Ka tnad Development of North Eastern Region (DoNER) ka la pynlong ia ka North East Trade and Investment Roadshow ha Chennai ha ka sngi Balang. Ka roadshow ka la ktik ia ki jingmut jingpyrkhat jong ki nongbei tyngka kiba la kloi ban peit ia ki lad kiba don ha ki jylla ka thain shatei lammihngi. Ha kane ka prokram la wan iashim bynta u Myntri Sorkar Pdeng ba dei khmih ia ka tnad Development of North Eastern Region & bad ka tnad Communications, Jyotiraditya M. Scindia, ha ryngkat u Pu Lalnghinglova Hmar, Myntri ka tnad Sports & Youth Services, Sorkar Mizoram, ki ophisar na ka tnad DoNER, North Eastern Council bad ki jylla ka thain shatei lammihngi.

U Myntri ka tnad DoNER u la ong ba u Myntri Rangbah Duh u la ong ba ka thain shatei lammihngi ka dei ka Asthalakshmi jong ka India, ka jingdon jingem kaba kongsan kaba la khreh ia ka jingwan ki karkhana. U la kdew sha ki sienjam na ka bynta ka jingpynbiang ia ki jingdon jingem kiba la wan ha ka thain shatei lammihngi hapoh ka jingialam jong u Myntri Rangbah Duh ha kine ki 10 snem ba la dep, kiba kynthup ka jingpyniar ia ka jingiasoh lyngba ki liengsuin, ki surok bad ki rel, ki lad ka leit ka wan lyngba ki jaka shong um. U Myntri ka tnad DoNER u la ong ba man ki phra tylli ki jylla ha ka thain shatei lammihngi ki don la ki jong ki jingkhlain, ki jingdon jingem bad ki lad bad kumta kane ka thain ka long ka bynta kaba kongsan ha ka roi ka par jong ka India. Naduh ka jingiar jong ka deiriti haduh ka jingitynnad bad ka jingdon ha ka jaka kaba kongsan, ka thain shatei lammihngi ka don shibun ki lad ban long kawei na ki bor kiba khlain jong ka ri ha ka ioh ka kot. Ka jingjan jong ka ia ka Southeast Asia ka pylong ruh ia ka thain shatei lammihngi kum ka khyrdop sha ki ri ka South East Asia, kaba iahap bha bad ka Act East Policy jong ka India. U la kdew ruh sha ki lad jong ki jylla ka thain ha ki kam bapher bapher kum ka kam jngoh kai bad ka kam ai jaka sah ia ki nongleit nongwan, ka kam rep bad ki kam kiba iadei bad ka kam rep, ka kam ai jingsumar, ki kam pynbyrnia bad ki kam ialehkai, ki jingdon jingem bad ka kam logistic, IT bad ITeS, ki kam jain, ki kam thain jain bad kam shna tiar, ka bording bad kiwei kiwei. U la kular ia ki nongbei tyngka ba ki samla jong ka thain, ka jingnang jingstad, bad ki jingdon jingem kiba bun ki pynlong ba kane ka jaka ka dei kaba biang bha ban bei tyngka. U Myntri u la ong ba u itynnad bha ia ka Chennai, bad u la ong ba kane ka dei ka jaka kaba khlain ha ka kam IT bad ka jaka pdeng jong ka jingkiew ka ioh ka kot jong ka India. U la iaroh ia ka hiar pateng ha kane ka nongbah, ka teknoloji bad ki kam karkhana kiba khlain bad u la pyniasriem ia ki lad ha Chennai bad ki lad jong ka thain shatei lammihngi ha ka ioh ka kot. Da kaba kdew sha ka bor jong ka thain shatei lammihngi ha ka kam rep, ka kam pynmih jingbam, ka kam jngoh kai, bad ka kam shna jingshna, u la kyntu ia ki nongseng kam lajong na Chennai ba kin bei tyngka ha kine ki kam. U la ong ruh ba ka thain shatei lammihngi ka don 38% ki siej kaba plie ia ka lad kaba heh ia ki kam shna jingshna jong ka Chennai. Shuh shuh ki hydrocarbon bad ki lad pynmih bording ha ka thain shatei lammihngi ki ap ban shah pyndonkam. Ha kaba pynkut ia ka jingai jingkren, u la khot ia ki nongbei tyngka sha ka thain shatei lammihngi ba kin don ka bynta kaba heh ha ka jingtei ia ka lawei jong kane ka thain.

U Myntri ka tnad kam ialehkai, Sorkar Mizoram ha ka jingai jingkren, u la batai shaphang ki lad ba bun ban bei tyngka ha Mizoram watla kane ka dei ka jylla kaba rit kaba don tang 11 lak ngut ki briew. U la ong ba lyngba ka jingdon 55% ka bynta jong ka khyndew ha kaba la pyntrei ki kam horticulture, ka Mizoram ka pynmih ia u sying bad ki sohmynken ba don GI – tag, ha ryngkat ki soh niamtra, u sohkynphor bad u soh dragon, kaba plie ka lad kaba heh ha ka kam rep bad ka kam shna jingbam. Ka jylla ka bun ki siej kiba ym pat pyndonkam. U la ong ruh ba ka Mizoram ka dang kylla sha ka bor kaba heh ha ki kam ialehkai bad ka iahap bad ka jing thmu 2036 Olympics jong ka India: Ka Mizoram ka la pynmih ia ki nongialehkai kiba tbit bad kumta ka kam ialehkai ka dei kaba don shibun ki lad ban bei tyngka. U la kyntu ruh ia ki nongbei tyngka ba kin peit ia kiwei kiwei ki kam kum ka kam jngoh kai, ki jingdon jingem, ka kam shna jingbam bad kiwei kiwei ha kiba lah ban bei tyngka ha ka jylla Mizoram.

U Chanchal Kumar, Secretary, ka tnad DoNER u la kdew sha ki lad kiba bun ban bei tyngka ha ka thain shatei lammihngi bad u la ong ba kane ka dei ka jaka pdeng jong ka jingsaindur, ka jinghiar pateng ka deiriti bad ki lad ha ka ioh ka kot. Lyngba ki jaka ba itynnad bad ka kam jngoh kai kaba khlain, ka thain ka la khring ia ki nongbei tyngka. U la ong ba ha kine ki 10 snem ba la dep, ki lad pyniasoh ha ka thain ki la kylla la ka dei lyngba ki surok, ki rel, ki liengsuin, ka um ne ki kam digital. Ka jingkiew ka ioh nka kot ha ka thain ka la kham sted ban ia ka jong ka ri bad kumta ka iahap bha na ka bynta ki kam khaii pateng. Shuh shuh, ki jylla ka thain shatei lammihngi ki la wanrah ia ki polisi kiba iahap bad ka Sorkar Pdeng ban pynshlur ia ki jingbei tyngka. U la ong ba ka Sorkar ka la jied phra tylli ki jaka jngoh kai ban kyntiew kum ki nuksa jong ki kam jngoh kai ha man ki jylla jong ka thain lyngba ka rukom treikam PPP. U la ong ruh ba ki kam IT & ITeS ka la kiew wut wut ha ka thain shatei lammihngi. Shuh shuh, ka kam rep bad ki kam kiba iadei bad kane ki ai ia ki mar bapher bapher kiba don shibun ki lad na ka bynta ka ioh ka kot. U la ong ba ka skhim UNNATI bad la sdang da ka Sorkar India ka ai ki jingmyntoi haba bei tyngka ha ka thain shatei lammihngi. U la ong ruh ba lyngba ki surok bah bad ka Kaladan project, ka thain shatei lammihngi ka la khreh ban long ka jaka pdeng na ka bynta ka kam jngoh kai kaba iadei bad ka jingai jingsumar, ha kaba yn wan 60 million ngut ki briew na ki ri ba marjan. Ka single-window system ha ki jylla ka thain shatei lammihngi ka pynsuk ban trei ha ki kam khaii pateng. U la kyntu ia ki nongbei tyngka ba kin leit, kin peit bad iatrei lang na ka bynta ka jingkylla jong ka thain shatei lammihngi.

U Shantanu, Joint Secretary, ka tnad DoNER, u la batai shaphang ki lad ha ka thain shatei lammihngi bad u la ong ba kane ka thain ka don shibun ki lad bym pat pyndonkam. U la pyntip ba ha kine ki 10 snem ba la dep, ki lad ka leit ka wan ki la kiew bha ha ka thain la ka dei lyngba ki liengsuin, ki surok, ki rel ne ki jaka shong um. U la ong ba ki jingdon jingem ha ka thain, ki jingpyniasoh, ka jingbun ki briew kiba la long ban trei ha ki kam bad ki briew kiba tbit ha ka ktien phareng ka pynlong ba kane ka iahap bha na ka bynta ki kam khaii pateng bad ki iew ha Southeast Asia. U la kdew ruh sha ki lad ha ka thain ha ki kam kum ka IT & ITeS, ka jingai jingsumar, ka kam rep bad ki kam kiba iadei bad ka, ka pule puthi bad ka jingkyntiew ia ki sap, ka kam ialehkai bad kam pynbyrnia, ka kam jngoh kai bad ka kam ai jaka sah ia ki nongleit nongwan, ki jingdon jingem bad logistics, ki jain bad ka jingthain ia ki jain bad ka jingshna ia ki tiar bad ruh ka kam bording. U la ong ba lyngba ki lad kiba bun ha ki kam bapher bapher, ka thain shatei lammihngi ka khot ia ki nongbei tyngka ba kin peit ia ki lad kiba bun bad iashim bynta ha ka jingiaid lynti jong ka sha ka roi ka par.

U nongmihkhmat ia ka Tnad Promotion of Industry and Internal Trade (DPIIT), hapoh ka Tnad Commerce & Industry jong ka sorkar pdeng, u la ai jingpynshai halor ka skhim UNNATI,  kaba la wanrah ka jingsngewthuh kaba pura hapdeng ki nongiashim bynta shaphang ki jingmyntoi ba don ha kane ka skhim. U la ban jur ba ka Skhim UNNATI ka thmu ban kyntiew ia ki kam karkhana bad ka jingkiew shaphrang ka ioh ka kot ha ka thain shatei lammihngi jong ka ri. Ka Skhim ka ai jingmyntoi ban khring ia ki nongbeiu tyngka bad ki kompani shna tiar, kyrshan ia ka ‘Act East Policy’, bad kyntiew ia ka jingshna tiar ha ka ri bad ki jingai jingshakri ban pynduna ka jingshaniah na shabar ri bad kyntiew ia ka jingshalan tiar.

Ki ophisar kiba mihkhmat ia ki jylla ka thain shatei lammihngi ki la iasam ia ki sienjam na ka bynta ki kabu ba don ha ki kam bapher bapher. Ka Chennai roadshow ka la khring ia ka jingiashim bynta shitrhem na ki nongialam karkhana, kaba la pynkhlain shuh shuh ia ka jingkyrpad ban bei tyngka ha ka thain shatei lammihngi jong ka ri. Ha kane ka prokram la don ruh ki jingialang B2G, kaba la pynbiang ka rynsan ia ki nongbei tyngka ban iamir jingmut shaphang ki jing thmu bei tyngka ha ka thain shatei lammihngi.

Ka Chennai roadshow ka la kut ha ka rukom kaba ai mynsiem, ha kaba ki nongiashim ki la ong ba ki kloi ban peit ia ki kam ba lah ban iatreilang ha ka thain shatei lammihngi. Kane ka prokram ym tangba ka kyntiew ia ka jingiakren kaba don jingmut hynrei ka buh ia ka nongrim  na ka bynta ki jingiatreilang ha ki por ban wan, kyntiew ia ka ioh ka kot bad ka roi ka par kaba iaineh ha ka thain. Ka prokram ka la long sa uwei u mawmer ha ka jingseisoh jong ka jingpynlong ia ki roadshow ha kylleng ka ri bad pyni ia ki lad ki bym pat pyndonkam ha ka thain shatei lammihngi.

*****