ആഭ്യന്തരകാര്യ മന്ത്രാലയം
ജനുവരി 11 ശനിയാഴ്ച ന്യൂഡൽഹിയിൽ "മയക്കുമരുന്ന് കടത്തും ദേശീയ സുരക്ഷയും" എന്ന വിഷയത്തിലുള്ള ഒരു പ്രാദേശിക സമ്മേളനത്തിൽ കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ അധ്യക്ഷത വഹിക്കും
Posted On:
10 JAN 2025 3:43PM by PIB Thiruvananthpuram
ന്യൂ ഡൽഹി, 10 ജനുവരി 2025
"മയക്കുമരുന്ന് കടത്തും ദേശീയ സുരക്ഷയും" എന്ന വിഷയത്തിൽ ജനുവരി 11 ശനിയാഴ്ച ന്യൂഡൽഹിയിൽ നടക്കുന്ന പ്രാദേശിക സമ്മേളനത്തിൽ കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ അധ്യക്ഷത വഹിക്കും. വടക്കേ ഇന്ത്യയിലെ എട്ട് സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പ്രത്യേക ശ്രദ്ധ കേന്ദ്രീകരിച്ച് കൊണ്ട് മയക്കുമരുന്ന് കടത്തിന്റെ വർദ്ധിച്ചുവരുന്ന ആശങ്കയും ദേശീയ സുരക്ഷയിലുള്ള അതിന്റെ സ്വാധീനവും അഭിസംബോധന ചെയ്യുക എന്നതാണ് നാർക്കോട്ടിക് കൺട്രോൾ ബ്യൂറോ (എൻ‌സി‌ബി) സംഘടിപ്പിക്കുന്ന സമ്മേളനം ലക്ഷ്യമിടുന്നത്.
പരിപാടിയിൽ, ശ്രീ അമിത് ഷാ മയക്കുമരുന്ന് നിർമാർജന പക്ഷാചരണം, എൻ‌സി‌ബിയുടെ ഭോപ്പാൽ സോണൽ യൂണിറ്റിന്റെ പുതിയ ഓഫീസ് സമുച്ചയം എന്നിവയുടെ ഉദ്ഘാടനം നിർവഹിക്കും.36 സംസ്ഥാനങ്ങളിലേക്കും കേന്ദ്രഭരണ പ്രദേശങ്ങളിലേക്കും മാനസ്-2 ഹെൽപ്പ്‌ലൈൻ വ്യാപിപ്പിക്കും.
ദേശീയ നാർക്കോട്ടിക് ഹെൽപ്പ്‌ലൈൻ 'മാനസ്' പോർട്ടലിൽ നിന്നുള്ള തത്സമയ വിവരങ്ങൾ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും ആന്റി-നാർക്കോട്ടിക് ടാസ്‌ക് ഫോഴ്‌സുമായി (ANTF) പങ്കിടുന്നതിലും, മയക്കുമരുന്ന് കടത്തിനെതിരെ പോരാടുന്നതിൽ സംസ്ഥാനങ്ങളുടെ പുരോഗതി വിലയിരുത്തുന്നതിനും നാർക്കോട്ടിക് കോർഡിനേഷൻ സംവിധാനത്തിന്റെ (NCORD) ഫലപ്രാപ്തി വിലയിരുത്തുന്നതിലും സമ്മേളനം ശ്രദ്ധ കേന്ദ്രീകരിക്കും. സംസ്ഥാന ഫോറൻസിക് സയൻസ് ലബോറട്ടറികളുടെ (SFSL-കൾ) പ്രവർത്തനം ശക്തിപ്പെടുത്തുന്നതിനും മെച്ചപ്പെടുത്തുന്നതിനും; മയക്കുമരുന്ന് കടത്തിനെതിരായ ശ്രമങ്ങൾ ശക്തിപ്പെടുത്തുന്നതിന് NIDAAN ഡാറ്റാബേസ് ഉപയോഗിക്കുന്നതിനും; മയക്കുമരുന്നുകളുടെയും സൈക്കോട്രോപിക് ലഹരിവസ്തുക്കളുടെയും നിയമവിരുദ്ധ കടത്ത് തടയൽ (PIT-NDPS) നിയമത്തിലെ വ്യവസ്ഥകൾ നടപ്പിലാക്കുന്നതിനും; മയക്കുമരുന്നുമായി ബന്ധപ്പെട്ട കേസുകളുടെ വേഗത്തിലുള്ള വിചാരണയ്ക്കായി പ്രത്യേക NDPS കോടതികൾ സ്ഥാപിക്കുന്നതിനും; മയക്കുമരുന്ന് കടത്തും ദുരുപയോഗവും ഫലപ്രദമായി ചെറുക്കുന്നതിന് എല്ലാ ഏജൻസികളുടെയും സമഗ്രമായ സഹകരണം ഉറപ്പാക്കുന്നതിന് ഒരു സമഗ്ര സർക്കാർ സമീപനം വളർത്തിയെടുക്കുന്നതിനും ഇത് ശ്രദ്ധ കേന്ദ്രീകരിക്കും. നാളെ (2025 ജനുവരി 11) മുതൽ 2025 ജനുവരി 25 വരെയുള്ള മയക്കുമരുന്ന് നിർമാർജന പക്ഷാചരണത്തിൽ 2411 കോടി രൂപയുടെ അന്താരാഷ്ട്ര വിപണി മൂല്യമുള്ള, പിടിച്ചെടുത്ത 44,792 കിലോഗ്രാം മയക്കുമരുന്നുകൾ നശിപ്പിക്കും.
പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ, മയക്കുമരുന്ന് കടത്തിനെതിരെ കേന്ദ്ര സർക്കാർ സഹിഷ്ണുത ഇല്ലാത്ത നയം സ്വീകരിച്ചു. 2047 ഓടെ മയക്കുമരുന്ന് രഹിത ഇന്ത്യ കൈവരിക്കുന്നതിനായി ആഭ്യന്തര മന്ത്രാലയം (എംഎച്ച്എ) ഒരു ത്രിമുഖ തന്ത്രം നടപ്പിലാക്കുന്നു. സ്ഥാപനപരമായ ചട്ടക്കൂടുകൾ ശക്തിപ്പെടുത്തുക, മയക്കുമരുന്ന് വിരുദ്ധ ഏജൻസികൾക്കിടയിൽ ഏകോപനം വർദ്ധിപ്പിക്കുക, ബൃഹത്തായ പൊതു അവബോധ പരിപാടി ആരംഭിക്കുക എന്നിവ ഇതിൽ ഉൾപ്പെടുന്നു.
സമ്മേളനത്തിന്റെ ഭാഗമായ 8 സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമുള്ള ഗവർണർമാർ, ലെഫ്റ്റനന്റ് ഗവർണർമാർ, മുഖ്യമന്ത്രിമാർ, മുതിർന്ന ഉദ്യോഗസ്ഥർ എന്നിവർ യോഗത്തിൽ പങ്കെടുക്കും. വിവിധ മന്ത്രാലയങ്ങൾ, വകുപ്പുകൾ, നിയമ നിർവ്വഹണ ഏജൻസികൾ എന്നിവയിൽ നിന്നുള്ള മുതിർന്ന ഉദ്യോഗസ്ഥരും സമ്മേളനത്തിൽ പങ്കെടുക്കും.
*******************
(Release ID: 2091863)
Visitor Counter : 10