Lada phi don ka jingtip kaba bniah shaphang ka jingkiew shaphrang jong ka nongbah jong phi ha kaba iadei bad ki thong Sustainable Development Goal (SDG), kane ka dei ka lad ia phi ban ioh jingithuh ha kylleng ka ri. Ka World Audio Visual & Entertainment Summit (WAVES) 2025 ka ai ka lad kaba kyrpang ia ki briew kiba sngewthuh ia ki sienjam, ki jingeh bad ki jingjop ha ka nongbah jong ki na ka bynta ka jingiaineh.

Ka 'City Quest: Shades of Bharat', ka jingialehkai kaba ai jingtip, ka dei ka bynta kaba heh jong ka jingiakhun Create in India kaba dang iaid mynta hapoh ka WAVES 2025. Kane ka jingialehkai ka dei kaba la saindur ban ai jingtip bad ai mynsiem ia ki samla da kaba pynlong jinglehkai ia ki bynta jong ka jingkyntiew ia ki nongbah lyngba ka jingpeit ia ki thong Sustainable Development Goal (SDG). Ka peit ia ki jingkhlain bad ki jingeh jong 56 tylli ki nongbah ha kylleng ka ri da kaba wanrah biang ia ka jingkmen jong ki jingialehkai trump card ha ki por ba dang khynnah.

Kane ka rynsan kan plié ka lad ban pyni ia ki nongbah kiba shim ia ki sienjam kiba heh sha ka lawei kaba iaineh. Paw kum u lahduh ha ka kam jingiaineh ha ki jaka sor bad ioh ia ka lad ban pyni ia ka jingtip jong phi shaphang ka jingiaid lynti SDG jong ka nongbah, ha kaba ia ki nongjop yn pynkup burom ha ka WAVES 2025 ha Mumbai naduh ka 1-4 tarik u Jymmang, 2025.

Shaphang ka jingialehkai

Ka jingialehkai City Quest ka dei kaba lehkai marwei ha kaba ki nongialehkai ki iakhun bad ka kor computer da kaba pyndonkam ia ki card jong ki nongbah. Man ka card ka don hynriew tylli ki bynta kaba plié lad ia ki nongialehkai ba kin ianujor ia ki nongbah katkum ki statistic bapher bapher kum ka Hunger Index, Ka Koit ka Khiah, ka Bha ka Miat, ka Jingiaryntih kyrdan hapdeng ki shynrang bad kynthei. Ka peit ia 15 tylli ki SDG bad ka pyndonkam ia ki 6 tylli ki SDG ba khlain tam jong 56 tylli ki nongbah da kaba pyndonkam ia ka Urban Index (2021) jong ka NITI Aayog.

Ka ai jingtip ia ki nongialehkai shaphang ki jingeh hakhmat ka roi ka par bad ki jingjop jong 56 tylli ki nongbah jong ka India da kaba ban jur halor ka jingiarap jong ki rukom im kiba kyntiew ia ka jingiaineh.

Katba ki nongialehkai ki peit ia ki bynta bapher bapher jong man ki nongbah lyngba ka City Quest, ki ioh jingsngewthuh kumno ki sienjam shimet bad ki sienjam iatrei lang ki iarap ia ka jingiaineh jong ka India ha ka pyrthei

Ka jingialehkai City Quest ka dei kaba baroh ki lah ban ialehkai bad ka plié lad ban ioh biang ia ka jingsngewtynnad ban ialehkai ia ki jingialehkai card ryngkat ka jingpynkylla ba thymmai bad ka lad ban tip kham bha shaphang ki nongbah jong ka Bharat. Ka jingialehkai ka don ki leaderboard jong ki nongbah bad jong ka ri kaba wanrah ia ka jingiakhun hapdeng ki nongialehkai bad kaba kyntiew ia ka jingiashim bynta na ki thain bapher bapher. Ki nongialehkai ki lah ban kyntiew kyrteng na ka bynta ka nongbah jong ki kaba wanrah ia ka jingsngew sarong shaphang ka imlang sahlang bad ka jaka ba ki sah.

City Quest: Ka jingtei ia ka jabieng ha ka E-Summit 2025 jong ka IIT Bombay

‘City Quest: Shades of Bharat’, ka jingialehkai kaba ai jinghikai ka ianujor ia 56 tylli ki nongbah ka India ha kaba iadei bad ki thong Sustainable Development Goal bad ka dei kaba la pyni ha ka E-Summit 2025 kaba dang shu dep kaba dei ka prokram ba kyrpang kaba man u snem jong ka E-Cell IIT Bombay ha une u taiew ba la dep. Kane ka prokram ka la long kaba shongshit, ka jingiashim bynta da ki briew kiba la sngewtynnad bha bad ka jingiashim bynta haduh 30,000 ngut ki samla pule ha ki ar sngi.

Ha ka E-Summit 2025 jong ka IIT Bombay, ka E Gaming Federation (EGF), kaba dang pyniaid ia ka City Quest ha ka jingiatreilang bad ka tnad Information and Broadcasting, ka la pynlong ia ki jingiamir jingmut shaphang ka gaming, ki startup, bad ki teknoloji ba thymmai. Kine ki bynta ki la pyni ia ka bynta kaba heh jong ka kam gaming bad ki teknoloji ha ka jingseng kam lajong mynta.

Ki briew ba pawnam ha ka Summit ki kynthup Nandan Nilekani, Anupam Mittal bad Sonam Wangchuk. Ka City Quest ka la khring bha ia ki sampa pule IITB bad kito kiba la wan iashim bynta, kaba la pynshongshit shaphang ka World Audio Visual Entertainment Summit 2025, ka ban wan bad ki jingiakhun Create in India Season 1.

Ka jingiakren shaphang ki SDG lyngba ka kam iathuh khana ha IIT Bombay

Ka City Quest ka la plié ki lad ia ki samla pule lyngba ka kam iathuh khana shaphang ki nongbah jong ka India bad ka jingkongsan jong ka jingiashim bynta ki briew ka India lyngba ki kam jong ki kiba man ka sngi ban kyntiew ia ka India ha ki kyrdan SDG jong ka pyrthei.

La pynlong ruh ia ki jingiakhun hapdeng ki samla pule kum ki nongmihkhmat jong ki shnong jong ki kiba la iakhun pyrshah iwei ia iwei lyngba ki City Quest trump card. Ki nongjop ki la ioh ia ki special edition jong ka City Quest deck man ka kynta jong ka sngi.

Ki mat ba kongsan jong ka City Quest: Shades of Bharat:

• Ka jingialehkai kaba saindur thymmai: Ki nongialehkai ki iakhun da kaba pyndonkam ia ka bor pyrkhat ban sngewthuh kumno ki nongbah ki nong synniang sha ki SDG, kaba wanrah ia ka jingsngew iatylli bad ka jingsngew sarong shaphang ka imlang sahlang.
• Ka jingkam ia ki jingiaphiah: Ka City Quest ka pyni kumno ka jingpynkylla jinglehkai ka lah ban wanrah ia ka jingiasoh jong ka jingshna polisi bad ka jingiashim bynta ki paidbah, ka ai ia ka lad kaba sngewtynnad ban ai jinghikai bad ai mynsiem ia ki samla jong ka India na ka bynta ka roi ka par kaba iaineh.

WAVES 2025

U Myntri Sorkar Pdeng ba dei khmih ia ki tnad Information and Broadcasting, Kam Rel, Kam Electronic and IT, Ashwini Vaishnaw, u la pynbna ia ka tarik bad ka jaka ha kaba yn pynlong ia ka World Audio Visual Entertainment Summit (WAVES 2025). Kane ka prokram, ka ban kyntiew ia ka India kum ka nongialam jong ka pyrthei ha ki kam saindur, kan long ha Mumbai naduh ka 1 tarik u Jymmang 2025 haduh ka 4 tarik u Jymmang 2025.

Kane ka jingpynbna ka wan hadien ka jingiakynduh jong ka Advisory Board jong ka WAVES bad u Myntri Rangbah Duh Narendra Modi, kaba pyni ia ka jingthmu jong ka ri ban long ka bor jong ka jingsaindur ha ka pyrthei. Kane ka summit kan wanrah lang ia ki media CEO, ki riewpawkhmat ha ki kam pynpyrnia, bad ki nongsaindur ba tbit tam na kylleng ka pyrthei – ka ban pyniasoh ia ka kam pynbyrnia, ka jingsaindur bad ka deiriti kumba ym pat ju iohi mynshuwa.

Kane ka jingialehkai ka dei kaba lah ban ioh ei ha ka Android lyngba ka Google Play, kaba ai ka rynsan ia ki nongialehkai na kylleng ka ri ban don jingiadei bad ki kam ba kongsan ha ka imlang sahlang bad noh synniang sha ka jingsngewthuh lang ia ka roi ka par jong ki jaka sor bad ka jingiaineh.

*****