వేవ్స్ యువ చిత్ర దర్శకుల పోటీ

భవిష్యత్ తరంలో సృజనాత్మకతను రగిలించేలా పోటీలు

పరిచయం

సమాచార, ప్రసార మంత్రిత్వ శాఖతో కలిసి విజిలింగ్ వుడ్స్ ఇంటర్నేషనల్ నిర్వహిస్తున్న వేవ్స్ యువ చిత్ర దర్శకుల పోటీ (వేవ్స్ యంగ్ ఫిల్మ్ మేకర్స్ చాలెంజ్) 12 నుంచి 19 సంవత్సరాల వయస్సున్న వర్ధమాన కథకులకు సినీనిర్మాణ ప్రపంచంలో అడుగు పెట్టడానికి ఉత్తేజకరమైన వేదికను అందిస్తోంది. సృజనాత్మకతను జ్వలింపజేసేలా, డిజిటల్ అక్షరాస్యతను పెంపొందించేలా, కథన నైపుణ్యాలను మెరుగుపరిచేలా రూపొందించిన ఈ పోటీ ద్వారా యువ సృజనకారులను నిర్వాహకులు ఆహ్వానిస్తున్నారు. 60 సెకన్ల నిడివితో వారు చిత్రాన్ని తీర్చిదిద్దాల్సి ఉంటుంది. ప్రపంచ దృశ్య శ్రవ్య వినోద సదస్సు (వేవ్స్)లో ముఖ్య భాగంగా నిర్వహిస్తున్న ఈ పోటీ.. లఘుచిత్రాల ద్వారా తమ భావుకతను ప్రదర్శించేలా, తమ దృక్పథాలను పంచుకునేలా పిల్లలు, యువతను ప్రోత్సహిస్తోంది.

ముంబయిలోని జియో వరల్డ్ కన్వెన్షన్ సెంటర్, జియో వరల్డ్ గార్డెన్స్ లో ఈ ఏడాది మే 1 నుంచి 4 వరకు నిర్వహించనున్న వేవ్స్.. మీడియా, వినోద పరిశ్రమల్లో చర్చలు, సమన్వయం, ఆవిష్కరణల కోసం ప్రధాన వేదికగా నిలవనుంది. ఈ రంగాన్ని ముందుకు నడిపిస్తున్న ప్రముఖులు, భాగస్వాములు, ఆవిష్కర్తలందరినీ ఒక్కచోటికి చేర్చి కొత్త అవకాశాలను అన్వేషించడానికి, సవాళ్లను పరిష్కరించడానికి, భారత మీడియా- వినోద రంగంలో వృద్ధిని ప్రోత్సహించడానికి అవకాశాన్నిస్తోంది.

కేంద్ర సమాచార, ప్రసార మంత్రిత్వ శాఖ చేపట్టిన ప్రతిష్ఠాత్మక కార్యక్రమం ‘క్రియేట్ ఇన్ ఇండియా చాలెంజెస్’ వేవ్స్ కు కేంద్ర బిందువుగా నిలిచింది. 31 పోటీలు, 70,000కు పైగా పోటీదారులతో ప్రారంభమైన ఈ కార్యక్రమం.. ప్రపంచం నలుమూలల నుంచి సృజనకారుల దృష్టిని ఆకట్టుకుంది. ఆవిష్కరణ వ్యవస్థలో వృద్ధిని ప్రోత్సహించడం ద్వారా మీడియా, వినోద రంగాలకు అంతర్జాతీయ కేంద్రంగా భారత్ ను నిలపడం ఈ పోటీల లక్ష్యం.

ముఖ్య లక్ష్యాలు:

• సృజనాత్మకతను ప్రేరేపించడం: సినిమా ద్వారా సృజనాత్మకతనూ, కల్పనాశక్తినీ వ్యక్తీకరించేలా యువ చిత్ర దర్శకులకు ఆహ్లాదకరమైన, భరోసా కల్పించే వేదికను అందించడం.

• కథా కథనాలకు ప్రోత్సాహం: యువ ప్రేక్షకులను ఆకట్టుకునే ఆకర్షణీయమైన, భావుకతతో కూడిన కథనాలను రూపొందించేలా యువతను ప్రోత్సహించడం.

• ఆత్మవిశ్వాసాన్ని పెంపొందించడం: అంతర్జాతీయ వేదికపై తమ ప్రతిభను ప్రదర్శించే అవకాశాన్ని అందించడం ద్వారా పిల్లలు, యువతను సాధికారులను చేయడం.

• వైవిధ్యాన్ని చాటడం: యువ చిత్ర దర్శకులు తెరకెక్కించే విభిన్న దృక్పథాలు, కథనాలను ప్రముఖంగా చాటడం.

విజేతలను నిర్ణయించడానికి ప్రమాణాలు

నమోదుకు మార్గదర్శకాలు

పోటీకి సంబంధించి ముఖ్యమైన తేదీలు

• 2024 సెప్టెంబర్ నుంచి 2025 ఫిబ్రవరి 15 వరకు జరుగుతుంది.

• చిత్ర నిర్మాణం, సృజనాత్మకత, సమష్టి కృషిపై మొదటి రౌండ్ లో ప్రధానంగా దృష్టి సారిస్తారు.

• ప్రతి కేటగిరీలో మొదటి 10 స్థానాల్లో నిలిచిన వారికి మార్చి 7, 8 తేదీల్లో ముంబయిలోని విజిలింగ్ వుడ్స్ ఇంటర్నేషనల్ లో చిత్ర దర్శకుడు అమోల్ గుప్తే ఆధ్వర్యంలో నిర్వహించే రెండు రోజుల కార్యశాలలో పాల్గొనే అవకాశం లభిస్తుంది.

• ఎంపికైన బృందాలు తమ చిత్రాలను మరోసారి చిత్రీకరించే అవకాశం లభిస్తుంది. వారు తుది చిత్రాన్ని ఏప్రిల్ 15 నాటికి సమర్పించాలి.

పురస్కారాలు, గుర్తింపు

• ఎంపికైన చిత్రాలను వేవ్స్ ప్రత్యేక సదస్సులో ప్రదర్శిస్తారు. అక్కడే విజేతలను ప్రకటిస్తారు.

• ప్రతీ వయో విభాగంలో విజేతలకు ప్రోత్సాహకంగా వేవ్స్ కు ప్రయాణ, వసతి సదుపాయాలు లభిస్తాయి.

• విజేతలకు గుర్తింపు, మార్గదర్శకత్వం, స్కాలర్షిప్ అవకాశాలు, ఆన్లైన్ చిత్ర నిర్మాణ కోర్సుల్లో ప్రవేశం, విజయాలకు సంబంధించి ధ్రువీకరణ పత్రాలు లభిస్తాయి.

• పోటీలో భాగస్వాములైన అందరికీ యువ చిత్ర దర్శకులుగా తమ అభివృద్ధికి ఉపయోగపడేలా విలువైన సూచనలు లభిస్తాయి.

ఆధారాలు:

• https://wavesindia.org/challenges-2025

• https://whistlingwoods.co.in/WAVES/