କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ଆଜି ସଂସଦରେ ୨୦୨୫-୨୬ ବଜେଟ୍ ଉପସ୍ଥାପନ କରିବା ସମୟରେ କହିଛନ୍ତି ଯେ ଏହି ବଜେଟ୍ ସମସ୍ତ କ୍ଷେତ୍ରରେ ସନ୍ତୁଳିତ ବିକାଶ ଏବଂ ବିକଶିତ ଭାରତର ଲକ୍ଷ୍ୟ ହାସଲ କରିବା ସହିତ ଆଗାମୀ ପାଞ୍ଚ ବର୍ଷ ମଧ୍ୟରେ 'ସବକା ବିକାଶ'ର ସ୍ୱପ୍ନକୁ ସାକାର କରିବାର ଏକ ଅନନ୍ୟ ସୁଯୋଗ ପ୍ରଦାନ କରିବ। କେନ୍ଦ୍ର ବଜେଟରେ ଏମଏସଏମଇକୁ ଦେଶର ବିକାଶ କାହାଣୀର ଏକ ଶକ୍ତିଶାଳୀ ଉପକରଣ ଭାବରେ ବର୍ଣ୍ଣନା କରାଯାଇଛି । ଅଭିବୃଦ୍ଧିକୁ ତ୍ୱରାନ୍ୱିତ କରିବା ଏବଂ ସମନ୍ୱିତ ବିକାଶ ସୁନିଶ୍ଚିତ କରିବାରେ ଏମଏସଏମଇଗୁଡ଼ିକୁ ସହାୟତା କରିବା ପାଇଁ ବଜେଟରେ ଅନେକ ବିକାଶମୂଳକ ପଦକ୍ଷେପ ପ୍ରସ୍ତାବ ଦିଆଯାଇଛି ।

ଏମଏସଏମଇ ବର୍ଗୀକରଣ ପଦ୍ଧତିର ସଂଶୋଧନ

ସଂସଦରେ ବଜେଟ୍ ଉପସ୍ଥାପନ କରିବା ସମୟରେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ କହିଥିଲେ ଯେ ଏମ୍ ଏସ୍ ଏମ୍ ଇ ଗୁଡ଼ିକ ପାଇଁ ବର୍ଗୀକରଣ ସମ୍ବନ୍ଧୀୟ ନିବେଶ ଏବଂ ବ୍ୟବସାୟ ସୀମା ଯଥାକ୍ରମେ ୨.୫ ଏବଂ ୨ ଗୁଣ ବୃଦ୍ଧି କରାଯିବ। ଏହା ସେମାନଙ୍କୁ ବୃହତ ଉଦ୍ୟୋଗ ହେବା ଏବଂ ଯୁବବର୍ଗଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବାକୁ ଆତ୍ମବିଶ୍ୱାସ ଦେବ ବୋଲି ସେ ଉଲ୍ଲେଖ କରିଛନ୍ତି।

ଏହାର ବିବରଣୀ ସାରଣୀ ୧ରେ ପ୍ରଦାନ କରାଯାଇଛି...

କେନ୍ଦ୍ର ଅର୍ଥ ଏବଂ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ କହିଛନ୍ତି ଯେ ଏକ କୋଟିରୁ ଅଧିକ ପଞ୍ଜୀକୃତ ଏମଏସଏମଇ ବର୍ତ୍ତମାନ ୭.୫ କୋଟି ଲୋକଙ୍କୁ ନିଯୁକ୍ତି ପ୍ରଦାନ କରୁଛନ୍ତି ଏବଂ ଆମର ଉତ୍ପାଦନରେ ୩୬ ପ୍ରତିଶତ ଯୋଗଦାନ କରୁଛନ୍ତି ତଥା ଭାରତକୁ ଏକ ବିଶ୍ୱସ୍ତରୀୟ ଉତ୍ପାଦନ କେନ୍ଦ୍ରରେ ପରିଣତ କରିବା ପାଇଁ ମିଳିତ ଭାବରେ କାର୍ଯ୍ୟ କରୁଛନ୍ତି । ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ଏହି ଏମଏସଏମଇଗୁଡିକ ସେମାନଙ୍କର ଗୁଣାତ୍ମକ ଉତ୍ପାଦ ସହିତ ଆମର ରପ୍ତାନିରେ ୪୫ ପ୍ରତିଶତ ଯୋଗଦାନ କରନ୍ତି ।

ଗ୍ୟାରେଣ୍ଟି କଭର ସହିତ ଋଣ ଉପଲବ୍ଧତାରେ ଉଲ୍ଲେଖନୀୟ ବୃଦ୍ଧି

କେନ୍ଦ୍ର ଅର୍ଥ ଏବଂ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ କହିଛନ୍ତି ଯେ ଋଣ ଉପଲବ୍ଧତାରେ ଉନ୍ନତି ଆଣିବା ପାଇଁ ଋଣ ଗ୍ୟାରେଣ୍ଟି କଭର ବୃଦ୍ଧି କରାଯିବ:

୧) ଅଣୁ ଓ କ୍ଷୁଦ୍ର ଉଦ୍ୟୋଗ ପାଇଁ ୫ କୋଟି ଟଙ୍କାରୁ ଆରମ୍ଭ କରି ୧୦ କୋଟି ଟଙ୍କା ପର୍ଯ୍ୟନ୍ତ, ଯାହା ଆଗାମୀ ୫ ବର୍ଷରେ ଅତିରିକ୍ତ ଦେଢ଼ ଲକ୍ଷ କୋଟି ଟଙ୍କାର ଋଣ ଉପଲବ୍ଧ କରାଇବ।

୨) ଷ୍ଟାର୍ଟଅପ୍ ପାଇଁ ୧୦ କୋଟିରୁ ୨୦ କୋଟି ପର୍ଯ୍ୟନ୍ତ, ଆତ୍ମନିର୍ଭର ଭାରତ ପାଇଁ ଗୁରୁତ୍ୱପୂର୍ଣ୍ଣ ୨୭ଟି ଫୋକସ୍ ସେକ୍ଟରରେ ଋଣ ପାଇଁ ଗ୍ୟାରେଣ୍ଟି ଶୁଳ୍କ କୁ ୧ ପ୍ରତିଶତକୁ ହ୍ରାସ କରାଯାଇଛି।

୩) ଉତ୍ତମ ପ୍ରଦର୍ଶନ କରୁଥିବା ଏମଏସଏମଇ ପାଇଁ ୨୦ କୋଟି ଟଙ୍କା ପର୍ଯ୍ୟନ୍ତ ମିଆଦୀ ଋଣ ।

କ୍ଷୁଦ୍ର ଉଦ୍ୟୋଗ ପାଇଁ କ୍ରେଡିଟ୍ କାର୍ଡ

କେନ୍ଦ୍ର ଅର୍ଥ ଏବଂ କର୍ପୋରେଟ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ଆମେ ଏଣ୍ଟରପ୍ରାଇଜ୍ ପୋର୍ଟାଲରେ ପଞ୍ଜୀକୃତ କ୍ଷୁଦ୍ର ଉଦ୍ୟୋଗଗୁଡିକ ପାଇଁ ୫ ଲକ୍ଷ ଟଙ୍କାର ସୀମା ସହିତ ସ୍ୱତନ୍ତ୍ର ଅନୁକୂଳ କ୍ରେଡିଟ୍ କାର୍ଡ ଆରମ୍ଭ କରିବୁ । ପ୍ରଥମ ବର୍ଷରେ ୧୦ ଲକ୍ଷ କାର୍ଡ ପ୍ରଦାନ କରାଯିବ ବୋଲି ସେ ଉଲ୍ଲେଖ କରିଛନ୍ତି।

ଷ୍ଟାର୍ଟଅପ୍ ପାଇଁ ପାଣ୍ଠି

ବଜେଟ୍ ଅଭିଭାଷଣରେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, ଷ୍ଟାର୍ଟଅପ୍ ଗୁଡ଼ିକ ପାଇଁ ବିକଳ୍ପ ନିବେଶ ପାଣ୍ଠି (ଏଆଇଏଫ୍)କୁ ୯୧,୦୦୦ କୋଟିରୁ ଅଧିକ ପ୍ରତିଶ୍ରୁତି ମିଳିଛି। ଏଥିପାଇଁ ପ୍ରତିଷ୍ଠିତ ପାଣ୍ଠିକୁ ୧୦,୦୦୦ କୋଟି ଟଙ୍କାର ସରକାରୀ ଅନୁଦାନ ପ୍ରଦାନ କରାଯାଇଛି। ଏବେ ସମ୍ପ୍ରସାରିତ ପରିସର ଏବଂ ୧୦,୦୦୦ କୋଟି ଟଙ୍କାର ନୂତନ ଯୋଗଦାନ ସହିତ ଏକ ନୂତନ ପାଣ୍ଠି ପ୍ରତିଷ୍ଠା କରାଯିବ ବୋଲି ସେ କହିଛନ୍ତି।

ନୂତନ ଉଦ୍ୟୋଗୀଙ୍କ ପାଇଁ ନୂଆ ଯୋଜନା

କେନ୍ଦ୍ର ଅର୍ଥ ଏବଂ କର୍ପୋରେଟ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ କହିଛନ୍ତି ଯେ ମହିଳା, ଅନୁସୂଚିତ ଜାତି ଏବଂ ଅନୁସୂଚିତ ଜନଜାତିର ପାଞ୍ଚ ଲକ୍ଷ ନୂତନ ଉଦ୍ୟୋଗୀଙ୍କ ପାଇଁ ଏକ ନୂତନ ଯୋଜନା ଆରମ୍ଭ କରାଯିବ । ଏହି ଯୋଜନା ଅଧୀନରେ ଆସନ୍ତା ୫ ବର୍ଷ ମଧ୍ୟରେ ୨ କୋଟି ଟଙ୍କା ପର୍ଯ୍ୟନ୍ତ ମିଆଦୀ ଋଣ ଉପଲବ୍ଧ ହେବ ବୋଲି ସେ ଉଲ୍ଲେଖ କରିଛନ୍ତି। ନିଜ ଅଭିଭାଷଣରେ ସେ କହିଛନ୍ତି, ସଫଳ ଷ୍ଟାଣ୍ଡଅପ୍ ଇଣ୍ଡିଆ ଯୋଜନାରୁ ମିଳିଥିବା ଅଭିଜ୍ଞତାକୁ ଏହି ଯୋଜନାରେ ଅନ୍ତର୍ଭୁକ୍ତ କରାଯିବ। ଉଦ୍ୟୋଗୀ ଓ ପରିଚାଳନାଗତ ଦକ୍ଷତା ପାଇଁ ଅନଲାଇନ୍ ଦକ୍ଷତା ବିକାଶ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯିବ।

ଡିପ୍ ଟେକ୍ ପାଣ୍ଠି

କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ସୂଚନା ଦେଇଛନ୍ତି ଯେ ଏହି ପଦକ୍ଷେପର ଏକ ଅଂଶ ଭାବରେ ପରବର୍ତ୍ତୀ ପିଢ଼ିର ଷ୍ଟାର୍ଟଅପ୍ ଗୁଡ଼ିକୁ ଉତ୍ସାହିତ କରିବା ପାଇଁ ଡିପ୍ ଟେକ୍ ପାଣ୍ଠି ପାଇଁ ଏକ ପାଣ୍ଠି ଉପରେ ମଧ୍ୟ ବିଚାର କରାଯିବ।

ରପ୍ତାନି ପ୍ରୋତ୍ସାହନ ମିଶନ

କେନ୍ଦ୍ର ଅର୍ଥ ଏବଂ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ କହିଛନ୍ତି ଯେ ଆଞ୍ଚଳିକ ଏବଂ ମନ୍ତ୍ରଣାଳୟ ଲକ୍ଷ୍ୟ ନେଇ ଏକ ରପ୍ତାନି ପ୍ରୋତ୍ସାହନ ମିଶନ ଆରମ୍ଭ କରାଯିବ, ଯାହା ବାଣିଜ୍ୟ ମନ୍ତ୍ରଣାଳୟ, ଏମଏସଏମଇ ମନ୍ତ୍ରଣାଳୟ ଏବଂ ଅର୍ଥ ମନ୍ତ୍ରଣାଳୟ ଦ୍ୱାରା ମିଳିତ ଭାବରେ ପରିଚାଳିତ ହେବ । ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଏହି ମିଶନ ରପ୍ତାନି ଋଣ ଏବଂ ସୀମାପାର ସହାୟତା ସହଜରେ ଉପଲବ୍ଧ କରାଇବ ଏବଂ ଏମଏସଏମଇଗୁଡ଼ିକୁ ବିଦେଶୀ ବଜାରରେ ଅଣ-ଶୁଳ୍କ ସମସ୍ୟାର ସମାଧାନ କରିବାରେ ସାହାଯ୍ୟ କରିବ ।

TKM/Swadhin