২০২৪ বৰ্ষটো ভাৰতীয় ক্ৰীড়াৰ বাবে এক কীৰ্তিচিহ্নস্বৰূপ বৰ্ষ, কাৰণ বিশ্ব মঞ্চত দেশখনে অভূতপূৰ্ব সফলতা লাভ কৰিছে। পেৰিছ পেৰালিম্পিক গেমছত অভিলেখ ভংগকাৰী প্ৰদৰ্শনৰ পৰা আৰম্ভ কৰি দবাত ঐতিহাসিক জয় আৰু ক্ৰীড়াত মহিলাৰ অংশগ্ৰহণৰ প্ৰসাৰলৈকে ভাৰতে একাধিক শাখাত নিজৰ উত্থানশীল দক্ষতা প্ৰদৰ্শন কৰিছে। যুগান্তকাৰী পদক্ষেপ আৰু খেলুৱৈ সবলীকৰণৰ ওপৰত নৱীকৃত মনোনিৱেশৰ দ্বাৰা সমৰ্থিত এই উল্লেখযোগ্য কৃতিত্বসমূহে ক্ৰীড়া উৎকৃষ্টতাক লালন-পালন আৰু ভৱিষ্যত প্ৰজন্মক অনুপ্ৰাণিত কৰাৰ বাবে দেশৰ দায়বদ্ধতাক প্ৰতিফলিত কৰে।

২০২৪ চনৰ পেৰিছ অলিম্পিক আৰু পেৰালিম্পিক গেমছত ভাৰতৰ উল্লেখযোগ্য সফলতাঃ

২০২৪ চনৰ পেৰিছ অলিম্পিক গেমছত ভাৰতে ১টা ৰূপ আৰু ৫টা ব্ৰঞ্জকে ধৰি ৬টা পদক লাভ কৰি উল্লেখযোগ্য সাফল্য অৰ্জন কৰিবলৈ সক্ষম হয়। এই কৃতিত্বত শ্বুটিং শাখাই গুৰুত্বপূৰ্ণ ভূমিকা পালন কৰিছিল। এই ইভেণ্টত তাৰকা খেলুৱৈ মানু ভাকেৰ, সৰবজোত সিং, আৰু স্বপ্নিল কুশলে দেশলৈ তিনিটা ব্ৰঞ্জৰ পদক লৈ আহিছিল। ইয়াৰ উপৰিও নীৰজ চোপ্ৰাই জেভেলিন থ্ৰ’ত ৰূপৰ পদক লাভ কৰে, অমন চেহৰাৱাটে মল্লযুঁজত ব্ৰঞ্জৰ পদক লাভ কৰে, আৰু ভাৰতীয় হকী দলে সফলতাৰে ব্ৰঞ্জৰ পদক অক্ষুন্ন ৰাখে। ৰাষ্ট্ৰীয় গৌৰৱৰ এক মুহূৰ্তত ২০২৪ চনৰ ১৫ আগষ্টত লালকিল্লাত স্বাধীনতা দিৱস উদযাপনৰ সময়ত সকলো পদক বিজয়ী খেলুৱৈক বিশেষ অতিথি হিচাপে আমন্ত্ৰণ জনোৱা হয়। ইয়াৰ পিছত তেওঁলোকে মাননীয় প্ৰধানমন্ত্ৰী ডাঙৰীয়াৰ সৈতে মত বিনিময় কৰে। ২০২৪ চনৰ ২৮ আগষ্টৰ পৰা ৮ ছেপ্টেম্বৰ ২০২৪লৈ অনুষ্ঠিত হোৱা পেৰিছ পেৰালিম্পিক গেমছত ভাৰতে এতিয়ালৈকে সৰ্ববৃহৎ দলৰ সৈতে ইতিহাস ৰচনা কৰিছিল। ভাৰতৰ খেলুৱৈসকলে ব্যতিক্ৰমী প্ৰদৰ্শন আগবঢ়াই ৭টা সোণ, ৯টা ৰূপ, আৰু ১৩টা ব্ৰঞ্জকে ধৰি ২৯টা পদক লাভ কৰি পদকৰ সংখ্যাত ১৮সংখ্যক স্থান দখল কৰে। এই ঐতিহাসিক প্ৰদৰ্শন পেৰালিম্পিক ইতিহাসত দেশৰ সৰ্বোত্তম কৃতিত্বৰ চিন স্বৰূপ।

দবাত যুগান্তকাৰী কৃতিত্বঃ FIDE দবা অলিম্পিয়াড আৰু বিশ্ব দবা চেম্পিয়নশ্বিপ

হাংগেৰীৰ বুডাপেষ্টত অনুষ্ঠিত ৪৫ সংখ্যক FIDE দবা অলিম্পিয়াডত ভাৰতৰ দবা ক্ষেত্ৰখনে নতুন উচ্চতা স্পৰ্শ কৰে, য’ত ভাৰতীয় পুৰুষ আৰু মহিলা দবা উভয় দলে স্বৰ্ণ পদক লাভ কৰি ইতিহাস ৰচনা কৰে। গুকেশ ডি, প্ৰাগনানন্ধা আৰ, অৰ্জুন এৰিগাইছি, বিদিত গুজৰাথীৰ দৰে তাৰকা খেলুৱৈৰ সৈতে পুৰুষৰ দলটোৱে প্ৰতিযোগিতাখনত আধিপত্য বিস্তাৰ কৰি ১১খন মেচৰ ভিতৰত ১০খন খেলত জয়লাভ কৰি অন্তিম ৰাউণ্ডত স্লোভেনিয়াক পৰাস্ত কৰে। গুকেশ ডি আৰু অৰ্জুন এৰিগাইচিয়ে তেওঁলোকৰ ব্যতিক্ৰমী প্ৰদৰ্শনৰ বাবে ব্যক্তিগতভাৱে স্বৰ্ণ পদক লাভ কৰে।

হৰিকা দ্ৰোণাৱল্লী, বৈশালী আৰ, দিব্য দশমুখ, ভান্টিকা আগৰৱাল, আৰু তানিয়া ছচদেৱে গঠিত ভাৰতীয় মহিলা দলটোৱে আৰম্ভণিৰ বিপৰ্যয়সমূহ অতিক্ৰম কৰি অন্তিম ৰাউণ্ডত আজাৰবাইজানক পৰাস্ত কৰি খিতাপ দখল কৰে। প্ৰধানমন্ত্ৰী নৰেন্দ্ৰ মোদীয়ে ভাৰতৰ যুৱ দবা খেলুৱৈসকলক তেওঁলোকৰ ঐতিহাসিক কৃতিত্বৰ বাবে প্ৰশংসা কৰে আৰু ভাৰতীয় দবা ইতিহাসৰ এই উল্লেখযোগ্য কৃতিত্বক উদযাপন কৰি নতুন দিল্লীত প্ৰধানমন্ত্ৰীয়ে বিজয়ী দলসমূহক সম্বৰ্ধনা জনায়। এক অসাধাৰণ কৃতিত্বৰে ডি গুকেশে ২০২৪ চনত ছিংগাপুৰত অনুষ্ঠিত বিশ্ব দবা চেম্পিয়নশ্বিপত চীনৰ ডিং লিৰেনক পৰাস্ত কৰি আটাইতকৈ কম বয়সীয়া বিশ্ব দবা চেম্পিয়ন হিচাপেও ইতিহাস ৰচনা কৰে।

অস্মিতা মহিলা লীগেৰে মহিলা ক্ৰীড়াক প্ৰচাৰ কৰাঃ

সমগ্ৰ দেশৰ ২০টা ক্ৰীড়া শাখাত ASMITA (Achieving Sports Milestone by Inspiring Women through Action) মহিলা লীগ অনুষ্ঠিত কৰা হৈছে, য’ত সৰু চহৰ আৰু গাঁৱৰ মহিলা খেলুৱৈসকলকো জড়িত কৰাত গুৰুত্ব দিয়া হৈছে। এতিয়ালৈকে ৭৬৬খন প্ৰতিযোগিতা অনুষ্ঠিত হোৱাৰ লগে লগে ৮৩,৭৬৩ গৰাকী মহিলা খেলুৱৈয়ে এই পদক্ষেপত অংশগ্ৰহণ কৰিছে, যাৰ ফলত ভাৰতৰ ক্ৰীড়াক্ষেত্ৰত মহিলা সবলীকৰণৰ প্ৰতিশ্ৰুতি আৰু অধিক শক্তিশালী হৈছে।

KIRTI (খেলো ইণ্ডিয়া ৰাইজিং টেলেণ্ট আইডেন্টিফিকেশন) কাৰ্যসূচীঃ

সমগ্ৰ ভাৰতত যুৱ ক্ৰীড়া প্ৰতিভা চিনাক্তকৰণৰ ক্ষেত্ৰত KIRTI (খেলো ইণ্ডিয়া ৰাইজিং টেলেণ্ট আইডেন্টিফিকেশন) কাৰ্যসূচীয়ে উল্লেখযোগ্য অগ্ৰগতি লাভ কৰিছে। আধুনিক প্ৰযুক্তি আৰু উত্তম পদ্ধতি ব্যৱহাৰ কৰি এই কাৰ্যসূচীৰ দুটা পৰ্যায় সম্পূৰ্ণ কৰা হৈছে। ৯ৰ পৰা ১৮ বছৰ বয়সৰ ভিতৰৰ স্কুললৈ যোৱা শিশুসকলক চিনাক্ত কৰিবলৈ দেশজুৰি ১.৮ লাখৰো অধিক মূল্যায়ন কৰা হৈছে, যাৰ ফলত এক নিৰৱচ্ছিন্ন আৰু কাৰ্যক্ষম প্ৰতিভা চিনাক্তকৰণ ব্যৱস্থা নিশ্চিত কৰা হৈছে।

RESET (অৱসৰপ্ৰাপ্ত খেলুৱৈ সবলীকৰণ প্ৰশিক্ষণ)কাৰ্যসূচীঃ

অৱসৰপ্ৰাপ্ত খেলুৱৈসকলক সবলীকৰণৰ লক্ষ্যৰে ২০২৪ চনৰ ২৯ আগষ্টৰ পৰা RESET (Retired Sportperson Empowerment Training) কাৰ্যসূচী আৰম্ভ কৰা হয়। এই কাৰ্যসূচীয়ে অৱসৰপ্ৰাপ্ত খেলুৱৈসকলক প্ৰয়োজনীয় জ্ঞান আৰু দক্ষতাৰে সমৃদ্ধ কৰে, যাৰ জৰিয়তে তেওঁলোকক বিভিন্ন কেৰিয়াৰ খণ্ডত অধিক নিয়োগযোগ্য কৰি তোলা হয়। ১৮টা শাখাৰ ১৪খন ৰাজ্য/কেন্দ্ৰীয় শাসিত অঞ্চলৰ পৰা মুঠ ৩০ গৰাকী প্ৰশিক্ষাৰ্থীয়ে এই পৰ্যন্ত সফলতাৰে প্ৰশিক্ষণ সমাপ্ত কৰিছে।

*****

Himanshu Pathak/MS