থৌরম অসিদা শরুক য়ারিবা কেন্দ্রগি কেবিনেত্তা ঐগা থৌ পুমিন্নরিবা, ঐগী মরুপ শ্রী জগত প্রকাশ নদ্দা জী, মন্সুখ মান্দৱিয়া জী, প্রতাপ রাও জাধৱ জী, শ্রীমতি অনুপ্রিয়া পতেল জী, সুকুমারি সোভা করন্দলাজে, পার্লিয়ামেন্তা ঐগা লোইননা থৌ পুমিন্নরিবা, মফম অসিগী এম.পি., শ্রী রামৱীর সিং বিধুরি জী, তোঙান-তোঙানবা রাজ্যশিংদগী ভর্চুৱল ওইনা মসিদা শরুক য়ারিবা ইকাইখুম্নরবা গোবর্নরশিং, ইকাইখুম্নরবা মুখ্য মন্ত্রীশিং, এম.পি.শিং, এম.এল.এ.শিং, অতোপ্পা ইকাইখুম্নরবা মীয়ামগী মীহুৎশিং, লৈবাক অসিগী তোঙান-তোঙানবা মফমশিংদগী হেল্থ ইনস্তিত্যুশনশিংদগী দোক্তরশিং, ভৈদ্যশিং, আয়ুশ অমসুং হেল্থ প্রোফেস্নেলশিং... হেল্থ সিস্তেমগা মরি লৈনবা ইচিল-ইনাও, ইচে-ইচলশিং, ওল ইন্দিয়া ইনস্তিত্যুত ওফ আয়ুর্ভেদকী দোক্তর অমসুং কর্মচারি পুম্নমক, ইবেম্মা অমসুং ইবুংঙোশিং!

ঙসি লৈবাক শিনথুংনা ধন্তেরস অমসুং ভগৱান ধনৱন্তরিগী মপোক কুমওনগী থৌরম পাংথোক্লি। ঐহাক্না ময়াম পুম্নমক্তা ধন্তেরস অমসুং ধনৱন্তরিগী জয়ন্তিগী নুংঙাইবা ফোংদোক্লি। ঙসিগী নুমিৎ লৈবাক অসিগী মী ময়াম অমনা ময়ুমগীদমক্তা অনৌবা পোৎলম অমা নত্রগা অমদি লৈ। ঐহাক্না মরু ওইনা লৈবাক অসিগী লাল্লোন-ইতিক তৌরিবা মরুপশিংবু য়াইফ-পাউজেল পীরি। ময়াম পুম্নমক্তশু দিপাৱলিগীদমক্তা মাংজৌননা য়াইফ-পাউজেল পীরি। ঐখোয়গী মরক্তা ময়াম অমনা দিৱালি ময়াম অমা উরম্লগনি অদুবু হন্দক্কী দিৱালি অসিদি য়াম্না পুৱারি ওইরবা দিৱালিনি। নখোয় ময়াম্ন খল্লগনি মদুদি দিৱালি ময়াম অমা য়েংমন্দনা শমদা পোক ফাওবা হৌরে অদুগা মোদী জীনা করম্বা পুৱারি ওইরবা দিৱালি পুরক্লিবনো। চহি ৫০০গী মতুংদা অসিগুম্বা তাঞ্জা অমা লাক্লে ... মদুদি আয়োধ্যাদা রামললাগী পোক্নফমদা শারিবা মহাক্কী মন্দিরদা দীপ লিশিং কয়া অমা থাল্লগনি, য়াম্না ফজরবা কুম্মৈ অমা ওইরগনি। মসিগী দিৱালি অসি ঐখোয়গী রামনা অমুক হন্না মশাগী ময়ুমদা হল্লক্লে। অমসুং হন্দক্তি খৌরাংনা ঙাইরিবা অদু চহি ১৪গী মতুংদা নত্তে, চহি ৫০০গী মতুংদা মপুং ফারিবনি।   

মরুপশিং,

ধন্তেরসকী নুমিৎ অসি লাইবক ফবা অমসুং হকচাং ফনা লৈবগী কুম্মৈ অসি তাঞ্জা চারুবা নত্তে। মসি ভারতকী সংস্কৃতিগী পুনশিরোলগী খুদম অমনি। ঐখোয়গী রিশিশিংনা হায়রম্মি-আরোগ্যাম পরমম ভাগ্যম! মসিনা হায়বদি, হকশেলনা খ্বাইদগী অথোইবা লাইবক্নি, অথোইবা লন্নি। হায়নৈ মদুদি হেল্থ ইস ৱেল্থ হায়না। মসিগই অরিবা ৱাখল্লোন অসিনা ঙসিদি আয়ুর্ভেদ দিৱসকী শক্তমদা মালেম শিনবা থুংনা খঙনরে। ঐখোয় কদুইংমক্কী ওইনদি য়াম্না হরাওনিংঙাই ওইবা ৱাফম্নি মদুদি ঙসিদি লৈবাক ১৫০ হেনবদা আয়ুর্ভেদ দিৱস অসি পাংথোক্লি।  মসিনা খুদম্নি- আয়ুর্ভেদকা মরি লৈননা মালেম শিনথুংনা পুক্নিং চিংশিনলক্লি! অমসুং মসিনা খুদম্নি মদুদি ভারতনা মশাগী অরিবা এক্সপরিয়েন্সশিং অদুনা মালেম পুম্ববু কয়া য়াম্না পীবা ঙম্বগে হায়বদু তাক্লি।

মরুপশিং,

হৌখিবা চহি ১০ অসিদা লৈবাক অসিনা আয়ুর্ভেদকী লৌশিংবু মোদর্ন মেদিসিনগা লোইননা পুনশিন্দুনা হকশেলগী লমদা অনৌবা পন্দুপ অমমুক হাপচিনখ্রে। ‘ওল ইন্দিয়া ইনস্তিত্যুত ওফ আয়ুর্ভেদ’না মসিগী অচৌবা সেন্তর অমা ওইরক্লি। চহি ৭কী মমাংদা, ঙসিগী নুমিৎ অসিমক্তদা, ঐহাক্না ইনস্তিত্যুত অসিগী অহানবা ফেজ অদু মীয়ামদা খুদোল তম্নবগী খুদোংচাবা অদু ফংজখি। ঙসি ভগৱান ধনৱন্তরিগী জয়ন্তি অসিদা ঐহাক্না মসিগী অনিশুবা ফেজ শঙ্গাবগী তাঞ্জা অদু ফংলে। মফম অসিদা পঞ্চকর্মগুম্বা অরিবা মেথদশিং অসি মতম অসিগী অনৌবা তেক্নোলোজীগা লোইননা ফ্যজন তৌবা উবা ফংলগনি। আয়ুরভেদ অমসুং মেদিকেল সাইন্সগী লমদা এদভান্স রিসর্চশু তৌগনি। অমসুং ঐহাক্না মসিগীদমক্তা লৈবাক মীয়ামদা নুংঙাইবা ফোংদোক্লি।

মরুপশিং,

লৈবাক অসিগী প্রজাশিংনা হকচাং ফনা লৈরিবমখৈ, লৈবাক অদুগী চাউখৎ-খোংথাংগী খোংজেল অদুশু হেন্না য়াংগনি। মসিগী ৱাখল্লোন অসিগা লোইননা, মশাগী প্রাজাশিংগী হকশেলদা মরু ওইবা থমদুনা, কেন্দ্র সরকারনা হেল্থ পোলিসীগী য়ুম্বি মঙাগী ৱারেপ লৌখি। অহানবদা- প্রিভেন্তিব হেল্থকিয়র, হায়বদি লাইনা অদুনা হৌরক্ত্রিঙৈদা ঙাকথোকপা.... অনিশুবদা– লাইনা অদুগী মতম চানা লাইওং খঙদোকপা.... অহুমশুবদা- লেম্না অমসুং হোংনা লাইয়েংবা, অ্ংবা হিদাক-লাংথকশিং... মরিশুবদা- অপিকপা সিতীশিংদা অফবা মখলগী লাইয়েং, দোক্তরশিংগী অৱাংপা লৈহন্দবা.... অমসুং মঙাশুবদা- হেল্থকিয়রদা তেক্নোলোজীগী এক্সপান্সন। ভারতনা হৌজিক্তি হেল্থকিয়র সেক্তর অসিবু হোলিস্তিক হেল্থকিয়রগী মিৎয়েংদগী য়েংলে। ঙসিদি, মসিগী প্রোগ্রাম অসিদা মসিগী য়ুম্বি মঙা অসিগী য়াম্না চাউনা মমি তাবা ফংলে। হৌজিক-হৌজিক মফম অসিদা লুপা করোর লিশিং ১৩ রোমগী ওইগদবা প্রোজেক্তশিং শঙ্গাখ্রে অমসুং উরেপ-উয়ুং তমখ্রে। আয়ুর-স্বাস্থ্যা য়োজনাগী মখাদা সেন্তর ওফ এক্সেলেন্স ৪... দ্রোনশিংগী খুত্থাংদা হেল্থ সর্বিসশিংগী এক্সপান্সন.... AIIMS রিশিকেশতা হেলিকোপ্তর সর্বিস.... AIIMS দিল্লী অমসুং AIIMS বিলাশপুরদা অণোবা ইনফ্রাস্ত্রকচর.... লৈবাক অসিগী অতোপ্পা AIIMS ৫দা সর্বিসশিংগী এক্সপান্সন..... মেদিকেল কোলেজশিং হৌদোকপা.... নর্সিং কোলেজশিংগী ভুমিপুজন...... লৈবাক অসিদা হেল্থ সর্বিসশিং অমুক হন্না হিংগৎহনবগা মরি লৈনবা অসিগুম্বা থবক কয়া অমা ঙসি পাংথোক্লি। ঐহাক য়াম্না হরাওই মদুদি অসিগুম্বা হোসপিতাল কয়া অমা ঐখোয়গী থবক তৌরিবা ইচিল-ইনাওশিং অমসুং ইচে-ইচলশিংগী লাইয়েংনবগীদমক্তা শাখ্রে। মসিগী হোসপিতালশিং অসিনা ঐখোয়গী ৱার্কিং ক্লাসকীদমক্তা সর্বিসকী সেন্তরশিং ওইরগনি। ঙসি শঙ্গাখিবা ফার্মা য়ুনিৎশিং অদুনা লৈবাক অসিমক্তা অৱাংবা ক্বালিতী স্তেন্তশিং অমসুং ইমপ্লান্তশিংগা লোইননা এদভান্স ওইরবা হিদাক-লাংথকশিং মেন্যুফেকচর তৌরগনি। মসিগী য়ুনিৎশিং অসিনা ফার্মা সেক্তরদা ভারতকী শাহবু খুমাং চাউশিনহল্লগনি।

মরুপশিং,

ঐখোয় অনম্বনা অনাবা হায়সিনা ইমুং-মনুং পুম্বদা ব্রজ তাবগুম্না থোকপা অদুগুম্বা ইমুংশিংদগী হৌরকপা ঙাক্তনি। করিগুম্বা কনাগুম্বা লাইরবা ইমুং অমগী মীওই অমনা য়াম্না কন্না নারবদি, মদুনা ইমুংগী মীওই খুদিংমক্তআ শোকহল্লি। মতম অমদা মীশিংনা লাইয়েংনবগীদমক্তা মখোয়গী য়ুমশিং, লমশিং, সনা-লিক্কোল, লৈজবা খুদিংমক য়োন্থোক্নরম্মি। লাইরবা মীওই অমগী থৱায়না শাথিবা লাইনা অমগী লাইয়েংবদা চংবা মমল অদু তাবদা নিক্লম্মি। অহল ওইরবা মমানা মশাবু লাইয়েংগদ্র নত্রগা মহাক্কী মশুশিংবু লাইরিক তম্নগদ্রা হায়না খল্লম্মি। অহল ওইরবা মপা অমনা মশাবু লাইয়েংগদ্র নত্রগা ইমুংগী শেঞ্জংবু য়েংশিনগদ্র হায়না খল্লম্মি। মরম অদুনা লাইরবআ ইমুংশিংগী অহলশিংনা লম্বি অমখ্তমক উরম্মি। তুমিন্না অনা-অয়ে অদুবু খঙজিল্লি। তুমিন্না শিবা ঙাইরম্মি। শেল লৈতবনা মরম ওইরগা লাইয়েংবা ঙমদদুনা উপাই লৈজদা লাইরবশিংবু নিংবা কাইহল্লি।

ঐহাক্না ঐহাক্কী লাইরবা ইচিল-ইনাওশিং অমসুং ইচে-ইচলশিংবু অসিগুম্না উপাই লৈজদবা অসি য়েংবা ঙমদে। মরম অদুনা আয়ুশমান ভারত য়োজনা অসি মসিগী মনুংশি, মদুগী চৈনা, চৈনা ফংবা মতৌ অমসুং ঐখোয়গী ইরৈচাশিংগী মাইকৈদা কত্থোক্নিংবগী ৱাখল্লোন অসিদগী হৌরকখিবনি। সরকার অসিনা ৱারেপ লৌখি মদুদি সরকারনা লাইরবশিংগী হোসপিতলাইজেশন অচংবা শেল অদু পুথোক্কনি... লুপা লাখ ৫ ফাওবগী লাইয়েংবদা চংবা শেল। ঙসিদি ঐহাক য়াম্না পেল্লে মদুদি লৈবাক অসিগী লাইরবা মী করোর ৪ রোম্না আয়ুশমান য়োজনাগী খুদোংচাবা লৌখ্রে। মসিগী লাইরবা মী করোর ৪ অসি হোসপিতালদা এদমিৎ তোখ্রে, খরা অমদি তোঙান-তোঙানবা লাইনাশিংগীদমক্তা কয়ারক হন্না এদমিৎ তৌখ্রে.... মখোয়গী লাইনাশিং অদুবু লাইয়েংখ্রে... অমসুং মখোয়না লুপা অমফাওবা তিংখিদে। করিগুম্বা আয়ুশমান য়োজনা লৈরমদ্রবদি..... মসিগী লাইরবা মীশিং অসিনা মখোয়গী সেঙ্গাওদগী লুপা করোর লাখ ১.২৫ রোম থিগদৌরিবনি। ঐহাক্না লৈবাক অসিগী তোঙান-তোঙানবা রাজ্যশিংদা আয়ুশমান য়োজনাগী বেনিফিসরীশিংগা য়াম্না তোইনা উনৈ, মখোয়গী নুঙাইবা অমসুং অৱাবশিং অদু তাই, মখোয়গী এক্সপরিয়েন্সশিং অদু তাই অমসুং ৱা ঙাংবা মতমদা মখোয়গী মমিত্তগী তাবা হরাওবগী পীরাং অদু আয়ুশমান য়োজনা অসিগা মরি লৈনবা মীপুম খুদিংমক্কীদমক্তাদি থৌজাল অমদগী তাবা নত্তে... দোক্তর খুদিংমক্কী..... পেরামেদিকেল স্তাফ খুদিংমক্কীদমক্তদি, মসিদগী হেন্না চাউবা থৌজাল লৈত্রে।

থাজবিয়ু… অসিগুম্বা অৱাবশিং অসিদগী মীশিংবু কন্নবা স্কীম অমত্তা মমাংদা সেমকিদ্রি… অমসুং ঙসিদি ঐহাক বাম্ন পেল্লে মদুদি অয়ুশমান য়োজনা অসি চাউথোরক্লে। লৈবাক অসিদা লৈরিবা অহল ওইরবা মীওই খুদিংমক্না মসিগি প্রোগ্রাম অসিবু তান্নরি। ইলেক্সনগী মতমদা, ঐহাক্না অহুমশুবা তার্মদা, চহি ৭০গী মথক্তা লৈবা অহল খুদিংমক অয়ুশমান য়োজনাগী মখাদা পুরক্লগনি হায়না থাজবা পীখি… ঙসি ধনৱন্তরি জয়ন্তি অসিদা, মসিগী ধাজবা অসি নিংবা থুংহল্লে। ঔজিক্তি চহি ৭০গী মথক্তা লৈবা লৈবাক অসিগী অহল খুদিংমক্না হোসপিতালশিংদা লেম্না লাইয়েংবা য়ারগনি। অসিগুম্বা অহল ওইরবা মীওইশিং অসিদা আয়ুশমান ৱায়া ৱন্দনা কার্দ পীরগনি। সরকার অসিনা লৈবাক অসিদা লৈরিবা অহল ওইরবা মীপুম খুদিংমক…. চহি ৭০ এল্লবামীপুম খুদিংমকপু য়ারিবমখৈ থুনা আয়ুশমান ৱায়া ৱন্দনা কার্দ ফংহন্নবা হোৎনরি। অমসিং মসিগী স্কীম অসিদা ইনকমগী রেস্ত্রিক্সন অমত্তা লৈতে… লাইরবা মীশক ওইবা য়াই…. মিদল ক্লাসকী মীশক ওইবা য়াই…. শেল পাইবা উপ্পর ক্লাসকি মীশক ওইবা য়াই, মীপুম খুদিংমক্নামসিগী বেনিফিসরি ওইবা য়াই। মসিগী স্কীম অসিগী খুদোংচাবা লৌনিংবা খুদিংমক, লৈবাক অসিগী প্রজা খুদিংমক্না করিগুম্বা মহাক্কী চহি অদু ৭০গি মথক্তা ওইরবদি মসিগী খুদোংচাবা লোবা য়াগনি।

অহল ওইরবা মীওই কুদিংমক্না অৱা-অনাদগী কোম্না নিংখা তম্না হিংগদবনি, মখোয়না হকচাং ফবা পুনশি মহিং অমা হিংগদবনি…. ইজৎ লৈনা পুনশি হিংগদবনি…..  স্কীম অসিনা মসিগীদমক্তা মাইলস্তোন অমা ওইরগনি। করিগুম্বা য়ুম অমগী অহল ওইরবা মীওই অদুনা আয়ুশমান ৱায়া ৱন্দনা কার্দ লেরবদি, ইমুং অদুগী চাদি অদু হন্থরগনি, মখোয়গী অৱাবশিং অদুশু হন্থরগনি। ঐহাক্না মসিগী স্কীম অসিগীদমক্তা ইরেচাশিং পুম্নমক্তা নুংঙাইবা ফোংদোক্লি, অমসুং ঐহাক্না মফম অসিদগী চহি ৭০ হেল্লবা অহল ওইরবা মীওইশিং পুম্নমক্তা সলাম তৌজরি। অদুবু মসিগা লোইননা ঐহাক্না দিল্লীগী চহি ৭০ হেল্লবা অহল ওইরবশিং পুম্নমক্তা অমসুং ৱেস্ত বেঙ্গলগী চহি ৭০ হেল্লবা অহল ওইরবশিং পুম্নমক্তা ঙাকপীনবা হায়জরি মদুদি ঐহাক্না নখোয় অৱাফমদা তারে হায়বা খঙগনি অদুবু ঐহাক্না মদুগী পাউ ফংগনি অদুবু ঐহাক্না নখোয়গী মতেং পাংবা ঙম্লোই অমসুং মদুগী মরমদি দিল্লী সরকার অমসুং ৱেস্ত বেঙ্গল সরকার আয়ুশমান স্কীম অসি য়াওদে, মখোয়গী রাজনিতিগী অপাম্ব অদুনা মরম ওইরগা য়াওদে, মশাগী রাজ্য মক্তদা অনাবা মীশিংবু নমথদুনা থম্বগী ৱাখল্লোন অসিমক মীওইবা জাতি মিৎয়েংদগী মরম অমএক্তদা মসিগী ৱাখল্লোন অসি চুমদে। অমসুং মরম অদুনা ঐহাক্না ৱেস্ত বেঙ্গল অমসুং দিল্লীগী অহলশিংদা ঙাকপীনবা হাবজরিবনি। ঐহাক্না ইরৈচাশিংগীদমক্তা থবক তৌবা ঙম্মি অদুবু রাজনিতিগী ওইবা মখোয়গী ওইজবা থিবগী শম্বল অদুনা ঐহাকপু দিল্লী অমসুং ৱেস্ত বেঙ্গলগী অহলশিংবু সেবা তৌবদগী থংঙি। অমসুং ঐগী ওইনদি, ঐহাক্না মসি রাজনিতিগি ৱাখললোনদগী ঙাংবা নত্তে, ঐহাক্না ঙাংলিবা মফম দিল্লী অসিগী অহলশিংনশু ঐহাক্না ঙাংলিবা অসি তরমগনি হায়বদা থমোইনুংদা অৱাবা ফাওই।  এআক্কী থমোইদা কয়া য়াম্না ৱাবগে হায়বদু ঐহাক্কী ইচিল অসিনা ৱাহৈ ওইনা ফোংদোকপা ঙম্লরোই।

মরুপশিং,

লাইরবা নত্রগা মিদল ক্লাসপু ওইসনু, য়ারিবমখৈ মীপুম খুদিংমক্কী লাইয়েংবগী অচংবা শেল অদু খ্বাইদগী নেম্বা ওইগদবনি। ঙসিদি, লৈবাক অসি শিনথুংনা পি.এম. জন ঔসাধি কেন্দ্র লিশিং ১৪ হেন্না লৈরে, ঐখোয়গি সরকার অসিনা কয়া য়াম্না সেন্সিতিব ওইনা থবক তৌরিবগে হাববগী খুদম্নি। চাদা ৮০ দিস্কাউন্ত পীদুনা জন ঔসধি কেন্দ্রশিং অসিদা হিদাক-লাংথকিশিং ফংলি। করিগুম্বা মসিগী জন ঔশধি কেন্দ্রশিং অসি লৈরমদ্রবদি, হৌজিক ফাওবদা লাইরবশিং অমসুং মিদল ক্লাসতা য়োল্লিবা হিংদাকশিং অদুগী মতুং ইন্নদি, ঐহাক হায়বা ঙমগনি মদুদি মখোয়না ইদাক-লাংথকসিংদা লুপা করোর লিশিং ৩০ হেন্না চাদিং তোরম্লগনি। মখোয়না লুপা লিশিং করোর ৩০ সেব তোবা ঙম্লিবা অসি মখোয়না হিদাক-লাংথকশিং অদু জন ঔশধি কেন্দ্রশিং অসিদগী চাদা ৮০ দিস্কাউন্ত তোদুনাফংবগীনি।

নখোয়না খঙলম্লগনি.... ঐখোয়না স্তেন্তশিং অমসুং নী ইমপ্লন্তশিংঘুম্বা দিভাইসশিং অসি হোংথহনখ্রে। মসিগী ৱারেপ অসি লৌরমদ্রবদি.... মসিগী ওপরেশনশিং অসি চত্থখিবা ইচম-চম্বা মীওইশিংনা করোর লিশিং ৮০ হেন্না চাদিং তৌরম্বা য়াই, মখোয়গী লুপা করোর ৮০ অদু কনবা ঙমহৌরিবা অসি ঐখোয়গী হোৎনজমনগী মহৈনি। ফ্রী দাইলাইসিস স্কীমনা মরম ওইরগা পেসেন্ত লাখ কবা অমগী শেল লুপা করোর লিশিং কয় অমা কনবা ঙমখ্রে। ঐখোয়গী সরকার অসিনা শাথিবা খুদোংথিনিংঙাই ওইবা লাইনাশিংদগী ঙকথোক্নবা মিসন ইন্দরধানুশ অভিয়ান চলাইরি। মসিনা মীরোল্লবী নুপীশিংগী পুনশি কনবদা নত্তনা.... পোকপদা ঙাইরিবা অঙাংশিংগী পুনশিশু কল্লিবনি... অদুদা নত্তনা মখোয়শিং অদুবু অরুবা লাইনাশিংদগীশু ক্লিবনি। ঐহাক্না ঐখোয়গী লৈবাক অসিগী লাইরবশিং অমসুং মিদল ক্লাসশিং অসিনা য়াম্না তাংবা লাইয়েংগী পোৎলুম অসিদগী নিংখাতমদ্রিবফাওবা পোত্থারোই অমসুং ঙসি লৈবাক অসিনা মসিগী মাইকৈদা মাং লোমদা খোং থাংজিল্লি।    

মরুপশিং,

নখোয়না খঙই... লাইনানা থোকহনবা খুদোংথিবশিং অমসুং অৱাবশিং অদু হন্থনবা, খ্বাইদগী মরু ওইবা থবক অদুদি মতম চানা লাইওং খঙদোকপা.... করিগুম্বা কনাগুম্বা অমা নাবা তারবদি, মহাক্না ঙন্নালাইওং খঙদোক্নবগী ফেসিলিতী অদু লৌগদবনি অমসুং লাইনা অদু য়াম্না ঙন্না লাইয়েংহৌগদবনি... মসিগীদমক্তা, লৈবাক শিনথুংনা আয়ুশমান আরোগ্যা মন্দির লাখ অনি হেন্না হাংদোকখ্রে। ঙসিদি, মসিগী আরোগ্য মন্দিরশিং অসিনা মী করোর কয়া অমগী কন্সর, ব্লদ প্রেসর, দাইবেতিসগুম্বা লাইনশিং আসিবু য়াম্না লাইনা দাইগনোজ তৌখ্রে। য়াম্না লাইনা দাইগনোসিস তৌবনা মরম ওইরগা মীশিং অসিগী লাইয়েংশু মতম চানআ চত্থরে। মতম চানা লাইয়েং চত্থবা হায়বসিশু মখোয়গী শেল সেব তৌরিবনি।

এখোয়গী সরকার অসিনা হেল্ত সেক্তরদা তেক্নোলোজী অয়াম্বা শিজিন্নদুনা ইরৈচাশিংগী শেল তুংশিনবদা মতেং পাংলি। ই-সঞ্জীৱনি স্কীমগী মখাদা, হৌজিক ফাওবদা মী করোর ৩০, হাবরিবা মশিং অসি অপিকপদি নত্তে, মী করোর ৩০না ইকাইখুম্নরবা, শক্নাইরবা দোক্তরশিংগা ওনলাইনদা কন্সল্ত তৌখ্রে। মখোয়না দোক্তরশিংদগী লেম্না অমসুং অচুম্বা কন্সলতেশন ফংদুনা শেল য়াম্না সেব তোহৌরে। ঙসিদি ঐখোয়না U-ৱিন প্লেতফোর্ম লোঞ্চ তৌখ্রে। মসিগী প্লেতফোর্ম অসিদগী ভারতনা মশাগী ওইবা তেক্নোলোজী ৱাংবা এদভান্স ইন্তরফেস অমা লৈরগনি। মালেম পুম্বনা কোরোনা মতমদা ঐখোয়গী কো-ৱিন প্লেতফোর্মগী মাইপাকপা অদু উবা ফংখ্রে। পেমেন্ত সিস্তেমদা UPIগী মাইপাকপা অদু ঙসিদি মালেমগী ৱারি ওইরে। ভারতনা দিজিতেল পব্লিক ইনফ্রাস্ত্রকচর হায়বদি DPIগী খুত্থাংদা হেল্থ সকে্তরদা চপ মান্নাবআ মাইপাকপা অদু অমুক হন্না পুরক্কদৌরি।  

মরুপশিং,

নিংখা তম্লবা মতুং দেকেদ ৬-৭ অসিদা হেল্থ সেক্তরদা তৌরমদবা থবকশিং অদু হৌখিবা চহি ১০ অসিদা তৌরি। হৌখিবা চহি ১০ অসিদা, মশিং য়াম্লবা অনৌবা AIIMS অমসুং মেদিকেল  কোলেজশিং লৈবাক অসিদা হাংদোরক্লি। ঙসি, থৌরম অসিমক্তদা, কর্নাতকা, য়ু.পি., এম.পি. অমসুং মধ্য প্রদেশতা হোসপিতাল কয়া অমগী উরেপ-উয়ুং তমখ্রে। কর্নাতকাগী নর্সাপুর অমসুং বোম্মা-সান্দ্রদা, মধ্য প্রদেশকী পিতামপুরদা, অন্ধ্র প্রদেশকী আচিতাপুরমদা অমসুং হরিয়ানাগী ফরিদাবাদতা অনৌবা মেদিকেল কোলেজশিংগী উরেপ-উয়ুং তমখ্রে। য়ু.পি.গী মীরুত্তা অনৌবা ESIC হোসপিতালগী থবক হৌখ্রে। ইন্দোরদা হোসপিতাল অমশু হৌখ্রে। হেনগৎলক্লিবা হোসপিতালশিংগী মশিং অসিনা মেদিকেল সীতশিংগী মশিংশু খোংজেল চপ মান্ননা হেনগৎলক্লি তাকপনি। ঐহাক্না লাইরবা অঙাং অমগী দোক্তর ওইনিংবগী মঙলান অদু কাইবা পামদে। অমসুং ঐহাক্না থাজৈ মদুদি সরকারগী মাইপাকপা অদু লৈবাক অসিগী নহা অমগী মঙালনা কাইদবা হায়বা ৱাফম অসিদশু লৈ। মঙলানগীশু মশাগী শক্তি লৈজৈ, করিগুম্বা মতমদা মঙলান অসিশু পুক্নিং থৌগৎনবগী মচাক অমা ওইরিবনি। ঐহক্না মিদল ক্লসকী অঙাংশিংবু মেদিকেল তম্নবগীদমক্তা মপান লমদা উপাই লৈতদনা চৎপা হায়বসি পামদে.... মরম অদুনা ঐহাক্না হৌখিবা চহি ১০ অসিদা, মেদিকেল সীতশিং হেনগৎনবা কেমপেন অমা ভারত্তা কন্না চত্থরি। হৌখিবা চহি ১০ অসিদা, MBBS অমসুং MDগীদমক্তা পুন্না অনৌবা সীত লাখ অমরোম হেনগৎলকখ্রে। অমসুং হন্দক্কী চহি অসিদা, ঐহাক্না রেদ ফোর্ততগী লাউথোকখ্রে মদুদি লাক্কদবা চহি ৫ অসিদা ঐখোয়না মেদিকেল লাইন অসিদা অহেনবা সীত লিশিং ৭৫ আমগা হাপচিল্লগনি.... নখোয়না খন্দুনআ য়েংবীয়ু মসিনা খুঙ্গং খুদিংমক্তা দোক্তরশিংগী মশিং কয়া য়াম্না হেনগৎলগনি।

মরুপশিং,

ঙসিদি লৈবাক অসিদা রেজিস্তর তৌরবা আয়ুশ প্রক্তিস্নর লাখ ৭.৫ হেন্না লৈরে। ঐখোয়না মসিগী মশিং অসি অমুক্কশু হেন্না হেনগৎহনগদবনি। লৈবাক অসিদা মসিগীদমক্তা থবকশু তৌরি।  ঙসি মালেম অসিনা ভারতপু মেদিকেল অমসুং ৱেলনেস তুরিজমগী অচৌবা সেন্তর অমা ওইনশু উই। মালেম অসিগী মফম কয়াদগী মীশিংনা ভারত্তা য়োগ, পঞ্চকর্মা অমসুং মেদিতেশনগীদমক্তা লাকই। লাক্কদবা মতমশিংদা, মসিগী মশিং অসি অমুক্কশু হেন্না য়াংনা হেনগৎলক্লনি। ঐখোয়গী নহাশিং, ঐখোয়গী আয়ুশ প্রক্তিস্নরশিংনা মসিগীদমক্তা শেম-শাদুনা লেগদবনি। প্রিভেন্তিব কার্দিয়োলোজী... আয়ুরভেদিক ওর্থোপেদিক্স..... আবুর্ভেদ স্পোর্তস মেদিসিন অমসুং আয়ুর্ভেদ রেহেব সেন্তরশিং.... অসিগুম্বা লমশিং অসিদা ভারত খক্তা নত্তনা তোঙান-তোঙানবা লৈবাকশিংদশু আয়ুশ প্রক্তিস্নরশিংগীদমক্তা খুদোংচাবা কয়া অমা লৈরি। ঐখোয়গী নহাশিংনা মসিগী খুদোংচাবশিং অসিগী কূত্থাংদা খুমাং চাউশিনবদা নত্তনা মীওইবা খুনাই অসিগীদমক্তা অচৌবা সর্বিস অমা তৌরগনি। 

মরুপশিং,

২১শুবা সেঞ্চুরীদা, সাইন্সনা হিদাক-লাংথক্কী লমদা য়াম্না য়াংনা ঙক্নিংঙাই ওইবা মওংদা খুমাং চাউশিল্লকখি। মমাংদা হান্না লায়েংবা ঙমদবা লাইনা ওইনা খন্নরম্বশিং অদুগীদমক্তা লাইয়েংশিং লৈরক্লে। মালেম অসিনা লাইয়েংগা লোইন-লোইননা ৱেলনেসতা মরু ওইবা থম্বা হৌরক্লে। অমসুং ৱেলনেসকী মতাংদদি, হকশেলগী মতাংদদি, মসিগী মতাংদা ভারতনা চহি লিশিং কয়া অমগী এক্সপরিয়েন্স লৈ। মতম অসিনি ঐখোয়না ঐখোয়গী অরিবা লৌশিংশিং অদুবু মোদর্ন সাইন্সকী মিৎয়েংদগীশুং প্রমান পীগদবা অদু। মরম অদুনা ঐহাক্না খুদম-চাংদম য়াওবা আয়ুর্ভেদগী মতাংদা পল্লিবদু। আয়ুর্ভেদতা পর্সোনেলাইজদ ত্রীৎমেন্ত প্রোতোকোলশিংগী নোলেজ য়াম্না লৈ... অদুবু মোদর্ন সাইন্সকী মিৎয়েংদগীদি, মসিগী মাইকৈদা সোলিদ ওইবা কনক্লুসিব ৱার্ক অমত্তা তৌখিদ্রি। ঙসিদি মসিগী মাইকৈদা লৈবাক অসিনা য়াম্না মরু ওইবা কেমপেন অমা হৌদোক্লগনি হায়সি য়াম্না হরাওই।  কেমপেন অসি- প্রাক্রিতি পরিক্সা অভিয়ান!মসিগী প্রক্রিতি পরিক্সা অভিয়ান! মরমদি পেসেন্ত খরা আয়ুর্ভেদনা মরম ওইরগা ফখ্রে, ফল অদু উবা ফংলে, খুদমদি লৈতে, ঐখোয়না ফলগা লোইননা খুদমশু তঙাইফদে। মালেম অসিগী হকশেলগীদমক্তা ঐখোয়দা হর্ব লৈ হাববদু মালেম অসিদা উৎনবগীদমক্তা। মসিগি কেমপেন অসিগ মখাদা, ঐখোয়না আয়ুর্ভেদগী প্রিন্সিপলশিং অদুদা য়ুমফম ওইরগা মীপুম খুদিংমক্কী খ্বাইদগী ফাব পুনশি মহিং অমা শেম্বা য়াই। ঐখোয়না মীওইশিং অদু লাইনা অদুনা নারক্ত্রিঙৈগী মমাংদা মখোয়গী রিস্ক এনালিসিস তৌবা য়াই। ঐহাক্না থাজৈ মদুদি মসিগী মাইকৈদা খুমাং চাউশিল্লকপনা ঐখোয়গী হেল্থ সেক্তরদা য়াম্না চাউনা অওনবা পুরক্কনি। মালেম পুম্বদা হেল্থকিয়রগী তোঙানবা মিৎয়েং অমা পীবা য়াই।

মরুপশিং,

মোদর্ন মেদিকেল সাইন্সকী মাইপাকপগী অতোপ্পা অচৌবা মরম অমনা প্রিন্সিপাল খুদিংমক্কী লেব ভেলিদেশন তৌবা... ঐখোয়গী ত্রেদিস্নেল হেল্থকিয়র সিস্তেমনশু মসিগী চাংয়েং অসি মাইপাকপা তাই। ঐখোয়না অশ্বগন্ধা, য়াইঙং, গুল মোরোক... অসিগুম্বা হর্ব কয়া অমা মীরোল কয়া কয়াদগীহৌনা তোঙান-তোঙানবা লাইয়েংগীদমক্তা শিজিন্নদুনা লাক্লবনি। হৌজিক্তি মখোয়গী কান্নবশিং অসি  য়াম্না ইমপেক্ত লৈবা স্তদীশিং মাইপাক্না শিজিন্নখ্রে। মরম অদুনা অশ্বগন্ধাগুম্বা হিদাক-লাংথকশিং অসিগী দিমান্দশিং অসি ঙসি মালেম অসিদা য়াম্না য়াংনা হেনগৎলক্লিবনি। অশ্বগন্ধা এক্সত্রেক্তকী মার্কেত অসি হন্দক্কী দেকেদ অসিগী লোইশিল্লকপদা বিলিয়ন দোলর অনি মখাই য়ৌরবা য়াই হায়না পানরি। নখোয়না খন্দুনা য়েংঙো.... লেব ভেলিদেশনগী খুত্থাংদা মসিগী হর্বশিং অসিগী ভেল্যুএশন অদু কয়া য়াম্না হেনগৎপা ঙম্বগৈ হায়বদু য়েংবীয়ু! কয়া য়াম্না চাউবা মার্কেত অমা ঐকোয়না শেম্বা ঙম্বগে হায়বদু য়েংবীয়ু!

মরম অদুনা, কোমরেদশিং,

আয়ুশকী মাইপাকপা অসিগী শাফু অদু হেল্থ সেক্তর খক্তদা লোইবা নত্তে। নাকল অমদা মসিনা ভারত্তা অনৌবা খুদোংচাবশিং পীরি, অমসুং নাকল অমরোমদনা, মসিনা মালেমগী য়াফনবগী হোৎনরিবশিং অসিবু হেন্নশু কনখৎহল্লি। ঐখোয়গী হোৎনজমনশিং অদুনা মরম ওইরগা চহি ১০গী মনুংদা, আয়ুশনা লৈবাক অসিদা খ্বাইদগী য়াংনা চাউখৎলকপা সেক্তরশিংগী মনুংদা অমা ওইরক্লি। ২০১৪দা, আয়ুশকা মরি লৈনবা মেন্যুফেকচরিং সেক্তর অদু বিলিয়ন দোলর অহুম ওইরম্মি, ঙসিদি চাউরাক্না বিলিয়ন দোলর ২৪দা চাউখৎলক্লে। হায়বদি চহি ১০ অসিদা শরুক নিপাল থোক্না হেনগৎলকখ্রে। মরম অদুনা ঙসিদি লৈবাক অশিগী নহাশিংনা অনৌবা আয়ুশ স্তার্তঅপশিং হৌদোরক্লিবনি। ত্রেদস্নেল ওইবা প্রোদক্তশিং, তেক্নোলোজী শিজিন্নদুনা পুথোকপা অনৌবা প্রোদক্তশিং, অনৌবা সর্বিসশিং, হায়রিবশিং অসিগা মরি লৈনবা আয়ুশ স্তার্তঅপ ৯০০ হেন্না ঙসিদি লৈবাক অসিদা থবক তৌরি। ঙসি ভারতনা লৈবাক ১৫০দা বিলিয়ন দোলর কয়া অমগী ওইগদবা আয়ুশকী পোত্থোকশিং এক্সপোর্ত তৌরি। ঐখোয়গী ইমুংশিংনা মদুগী কান্নবা দাইরেক্ত ওইনা ফংলি। হান্না লোকেল মার্কেত্তা খক্তমক ফংলম্বা হর্বশিং অমসুং সুপর ফুদশিং অদু হৌজিক্তি গ্লোবল মার্কেত্তা ফংলে।  

মরুপশিং,

লৌমীশিংনা হোংলক্লিবা সিনারিয়ো অসিদগী খ্বাইদগী হেন্না কান্নবা ফংনবা, সরকার অসিনা হর্বশিংগী প্রোদক্সনশু য়োকখৎলি। নামামি গঙ্গে প্রোজেক্তকী মখাদা, গঙ্গা তুরেলগি খোংবান্দা হর্বশিংগী নচরেল ফার্মিং অমসুং প্রোদক্সনবু প্রোমোত তৌরি।

মরুপশিং,

ঐখোয়গী জাতিগী লমচৎ, ঐখোয় খুনাই অসিগী চৎনরিবা মওং-মতৌ অসিগী থৱায় অসি – “সর্বে ভৱন্তু সুখিনাহ, সর্বে সান্তু নিরামায়াহ”. পুম্নমক নুংঙাইনা লৈবা ওইসনু, পুম্নমক হকচাং ফনা লৈবা ওইসনু। হৌখিবা চহি ১০ অসিদা, ঐখোয়না ‘সবকা সাথ, সবকা বিকাস’কী মন্ত্র অসিগী মতুং ইন্দুনআ লৈবাক অসিগী পোলিসীশিংদা মসিগী সেন্তিমেন্ত অসি য়াওহনখি। লাক্কদবা চহ ২৫ অসিদা, হেল্থ সেক্তরদা ঐখোয়না হোৎনখিবশিং অসিনা চাউখৎপা ভারত অমগী অরিবা ফাউন্দেশন আমা ওইগদৌরিবনি। ঐহাক্না থাজৈ মদুদি ভগৱান ধনৱন্তরীগী থৌজালদগী, ঐখোয়না চাউখৎপা ভারত অমসুং মসিগা লোইন-লোইননা হকচাং ফবা ভারত অমগী মঙলান অদুবু মঙফাওনবা ঙম্লগনি।

অমসুং কোমরেদশিং,

ঐহাক্না ফল অমসুং খুদমগী মতাংদা ৱা ঙাংবা মতমদা, ঐখোয়না মাইকৈ অমদা য়াম্না কন্না হোৎণগদৌরিবনি অমসুং মদুদি ঐখোয়গী লৈবাক অসিদা, মেন্যুস্ক্রিপশিং অসি য়াম্না য়াম্না চাইদুনা লৈরি। আয়ুর্ভেদাগা মরি লৈনবা মেন্যুস্ক্রিপশিং অসি মফম ময়াম অমদা চাইদুনা লৈরি। হৌজিক লৈবাক অসিনা মসিগী হেরিতেজ অসিবু ঙাকশেন্দুনা থম্নবা মিসন মোদতা থবক পাইখৎলগনি। মহৈ-মশিংগী স্তোরহাউস পুম্বা তাদুনালৈরে, মদু ইনস্ক্রিপ্সনদা, কোপ্পর প্লেতশিংদা ওইবা য়াই, খুৎনা ইবা চিথিশিংদা য়াওদুনা লৈ। পুম্নমক অসি খোমগৎনবগী থবক  অমসুং হৌজিক্তি আর্তিফিসিয়েল ইন্তেলিজেন্সকী মতম্নি, ঐখোয়না মদুবু চপ মান্নবা মওংদা তেক্নোলোজীগা কনেক্ত তৌবা পাম্লি, মদুগী নোলেজশিং অদুদগী করম্বা অনৌবা পোৎশিং লৌথোকপা ঙমগনি, মরম অদুনা ঐখোয়না মসিগী মাইকৈদা অচৌবা থবক অমশু তৌরগনি।

মরুপশিং,

ঙসিগী থৌরম অসিদা, ঐহাক্না অমুক্কশু হন্না চহি ৭০গী মথক্তা লৈরবা লৈবাক অসিগী অহল খুদিমক্তা ঐহাক্না ইকাইখুম্নবা উৎচরি, মখোয়বু ইকাইখুম্নজরি অমসুং নখোয় পুম্নমক্তা নুঙাইবা ফোংদোক্লি।

থাগৎচরি!

****