Na ka bynta ka jingbei tyngka kaba jrong samoi ha kaba iadei bad ki kam duriaw, ka Myntri Sorkar Pdeng ba dei khmih ia ka Tnad Kam Pla Tyngka, Nirmala Sitharaman ka la tyrwa ban sdang ia ka Maritime Development Fund ia kaba la pynbiang pisa T. 25,000 klur. Haba pynbna ia kane ha ka jingkren jong ka halor ka mang tyngka ha iing dorbar thawain Parliament mynta ka sngi, ka Myntri sorkar pdeng ba dei khmih ia ka Tnad Kam Pla Tyngka, Nirmala Sitharaman ka la ong ba kane ka jingpynbiang pisa kadei na ka bynta ka jingkyrshan bad kyntiew ka jingialeh ba iadei bad ki kam duriaw. Ka fund kan don haduh 49 per cent ka jingkyrshan na ka sorkar, bad kaba tam kan wan na ki kad lieng bad ki kam shimet

Ka Myntri Kam Pla Tyngka ka la ong ba yn pynkylla ia ka Shipbuilding Financial Assistance Policy ban weng ia ki jingeh ba iadei bad ka jinglut, kaba kynthup ruh ia ki Credit Note na ka bynta ka jinglaw lyngkhot ia ki lieng ha ki jaka ieng lieng jong ka India ban kyntiew ia ka ioh ka kot. Shuh shuh, la tyrwa ban kynthup ha ki jingdon jingem ia ki lieng kiba heh kiba palat ia ka jingeh ba la buh ha ka thup harmonized master list (HML). Ka Mang Tyngka jong ka sorkar pdeng ruh ka la tyrwa ban pynsuk ia ki ‘Shipbuilding Cluster’ khnang ban lah ban kyntiew ia ki bynta bapher bapher, ki thup bad ka  jingheh jong ki lieng. Kane kan kynthup shuh shuh ia ki lad jingdon jingem, ka jingtbit treikam bad ka teknoloji ban kyntiew ia ka jinglong jingman baroh kawei. Da kaba pdiang ba ka dei ka kam kaba donkam bun ka por, ka Myntri Kam Pla Tyngka ka la tyrwa ban bteng ka jingpyllait Basic Customs Duty ha kaba iadei bad ki mar, ki kor, ki tiar na ka bynta ban shna ia ki lieng sa shiphew snem. Ka la tyrwa ruh kajuh ka jingmyntoi ban pynpra ia ki lieng khnang ba kane ka kam kan long kaba kham seisoh.

Ha ka jingiaroh ia ka Skhim pyniasoh ha ki thain ka UDAN, ka Nirmala Sitharaman ka la ong ha ka jingkren jong ka ba ka UDAN ka la iarap ia 1.5 klur ki briew kiba pdeng ka ioh ka kot ban pynurlong ia ki jingangnud jong ki na ka bynta ka leit ka wan kaba kham sted. Ka skhim ka la pyniasoh 88 tylli ki kad liengsuin bad ka la pyntreikam 619 tylli ki lynti pynher liengsuin. Da ka jingioh mynsiem na kane ka jingjop, yn plie paidbah ia ka skhim UDAN kaba la pynkylla ban kyntiew ia ka jingpyniasoh ha ka thain bad 120 tylli ki jaka ba thymmai bad kit 4 klur ki nongleit nongwan ha ki 10 snem ban wan bad kane ka skhim kan kyrshan ruh ia ki kad helicopter bad ki liengsuin kiba kham rit ha ki jaka rilum, ki aspirational distrik bad ki distrik ha ka thain shatei lammihngi, la ong ka Myntri Kam Pla Tyngka. Ka la pyntip ruh ha iing dorbar thawain ba ka sorkar kan iarap ban kyntiew ia ki jingdon jingem bad ki jaka ieng ki liengsuin kit mar ba kynthup ki mar kiba kloi ban pyut bad ki mar horticulture. Yn pyniaid beit iaid ryntih ruh ia ka jingpeit ia ki mar ba kit bad ki kam customs.

Lyngba ka jingkyntiew ia ki jingdon jingem ha ka jylla Bihar, ka Myntri Sorkar Pdeng ba dei khmih ia ka Tnad Kam Pla Tyngka ka la tyrwa ban shna ia ki kad liengsuin ba thymmai  ha Bihar ban pynurlong ia ki jingdonkam jong ka jylla ha ki por ban wan. Kine kin kynthup bad ka jingpynheh ia ka kad liengsuin Patna bad ka liengsuin ha Bihta. Yn ai jingiarap pisa na ka bynta ka projek Western Koshi Canal ERM ka ban ai jingmyntoi ia ki nongrep kiba rep ha ka jaka kaba palat 50,000 hectare ha ka thain Mithilanchal jong ka Bihar.

****