯಲ್ಲಿ ಶೇ.100 ರಷ್ಟು ಗುರಿ ಸಾಧಿಸಿವೆ, ದೇಶವನ್ನು ಶುದ್ಧ ಇಂಧನ ಅಳವಡಿಕೆಯಲ್ಲಿ ಮುನ್ನಡೆಸಿವೆ. ರಾಜಸ್ಥಾನ, ಮಹಾರಾಷ್ಟ್ರ, ಗುಜರಾತ್ ಮತ್ತು ತಮಿಳುನಾಡಿನಂತಹ ರಾಜ್ಯಗಳು ಕೂಡ ಅಸಾಧಾರಣವಾಗಿ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿವೆ, ಒಟ್ಟಾರೆ ಸ್ಥಾಪನಾ ಅಂಕಿಅಂಶಗಳಿಗೆ ಗಣನೀಯ ಕೊಡುಗೆ ನೀಡುತ್ತಿವೆ. 2026-27ರ ವೇಳೆಗೆ 1 ಕೋಟಿ ಮನೆಗಳನ್ನು ತಲುಪುವ ಗುರಿಯೊಂದಿಗೆ ಯೋಜನೆಯ ಸುಗಮ ಮತ್ತು ಸಕಾಲಿಕ ಅನುಷ್ಠಾನವನ್ನು ಖಚಿತಪಡಿಸಿಕೊಳ್ಳಲು ಸರ್ಕಾರವು ಎಲ್ಲಾ ರಾಜ್ಯಗಳಲ್ಲಿ ಪ್ರಗತಿಯನ್ನು ಸಕ್ರಿಯವಾಗಿ ಮೇಲ್ವಿಚಾರಣೆ ಮಾಡುತ್ತಿದೆ.

ಭಾರತದ ಛಾವಣಿ ಸೌರ ವಲಯವನ್ನು ಮುನ್ನಡೆಸುತ್ತಿದೆ

ಈ ಯೋಜನೆಯ ಒಟ್ಟು ವೆಚ್ಚ ₹75,021 ಕೋಟಿ. ಸುಲಭ ಹಣಕಾಸು ಒದಗಿಸಲು ಅನುಕೂಲವಾಗುವಂತೆ, ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವ ಶ್ರೀ ಪ್ರಲ್ಹಾದ್ ಜೋಶಿ ಅವರು ಇತ್ತೀಚೆಗೆ ಮುಂಬೈನಲ್ಲಿ ನವೀಕರಿಸಬಹುದಾದ ಇಂಧನಕ್ಕಾಗಿ ಹಣಕಾಸು ಸಜ್ಜುಗೊಳಿಸುವ ರಾಷ್ಟ್ರೀಯ ಕಾರ್ಯಾಗಾರದಲ್ಲಿ ಉನ್ನತ ಬ್ಯಾಂಕರ್‌ ಗಳೊಂದಿಗೆ ಸಭೆ ನಡೆಸಿದರು, ಈ ಯೋಜನೆಯಡಿಯಲ್ಲಿ ತೊಂದರೆ ರಹಿತ ಸಾಲಗಳ ವಿತರಣೆಯನ್ನು ಖಚಿತಪಡಿಸಿಕೊಳ್ಳುವಂತೆ ಒತ್ತಾಯಿಸಿದರು. ಕಡಿಮೆ-ವೆಚ್ಚದ ಹಣಕಾಸು, ನವೀನ ಹಣಕಾಸು ಮಾದರಿಗಳು, ಜಾಗತಿಕ ಹವಾಮಾನ ನಿಧಿಗಳಿಗೆ ಸುಧಾರಿತ ಪ್ರವೇಶ ಮತ್ತು ಹೊಸ ತಂತ್ರಜ್ಞಾನಗಳಿಗೆ ವರ್ಧಿತ ಅಪಾಯ-ಹಂಚಿಕೆ ಕಾರ್ಯವಿಧಾನಗಳ ಅಗತ್ಯತೆ ಸೇರಿದಂತೆ ಹಣಕಾಸಿನ ಪ್ರವೇಶದಂತಹ ಹಲವಾರು ಪ್ರಮುಖ ನಿರ್ಧಾರಗಳಿಗೆ ಈ ಸಭೆಯು ಕಾರಣವಾಯಿತು. ಭಾರತದ ಶುದ್ಧ ಇಂಧನ ಪರಿವರ್ತನೆಯನ್ನು ಬೆಂಬಲಿಸಲು ಸಾರ್ವಜನಿಕ-ಖಾಸಗಿ ಪಾಲುದಾರಿಕೆಗಳನ್ನು ಬಲಪಡಿಸುವ ಮತ್ತು ಹಸಿರು ಹಣಕಾಸು ವಿಧಾನಗಳನ್ನು ವಿಸ್ತರಿಸುವ ಮಹತ್ವವನ್ನು ಸಭೆಯು ಒತ್ತಿಹೇಳಿತು.

ಸರ್ಕಾರವು ಛಾವಣಿ ಸೌರಶಕ್ತಿ ಉಪಕ್ರಮವನ್ನು ಸಾರ್ವಜನಿಕ ಮೂಲಸೌಕರ್ಯಗಳಿಗೂ ವಿಸ್ತರಿಸುತ್ತಿದೆ, ಸರ್ಕಾರಿ ಕಟ್ಟಡಗಳ ಮೇಲೆ ಸೌರಶಕ್ತಿ ವ್ಯವಸ್ಥೆಗಳ ಸ್ಥಾಪನೆಯನ್ನು ಉತ್ತೇಜಿಸುತ್ತಿದೆ. ಈ ಪ್ರಯತ್ನವು ಕಾರ್ಯಾಚರಣೆಯ ಇಂಧನ ವೆಚ್ಚವನ್ನು ಕಡಿಮೆ ಮಾಡುವುದಲ್ಲದೆ, ವಾಣಿಜ್ಯ ಮತ್ತು ಕೈಗಾರಿಕಾ ವಲಯಗಳಿಗೆ ಮಾದರಿಯಾಗಿ ಕಾರ್ಯನಿರ್ವಹಿಸುತ್ತದೆ, ದೇಶಾದ್ಯಂತ ಸೌರಶಕ್ತಿಯ ವ್ಯಾಪಕ ಅಳವಡಿಕೆಯನ್ನು ಉತ್ತೇಜಿಸುತ್ತದೆ.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ, ಸ್ವಾವಲಂಬಿ ಭಾರತ ಉಪಕ್ರಮಕ್ಕೆ ಅನುಗುಣವಾಗಿ, ಪ್ರಧಾನಮಂತ್ರಿ ಸೂರ್ಯ ಘರ್: ಉಚಿತ ವಿದ್ಯುತ್ ಯೋಜನೆಯು ಭಾರತದಲ್ಲಿ ಉತ್ಪಾದಿಸಲಾದ ಸೌರ ಘಟಕಗಳು ಮತ್ತು ಕೋಶಗಳ ಬಳಕೆಯನ್ನು ಕಡ್ಡಾಯಗೊಳಿಸುವ ಮೂಲಕ ದೇಶೀಯ ಉತ್ಪಾದನೆಯನ್ನು ಬೆಂಬಲಿಸುತ್ತದೆ. ಮಾರ್ಚ್ 10, 2025 ರ ಹೊತ್ತಿಗೆ, ಈ ಯೋಜನೆಯು 3 ಗಿ.ವ್ಯಾ. ಗಿಂತ ಹೆಚ್ಚಿನ ಛಾವಣಿಯ ಸೌರ ಸಾಮರ್ಥ್ಯದ ಸ್ಥಾಪನೆಯನ್ನು ಸುಗಮಗೊಳಿಸಿದೆ, ಮಾರ್ಚ್ 2027 ರ ವೇಳೆಗೆ ಹೆಚ್ಚುವರಿ 27 ಗಿ.ವ್ಯಾ. ಗುರಿಯನ್ನು ನಿಗದಿಪಡಿಸಲಾಗಿದೆ. ಈ ಉಪಕ್ರಮವು ಇನ್ವರ್ಟರ್‌ ಮತ್ತು ಬ್ಯಾಲನ್ಸ್‌ ಆಫ್‌ ಪ್ಲಾಂಟ್‌ (ಬಿಒಪಿ) ಬಿಡಿಭಾಗಗಳ ಸ್ಥಳೀಯ ಉತ್ಪಾದನೆಯನ್ನು ಉತ್ತೇಜಿಸುತ್ತದೆ. ಭಾರತದ ನವೀಕರಿಸಬಹುದಾದ ಇಂಧನ ಪೂರಕ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುತ್ತದೆ ಮತ್ತು ಮೇಕ್ ಇನ್ ಇಂಡಿಯಾ ದೃಷ್ಟಿಕೋನವನ್ನು ಉತ್ತೇಜಿಸುತ್ತದೆ.

ಕೇಂದ್ರ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರ ಮಾರ್ಗದರ್ಶನದಲ್ಲಿ, ಎಂ ಎನ್‌ ಆರ್‌ ಇ ಸಚಿವಾಲಯವು ಯೋಜನೆಯನ್ನು ಕ್ಷಿಪ್ರವಾಗಿ ಅನುಷ್ಠಾನಗೊಳಿಸುವುದು, ತ್ವರಿತ ನಿಯೋಜನೆಗಾಗಿ ಮೂಲಸೌಕರ್ಯಗಳನ್ನು ಸೃಷ್ಟಿಸುವುದು, ಸಮರ್ಥ ಸಬ್ಸಿಡಿ ವಿತರಣೆಯನ್ನು ಖಾತ್ರಿಪಡಿಸುವುದು ಮತ್ತು ವ್ಯಾಪಕವಾದ ಜಾಗೃತಿ ಅಭಿಯಾನಗಳನ್ನು ನಡೆಸುತ್ತಿದೆ. ಈ ಯೋಜನೆಯು ಸಾರ್ವಜನಿಕರಿಂದ ಮತ್ತು ಸರ್ಕಾರದಿಂದ ಅಗಾಧವಾದ ಬೆಂಬಲವನ್ನು ಪಡೆಯುತ್ತಿದೆ, ಇದು ಭಾರತದ ಸ್ವಚ್ಛ, ಹಸಿರು ಮತ್ತು ಇಂಧನ-ಸುರಕ್ಷಿತ ಭವಿಷ್ಯದ ಕಡೆಗೆ ಪರಿವರ್ತಕ ಹೆಜ್ಜೆಯನ್ನು ಗುರುತಿಸುತ್ತದೆ.

*****