ନାଇଜେରିଆର ଅବୁଜାରେ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ସମ୍ମାନାର୍ଥେ ପ୍ରବାସୀ ଭାରତୀୟଙ୍କ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ସେ ଉଦବୋଧନ ଦେଇଛନ୍ତି । ଭାରତୀୟ ସମୁଦାୟଙ୍କ ପକ୍ଷରୁ ତାଙ୍କୁ ଦିଆଯାଇଥିବା ଉତ୍ସାହଭରା ସମ୍ବର୍ଦ୍ଧନାରେ ପ୍ରଧାନମନ୍ତ୍ରୀ ଖୁସି ଜାହିର କରିଛନ୍ତି । ସେ କହିଛନ୍ତି ପ୍ରବାସୀଙ୍କ ପକ୍ଷରୁ ଦିଆଯାଇଥିବା ଭଲପାଇବା ଓ ବନ୍ଧୁତ୍ୱ ତାଙ୍କ ପାଇଁ ବଡ଼ ପୁଞ୍ଜି ।

ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ, ରାଷ୍ଟ୍ରପତି ତିନୁବୁଙ୍କ ସହ ଆଲୋଚନା ଅବସରରେ ରାଷ୍ଟ୍ରପତି ନାଇଜେରିଆରେ ଥିବା ଭାରତୀୟଙ୍କ ପ୍ରଚେଷ୍ଟାକୁ ପ୍ରଶଂସା କରିଥିଲେ ଯାହାକି ତାଙ୍କୁ ଗର୍ବିତ କରିଛି । ଏକ ଉଦାହରଣ ଦେଇ ସେ କହିଥିଲେ, ପିଲାମାନେ ତାଙ୍କ କ୍ୟାରିଅରରେ ଭଲ ଫଳ କଲେ ପିତାମାତା ଯେପରି ଖୁସି ହୁଅନ୍ତି, ସେ ସେହିପରି ଖୁସି ଓ ଗର୍ବ ଅନୁଭବ କରିଛନ୍ତି ।  ପ୍ରଧାନମନ୍ତ୍ରୀ କହିଥିଲେ,ଏଠାରେ ପ୍ରବାସୀ ଭାରତୀୟ ମାନେ ନାଇଜେରିଆ ସହ ସର୍ବଦା ସୁଖ ଓ ଦୁଃଖ ସମୟରେ ଛିଡ଼ା ହୋଇଛନ୍ତି । ସେ କହିଥିଲେ ନାଇଜେରିଆରେ ୪୦ରୁ ୬୦ ବର୍ଷ ବୟସ ଅନେକ ଭାରତୀୟ ଅଛନ୍ତି ଯେଉଁମାନେ କି ଏକଦା ଭାରତୀୟ ଶିକ୍ଷକଙ୍କ ନିକଟରେ ପଢ଼ୁଥିଲେ । ନାଇଜେରିଆରେ ଅନେକ ଭାରତୀୟ ଡାକ୍ତର ନିଃସ୍ୱାର୍ଥପର ଭାବେ ସେବା କରୁଥିବା ସେ କହିଥିଲେ । ସେ ଉଲ୍ଲେଖ କରିଥିଲେ, ଅନେକ ଭାରତୀୟ ବ୍ୟବସାୟୀ ପ୍ରତିଷ୍ଠିତ ବ୍ୟବସାୟୀ ଭାବେ ଏଠାରେ ଅଛନ୍ତି ଏବଂ ନାଇଜେରିଆର ବିକାଶ ଯାତ୍ରାରେ ସକ୍ରିୟ ଭୂମିକା ଗ୍ରହଣ କରିଛନ୍ତି । ପ୍ରଧାନମନ୍ତ୍ରୀ କହିଥିଲେ, ଏପରିକି ସ୍ୱାଧୀନତା ପୂର୍ବରୁ ଶ୍ରୀ କିଶନଚନ୍ଦ ଝେଲାରାମ ଜୀ ନାଇଜେରିଆ ଆସି ବ୍ୟବସାୟ ଆରମ୍ଭ କରିଥିଲେ, ଯାହାକି ଏବେ ନାଇଜେରିଆର ବୃହତ ବ୍ୟବସାୟ ପ୍ରତିଷ୍ଠାନ ଗୁଡ଼ିକ ମଧ୍ୟରୁ ଅନ୍ୟତମ । ସେ କହିଥିଲେ, ଆଜି ଅନେକ ଭାରତୀୟ କମ୍ପାନୀ ପାଇଜେରିଆର ଅର୍ଥ ବ୍ୟବସ୍ଥାକୁ ମଜବୁତ୍ କରୁଛନ୍ତି । ଶ୍ରୀ ମୋଦୀ କହିଥିଲେ, ତୁଳସୀଚନ୍ଦ୍ର  ଫାଉଣ୍ଡେସନ ଅନେକ ନାଇଜେରୀୟଙ୍କ ଜୀବନକୁ ଆଲୋକିତ କରୁଛି । ନାଇଜେରିଆରେ ପ୍ରବାସୀ ଭାରତୀୟମାନେ କାନ୍ଧକୁ କାନ୍ଧ ମିଳାଇ ଚାଲୁଥିବାର ପ୍ରଶଂସା କରି ଶ୍ରୀ ମୋଦୀ କହିଥିଲେ, ଏହା ଭାରତୀୟଙ୍କ ସବୁଠାରୁ ବଡ଼ ଶକ୍ତି ଏବଂ ଏହା ଭାରତୀୟ ସଂସ୍କୃତିକୁ ଦର୍ଶାଉଛି । ସେ କହିଥିଲେ ଭାରତୀୟ ମାନେ କେବେହେଲେ ସମସ୍ତଙ୍କ କଲ୍ୟାଣ ଆଦର୍ଶ ଭୁଲନ୍ତି ନାହିଁ ଏବଂ ସର୍ବଦା ସମଗ୍ର ବିଶ୍ୱ ଗୋଟିଏ ପରିବାର ନୀତିକୁ ବିଶ୍ୱାସ କରନ୍ତି ।

ଶ୍ରୀ ମୋଦୀ କହିଥିଲେ, ସଂସ୍କୃତିକୁ ନେଇ ଭାରତୀୟ ମାନେ ଯେଉଁ ସମ୍ମାନ ଅର୍ଜନ କରିଛନ୍ତି ତାହା ସର୍ବତ୍ର ସ୍ପଷ୍ଟ ପ୍ରତୀୟମାନ । ଯୋଗ ନାଇଜେରିଆରେ ଲୋକପ୍ରିୟ ହେବାରେ ଲାଗିଛି ବୋଲି ଉଲ୍ଲେଖ କରି ପ୍ରବାସୀ ଭାରତୀୟଙ୍କ ପ୍ରତ୍ୟେକ ଦିନ ଯୋଗାଭ୍ୟାସ କରିବାକୁ ସେ ପରାମର୍ଶ ଦେଇଥିଲେ । ନାଇଜେରିଆର ଜାତୀୟ ଟିଭି ଚାନେଲରେ ପ୍ରତି ସପ୍ତାହରେ ଯୋଗ କାର୍ଯ୍ୟକ୍ରମ ପ୍ରସାରିତ ହେଉଥିବା ସେ କହିଥିଲେ । ହିନ୍ଦୀ ଭାଷା ଏବଂ ଭାରତୀୟ ଚଳଚ୍ଚିତ୍ର ନାଇଜେରିଆର କ୍ରମେ ଲୋକପ୍ରିୟ ହେଉଥିବା ସେ କହିଥିଲେ ।

ଗାନ୍ଧିଜୀ ଆଫ୍ରିକାରେ ଯଥେଷ୍ଟ ଦିନ ଅତିବାହିତ କରିଥିବା ଉଲ୍ଲେଖ କରି ଶ୍ରୀ ମୋଦୀ କହିଥିଲେ, ଭାରତ ଓ ନାଇଜେରିଆର ଲୋକମାନେ ସ୍ୱାଧୀନତା ସଂଗ୍ରାମରେ କୌଣସି ପ୍ରଚେଷ୍ଟା ଛାଡ଼ି ନଥିଲେ । ବରଂ ଭାରତୀୟଙ୍କ ସ୍ୱାଧୀନତା ନାଇଜେରିଆର ସ୍ୱାଧୀନତା ସଂଗ୍ରାମକୁ ପ୍ରେରଣା ଦେଇଥିଲା । ଶ୍ରୀ ମୋଦୀ କହିଥିଲେ, ସ୍ୱାଧୀନତା ସଂଗ୍ରାମ ସମୟର ସେ ଦିନ ଥିଲା ଏବଂ ଆଜି, ଉଭୟ ଭାରତ ଓ ନାଇଜେରିଆ ଦ୍ରୁତ ଗତିରେ ବିକାଶ କରୁଛନ୍ତି । “ଭାରତର ଗଣତନ୍ତ୍ରର ସ୍ରଷ୍ଟା ହୋଇଥିବା ବେଳେ ନାଇଜେରିଆ ଆଫ୍ରିକାରେ ବୃହତ୍ତମ ଗଣତନ୍ତ୍ର” ଶ୍ରୀ ମୋଦୀ କହିଥିଲେ ।  ସେ କହିଥିଲେ ଉଭୟ ରାଷ୍ଟ୍ରର ସମାନତା ମଧ୍ୟରେ ଗଣତନ୍ତ୍ର, ବିବିଧତା ଏବଂ ଜନସାଂଖ୍ୟିକ ପ୍ରସଙ୍ଗ ରହିଛି । ନାଇଜେରିଆର ବିବିଧତାରେ ଖୁସି ପ୍ରକାଶ କରି ଶ୍ରୀ ମୋଦୀ କହିଥିଲେ, ମନ୍ଦିର ନିର୍ମାଣରେ ନାଇଜେରିଆ ସରକାରଙ୍କ ସହାୟତା ପାଇଁ ଭାରତୀୟଙ୍କ ପକ୍ଷରୁ କୃତଜ୍ଞତା ଜଣାଇଥିଲେ ।

ସମଗ୍ର ବିଶ୍ୱରେ ଭାରତ ଚର୍ଚ୍ଚାର ପ୍ରସଙ୍ଗ ହୋଇଥିବା ସୂଚାଇ ଶ୍ରୀ ମୋଦୀ କହିଥିଲେ, ସ୍ୱାଧୀନତା ପରବର୍ତ୍ତୀ ସମୟରେ ଭାରତ ଅନେକ ଗୁଡ଼ିଏ ସଂଘର୍ଷ କରିଛି । ଚନ୍ଦ୍ରାୟନ, ମଙ୍ଗଳାୟନ ଏବଂ  ସ୍ୱଦେଶୀ ଯୁଦ୍ଧ ବିମାନର କୃତିତ୍ୱ ପାଇଁ ପ୍ରତ୍ୟେକ ଭାରତୀୟ ଗର୍ବ ଅନୁଭବ କରୁଛନ୍ତି । ‘ମହାକାଶରୁ ନିର୍ମାଣ କ୍ଷେତ୍ର, ଡିଜିଟାଲ ଟେକ୍ନୋଲୋଜି ଏବଂ ସ୍ୱାସ୍ଥ୍ୟସେବା ଆଦିରେ ଭାରତ ଏବେ ବିଶ୍ୱଶକ୍ତି ମାନଙ୍କ ସହ ପ୍ରତିଦ୍ୱନ୍ଦ୍ୱିତା କରୁଛି” ଶ୍ରୀ ମୋଦୀ କହିଥିଲେ । ସେ କହିଥିଲେ, ସ୍ୱାଧୀନତାର ୬୦ ବର୍ଷ ମଧ୍ୟରେ ଭାରତର ଅର୍ଥନୀତି ମାତ୍ର ଏକ ଟ୍ରିଲିଅନ ଡଲାର ଅତିକ୍ରମ କରିଥିବା ବେଳେ କେବଳ ଗତ ଏକ ଦଶନ୍ଧିରେ ୨ ଟ୍ରିଲିଅନକୁ ଅତିକ୍ରମ କରିଛି, ଯାହାକି ଭାରତକୁ ବିଶ୍ୱରେ ଆଜି ପଞ୍ଚମ ବୃହତ ଅର୍ଥନୀତିରେ ପରିଣତ କରିଛି । ଭାରତର ଅର୍ଥନୀତି ଅତି ଶୀଘ୍ର ୫ ଟ୍ରିଲିଅନ ଡଲାରକୁ ଅତିକ୍ରମ କରିବ ଏବଂ ଦେଶ ବିଶ୍ୱରେ ତୃତୀୟ ବୃହତ୍ତମ ଅର୍ଥନୀତି ହେବ ବୋଲି ଶ୍ରୀ ମୋଦୀ ଆଶା ପ୍ରକାଶ କରିଥିଲେ ।

ଭାରତୀୟ ମାନେ ବିପଦକୁ ମୁକାବିଲା କରନ୍ତି ବୋଲି ଉଲ୍ଲେଖ କରି ସେ କହିଥିଲେ, ଭାରତ ବିଭିନ୍ନ କ୍ଷେତ୍ରରେ ଦ୍ରୁତ ଗତିରେ ଅଗ୍ରସର ହେଉଛି । ଭାରତରେ ୧.୫ ଲକ୍ଷରୁ ଅଧିକ ଷ୍ଟାର୍ଟଅପ୍ ପଂଜିକୃତ ହୋଇଥିବା ଦର୍ଶାଇ ସେ କହିଥିଲେ, ଏହା ସୁବିଧା ଜୀବନରୁ ବାହାରକୁ ବାହାରି ଭାରତୀୟ ଯୁବପିଢ଼ି କରିଥିବା କଷ୍ଟର ପ୍ରତ୍ୟକ୍ଷ ଫଳ । “ବିଗତ ଦଶ ବର୍ଷରେ ଭାରତରେ ୧୦୦ରୁ ଅଧିକ ୟୁନିକର୍ନ ଅଛି” ଶ୍ରୀ ମୋଦୀ କହିଥିଲେ ।

ସେବା କ୍ଷେତ୍ରରେ ଭାରତ ବେଶ୍ ପରିଚିତ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ, ସରକାର ମଧ୍ୟ ସୁବିଧା କ୍ଷେତ୍ରରୁ ବାହାରକୁ ବାହାରି ଭାରତକୁ ବିଶ୍ୱସ୍ତରୀୟ ନିର୍ମାଣ ହବ୍ ରେ ପରିଣତ କରିବାକୁ ନିର୍ମାଣ କ୍ଷେତ୍ରକୁ ବେଶ୍ ଗୁରୁତ୍ୱ ଦେଇଛନ୍ତି । ସେ କହିଲେ, ଏହାର ପ୍ରମାଣ ଏହାଯେ ଭାରତ ଆଜି ବିଶ୍ୱରେ ଅନ୍ୟତମ ବୃହତ୍ତମ ମୋବାଇଲ ଫୋନ୍ ନିର୍ମାତା ରାଷ୍ଟ୍ର ହୋଇପାରିଛି ଏବଂ ଭାରତରେ ୩୦ କୋଟିରୁ ଅଧିକ ମୋବାଇଲ ଫୋନ୍ ନିର୍ମାଣ ହୋଇଛି । ସେ ପୁଣି କହିଥିଲେ, ବିଗତ ଏକ ଦଶନ୍ଧିରେ ଭାରତର ମୋବାଇଲ ଫୋନ୍ ରପ୍ତାନି ୭୫ ଗୁଣା ହୋଇପାରିଛି । ଭାରତର ପ୍ରତିରକ୍ଷା ରପ୍ତାନିରେ ଖୁସି ପ୍ରକାଶ କରି ଶ୍ରୀ ମୋଦୀ କହିଥିଲେ, ଏହା ୩୦ ଗୁଣା ବୃଦ୍ଧି ପାଇଛି ଏବଂ ଆଜି ଭାରତ ୧୦୦ରୁ ଅଧିକ ରାଷ୍ଟ୍ରକୁ ପ୍ରତିରକ୍ଷା ଯନ୍ତ୍ରାଂଶ ରପ୍ତାନି କରୁଛି । ପ୍ରଧାନମନ୍ତ୍ରୀ କହିଥିଲେ, ଭାରତର ମହାକାଶ କ୍ଷେତ୍ର ବିଶ୍ୱବ୍ୟାପୀ ପ୍ରଶଂସା ପାଇଛି । ଭାରତ ନିଜସ୍ୱ ଗଗନଯାନରେ ଭାରତୀୟ ମହାକାଶଚାରୀଙ୍କୁ ପଠାଇବାକୁ ନିଷ୍ପତ୍ତି ନେଇଥିବା ସେ କହିଥିଲେ । ଭାରତ ମଧ୍ୟ ମହାକାଶରେ ଏକ ମହାକାଶ କେନ୍ଦ୍ରର ବିକାଶ କରିବାକୁ ଯାଉଛି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ, ଭାରତ ଏବେ ସୁବିଧା କ୍ଷେତ୍ରରୁ ବାହାରି ନବପ୍ରବର୍ତ୍ତନ ଓ ନୂତନ ରାସ୍ତା ଠାବ ଦିଗରେ ଅଛି । ପ୍ରଧାନମନ୍ତ୍ରୀ କହିଥିଲେ, ବିଗତ ୨୦ ବର୍ଷରେ ଭାରତ ୨୫ କୋଟିରୁ ଅଧିକ ଲୋକଙ୍କୁ ଦାରିଦ୍ର‌୍ୟମୁକ୍ତ କରିଛି । ଅନେକ ଲୋକ ଦାରିଦ୍ର‌୍ୟରୁ ମୁକ୍ତ ହୋଇପାରିବା ସମଗ୍ର ବିଶ୍ୱ ପାଇଁ ଏକ ପ୍ରେରଣା ଏବଂ ପ୍ରତ୍ୟେକ ଦେଶକୁ ଏହି ଆଶା ଦେଉଛି ଯେ, ଯଦି ଭାରତ ଏହା କରିପାରୁଛି, ଆମେ ମଧ୍ୟ ଏହା କରିପାରିବା । ଶ୍ରୀ ମୋଦୀ କହିଥିଲେ, ଭାରତ ଏକ ବିକଶିତ ଭାରତ ଗଠନର ଏକ ନୂଆ ଯାତ୍ରା ଆରମ୍ଭ କରିଛି । ୨୦୪୭ ମସିହା ସୁଦ୍ଧା ବିକଶିତ ଭାରତ ଗଠନ ଲକ୍ଷ୍ୟ ପୂରଣ ଦିଗରେ ପ୍ରତ୍ୟେକ ଭାରତୀୟ କାମ କରୁଛନ୍ତି ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ, ଅଭିବୃଦ୍ଧି, ଶାନ୍ତି, ସମୃଦ୍ଧି କିମ୍ବା ଗଣତନ୍ତ୍ର ଯାହାବି ହେଲେ ଭାରତ ବିଶ୍ୱ ପାଇଁ ନୂତନ ଆଶାର କିରଣ ହୋଇଛି । ସେ ଉଲ୍ଲେଖ କରିଥିଲେ, ଏପରିକି ନାଇଜେରିଆରେ ପ୍ରବାସୀ ଭାରତୀୟମାନେ ଏହା ଅଭିଜ୍ଞତା କରିଥିବେ ଯେ ଯେତେବେଳେ ସେମାନେ ଭାରତରୁ ଆସିଛନ୍ତି ବୋଲି କହୁଛନ୍ତି, କିଭଳି ସମ୍ମାନ ପାଉଛନ୍ତି ।

ପ୍ରଧାନମନ୍ତ୍ରୀ କହିଥିଲେ, ଯେତେବେଳେ ବିଶ୍ୱରେ କୌଣସି ସମସ୍ୟା ସୃଷ୍ଟି ହେଉଛି, ଭାରତ ବିଶ୍ୱଭ୍ରାତା ଭାବେ ପ୍ରଥମେ ପ୍ରତିକ୍ରିୟା ଦେଉଛି କିମ୍ବା ପହଞ୍ଚୁଛି । ସେ କହିଥିଲେ, କରୋନା ସମୟରେ ବିଶ୍ୱବ୍ୟାପୀ ବେଶ୍ ହଟ୍ଟଚମଟ ଦେଖା ଦେଇଥିଲେ, ଟିକା ପାଇଁ ସମସ୍ତେ ବ୍ୟତିବ୍ୟସ୍ତ ହୋଇପଡ଼ିଥିଲେ ଏବଂ ଭାରତ ସେହି ଘଡ଼ି ସନ୍ଧି ମୁହୂର୍ତ୍ତରେ ନିଷ୍ପତ୍ତି ନେଇଥିଲା, ଯେତେ ଅଧିକ ସମ୍ଭବ ରାଷ୍ଟ୍ରଙ୍କୁ ଟିକା ଦିଆଯିବ । ଶ୍ରୀ ମୋଦୀ କହିଥିଲେ, ଏହା ଆମ ସଂସ୍କାର ଏବଂ ସହସ୍ରାଧିକ ବର୍ଷର ସଂସ୍କୃତି ଆମକୁ ଏହି ଶିକ୍ଷା ଦେଇଛି । ସେ କହିଥିଲେ, ତେଣୁ ଭାରତ ଟିକାର ଉତ୍ପାଦନ ବଢ଼ାଇଥିଲା ଏବଂ ୧୫୦ରୁ ଅଧିକ ରାଷ୍ଟ୍ରଙ୍କୁ ଔଷଧ ଏବଂ ଟିକା ପଠାଇଥିଲା । ପ୍ରଧାନମନ୍ତ୍ରୀ କହିଥିଲେ, ଭାରତର ଏହି ପଦକ୍ଷେପ ଯୋଗୁ ନାଇଜେରିଆ ସମେତ ଅନେକ ଆଫ୍ରିକୀୟ ରାଷ୍ଟ୍ରରେ ହଜାର ହଜାର ଲୋକଙ୍କ ଜୀବନ ବଞ୍ଚି ଯାଇଥିଲା । ସେ ଗୁରୁତ୍ୱ ଦେଇଥିଲେ କହିଥିଲେ, ବର୍ତ୍ତମାନର ଭାରତ ‘ସବକା ସାଥ, ସବକା ବିକାଶ’ ମନ୍ତ୍ରରେ ବିଶ୍ୱାସ କରେ ।

ଆଫ୍ରିକାର ଭବିଷ୍ୟତ ଅଭିବୃଦ୍ଧି ନିମନ୍ତେ ନାଇଜେରିଆକୁ ଏକ ବୃହତ କେନ୍ଦ୍ର ଭାବେ ଦର୍ଶାଇ ଶ୍ରୀ ମୋଦୀ କହିଥିଲେ, ଆଫ୍ରିକାରେ ବିଗତ ୫ ବର୍ଷରେ ୧୮ଟି ନୂତନ ଦୂତାବାସ ଖୋଲିଛି । ସେ କହିଥିଲେ, ଗତ ବର୍ଷମାନଙ୍କରେ ପ୍ରତ୍ୟେକ ବିଶ୍ୱ ମଞ୍ଚରେ ଆଫ୍ରିକାର ସ୍ୱରକୁ ମଜବୁତ୍ କରିବାକୁ ଭାରତ ଯଥାସମ୍ଭବ ଚେଷ୍ଟା କରିଛି । ପ୍ରଥମ ଥର ପାଇଁ ଭାରତର ଜି-୨୦ ଅଧ୍ୟକ୍ଷତା କଥା ଦର୍ଶାଇ ସେ କହିଥିଲେ, ଆଫ୍ରିକାକୁ ସ୍ଥାୟୀ ସଦସ୍ୟ କରିବାକୁ ଦୃଢ଼ ପଦକ୍ଷେପ ନିଆଯାଇଥିଲା । ସେ ଖୁସିର ସହ ଏହା କହିଥିଲେ, ଜି-୨୦ର ପ୍ରତ୍ୟେକ ସଦସ୍ୟ ରାଷ୍ଟ୍ର ଭାରତର ଏହି ପଦକ୍ଷେପକୁ ଦୃଢ଼ ସମର୍ଥନ ଜଣାଇଥିଲେ ଏବଂ ଭାରତର ଆମନ୍ତ୍ରଣ କ୍ରମେ ନାଇଜେରିଆ ସମ୍ମାନର ସହ ଅତିଥି ରାଷ୍ଟ୍ର ହୋଇ ନୂଆ ଇତିହାସକୁ ଦେଖିଥିଲା ।

ଆସାନ୍ତା ବର୍ଷ ଜାନୁଆରୀରେ ଭାରତ ଆସିବାକୁ ସମସ୍ତଙ୍କୁ ପ୍ରଧାନମନ୍ତ୍ରୀ ସ୍ୱତନ୍ତ୍ର ଭାବେ ନିମନ୍ତ୍ରଣ କରିଥିଲେ । ସେ କହିଥିଲେ ଜାନୁଆରୀ ମାସରେ ଅନେକ ଗୁଡ଼ିଏ ଉତ୍ସବ ଏକକାଳୀନ ପଡ଼ିବ । ଜାନୁଆରୀ ୨୬ ତାରିଖରେ ଗଣରାଜ୍ୟ ଦିବସ ପାଳନ ହେବ ଏବଂ ଜାନୁଆରୀ ଦ୍ୱିତୀୟ ସପ୍ତାହରେ ଓଡ଼ିଶା ମାଟିରେ ପ୍ରଭୁ ଜଗନ୍ନାଥଙ୍କ ପାଦ ଦେଶରେ ପ୍ରବାସୀ ଭାରତୀୟ ଦିବସ ପାଳନ କରାଯିବ । ଜାନୁଆରୀ ୧୩ ତାରିଖରୁ ଫେବୃଆରୀ ୨୬ ତାରିଖ ପର୍ଯ୍ୟନ୍ତ ୪୫ ଦିନ ଧରି ପ୍ରୟାଗରାଜରେ ହେବାକୁ ଥିବା ମହାକୁମ୍ଭ କଥା ମଧ୍ୟ ପ୍ରଧାନମନ୍ତ୍ରୀ କହିଥିଲେ । ଶ୍ରୀ ମୋଦୀ କହିଥିଲେ, ଏକାଠି ଭାରତ ଆସିବାର ଅନେକ ଗୁଡ଼ିଏ କାରଣ ଅଛି ଏବଂ ଏହି ସମୟରେ ନାଇଜେରୀୟ ବନ୍ଧୁମାନଙ୍କ ସହ ଭାରତ ଆସିବାକୁ ସେ ପ୍ରବାସୀ ଭାରତୀୟମାନଙ୍କୁ କହିଥିଲେ । ପ୍ରଧାନମନ୍ତ୍ରୀ କହିଥିଲେ, ୫୦୦ ବର୍ଷ ପରେ ଅଯୋଧ୍ୟାରେ ପ୍ରଭୁ ଶ୍ରୀରାମ ଚନ୍ଦ୍ରଙ୍କର ଏକ ଭବ୍ୟ ମନ୍ଦିର ନିର୍ମାଣ କରାଯାଇଛି ଏବଂ ସମସ୍ତେ ସନ୍ତାନସନ୍ତତିଙ୍କ ସହ ଏହାକୁ ଦର୍ଶନ କରିବା ଉଚିତ । ଶ୍ରୀ ମୋଦୀ ଉଲ୍ଲେଖ କରିଥିଲେ ଯେ, ପ୍ରଥମେ ପ୍ରବାସୀ ଭାରତୀୟ ଦିବସ, ଏହାପରେ ମହାକୁମ୍ଭ ଏବଂ ପରେ ଜନରାଜ୍ୟ ଦିବସ, ଏହା ଏକ ପ୍ରକାର ତ୍ରିବେଣୀ ଏବଂ ଭାରତର ବିକାଶ ଓ ଐତିହ୍ୟ ସହ ଯୋଡ଼ିହେବା ପାଇଁ ଏକ ଅପୂର୍ବ ସୁଯୋଗ ।

ଉଦବୋଧନକୁ ସମାପ୍ତ କରି ଶ୍ରୀ ମୋଦୀ କହିଥିଲେ, ପୂର୍ବରୁ ଅନେକ ଥର ସେମାନେ ଭାରତ ଗସ୍ତରେ ଆସିଥାଇପାରନ୍ତି ଏବଂ ଆଗାମୀ ଦିନରେ ମଧ୍ୟ ଆସିପାରନ୍ତି, କିନ୍ତୁ ଏହି ଗସ୍ତ ସେମାନଙ୍କ ଜୀବନରେ ଏକ ଅମୂଲ୍ୟ ସ୍ମୃତି ହୋଇ ରହିବ । ପ୍ରତ୍ୟେକଙ୍କୁ ଉତ୍ସାହ ଓ ଭବ୍ୟ ସମ୍ବର୍ଦ୍ଧନା ପାଇଁ ପ୍ରଧାନମନ୍ତ୍ରୀ ଧନ୍ୟବାଦ ଜଣାଇଥିଲେ । 

SR