0 5

Haba u la rung ha ka jaka jingialang hapdeng ki jingrisa, ka auditorium ha ka Kala academy ha Goa ka la dap da ki jingthap kti bad ki jingsiaw. Kane ka dei namar ka jingpawnam u aktor Tamil, Shivakarthikeyan, ha ka kam shna phlim bad ha ka jingim.

Ka jingiaid lynti u Sivakarthikeyan na i jingsdang iba rit sha ka jingkylla sha uwei na ki briew ba pawkhmat tam ha ka kam shna phlim Tamil ka dei ka khana jong ka jingskhem jingmut, ka jingieid ia ka kam bad ka jingiaishah. Ha ka bynta kaba 55 jong ka International Film Festival of India (IFFI), u la iakren bad ka actor bad nongmihkhmat ha ki kam sain pyrthei Khushbu Sundar, ha kaba u la kren shaphang ka jingim ka kam bad ki bynta kiba ai mynsiem ia u.

“Naduh ka por mynshuwa, ka kam cinema ka dei kaba nga ieid bha bad nga ju thrang ban pynsngewtynnad ia ki briew,” la ong u Shivakartikeyan. “Kumta nga la sdang ban don bynta ha ki prokram ha ka tv kaba la plie lad ia nga ha ka kam pynbyrnia kaba nga la bud met bad mynsiem.”

Ha ka jingkren shaphang ki kam mynshuwa jong u kum u actor ba pynbud ia kiwei, u Sivakarthikeyan u la ong, “Nga ju pynbud ia ki professor jong nga ha ka engineering college. Hadien, haba nga panmap na ki, ki ju pynshlur ia nga da kaba ong ba nga dei ban shim ia kane ka sap bad pyndonkam ia ka ha ka rukom kaba bha.”

Une u actor u la ong ba ka jingkhlad syndet jong u kpa jong u ka dei ka por jong ka jingkylla ha ka jingim jong u. “Hadien ba la khlad i pa, nga la jan ngat ha ka jingdum ki jingmut jingpyrkhat. Ka kam jong nga ka la pyllait ia nga na kane bad ki jingsiaw, ki jingthap kti jong ki briew ki la long ka jingtngen ia nga,” u la ong da kaba bynrap ba ka dei ka jingieid jong ki briew kaba la pynskhem jingmut ia u.

Ka Khushbu Sundar ka la iaroh ia ka jingskhem jingmut bad ka jinglong shisur shidur jong u bad ka la ong ba kine ki dei ki nongrim kiba khlain tam jong u. Da kaba mynjur ia kane, u Sivakarthikeyan u la ong, “Nga la don beit kane ka jingthrang ban paw napdeng ki million ngut ki briew katba nga don ruh ka jingiadei bad ki briew. Ka jingim ka bun ki jingeh hynrei ka jingbeh ia la ki thong ka iarap ia ngi ban jop ia kne. Ka la don ka por ba nga la duh jingkyrmen hynrei ka jingieid jong ki briew ka la pynlong ia nga ban iaineh.”

Na ka jingpynbud ia kiwei sha ka jingdon bynta ha ka tv sha ka jinglong uwei na ki briew ba pawnam tam ha ka kam shna phlim Tamil, u Sivakarthikeyan u la trei bun jait ki kam. U la ioh jingiaroh kum u nongrwai, nongthoh jingrwai, bad producer. Ha ka jngkren shaphang ki kam ba u trei, u la ong, “Haba nga la sdang ban treikam, nga shim ia kano kano ka kam ba nga ioh. Hynrei mynta nga sngew ba ki khana ki jied ia nga.” U la ong ba ki phlim kum ka Doctor, Don, bad ka Amaran kaba dang shen, ha kaba u la ak kum u riewshlur ha ka thma u Mukund Varadarajan, ki dei ki nuksa kumno u jied ia ki bynta kiba don jingmut mynta.

Ha kaba iadei bad ka jingpyndonkam ia ka jingsamrkhie kum ka atiar, u Sivakarthikeyan u la ong, “Ka jingkylla na ka television sha ka cinema ka dei kaba jynjar, nga ju pyndonkam ia ka jingpynsamrkhie kum ka jingiada jong nga namar nga sngewthuh ba ki briew ki sngewthuh ia kane la ka dei ha ka tv ne ki phlim.”

Ia ki samla, u la ong: “Her kum ka sim ba laitluid, hynrei wanphai beit sha la ka skum . Ia nga, ka longiing ka dei ka skum bad nga ngeit ha ka jindon ka tynrai kaba skhem. Ki kmie ki kpa ki kwah ia kaba bha tam ia ngi.” Kane ka bynta ka la long ka jingrakhe ia ka sap kaba kyrpang bad ka khana kaba iahap bad ngi baroh. Ka jingiaid lynti u Sivakarthikeyan na ka longiing kaba pdeng ka ioh ka kot sha ki kliar kiba halor tam ha ka kam phlim Tamil ka iaineh kum ka jingai mynsiem ka khana jong ka jingieid, ka jingiaishah bad ka bor jong ki jingthmu.

* * *