0 4

“Kum ka nongpyni prokram jong ka ri, ka dei ka kamram jong ngi ban pynbiang ia ki prokram kiba khuid na ka bynta ki longiing kiba poi sha baroh ki bynta jong ka imlang sahlang,” la ong u Navneet Kumar Sehgal, Chairman, Prasar Bharati haba u la ai jingkren ha ka jingiakynduh bad ki lad pathai khubor shaphang ka WAVES OTT bad ki prokram ba ioh ka kane ka rynsan ha ka bynta kaba 55 jong ka IFFI ha Goa mynta ka sngi. Ka la don ka jingsngewthuh kaba shai ba donkam ia ka rynsan OTT jong ka Prasar Bharati kaba la ialam sha ka jingsdang ia ka WAVES. “Ha ryngkat ka khubor, ki jinglehkai, ki prokram shaphang ki jinglong jingman ba bynta ki dei ban long na ka bynta baroh ki briew jong ka ri,” u la ong. U Sehgal u la ong ruh ba kane ka rynsan kan pyni ia ka deiriti ba riewspah bad ka histori jong ka India. Ym donkam siew eiei ban download ia ka WAVES OTT bad ban peit ia ki prokram kiba don ha ka, lait noh na katto katne ki prokram, u la ong.

U Gaurav Dwivedi, CEO ka Prasar Bharati, u la ong, “Ka long kaba donkam ia ka nongai jingtip ia ki briew jong ka ri ba kan don ha baroh ki rynsan bad ngi dei ban pynbiang ia ki jingtip ia ki briew ha baroh kawei ka ri kaba iar jong ngi.” Kane ka rynsan ka dei na ka bynta baroh ki briew jong ka India bad kan iarap bha ia ki briew kiba la leit sah noh ha kiwei kiwei ki jaka hynrei kiba dang kwah ban pyniasoh bad ki tynrai jong ki, u la ong. “Palat 10,000 tylli ki phlim bad 40,000 haduh 50,000 kynta ki prokram kin don mynta lyngba ka WAVES OTT”, la pyntip u Prasar Bharati CEO.

‘Fauji 2.0’ kan don ha ka WAVES OTT

‘Fauji 2.0,’ ka dei kaba don nongrim ha ka phlim Fauji jong u Shahrukh Khan ha u snem 1980. U Producer Sandeep Singh, ki barikor Gauhar Khan, Vicky Jain bad kiwei kiwei kiba iadon bynta bad kane ka phlim ki la iashim bynta lang ha kane ka jingiakynduh bad ki lad pathai khubor. Ha ka jingkren shaphang kane ka projek ba thymmai jong ka, ka Gauhar Khan ka la ong, “ka Fauji 2 ka pyni ia ka jingim jong ki briew kiba long ki nongmihkhmat bad ki nongiada ia ka India.” Ha ka jingkren shaphang ka Doordarshan, u Vicky Jain u la ong ba baroh ki prokram jong ka DD ki long kum ka brand lajong. “Bun na ngi, ngi la iohi ia ka Ramayan bad ka Mahabharat ha ryngkat bad ka longiing jong ngi ha ka por jong ka khlam,” u la ong. U la ong ruh ba ka DD ka pynbiang prokram ia kito ki bym ioh ia ka cable TV. U Sandeep Singh, uba la pawnam bha na ka jingpynmih ia ki phlim kum ka Mary Kom, Aligarh bad Sarabjit, u la ong ba kane ka long kum ka jingpynkup burom haba pyni ia ka phlim jong u ha ka rynsan jong ka DD.

Ka ‘Kakbhushundi Ramayana’, ka prokram ba thymmai ba la sdang ha DD National kan don ha ka WAVES OTT

U Shiv Sagar uba dei u khun ksiew jong u film director bad producer ba pawnam Ramanand Sagar ruh u la iashim bynta ha ka jingiakynduh bad ki lad pathai khubor bad iasam ia ki jingsngewthuh jong u halor kumno ki series kin khring ia ki samla nongpeit. U la batai kumno la wad bniah palat 350 tylli ki bynta jong ka Ramayana na kylleng ka pyrthei ban shna ia ka ‘Kakbhushandi Ramayana’. “La shim ia ki khana kiba bit ba biang bad la pyni ha ka rukom kaba thymmai,” u la bynrap. Haba kren shaphang ka WAVES OTT, u Shiv Sagar u la ong, ka histori kaba riewspah jong ka India kan ioh ka rynsan kaba biang.

Ka rynsan WAVES OTT

Hynnin ka sngi, u Myntri Rangbah jong ka Goa, Dr. Pramod Sawant u la plie paidbah ia ka rynsan ‘WAVES’ Over-The-Top (OTT) jong ka Prasar Bharati ha ka jingialang plie jong ka 55^th International Film Festival of India (IFFI) kaba 55 kaba la long ha Goa. Lyngba ka jingplie ia kane ka rynsan, ka Doordarshan, ka nongai jingtip ia ki paidbah jong ka ri ka la rung sha kane ka rynsan ban ai jingshakri ba kham bha na ka bynta ki jingdawa ba kham heh ia ki jingai jingshakri digital streaming. Ka rynsan ka thmu ban pynkhie im ia ka histori da kaba pdiang ia ki rukom digital kiba katkum ka juk mynta da kaba pynmih ia ki prokram ba rim bad kiba thymmai.

Ka ‘WAVES’ ka dang mih kum ka rynsan OTT kaba don ki prokram ba kyrpang jong ka India kaba kdup ia ka deiriti jong ka ri da kaba phaikhmat sha ka pyrthei ha 12 tam ki ktien - Hindi, English, Bengali, Marathi, Kannada, Malayalam, Telugu, Tamil, Gujarati, Punjabi, Assamese. Kan don ka Video on demand, free-to-play gaming, Radio streaming, Live TV streaming, 65 tylli ki live Channel, ki App in App na ka bynta ki video bad gaming, and online shopping lyngba ka Open Network for Digital Commerce (ONDC) ba kyrshan ia ka rynsan e-commerce.

Na ka bynta ki jingtip ba kham bniah halor ka WAVES, sngewbha peit ha ka: https://pib.gov.in/PressReleaseIframePage.aspx?PRID=2075273

* * *