ആഗോളതലത്തിൽ രാജ്യം അഭൂതപൂർവമായ വിജയം കൈവരിച്ചതിനാൽ, 2024 ഇന്ത്യൻ കായികരംഗം എന്നും സ്മരിക്കുന്ന വർഷമാവുകയാണ്.  പാരീസ് പാരാലിമ്പിക് ഗെയിംസിലെ റെക്കോർഡ് പ്രകടനങ്ങൾ മുതൽ ചെസ്സിലെ ചരിത്ര വിജയങ്ങൾ കൂടാതെ കായികരംഗത്ത് സ്ത്രീകളുടെ പങ്കാളിത്തം പ്രോത്സാഹിപ്പിക്കൽ വരെ, ഇന്ത്യ കായികരംഗത്തെ ഒന്നിലധികം മേഖലകളിൽ  അതിൻ്റെ വർദ്ധിച്ചുവരുന്ന കഴിവ് പ്രദർശിപ്പിച്ചിട്ടുണ്ട്. ശ്രദ്ധേയമായ ഈ നേട്ടങ്ങളും ശ്രദ്ധേയ സംരംഭങ്ങളുടെ പിന്തുണയും അത്‌ലറ്റുകളുടെ ശാക്തീകരണത്തിൽ പുതിയ ശ്രദ്ധയും, കായിക മികവ് വളർത്തുന്നതിനും ഭാവി തലമുറകളെ പ്രചോദിപ്പിക്കുന്നതിനുമുള്ള രാജ്യത്തിൻ്റെ പ്രതിബദ്ധതയെ പ്രതിഫലിപ്പിക്കുന്നു.

2024-ലെ പാരീസ് ഒളിമ്പിക്‌സിലും പാരാലിമ്പിക്‌സിലും ഇന്ത്യയുടെ ശ്രദ്ധേയമായ വിജയം

2024 ലെ പാരീസ് ഒളിമ്പിക് ഗെയിംസിൽ, 1 വെള്ളിയും 5 വെങ്കലവും ഉൾപ്പെടെ 6 മെഡലുകൾ നേടിയാണ് ഇന്ത്യ മടങ്ങിയെത്തിയത്. ഈ നേട്ടത്തിൽ ഷൂട്ടിംഗ് വിഭാഗം നിർണായക പങ്ക് വഹിച്ചു. അത്‌ലറ്റുകളായ മനു ഭാക്കർ, സരബ്ജോത് സിംഗ്, സ്വപ്‌നിൽ കുസാലെ എന്നിവർ മൂന്ന് വെങ്കല മെഡലുകൾ വീട്ടിലെത്തിച്ചു. കൂടാതെ, നീരജ് ചോപ്ര ജാവലിൻ ത്രോയിൽ വെള്ളി മെഡൽ നേടി, അമൻ സെഹ്‌രാവത് ഗുസ്തിയിൽ വെങ്കലം നേടി, ഇന്ത്യൻ ഹോക്കി ടീം അതിൻ്റെ വെങ്കല മെഡൽ വിജയകരമായി നിലനിർത്തി. ദേശീയ അഭിമാനത്തിൻ്റെ ഒരു നിമിഷത്തിൽ, 2024 ഓഗസ്റ്റ് 15-ന് ചെങ്കോട്ടയിൽ നടന്ന സ്വാതന്ത്ര്യദിനാഘോഷത്തിൽ മെഡൽ നേടിയ എല്ലാ കായികതാരങ്ങളെയും പ്രത്യേക അതിഥികളായി ക്ഷണിച്ചു. ഇതിനെത്തുടർന്ന് അവർ പ്രധാനമന്ത്രിയുമായി സംവദിച്ചു.

2024 ഓഗസ്റ്റ് 28 മുതൽ സെപ്തംബർ 8 വരെ നടന്ന 2024 പാരീസ് പാരാലിമ്പിക് ഗെയിംസിൽ ഇന്ത്യ എക്കാലത്തെയും വലിയ സംഘവുമായി ചരിത്രം സൃഷ്ടിച്ചു. 7 സ്വർണവും 9 വെള്ളിയും 13 വെങ്കലവുമടക്കം 29 മെഡലുകൾ നേടി മെഡൽ പട്ടികയിൽ 18-ാം സ്ഥാനം നേടിയാണ് ഇന്ത്യയുടെ അത്‌ലറ്റുകൾ അസാധാരണമായ പ്രകടനം പുറത്തെടുത്തത്. ഈ ചരിത്ര പ്രകടനം പാരാലിമ്പിക് ചരിത്രത്തിൽ രാജ്യത്തിൻ്റെ എക്കാലത്തെയും മികച്ച നേട്ടമായി അടയാളപ്പെടുത്തുന്നു.

ചെസ്സിലെ തകർപ്പൻ നേട്ടങ്ങൾ: ഫിഡെ ചെസ്സ് ഒളിമ്പ്യാഡും ലോക ചെസ് ചാമ്പ്യൻഷിപ്പും

ഹംഗറിയിലെ ബുഡാപെസ്റ്റിൽ നടന്ന 45-ാമത് ഫിഡെ ചെസ്സ് ഒളിമ്പ്യാഡിൽ ഇന്ത്യയുടെ ചെസ്സ് മികവ് പുതിയ ഉയരങ്ങളിലെത്തി, അവിടെ ഇന്ത്യൻ പുരുഷ-വനിതാ ചെസ് ടീമുകൾ സ്വർണ്ണ മെഡലുകൾ നേടി ചരിത്രം സൃഷ്ടിച്ചു. ഗുകേഷ് ഡി, പ്രഗ്നാനന്ദ ആർ, അർജുൻ എറിഗൈസി, വിദിത് ഗുജറാത്തി തുടങ്ങിയ മികച്ച കളിക്കാരുള്ള പുരുഷ ടീം മത്സരത്തിൽ ആധിപത്യം പുലർത്തി, 11 മത്സരങ്ങളിൽ 10 എണ്ണം വിജയിക്കുകയും അവസാന റൗണ്ടിൽ സ്ലോവേനിയയെ പരാജയപ്പെടുത്തുകയും ചെയ്തു. ഗുകേഷ് ഡിയും അർജുൻ എറിഗൈസിയും തങ്ങളുടെ അസാധാരണ പ്രകടനത്തിന് വ്യക്തിഗത സ്വർണം നേടി.

ഹരിക ദ്രോണവല്ലി, വൈശാലി ആർ, ദിവ്യ ദേശ്മുഖ്, വന്തിക അഗർവാൾ, താനിയ സച്ച്‌ദേവ് എന്നിവരടങ്ങുന്ന ഇന്ത്യൻ വനിതാ ടീം ആദ്യഘട്ട പരാജയങ്ങളെ അതിജീവിച്ച് അവസാന റൗണ്ടിൽ അസർബൈജാനെ പരാജയപ്പെടുത്തി കിരീടം ഉറപ്പിച്ചു. ഇന്ത്യയുടെ യുവ ചെസ്സ് കളിക്കാരെ അവരുടെ ചരിത്ര നേട്ടത്തിന് പ്രധാനമന്ത്രി നരേന്ദ്ര മോദി അഭിനന്ദിക്കുകയും വിജയികളായ ടീമുകളെ ഇന്ത്യൻ ചെസ്സ് ചരിത്രത്തിലെ ഈ ശ്രദ്ധേയമായ നേട്ടം ആഘോഷിച്ച് പ്രധാനമന്ത്രി ന്യൂഡൽഹിയിൽ ആദരിക്കുകയും ചെയ്തു.

സിംഗപ്പൂരിൽ നടന്ന ലോക ചെസ് ചാമ്പ്യൻഷിപ്പിൽ ചൈനയുടെ ഡിംഗ് ലിറനെ തോൽപ്പിച്ച് 2024-ൽ ഡി.ഗുകേഷ് ഏറ്റവും പ്രായം കുറഞ്ഞ ലോക ചെസ് ചാമ്പ്യനായും ചരിത്രം സൃഷ്ടിച്ചു.

അസ്മിത (ASMITA) വിമൻസ് ലീഗുകളിലൂടെ സ്ത്രീകളുടെ കായിക വിനോദങ്ങൾ പ്രോത്സാഹിപ്പിക്കുന്നു

അസ്മിത, രാജ്യത്തുടനീളമുള്ള 20 കായിക ഇനങ്ങളിൽ വനിതാ ലീഗുകൾ സംഘടിപ്പിച്ചു. ചെറിയ പട്ടണങ്ങളിൽ നിന്നും ഗ്രാമങ്ങളിൽ നിന്നുമുള്ള വനിതാ അത്‌ലറ്റുകളെ ഉൾപ്പെടുത്തുന്നതിൽ ഇത്  ശ്രദ്ധ കേന്ദ്രീകരിക്കുന്നു. ഇതുവരെ നടന്ന 766 മത്സരങ്ങളിൽ, 83,763 വനിതാ അത്‌ലറ്റുകൾ ഈ സംരംഭത്തിൽ പങ്കെടുത്തു, കായികരംഗത്ത് സ്ത്രീകളെ ശാക്തീകരിക്കുന്നതിനുള്ള ഇന്ത്യയുടെ പ്രതിബദ്ധത ഇത് കൂടുതൽ ശക്തിപ്പെടുത്തുന്നു.

കീർത്തി (ഖേലോ ഇന്ത്യ റൈസിംഗ് ടാലൻ്റ് ഐഡൻ്റിഫിക്കേഷൻ) പ്രോഗ്രാം

കീർത്തി (KIRTI) (ഖേലോ ഇന്ത്യ റൈസിംഗ് ടാലൻ്റ് ഐഡൻ്റിഫിക്കേഷൻ) പ്രോഗ്രാം ഇന്ത്യയിലുടനീളമുള്ള യുവ കായിക പ്രതിഭകളെ കണ്ടെത്തുന്നതിൽ ഗണ്യമായ മുന്നേറ്റം നടത്തി. ആധുനിക സാങ്കേതിക വിദ്യയും മികച്ച രീതികളും പ്രയോജനപ്പെടുത്തി പരിപാടിയുടെ രണ്ട് ഘട്ടങ്ങൾ പൂർത്തിയായി. 9 നും 18 നും ഇടയിൽ പ്രായമുള്ള സ്കൂളിൽ പോകുന്ന കുട്ടികളെ തിരിച്ചറിയുന്നതിനായി രാജ്യവ്യാപകമായി 1.8 ലക്ഷത്തിലധികം മൂല്യനിർണ്ണയങ്ങൾ നടത്തി, തടസ്സമില്ലാത്തതും കാര്യക്ഷമവുമായ കഴിവ് തിരിച്ചറിയൽ സംവിധാനം ഉറപ്പാക്കുന്നു.

റീസെറ്റ് (റിട്ടയേർഡ് സ്‌പോർട്‌സ് പേഴ്‌സൺ എംപവർമെൻ്റ് ട്രെയിനിംഗ്) പ്രോഗ്രാം

വിരമിച്ച കായികതാരങ്ങളെ ശാക്തീകരിക്കുകയെന്ന ലക്ഷ്യത്തോടെ 2024 ഓഗസ്റ്റ് 29-ന് റീസെറ്റ് (റിട്ടയേർഡ് സ്‌പോർട്‌സ് പേഴ്‌സൺ എംപവർമെൻ്റ് ട്രെയിനിംഗ്) പ്രോഗ്രാം ആരംഭിച്ചു. വിരമിച്ച കായികതാരങ്ങൾക്ക് ആവശ്യമായ അറിവും നൈപുണ്യവും നൽകി പ്രോഗ്രാം അവരെ വിവിധ തൊഴിൽ മേഖലകളിൽ കൂടുതൽ തൊഴിൽ യോഗ്യരാക്കുന്നു. 18 വിഷയങ്ങളിലായി 14 സംസ്ഥാനങ്ങളിൽ നിന്നും കേന്ദ്ര ഭരണ പ്രദേശങ്ങളിൽ നിന്നുമായി ആകെ 30 ട്രെയിനികൾ ഇതുവരെ പരിശീലനം വിജയകരമായി പൂർത്തിയാക്കി.

***

NK