প্রধান মন্ত্রী শ্রী নরেন্দ্র মোদীনা ঙসি নাইজেরিয়াগী অবুজাদা ভারতকী মীওইশিংনা মহাকপু ইকায়খুম্নদুনা পাঙথোকপা থৌরম অমদা ভারতকী দাইস্পোরাশিংগী মফমদা ৱা ঙাংখ্রে‍। প্রধান মন্ত্রীনা ভারতকী মীওইশিংনা মহাকপু তরাম-তরাম ওকপিবগীদমক নুংঙাইবা ফোঙদোকখি‍। মীয়াম্না মহাক্কী মফমদা উৎপিরিবা মীনুংশি অমসুং মরূপ মপাং ওইবগী মরী অসি মহাক্কী মফমদদি অচৌবা লন অমনি হায়না মহাক্না হায়খি‍।

তিল্লিববা মীয়ামগী মফমদা হন্দক্কী অসিনা মহাক্না প্রধান মন্ত্রী ওইনা নাইজেরিয়াদা লাকপা অহান্বনি হায়রদুনা, শ্রী মোদীনা মখোয়গীদমক ভারত মচা করোর কয়াগী য়াইফ পাউজেল মহাক্না পুদুনা লাক্লিবনি হায়খি‍। ভারত মচা খুদিংমক্না নাইজেরিয়াদা লৈরিবা ভারত মচাশিংগী লৈরিবা থাক অসিদা চাউথোকচবা পোক্লি হায়না মহাক্না মখা তাখি‍। মহাক্কী মফমদা গ্রান্দ কম্মান্দর ওফ দি ওর্দর ওফ দি নাইজরগী মনা পীবিবগীদমক প্রেসিদেন্ত তিনুবু অমসুং নাইজেরিয়াগী মীয়ামগী মফমদা তৌবিমল খঙবা ফোঙদোক্লদুনা, শ্রী মোদীনা পুকচেল শেঙনা মনা অদু ভারত মচা করোর কয়াগী মফমদা কত্থোকখি‍।

প্রধান মন্ত্রীনা মহাক্কা প্রেসিদেন্ত তিনিবুগা ৱারী শানবা মতমদা, প্রেসিদেন্তনা নাইজেরিয়াদা লৈরিববা ভারত মচাশিংনা হোৎনরিবশিংবু থাগৎলকখি, অমদি মদুনা মহাকপু চাউথোকচবা পোকহল্লি হায়না ফোঙদোকখি‍। খুদম অমা পীরদুনা, মহাক্কী ৱাহৈ অদুনা মহাকপু মচাশিংনা মখোয়গী করিয়রদা মায় পাক্না খোঙ থাংজিনখিবা উবদা মমা মপা ওইবশিংগী মফমদা ফাওরিবা নুংঙাইবা অমসুং চাওথোকচবা অদুমক ফাওই হায়না শ্রী মোদীনা হায়খি‍। মফমসিদা লৈরিবা ভারতকী দাইস্পোরাশিংনা নাইজেরিয়াগী অৱা নুংঙাই পুংফম পুম্বদা লেপমিন্নদুনা লাক্লি হায়না প্রধান মন্ত্রীনা ফোঙোকখি‍। মতম অমদা ভারতকী ওজাশিংনা তাকপি তম্বিখিবা চহি ৪০ দ গী ৬০ ফাওবগী মনুংদা লৈবা ভারত মচা কয়া নাইজেরিয়াদা লৈ হায়না মহাক্না মখা তাখি‍। নাইজেরিয়াদা ভারতকী দোক্তর কয়া অমসু মশাগী ওইজবা থিদনা মীয়ামগী থৌগল তৌদুনা লৈরি হায়না শ্রী মোদীনা শিংথাখি‍। মফমসিদা বিজিনেস লিংখত্তুনা নাইজেরিয়াগী চাওখৎ ৱারীগী ইচঙ থৌরবা শরুক অমা ওইদুনা লাক্লবা ভারতকী বিজিনেসমেন কয়া অমসু মফমসিদা লৈ হায়না মহাক্না মখা তাখি‍। নীংতম্বা ফংদ্রিঙৈদগী হৌনা, শ্রী কিসনচান্দ ঝেলারাম জীনা নাইজেরিয়াদা হোংদুনা বিজিনেস লিংখত্তুনা ঙসিদি নাইজেরিয়াগী খ্বায়দগী চাউবা বিজিনেস হাউসশিংগী মরকল্তা অমা ওইরে হায়না প্রধান মন্ত্রীনা হায়খি‍। ঙসিদি ভারতকী কম্পেনী কয়ানা নাইজেরিয়াগী শেন্মিৎলোন্দা মথৌ হাপ্লি হায়না মহাক্না মখা তাখি‍। তুল্সিচন্দ্র ফাউন্দেসন্না নাইজেরিয়াগী মীওই কয়াগী পুন্সিদা মঙাল হাপ্লি হায়না শ্রী মোদীনা শিংথাখি‍। নাইজেরিয়াদা চাওখৎপা পুরকপদা লেংথোংমিন্নদুনা চৎমিন্নবগীদমক ভারতকী মীওইশিংবু থাগৎলদুনা, শ্রী মোদীনা মসিনা ভারতকী খ্বায়দগী চাউবা মতিক্নি অমসুং ভারতকী নাৎকী শক্তমসু ওইরি হায়খি‍। ভারত মচাশিংনা পুম্নমক্কী য়াইফবা হায়বা ৱাখল্লোন অসি কাউথোক্তে অমসুং মতম পুম্বদা মালেম পুম্বসি ইমুং অমনি হায়বগী থাজবা অসিগা লোয়ননা হিংই হায়না মহাক্না মখা তাখি‍।

ভারত মচাশিংনা লমদমসিগী নাৎকী মরমদা ফংলিবা ইকায়খুম্নবা অসি মফম খুদিংদা উবা ফংই হায়না শ্রী মোদীনা ফোঙদোকখি‍। নাইজেরিয়াগী মীয়াম মরক্তা য়োগবু পাম্নবা হেনগৎলক্লি হায়রদুনা, মহাক্না নাইজেরিয়াদা লৈরিবা ভারত মচাশিংগী মফমদা য়োগ চাং নাইনা শান্ননবা ৱাফম থমখি‍। নাইজেরিয়াগী নেস্নেল তেলিভিজন চেনেলদা য়োগগী চয়োলগী ওইনা শন্দোকপা থৌরম অমা লৈরম্মি হায়না প্রধান মন্ত্রীনা ফোঙদোকখি‍। নাইজেরিয়াদা হিন্দী অমসুং ভারতকী ফিল্মশিং পাম্নবসু হেনগৎলক্লি হায়না শ্রী মোদীনা শিংথাখি‍।

গান্ধীজীনা অফ্রিকাদা মতম শাংনা লেল্লম্মি হায়রদুনা, ভারত অমসুং নাইজেরিয়াগী মীয়াম্না মখোয়গী নীংতম ঈহৌদা করিগুম্বা অমত্তা তৌদনা তোকখিদে হায়না শ্রী মোদীনা হায়খি‍। ভারতকী নীংতম্বনা নাইজেরিয়াগী নীংতম ঈহৌবু মখা তানা পুক্নিং থৌগৎহনখি হায়না মহাক্না মখা তাখি‍। শ্রী মোদীনা নীংতম ঈহৌ মতমদা ওইখিবা পুন্সিগী ফীভম নীংশিংলদুনা, ঙসিসু ভারত অমসুং নাইজেরিয়ানা মরা তপ্না মাঙদা চঙশিল্লি হায়খি‍। “ভারতকী দিইমোক্রেসীগী মমানি অদুগা নাইজেরিয়ানা অফ্রিকাগী খ্বায়দগী চাউবা দিমোক্রেসী ওইরি,” হায়না শ্রী মোদীনা হায়খি‍। লৈবাক অনিমক্কী মান্নবা মশক হায়রগদি দিমোক্রেসী, দাইভর্সিতী অমসুং দিমোগ্রাফীগী মতিক লৈ‍ হায়না মহাক্না মখা তাখি‍। শ্রী মোদীনা লাইশঙ শাবদা নাইজেরিয়ন লৈঙাক্না পীরিবা মতেঙগীদমক ভারত মচাশিংগী মহুৎ শিল্লগা তৌবিমল খঙবা উৎখি‍।

ভারতনা মালেম শিন্বা থুংনা খন্ন-নৈনবগী হীরম ওইরি হায়রদুনা, শ্রী মোদীনা নীংতম্লবা মতুংদা ভারতনা থেংনখিবা ঈহৌ কয়াগী মতাঙদসু পনখি‍। ভারত মচা খুদিংমক্না চন্দ্রয়ান, মঙ্গলয়ান, মেদ ইন ইন্দিয়া ফাইতর প্লেন্নচিংবা ভারতকী মায় পাকপশিংগীদমক চাউথোচৈ হায়না মহাক্না মখা তাখি‍। “ভারতনা স্পেসতগী হৌরগা মেনুফেকচরিং সেক্তর, দিজিতেল তেক্নোলোজীদগী হৌরগা হেল্থকেয়র ফাওবদা গ্লোবেল পৱারশিংগা হিদান্নরি,” হায়না শ্রী মোদীনা হায়খি‍। ভারতনা নীংতম্লবা মতিং দেকেদ ৬গী মতুংদখক্তা $১ ত্রিলিয়ন লান্থোকপা ঙম্লক্লি হায়রদুনা, হৌখিবা দেকেদ অসিখক্তদা ভারতনা $২ ত্রিলিয়ন অমগা হাপচিন্দুনা ঙসিদি মালেমগী মঙাশুবা খ্বায়দগী চাউবা শেন্মিৎলোনগী থাক্তা কাখৎপা ঙম্লক্লি হায়না শ্রী মোদীনা ফোঙদোকখি‍। ভারতনা অথুবা মতমদা $৫ ত্রিলিয়নগী শেন্মিৎলোন ওইরক্তুনা মালেমগী অহুমশুবা খ্বায়দগী চাউবা শেন্মিৎলোন ওইরকপা ঙমগনি হায়না মহাক্না থাজবসু ফোঙদোকখি‍।

ভারত মচাশিং অসি খুদোংথিবা মায়োক্নবা ঙম্বা মীওইশিংনি হায়রদুনা, শ্রী মোদীনা ভারতনা সেক্তর কয়াদা খোঙলৈ থুনা খুমাঙ চাওশিল্লক্লি হায়খি‍। ভারতকী স্তার্ত-অপ ইকোসিস্তেমদা রেজিস্তর তৌরবা স্তার্ত-অপ লাখ ১.৫ হেন্না লৈরে হায়রদুনা, শ্রী মোদীনা ফীভম অসি ভারতকী নহাশিংগী মখোয়গী কমফোর্ত জোন্দগী থোরক্তুনা কন্না হোৎনখিবদুগী হকথেংননা ফংলকপা মহৈনি হায়খি‍। “হৌখিবা চহি ১০সিদা ভারত্তা য়ুনিকোর্ন মশিং ১০০ হেন্না লৈরে,” হায়না শ্রী মোদীনা ফোঙদোকখি‍।

ভারত অসি মাগী সর্ভিস সেক্তরগীদমক খঙনৈ হায়রদুনা, শ্রী মোদীনা লৈঙাক অসিনসু মাগী কমফোর্ত জোন্দগী থোরক্তুনা লৈবাক অসিববু মালেমগী থাক্কী মেনুফেকচরিং হব অমা ওইহন্নবা মেনুফেকচরিং সেক্তরদা অচৌবা ইনোৎ অমা পীরি হায়খি‍। মসিমক ভারতনা ঙসি  মালেমগী খ্বায়দগী চাউবা মোবাইল ফোন মেনুফেকচররশিংগী মরক্তা অমা ওইরক্লিবা অমসুং ভারত্তা মোবাইল ফোন করোর ৩০ হেন্না পুথোক্লিবা অসিনা তাক্লি হায়না মহাক্না হায়খি‍। ভারতকী মোবাইল ফোন এক্সপোর্তকী চাং হৌখিবা দেকেদ অসিদা শরুক ৭৫ হেনগৎলে হায়না মহাক্না হায়খি‍। হৌখিবা দেকেদ অসিদা লৈখিবা ভারকী দিফেন্স এক্সপোর্ত পল্লদুনা, শ্রী মোদীনা মসিদসু শরুক ৩০ হেনগৎলে অমসুং ঙসি ভারতনা মাগী দিফেন্স ইকুইপমেন্ত লৈবাক ১০০ হেন্বদা থাদোক্লি হায়খি‍। ভারতকী স্পেস সেক্তরবু মালেম পুম্বনা থাগৎনরি হায়না প্রধান মন্ত্রীনা হায়খি‍। ভারতনা ভারতকী এস্ত্রোনোত মশাগী গগনয়ান্দা স্পেসতা থাগৎনবা ফিরেপ লৌখ্রে হায়না মহাক্না মখা তাখি‍। ভারতনা স্পেসতা স্পেস স্তেসন অমসু শেমগৎলগনি হায়না মহাক্না মখা তাখি‍।

ভারতনা হৌজিক মাগী কমফোর্ত জোন্দগী থোরক্তুনা ইনোভেত তৌনবা অমসুং অনৌবা খুদোংচাবশিং শেমগৎনবা ৱাখল্লোন্দা লৈরি হায়না প্রধান মন্ত্রীনা হায়খি‍। হৌখিবা চহি ২০সিদা ভারতনা মীওই করোর ২৫ লায়রবগী পনখৈগী মথক্তা থাঙ্গৎলক্লে হায়না প্রধান মন্ত্রীনা হায়খি‍। মীওই কয়ানা লায়রবগী পনখৈগী মথক্তা কাখৎলকপা হায়বসি মালেমগী ওইনা অচৌবা পুক্নিং থৌগৎনফম অমনি অমসুং মসিনা লৈবাক খুদিংমক্কী মফমদা ভারতনা তৌবা ঙম্লগদি ঐখোয়সু তৌবা ঙমগনি হায়বগী থাজবা পীরি হায়না মহাক্না হায়খি‍। ভারতনা ঙসি চাওখৎপা ভারত অমা শেম্নবা পান্দমগা লোয়ননা অনৌবা খোঙচৎ অমদা লাক্লি হায়না শ্রী মোদীনা হায়খি‍। ভারত মচা খুদিংমক্না ২০৪৭ ফাওবদা চাওখৎপা ভারতকী পান্দম ফংনবা থবক পায়খৎলি হায়না মহাক্না থাজবা ফোঙদোকখি‍। চাওখৎপা, ইং-তপ্পা, নুংঙাই য়াইফবা নৎত্রগা দিমোক্রেসীদা ওইরবসু, ভারতনা মালেমগী অনৌবা থাজবা অমা ওইরক্লি হায়না প্রধান মন্ত্রীনা হায়খি‍। নাইজেরিয়াদা লৈরিবা ভারতকী দাইস্পোরাশিংনা ফাওবা মখোয় ভারত্তগীনি হায়বা মতমদা মখোয়না ফংলিবা ইকায়খুম্নবা অদু থেংনবিরমগনি হায়না মহাক্না ফোঙদোকখি‍।

মালেমসিদা প্রোব্লেম অমা হেক্তা লৈবা মতমদা, ভারতনা মফমদুদা ফর্স্ত রেস্পোন্দর অমা ওইনা, মালেমগী মচিন মনাও অমা ওইনা য়ৌশিল্লি‍ হায়না প্রধান মন্ত্রীনা হায়খি‍। কোরোনাগী মতমদা মালেমসিদা ৱা কয়া ঙাংনখি, লৈবাক খুদিংমক্না ভেক্সিনগীদমক পাখৎনখি অমসুং অদুগুম্বা লাংফমগী পুংফমদুদা, ভারতনা হেক ঙম্লিবমখৈ লৈবাক কয়াদা ভেক্সিন ফংহন্নবা ফিরেপ লৌখি হায়না মহাক্না হায়খি‍। মসি ঐখোয়গী লীচৎনি অমসুং চহি লিশিং কয়াগী নাৎনা মসি ঐখোয়দা তম্বিদুনা লাকখ্রবনি হায়না শ্রী মোদীনা হায়খি‍। মরম অসিননি ভারতনা ভেক্সিন পুথোকপগী চাং হেনগৎহনখ্রিবা অমসুং মালেমগী লৈবাক ১৫০ হেন্বদা হিদাক লাংথকশিং অমসুং ভেক্সিনশিং থাখিবা হায়না শ্রী মোদীনা হায়খি‍। নাইজেরিয়া য়াওনা অফ্রিকান লৈবাক কয়াদা ভারতনা হোৎনখিবা অসিনা মরম ওইরগা মীওই লিশিং কয়াগী পুন্সি কনখি হায়না প্রধান মন্ত্রীনা হায়খি‍। ঙসি ভারতনা ‘সবকা সাথ সবকা বিকাস’ হায়বা ৱাখল্লোনসিদা থাজবা থম্লি হায়না মহাক্না ফোঙদোকখি‍।

নাইজেরিয়াবু অফ্রিকাগী তুংগী চাওখৎলকপগী অচৌবা মফম অমনি হায়রদুনা, শ্রী মোদীনা হৌখিবা চহি ৫সিদা অফ্রিকাদা অনৌবা এম্বেসী ১৮ থবক হৌখ্রে হায়খি‍। মমাঙ চহিদা, ভারতনা অফ্রিকাগী খোঞ্জেল মালমেগী ফম্পাক্তা পুখৎনবা হোৎনবা য়াবা হোৎনখি হায়না মহাক্না হায়খি‍। ভারতনা অহান্বা ওইনা G20গী প্রেসিদেন্সী পায়খিবগী মতাঙদা ফোঙদোক্লদুনা, অফ্রিকান য়ুনিয়মবু পর্মেনেন্ত মেম্বর অমা ওইহন্নবা কন্না হোৎনখিবনি হায়না শ্রী মোদীনা হায়খি‍। ভারতনা পাউজেল পীদুনা ভারত অমসুং নাইজেরিয়ানা লৌখৎখিবা খোঙথাংনা মপুং ফানা ইকায়খুম্নবগা লোয়ননা গেস্ত কন্ত্রী অমা ওইহন্দুনা পুৱারী শেমখিবদা G20 মেম্বর লৈবাক খুদিংমক্না য়ানিংবা উৎখিবদা মহাক্কী মফমদা অপেন্বা পোকখি হায়না মহাক্না মখা তাখি‍।

প্রধান মন্ত্রীনা মীপুম খুদিংমক্কী মফমদা মথঙ চহিগী জনুৱারীদা ভারত্তা লাক্নবা অখন্নবা পাউজেল পীখি‍। জনুৱারী ২৬তা রিপব্লিক দে অমসুং ওরিসাগী লমদমদা প্রভু জগন্নাথ জীগী খুয়াখাদা জনুৱারীগী অনিশুবা চয়োলদা পাঙথোক্কদৌরিবা প্রভাসি ভার্তিয় দিবসতগী হৌরগা জনুৱারী থাদা কুমহৈ কয়া লেংদুনা লৈরে হায়না মহাক্না হায়খি‍। প্রধান মন্ত্রীনা প্রয়াগরাজতা জনুৱারী ১৩দগী ফেব্রুৱারী ২৫ ফাওবদা নুমিৎ ৪৫নি চুপ্পা পাঙথোক্কদৌরিবা মহা কুম্ভগী মতাঙদু ফোঙদোকখি‍। মসিদগী হেন্বা ভারত্তা লাক্নবগী মরম কয়া অমসু লৈরি হায়রদুনা শ্রী মোদীনা ভারতকী দাইস্পোরাশিংগী মফমদা হন্দক্তি মখোয়গী নাইজেরিয়ন মরূপশিংগা লোয়ননা ভারত্তা লাক্নবা ৱাফম থমখি‍। প্রধান মন্ত্রীনা, অয়োধ্যাদা, চহি ৫০০গী মতুংদা, প্রভু শ্রী রামগী অচৌবা লাইশঙ অমা শারে, মফমসিদা ময়াম্না মখোয়গী অঙাংশিংগা লোয়ননা লাকপা য়াই হায়খি‍। শ্রী মোদীনা অহান্বদা NRI দে, অনিশুবদা মহা কুম্ভ, অমসুং মদুগী মতুংদা রিপব্লিক দেনা পরেং লেংদুনা ঈচেল অহুমগী ইতিনফম ওইদুনা ভারতকী চাওখৎ খোঙজেল অমসুং পারী পুরীগী লন অনিবু নীংথিনা মীৎয়েঙ তাননবা নীংথিরবা তাঞ্জা অমনি হায়খি‍।

মহাক্কী ৱারোল লোইশিল্লকপদা, প্রধান মন্ত্রীনা, মখোয়না ভারত্তা হান্না কয়ারক হন্না লাকখ্রবসু, হন্দক্কী খোঙচৎ অসিদি মখোয়গী পুন্সিদা মমল নাইদ্রবা নীংশিং মমি অমা থমহৌগনি হায়বা ৱাফম ফোঙদোকখি‍। প্রধান মন্ত্রীনা মীপুম খুদিংমকপু মখোয়গী পুক্নিংদা মথুম মরাং হৌবা মতৌগীদমক থাগৎখি অমসুং পুম্নমকপু তরাম্না ওকখি‍।

***