ধন্বন্তৰী জয়ন্তী আৰু নৱম আয়ুৰ্বেদ দিৱস উপলক্ষে প্ৰধানমন্ত্ৰী শ্ৰী নৰেন্দ্ৰ মোদীয়ে আজি নতুন দিল্লীত অল ইণ্ডিয়া ইনষ্টিটিউট অৱ আয়ুৰ্বেদ (AIIA)ত প্ৰায় ১২,৮৫০ কোটি টকাৰ স্বাস্থ্য খণ্ডৰ সৈতে জড়িত বিভিন্ন প্ৰকল্পৰ শুভাৰম্ভ, উদ্বোধন আৰু আধাৰশিলা স্থাপন কৰে।

সভাত ভাষণ দি প্ৰধানমন্ত্ৰীয়ে ধন্বন্তৰী জয়ন্তী আৰু ধনতেৰস উপলক্ষে শুভেচ্ছা জ্ঞাপন কৰে। তেওঁ দেশৰ সকলো ব্যৱসায়ীক নিজৰ শুভকামনা জ্ঞাপন কৰে। আজিৰ দিনটোত মানুহে নিজৰ ঘৰৰ বাবে নতুন কিবা কিনে। তেওঁ দীপাৱলীৰ আগতীয়া শুভেচ্ছাও জ্ঞাপন কৰে।

প্ৰধানমন্ত্ৰীয়ে কয় যে এই দীপাৱলী ঐতিহাসিক, কিয়নো অযোধ্যাত ভগৱান শ্ৰীৰামৰ মন্দিৰ হাজাৰ হাজাৰ দীপকেৰে উজ্জ্বলি উঠিব, যাৰ ফলত এই উদযাপন অভূতপূৰ্ব হৈ পৰিব। প্ৰধানমন্ত্ৰীয়ে কয়, "এইবাৰৰ দীপাৱলীত ভগৱান ৰাম পুনৰবাৰ নিজৰ বাসস্থানলৈ উভতি আহিছে।"

তেওঁ কয় যে অৱশেষত ১৪ বছৰৰ পাছত নহয়, বৰং ৫০০ বছৰৰ পাছত অপেক্ষাৰ অন্ত পৰিল।

শ্ৰী মোদীয়ে কয় যে এয়া কোনো সংযোগ নহয় যে এই বছৰ ধনতেৰসৰ উৎসৱ সমৃদ্ধি আৰু স্বাস্থ্যৰ সংযোজন, বৰঞ্চ ভাৰতৰ সংস্কৃতি আৰু জীৱন দৰ্শনৰো প্ৰতীক। প্ৰধানমন্ত্ৰীয়ে সাধু-সন্তসকলৰ উদ্ধৃতি দি কয় যে স্বাস্থ্যক সকলোতকৈ ডাঙৰ সম্পদ বুলি গণ্য কৰা হয় আৰু এই প্ৰাচীন ধাৰণাটোৱে যোগৰ ৰূপত সমগ্ৰ বিশ্বতে গ্ৰহণযোগ্যতা অৰ্জন কৰিবলৈ সক্ষম হৈছে। শ্ৰী মোদীয়ে এই কথাত প্ৰসন্নতা ব্যক্ত কৰে যে আজি ১৫০খনতকৈও অধিক দেশত আয়ুৰ্বেদ দিৱস উদযাপন কৰা হৈছে আৰু কয় যে ই আয়ুৰ্বেদৰ প্ৰতি ক্ৰমবৰ্ধমান আগ্ৰহ আৰু প্ৰাচীন কালৰ পৰা বিশ্বত ভাৰতৰ অৱদানৰ প্ৰমাণ।

প্ৰধানমন্ত্ৰীয়ে এই কথাত গুৰুত্ব আৰোপ কৰে যে বিগত এটা দশকত দেশত আধুনিক চিকিৎসা বিজ্ঞানৰ সৈতে আয়ুৰ্বেদৰ জ্ঞানৰ একত্ৰীকৰণে স্বাস্থ্য খণ্ডত এক নতুন অধ্যায় মুকলি কৰিছে। তেওঁ কয় যে অল ইণ্ডিয়া ইনষ্টিটিউট অৱ আয়ুৰ্বেদ এই অধ্যায়ৰ কেন্দ্ৰবিন্দু। শ্ৰী মোদীয়ে কয় যে সাত বছৰৰ আগতে আয়ুৰ্বেদ দিৱসৰ দিনা তেওঁ প্রতিষ্ঠানখনৰ প্রথম পর্যায় দেশক সমৰ্পিত কৰাৰ সৌভাগ্য লাভ কৰিছিল আৰু আজি ভগৱান ধন্বন্তৰীৰ আশীর্বাদত তেওঁ প্রতিষ্ঠানৰ দ্বিতীয় পর্যায়ৰ উদ্বোধন কৰিছে৷ তেওঁ কয় যে এই প্ৰতিষ্ঠানত আয়ুৰ্বেদ আৰু চিকিৎসা বিজ্ঞানৰ ক্ষেত্ৰত উন্নত গৱেষণামূলক অধ্যয়নৰ লগতে আধুনিক প্ৰযুক্তিৰ সৈতে সংযুক্ত পঞ্চকৰ্মৰ দৰে প্ৰাচীন কৌশল দেখা পোৱা যাব। এই অগ্ৰগতিৰ বাবে শ্ৰী মোদীয়ে ভাৰতৰ দেশবাসীক অভিনন্দন জ্ঞাপন কৰে।

যিকোনো ৰাষ্ট্ৰৰ অগ্ৰগতি প্ৰত্যক্ষভাৱে নাগৰিকৰ স্বাস্থ্যৰ ওপৰত নিৰ্ভৰশীল বুলি উল্লেখ কৰি প্ৰধানমন্ত্ৰীয়ে নাগৰিকৰ স্বাস্থ্যৰ প্ৰতি চৰকাৰৰ অগ্ৰাধিকাৰৰ ওপৰত আলোকপাত কৰে আৰু স্বাস্থ্য নীতিৰ পাঁচটা স্তম্ভৰ ৰূপৰেখা দাঙি ধৰে। তেওঁ এই পাঁচটা স্তম্ভৰ উল্লেখ কৰে- প্ৰতিৰোধমূলক স্বাস্থ্যসেৱা, ৰোগ শীঘ্ৰে ধৰা পেলোৱা, বিনামূলীয়া আৰু কম খৰচী চিকিৎসা আৰু ঔষধ, সৰু চহৰত চিকিৎসকৰ উপলব্ধতা আৰু স্বাস্থ্যসেৱাত প্ৰযুক্তিৰ সম্প্ৰসাৰণ। শ্ৰী মোদীয়ে কয়, “ভাৰতে স্বাস্থ্য খণ্ডক সামগ্ৰিক স্বাস্থ্য হিচাপে চায়।” শ্ৰী মোদীয়ে কয় যে আজিৰ প্ৰকল্পসমূহে এই পাঁচটা স্তম্ভ প্ৰতিফলিত কৰে। ১৩ হাজাৰ কোটি টকাৰো অধিক মূল্যৰ বিভিন্ন প্ৰকল্পৰ উদ্বোধনী আৰু আধাৰশিলা স্থাপনৰ কথা উল্লেখ কৰি, প্ৰধানমন্ত্ৰীয়ে আয়ুষ স্বাস্থ্য আঁচনিৰ অধীনত চাৰিটা উৎকৃষ্টতাৰ কেন্দ্ৰ স্থাপন, ড্ৰোন ব্যৱহাৰেৰে স্বাস্থ্য সেৱা সম্প্ৰসাৰণ, ঋষিকেশত এইমছত হেলিকপ্টাৰ সেৱাৰ কথা উল্লেখ কৰে। নতুন দিল্লী আৰু এইমছ, বিলাসপুৰত নতুন আন্তঃগাঁথনি, দেশৰ আন পাঁচটা এইমছৰ সেৱা সম্প্ৰসাৰণ, চিকিৎসা মহাবিদ্যালয় স্থাপন, নাৰ্চিং মহাবিদ্যালয়ৰ লোকাৰ্পণ আৰু স্বাস্থ্য খণ্ডৰ সৈতে জড়িত অন্যান্য প্ৰকল্পৰ কথা উল্লেখ কৰে। প্ৰধানমন্ত্ৰীয়ে শ্ৰমিকৰ চিকিৎসাৰ বাবে কিছু চিকিৎসালয় স্থাপন কৰাত সুখ প্ৰকাশ কৰে আৰু কয় যে এইবোৰ শ্ৰমিকৰ চিকিৎসাৰ কেন্দ্ৰ হৈ পৰিব। তেওঁ ফাৰ্মা ইউনিটৰ উদ্বোধনী সন্দৰ্ভতো ভাষণ দিয়ে, যিয়ে উন্নত ঔষধ আৰু উচ্চমানৰ ষ্টেণ্ট আৰু ইমপ্লাণ্ট নিৰ্মাণত গুৰুত্বপূৰ্ণ ভূমিকা পালন কৰিব আৰু ভাৰতৰ বৃদ্ধিৰ ক্ষেত্ৰত সহায় কৰিব।

প্ৰধানমন্ত্ৰীয়ে কয় যে আমাৰ বেছিভাগেই এনে পটভূমিৰ পৰা আহিছে য’ত অসুস্থতাৰ অৰ্থ হ’ল সমগ্ৰ পৰিয়ালটোৰ ওপৰত বজ্ৰপাত পৰা আৰু বিশেষকৈ দুখীয়া পৰিয়ালত যদি কোনোবাই গুৰুতৰ বেমাৰত ভুগিছে, তেন্তে তেওঁৰ পৰিয়ালৰ প্ৰতিজন সদস্যই ইয়াৰ দ্বাৰা বেয়াকৈ প্ৰভাৱিত হয়। তেওঁ কয় যে এটা সময় আছিল, যেতিয়া মানুহে চিকিৎসাৰ বাবে নিজৰ ঘৰ, মাটি, গহনা, সকলো বিক্ৰী কৰিছিল আৰু নিজৰ পকেটৰ পৰা বিশাল খৰচ বহন কৰিব পৰা নাছিল, আনহাতে দৰিদ্ৰ লোকে স্বাস্থ্যসেৱা আৰু অন্যান্য পৰিয়ালৰ অগ্ৰাধিকাৰৰ মাজৰ পৰা এটা বাছি ল’বলগীয়া হৈছিল। শ্ৰী মোদীয়ে জোৰ দি কয় যে দুখীয়াৰ হতাশা দূৰ কৰিবলৈ আমাৰ চৰকাৰে আয়ুষ্মান ভাৰত আঁচনি আৰম্ভ কৰিলে, যাৰ অধীনত চৰকাৰে দুখীয়াৰ চিকিৎসালয়ত ভৰ্তি হোৱাৰ ৫ লাখ টকা পৰ্যন্ত খৰচ বহন কৰিব। প্ৰধানমন্ত্ৰীয়ে সন্তুষ্টি প্ৰকাশ কৰে যে দেশৰ প্ৰায় ৪ কোটি দৰিদ্ৰ লোকে আয়ুষ্মান যোজনাৰ সুবিধা পাইছে আৰু তেওঁলোকে এটকাও খৰচ নকৰাকৈ চিকিৎসা লাভ কৰিছে। শ্ৰী মোদীয়ে কয় যে যেতিয়া তেওঁ দেশৰ বিভিন্ন ৰাজ্যত আয়ুষ্মান আঁচনিৰ হিতাধিকাৰীসকলক সাক্ষাৎ কৰে তেতিয়া তেওঁৰ সন্তুষ্টি হয় যে এই আঁচনিখন ইয়াৰ সৈতে জড়িত প্ৰতিজন লোকৰ বাবে বৰদান, লাগে তেওঁ চিকিৎসক হওক বা পেৰামেডিকেল কৰ্মচাৰী।

শ্ৰী মোদীয়ে আয়ুষ্মান যোজনাৰ সম্প্ৰসাৰণক লৈ সন্তুষ্টি প্ৰকাশ কৰি কয় যে প্ৰতিজন জ্যেষ্ঠ ব্যক্তি এই আঁচনিৰ বাবে আগ্ৰহী আৰু তৃতীয়বাৰৰ বাবে নিৰ্বাচিত হ’লে ৭০ বছৰৰ ওপৰৰ সকলো জ্যেষ্ঠ লোকক আয়ুষ্মান যোজনাৰ অধীনলৈ অনাৰ নিৰ্বাচনী নিশ্চয়তা পূৰণ হৈ আছে। তেওঁ কয় যে দেশত ৭০ বছৰৰ ওপৰৰ প্ৰতিজন জ্যেষ্ঠ ব্যক্তিয়ে আয়ুষ্মান ৱয় বন্দনা কাৰ্ডৰ জৰিয়তে চিকিৎসালয়ত বিনামূলীয়া চিকিৎসা লাভ কৰিব। শ্ৰী মোদীয়ে কয় যে এই কাৰ্ডখন সাৰ্বজনীন আৰু ইয়াত কোনো আয়ৰ সীমা নাই, লাগে তেওঁ দুখীয়া হওক বা মধ্যবিত্তীয় হওক বা উচ্চ শ্ৰেণীৰ হওক। এই আঁচনিখনে সাৰ্বজনীন কভাৰেজৰ বাবে এক মাইলৰ খুঁটি হিচাপে প্ৰমাণিত হ’ব বুলি অৱগত কৰি শ্ৰী মোদীয়ে কয় যে আয়ুষ্মান ৱয় বন্দনা কাৰ্ডে ঘৰত থকা জ্যেষ্ঠসকলৰ বাবে পকেটৰ পৰা হ’বলগীয়া খৰচ বহু পৰিমাণে হ্ৰাস কৰিব। তেওঁ এই আঁচনিৰ বাবে সকলো দেশবাসীক অভিনন্দন জনায় আৰু লগতে কয় যে এই আঁচনি দিল্লী আৰু পশ্চিম বংগত ৰূপায়ণ কৰা হোৱা নাই।

দৰিদ্ৰ আৰু মধ্যবিত্ত শ্ৰেণীৰ চিকিৎসাৰ খৰচ হ্ৰাস কৰাত চৰকাৰৰ অগ্ৰাধিকাৰৰ ওপৰত গুৰুত্ব আৰোপ কৰি প্ৰধানমন্ত্ৰীয়ে উল্লেখ কৰে যে সমগ্ৰ দেশতে ১৪ হাজাৰৰো অধিক প্ৰধানমন্ত্ৰী জন ঔষধি কেন্দ্ৰ আৰম্ভ কৰা হৈছে, য’ত ৮০ শতাংশ ৰেহাইত ঔষধ উপলব্ধ। তেওঁ কয় যে সুলভ মূল্যৰ ঔষধৰ উপলব্ধতাৰ বাবে দৰিদ্ৰ আৰু মধ্যবিত্ত শ্ৰেণীয়ে ৩০ হাজাৰ কোটি টকা সঞ্চয় কৰাত সফল হৈছে। তেওঁ আৰু কয় যে ষ্টেণ্ট আৰু আঁঠু ইমপ্লাণ্টৰ দৰে যন্ত্ৰৰ ব্যয় হ্ৰাস কৰা হৈছে, যাৰ ফলত সাধাৰণ নাগৰিকৰ হ’বলগীয়া ৮০ হাজাৰ কোটি টকাতকৈ অধিক লোকচান ৰোধ কৰিব পৰা গৈছে। তেওঁ মাৰাত্মক ৰোগ প্ৰতিৰোধৰ লগতে গৰ্ভৱতী মহিলা আৰু নৱজাত শিশুৰ জীৱন ৰক্ষাৰ বাবে বিনামূলীয়া ডায়েলাইছিছ আঁচনি আৰু মিছন ইন্দ্ৰধনুষ অভিযানৰ কথাও উল্লেখ কৰে। প্ৰধানমন্ত্ৰীয়ে আশ্বাস দিয়ে যে যেতিয়ালৈকে দেশৰ দৰিদ্ৰ আৰু মধ্যবিত্ত শ্ৰেণীয়ে ব্যয়বহুল চিকিৎসাৰ বোজাৰ পৰা মুক্তি নাপায় তেতিয়ালৈকে তেওঁ শান্তিৰে বহি নাথাকে।

প্ৰধানমন্ত্ৰীয়ে ৰোগৰ লগত জড়িত বিপদ আৰু অসুবিধা হ্ৰাস কৰিবলৈ সময়মতে ৰোগ নিৰ্ণয়ৰ গুৰুত্বৰ ওপৰত গুৰুত্ব আৰোপ কৰে। তেওঁ জোৰ দি কয় যে আগতীয়াকৈ ৰোগ নিৰ্ণয় আৰু চিকিৎসাৰ সুবিধাৰ বাবে সমগ্ৰ দেশতে দুই লাখৰো অধিক আয়ুষ্মান আৰোগ্য মন্দিৰ স্থাপন কৰা হৈছে। তেওঁ কয় যে এই স্বাস্থ্য মন্দিৰসমূহে কোটি কোটি নাগৰিকক কেন্সাৰ, উচ্চ ৰক্তচাপ, মধুমেহৰ দৰে ৰোগৰ বাবে সহজে নিজকে পৰীক্ষা কৰিবলৈ সক্ষম কৰে। তেওঁ কয় যে সময়মতে ৰোগ নিৰ্ণয় কৰিলে তৎকালীন চিকিৎসাৰ সুবিধা হয়, যাৰ ফলত শেষত ৰোগীসকলৰ খৰচ ৰাহি হয়। প্ৰধানমন্ত্ৰীয়ে আঙুলিয়াই দিয়ে যে চৰকাৰে ই-সঞ্জীৱ আঁচনিৰ অধীনত স্বাস্থ্যসেৱা বৃদ্ধি আৰু নাগৰিকৰ বাবে ধন সঞ্চয়ৰ বাবে প্ৰযুক্তি ব্যৱহাৰ কৰি আছে, য’ত ৩০ কোটিৰো অধিক লোকে অনলাইনযোগে চিকিৎসকৰ পৰামৰ্শ লৈছে। তেওঁ কয়, “চিকিৎসকৰ বিনামূলীয়া আৰু সঠিক পৰামৰ্শৰ ফলত স্বাস্থ্যসেৱাৰ খৰচ বহু পৰিমাণে হ্ৰাস পাইছে।” শ্ৰী মোদীয়ে ইউ-ৱিন প্লেটফৰ্ম মুকলি কৰাৰ কথা ঘোষণা কৰে, যিয়ে ভাৰতক স্বাস্থ্য খণ্ডত প্ৰযুক্তিৰ ক্ষেত্ৰত এক উন্নত আন্তঃপৃষ্ঠ প্ৰদান কৰিব। তেওঁ কয়, “বিশ্বই মহামাৰীৰ সময়ত আমাৰ কো-উইন প্লেটফৰ্মৰ সফলতা দেখিছে আৰু ইউপিআই পেমেণ্ট ব্যৱস্থাৰ সফলতা বিশ্বব্যাপী কাহিনীত পৰিণত হৈছে।” তেওঁ কয় যে ভাৰতৰ লক্ষ্য হৈছে ডিজিটেল ৰাজহুৱা আন্তঃগাঁথনিৰ জৰিয়তে স্বাস্থ্যসেৱা খণ্ডত এই সফলতাক পুনৰ কাৰ্যকৰী কৰা।

বিগত ছয়-সাত দশকত অৰ্জন কৰা সীমিত সফলতাৰ বিপৰীতে যোৱা দশকত ভাৰতৰ স্বাস্থ্য খণ্ডত অভূতপূৰ্ব অগ্ৰগতিৰ ওপৰত আলোকপাত কৰি প্ৰধানমন্ত্ৰীয়ে কয়, “যোৱা ১০ বছৰত, আমি অভিলেখ সংখ্যক নতুন এইমছ আৰু মেডিকেল কলেজ স্থাপন কৰিছোঁ।" আজিৰ কাৰ্যসূচীৰ কথা উল্লেখ কৰি প্ৰধানমন্ত্ৰীয়ে কয় যে কৰ্ণাটক, উত্তৰ প্ৰদেশ, মধ্যপ্ৰদেশ আৰু অন্ধ্ৰপ্ৰদেশত চিকিৎসালয় উদ্বোধন কৰা হয়। তেওঁ কৰ্ণাটকৰ নৰসপুৰ আৰু বোম্মাচন্দ্ৰ, মধ্যপ্ৰদেশৰ পিঠামপুৰ, অন্ধ্ৰপ্ৰদেশৰ অচিতাপুৰম আৰু হাৰিয়ানাৰ ফৰিদাবাদত নতুন চিকিৎসা মহাবিদ্যালয়ৰ আধাৰশিলাৰ কথাও উল্লেখ কৰে। তেওঁ কয়, “ইয়াৰ উপৰিও উত্তৰ প্ৰদেশৰ মীৰুটত এখন নতুন ইএছআইচি চিকিৎসালয়ৰ কাম আৰম্ভ হৈছে আৰু ইন্দোৰত এখন নতুন চিকিৎসালয় উদ্বোধন কৰা হৈছে।” প্ৰধানমন্ত্ৰীয়ে গুৰুত্ব আৰোপ কৰে যে চিকিৎসালয়ৰ সংখ্যা বৃদ্ধিয়ে চিকিৎসাৰ আসনৰ সমানুপাতিক বৃদ্ধিৰ প্ৰতিফলন ঘটায়। তেওঁ দৃঢ়তাৰে কয় যে কোনো দুখীয়া শিশুৰ চিকিৎসক হোৱাৰ সপোন নাভাগে আৰু কোনো মধ্যবিত্তীয় ছাত্ৰই ভাৰতত বিকল্পৰ অভাৱত বিদেশত অধ্যয়ন কৰিবলৈ বাধ্য নহ’ব। শ্ৰী মোদীয়ে কয় যে যোৱা ১০ বছৰত প্ৰায় ১ লাখ নতুন এমবিবিএছ আৰু এমডি আসন সংযোজন হৈছে আৰু তেওঁ অহা পাঁচ বছৰত আৰু ৭৫ হাজাৰ আসন ঘোষণা কৰাৰ নিজৰ প্ৰতিশ্ৰুতি পুনৰবাৰ উল্লেখ কৰে।

প্ৰধানমন্ত্ৰীয়ে কয় যে দেশত ৭.৫ লাখ পঞ্জীয়নভুক্ত আয়ুষ চিকিৎসকে স্বাস্থ্য সেৱা আগবঢ়াই আছে। তেওঁ এই সংখ্যা আৰু অধিক বৃদ্ধিৰ ওপৰত গুৰুত্ব আৰোপ কৰি ভাৰতত চিকিৎসা আৰু সুস্থতা পৰ্যটনৰ ক্ৰমবৰ্ধমান চাহিদাৰ ওপৰত আলোকপাত কৰে। তেওঁ ভাৰত আৰু বিদেশত প্ৰতিৰোধমূলক হৃদৰোগ, আয়ুৰ্বেদিক অস্থিৰোগ আৰু আয়ুৰ্বেদিক পুনৰ্বাসন কেন্দ্ৰৰ দৰে ক্ষেত্ৰ সম্প্ৰসাৰণৰ বাবে যুৱক-যুৱতী আৰু আয়ুষৰ চিকিৎসকক প্ৰস্তুত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। প্ৰধানমন্ত্ৰীয়ে কয়, "আয়ুষ চিকিৎসকৰ বাবে প্ৰচুৰ সুযোগ সৃষ্টি কৰা হৈছে। এই সুযোগসমূহৰ জৰিয়তে আমাৰ যুৱক-যুৱতীসকলে কেৱল নিজকে আগবঢ়াই নিয়াই নহয়, বৰং মানৱতাৰো মহান সেৱা কৰিব।"

প্ৰধানমন্ত্ৰী মোদীয়ে একবিংশ শতিকাৰ সময়ছোৱাত চিকিৎসা বিজ্ঞানৰ ক্ষেত্ৰখনত পূৰ্বতে দুৰাৰোগ্য ৰোগৰ চিকিৎসাৰ ক্ষেত্ৰত হোৱা অগ্ৰগতিৰ কথা উল্লেখ কৰে। তেওঁ কয়, "বিশ্বই সুস্থতাৰ লগতে চিকিৎসাকো গুৰুত্ব দিয়ে যদিও ভাৰতৰ এই ক্ষেত্ৰত হাজাৰ হাজাৰ বছৰৰ জ্ঞান আছে।" প্ৰধানমন্ত্ৰীয়ে প্ৰকৃতি পৰীক্ষণ অভিযান আৰম্ভ কৰাৰ কথা ঘোষণা কৰে, যাৰ উদ্দেশ্য হৈছে আয়ুৰ্বেদৰ সিদ্ধান্তসমূহৰ প্ৰয়োগ কৰি মানুহৰ বাবে আদৰ্শ জীৱন শৈলী আৰু আশংকাৰ বিশ্লেষণ তৈয়াৰ কৰা। তেওঁ জোৰ দি কয় যে এই পদক্ষেপে বিশ্বজুৰি স্বাস্থ্যসেৱা খণ্ডক পুনৰ সংজ্ঞায়িত কৰিব পাৰে আৰু সমগ্ৰ বিশ্বৰ বাবে এক নতুন দৃষ্টিভংগী প্ৰদান কৰিব পাৰে।

প্ৰধানমন্ত্ৰী মোদীয়ে উচ্চ প্ৰভাৱৰ বৈজ্ঞানিক অধ্যয়নৰ জৰিয়তে অশ্বগন্ধা, হালধি আৰু জালুকৰ দৰে পৰম্পৰাগত বনৌষধিক মান্যতা দিয়াৰ গুৰুত্বৰ ওপৰত জোৰ দিয়ে। তেওঁ কয়, “আমাৰ পৰম্পৰাগত স্বাস্থ্যসেৱা ব্যৱস্থাৰ পৰীক্ষাগাৰৰ বৈধকৰণে এই বনৌষধিসমূহৰ মূল্য বৃদ্ধি কৰাই নহয়, এক উল্লেখযোগ্য বজাৰো সৃষ্টি কৰিব। তেওঁ অশ্বগন্ধাৰ চাহিদা বৃদ্ধি পোৱাৰ কথা উল্লেখ কৰে, যিটো এই দশকৰ শেষলৈকে ২.৫ বিলিয়ন ডলাৰ হ’ব বুলি অনুমান কৰা হৈছে।

আয়ুষৰ সফলতাই কেৱল স্বাস্থ্য খণ্ডই নহয় অৰ্থনীতিকো ৰূপান্তৰিত কৰা বুলি জোৰ দি প্ৰধানমন্ত্ৰীয়ে কয় যে আয়ুষৰ সামগ্ৰী খণ্ড ২০১৪ চনত ৩ বিলিয়ন ডলাৰৰ পৰা বৰ্তমান প্ৰায় ২৪ বিলিয়ন ডলাৰলৈ বৃদ্ধি পাইছে, যি মাত্ৰ ১০ বছৰত আঠগুণ বৃদ্ধি হৈছে। তেওঁ কয় যে বৰ্তমান ভাৰতত ৯০০ৰো অধিক আয়ুষ ষ্টাৰ্ট-আপে কাম কৰি আছে, যিয়ে যুৱক-যুৱতীসকলৰ বাবে নতুন সুযোগৰ সৃষ্টি কৰিছে। প্ৰধানমন্ত্ৰীয়ে ১৫০খন দেশলৈ আয়ুষৰ সামগ্ৰীৰ বিশ্বব্যাপী ৰপ্তানিৰ ওপৰত আলোকপাত কৰে, যিয়ে স্থানীয় বনৌষধি আৰু ছুপাৰফুডক বিশ্বব্যাপী সামগ্ৰীলৈ ৰূপান্তৰিত কৰি ভাৰতীয় কৃষকসকলক উপকৃত কৰিছে। তেওঁ গংগা নদীৰ পাৰত প্ৰাকৃতিক কৃষি আৰু বনৌষধি খেতিৰ প্ৰসাৰ ঘটোৱা নমামি গংগা প্ৰকল্পৰ দৰে পদক্ষেপৰ কথাও আঙুলিয়াই দিয়ে।

স্বাস্থ্য আৰু সুস্থতাৰ প্ৰতি ভাৰতৰ দায়বদ্ধতাৰ কথা উল্লেখ কৰি মোদীয়ে কয় যে ই ভাৰতৰ ৰাষ্ট্ৰীয় চৰিত্ৰ আৰু সামাজিক তন্ত্ৰৰ আত্মা। তেওঁ জোৰ দি কয় যে যোৱা ১০ বছৰত চৰকাৰে দেশৰ নীতিসমূহক ‘সব কা সাথ, সবকা বিকাশ’ৰ দৰ্শনৰ সৈতে মিলাইছে। মোদীয়ে সামৰণি মাৰে, “এই প্ৰচেষ্টাসমূহে অহা ২৫ বছৰত এখন উন্নত আৰু সুস্থ ভাৰতৰ বাবে এক শক্তিশালী ভেটি স্থাপন কৰিব।”

এই উপলক্ষে কেন্দ্ৰীয় স্বাস্থ্য আৰু পৰিয়াল কল্যাণ তথা ৰসায়ন আৰু সাৰ মন্ত্ৰী শ্ৰীযুত জে পি নাড্ডা, শ্ৰম আৰু নিয়োগ তথা যুৱ পৰিক্ৰমা আৰু ক্ৰীড়া মন্ত্ৰী ড° মনসুখ মাণ্ডবিয়াকে ধৰি অন্যান্য বিশিষ্ট ব্যক্তিসকল উপস্থিত আছিল।

পৃষ্ঠভূমি

ফ্লেগশ্বিপ আঁচনি আয়ুষ্মান ভাৰত প্ৰধানমন্ত্ৰী জন আৰোগ্য যোজনা (PM-JAY)ত ডাঙৰ অৱদান আগবঢ়াই প্ৰধানমন্ত্ৰীয়ে ৭০ বছৰ আৰু তাতকৈ অধিক বয়সৰ সকলো জ্যেষ্ঠ নাগৰিককে স্বাস্থ্য আৱৰণ প্ৰদানৰ ব্যৱস্থা আৰম্ভ কৰিছে। ইয়াৰ দ্বাৰা সকলো জ্যেষ্ঠ নাগৰিকক তেওঁলোকৰ আয় যিয়েই নহওক কিয় স্বাস্থ্য আৱৰণ প্ৰদান কৰাত সহায়ক হ’ব।

সমগ্ৰ দেশতে গুণগত স্বাস্থ্য সেৱা প্ৰদানৰ বাবে প্ৰধানমন্ত্ৰীয়ে অহৰহ প্ৰচেষ্টা চলাই আহিছে। স্বাস্থ্যসেৱাৰ আন্তঃগাঁথনিৰ ব্যাপক উত্থানৰ অংশ হিচাপে প্ৰধানমন্ত্ৰীয়ে কেইবাটাও স্বাস্থ্যসেৱা প্ৰতিষ্ঠানৰ উদ্বোধন আৰু আধাৰশিলা স্থাপন কৰে।

প্ৰধানমন্ত্ৰীয়ে ভাৰতৰ প্ৰথমটো অল ইণ্ডিয়া ইনষ্টিটিউট অৱ আয়ুৰ্বেদৰ দ্বিতীয় পৰ্যায়ৰ উদ্বোধন কৰে। ইয়াৰ ভিতৰত আছে এখন পঞ্চকৰ্ম চিকিৎসালয়, ঔষধ নিৰ্মাণৰ বাবে এখন আয়ুৰ্বেদিক ফাৰ্মাচী, এটা ক্ৰীড়া চিকিৎসা ইউনিট, এটা কেন্দ্ৰীয় পুথিভঁৰাল, এটা আ টি আৰু ষ্টাৰ্ট-আপ ইনকিউবেচন চেণ্টাৰ আৰু এটা ৫০০ আসনৰ প্ৰেক্ষাগৃহ। তদুপৰি তেওঁ মধ্যপ্ৰদেশৰ মন্দসৌৰ, নিমুচ আৰু ছিওনীত তিনিখন চিকিৎসা মহাবিদ্যালয় উদ্বোধন কৰে। তেওঁ হিমাচল প্ৰদেশৰ বিলাসপুৰ, পশ্চিম বংগৰ কল্যাণী, বিহাৰৰ পাটনা, উত্তৰ প্ৰদেশৰ গোৰখপুৰ, মধ্যপ্ৰদেশৰ ভোপাল, অসমৰ গুৱাহাটী আৰু নতুন দিল্লীৰ এইমছত বিভিন্ন সা-সুবিধা আৰু সেৱাৰ সম্প্ৰসাৰণ আৰু উদ্বোধন কৰে, য'ত এটা জন ঔষধি কেন্দ্ৰও অন্তৰ্ভুক্ত আছে। প্ৰধানমন্ত্ৰীয়ে ছত্তীশগড়ৰ বিলাসপুৰৰ চৰকাৰী চিকিৎসা মহাবিদ্যালয়ত এটা ছুপাৰ স্পেচিয়েলিটি ব্লক আৰু ওড়িশাৰ বৰগড়ত এটা ক্রিটিকেল কেয়াৰ ব্লক উদ্বোধন কৰে।

প্ৰধানমন্ত্ৰীয়ে মধ্যপ্ৰদেশৰ শিৱপুৰী, ৰাতলাম, খাণ্ডৱা, ৰাজগড় আৰু মন্দসৌৰত পাঁচখন নাৰ্চিং কলেজ, আয়ুষ্মান ভাৰত স্বাস্থ্য আন্তঃগাঁথনি অভিযান (পিএম-এবিএইচআইএম)ৰ অধীনত হিমাচল প্ৰদেশ, কৰ্ণাটক, মণিপুৰ, তামিলনাডু আৰু ৰাজস্থানত ২১টা ক্ৰিটিকেল কেয়াৰ ব্লক আৰু নতুন দিল্লী আৰু হিমাচল প্ৰদেশৰ বিলাসপুৰত অৱস্থিত এইমছত বহুতো সুবিধা আৰু সেৱা সম্প্ৰসাৰণৰ আধাৰশিলাও স্থাপন কৰে।

প্ৰধানমন্ত্ৰীয়ে মধ্যপ্ৰদেশৰ ইন্দোৰত ইএছআইচি হাস্পতাল উদ্বোধন কৰাৰ লগতে হাৰিয়ানাৰ ফৰিদাবাদ, কৰ্ণাটকৰ বোম্মাচন্দ্ৰ আৰু নৰছাপুৰ, মধ্যপ্ৰদেশৰ ইন্দোৰ, উত্তৰ প্ৰদেশৰ মেৰুট আৰু অন্ধ্ৰপ্ৰদেশৰ অচুতাপুৰমত ইএছআইচি চিকিৎসালয়ৰ আধাৰশিলা স্থাপন কৰে। এই আঁচনিসমূহৰ পৰা প্ৰায় ৫৫ লাখ ইএছআই হিতাধিকাৰীয়ে স্বাস্থ্য সম্পৰ্কীয় সুবিধা লাভ কৰিব।

প্ৰধানমন্ত্ৰীয়ে বিভিন্ন খণ্ডত সেৱা প্ৰদান বৃদ্ধিৰ বাবে প্ৰযুক্তিৰ ব্যৱহাৰ বৃদ্ধিৰ প্ৰবল পোষকতা কৰি আহিছে। স্বাস্থ্যসেৱাক অধিক সুলভ কৰি তোলা আৰু সেৱা প্ৰদান বৃদ্ধিৰ বাবে ড্ৰ’ন প্ৰযুক্তিৰ এক অভিনৱ ব্যৱহাৰত প্ৰধানমন্ত্ৰীয়ে ১১টা তৃতীয় পৰ্যায়ৰ স্বাস্থ্যসেৱা প্ৰতিষ্ঠানত ড্ৰ’ন সেৱা আৰম্ভ কৰে। সেইবোৰ হ’ল উত্তৰাখণ্ডৰ এইমছ ঋষিকেশ, তেলেংগানাৰ এইমছ বিবিনগৰ, অসমৰ এইমছ গুৱাহাটী, মধ্যপ্ৰদেশৰ এইমছ ভোপাল, ৰাজস্থানৰ এইমছ যোধপুৰ, বিহাৰৰ এইমছ পাটনা, হিমাচল প্ৰদেশৰ এইমছ বিলাসপুৰ, উত্তৰ প্ৰদেশৰ এইমছ ৰায়ে বাৰেলী, ছত্তিশগড়ৰ এইমছ ৰায়পুৰ , অন্ধ্ৰ প্ৰদেশৰ এইমছ মংগলাগিৰি আৰু মণিপুৰৰ ৰিমছ ইম্ফল। তেওঁ দ্ৰুত চিকিৎসা সেৱা প্ৰদান কৰাত সহায়ৰ বাবে ঋষিকেশৰ এইমছ হাস্পতালৰ পৰা হেলিকপ্টাৰেৰে জৰুৰীকালীন চিকিৎসা সেৱাও আৰম্ভ কৰে।

প্ৰধানমন্ত্ৰীয়ে মুকলি কৰিলে U-WIN পৰ্টেল। ই টীকাকৰণ প্ৰক্ৰিয়া সম্পূৰ্ণৰূপে ডিজিটেল কৰি গৰ্ভৱতী মহিলা আৰু কেঁচুৱাক উপকৃত কৰিব। ইয়াৰ দ্বাৰা গৰ্ভৱতী মহিলা আৰু শিশু (জন্মৰ পৰা ১৬ বছৰলৈকে) ১২টা ভেকচিন-প্ৰতিৰোধযোগ্য ৰোগৰ বিৰুদ্ধে জীৱন ৰক্ষাকাৰী ভেকচিন সময়মতে প্ৰদান কৰাটো নিশ্চিত কৰিব। ইয়াৰ উপৰিও প্ৰধানমন্ত্ৰীয়ে মিত্ৰ আৰু স্বাস্থ্যসেৱা পেছাদাৰী আৰু প্ৰতিষ্ঠানসমূহৰ বাবেও এটা পৰ্টেল মুকলি কৰে। ই বৰ্তমানৰ স্বাস্থ্যসেৱা পেছাদাৰী আৰু সংস্থাসমূহৰ কেন্দ্ৰীভূত তথ্যকোষ হিচাপে কাম কৰিব।

দেশৰ স্বাস্থ্যসেৱাৰ পৰিৱেশ তন্ত্ৰৰ উন্নতিৰ বাবে অনুসন্ধান আৰু বিকাশ আৰু পৰীক্ষণ আন্তঃগাঁথনি শক্তিশালী কৰাৰ বাবে প্ৰধানমন্ত্ৰীয়ে কেইবাটাও পদক্ষেপ আৰম্ভ কৰে। প্ৰধানমন্ত্ৰীয়ে ওড়িশাৰ ভুৱনেশ্বৰৰ গোঠাপট্নাত কেন্দ্ৰীয় ঔষধ পৰীক্ষণ পৰীক্ষাগাৰ উদ্বোধন কৰে।

তেওঁ ওড়িশাৰ খোৰ্ধা আৰু ছত্তীশগড়ৰ ৰায়পুৰত যোগ আৰু প্ৰাকৃতিক চিকিৎসাৰ দুটা কেন্দ্ৰীয় গৱেষণা প্ৰতিষ্ঠানৰ আধাৰশিলা স্থাপন কৰে। চিকিৎসা সঁজুলিৰ বাবে গুজৰাটৰ NIPER আহমেদাবাদ, বাল্ক ঔষধৰ বাবে তেলেংগানাৰ এনআইপিইআৰ হায়দৰাবাদ, ফাইটোফাৰ্মাচিউটিকেলৰ বাবে অসমৰ NIPER গুৱাহাটী আৰু এন্টি-বেক্টেৰিয়েল এন্টি ভাইৰেল ঔষধ আৱিষ্কাৰ আৰু বিকাশৰ বাবে পঞ্জাৱৰ NIPER Mohaliত চাৰিটা চেণ্টাৰ অৱ এক্সেলেন্সৰ আধাৰশিলাও স্থাপন কৰে।

প্ৰধানমন্ত্ৰীয়ে চাৰিটা আয়ুষ উৎকৃষ্টতা কেন্দ্ৰৰ শুভাৰম্ভ কৰে, য’ত বেংগালুৰুত ডায়েবেটিছ আৰু মেটাবলিক ডিছঅৰ্ডাৰৰ বাবে উৎকৃষ্টতা কেন্দ্ৰ, আইআইটি দিল্লীত উদ্ভাৱনী প্ৰযুক্তিগত সমাধান, ষ্টাৰ্ট-আপ সহায় আৰু নেট জিৰ’ স্থায়ী সমাধানৰ বাবে দীৰ্ঘস্থায়ী আয়ুষ উৎকৃষ্টতা কেন্দ্ৰ; কেন্দ্ৰীয় ঔষধ গৱেষণা প্ৰতিষ্ঠান, লক্ষ্ণৌত আয়ুৰ্বেদত মৌলিক আৰু পৰিৱৰ্তনশীল গৱেষণাৰ বাবে উৎকৃষ্টতা কেন্দ্ৰ আৰু নতুন দিল্লীৰ জেএনইউত আয়ুৰ্বেদ আৰু ব্যৱস্থা চিকিৎসাৰ ওপৰত উৎকৃষ্টতা কেন্দ্ৰ অন্তৰ্ভুক্ত।

স্বাস্থ্যসেৱা খণ্ডত মেক ইন ইণ্ডিয়াৰ পদক্ষেপক জোৰ দি প্ৰধানমন্ত্ৰীয়ে গুজৰাটৰ ভাপি, তেলেংগানাৰ হায়দৰাবাদ, কৰ্ণাটকৰ বেংগালুৰু, অন্ধ্ৰপ্ৰদেশৰ কাকিনাডা আৰু হিমাচল প্ৰদেশৰ নালাগড়ত চিকিৎসা সঁজুলি আৰু বাল্ক ঔষধৰ বাবে প্ৰডাকচন লিংকড ইনচেণ্টিভ (পিএলআই) আঁচনিৰ অধীনত ৫টা প্ৰকল্প উদ্বোধন কৰে। এই ইউনিটসমূহে গুৰুত্বপূৰ্ণ বাল্ক ঔষধৰ লগতে বডি ইমপ্লাণ্ট আৰু ক্ৰিটিকেল কেয়াৰ সঁজুলিৰ দৰে গুৰুত্বপূৰ্ণ চিকিৎসা সঁজুলি নিৰ্মাণ কৰিব।

প্ৰধানমন্ত্ৰীয়ে নাগৰিকসকলৰ মাজত স্বাস্থ্য সজাগতা সৃষ্টি কৰাৰ লক্ষ্যৰে এক দেশজোৰা অভিযান “দেশ কা প্ৰকৃতি পৰীক্ষণ অভিযান”ও আৰম্ভ কৰে। যাৰ উদ্দেশ্য হৈছে নাগৰিকৰ মাজত স্বাস্থ্যৰ প্ৰতি সজাগতা বঢ়োৱা। তেওঁ প্ৰতিখন ৰাজ্য আৰু কেন্দ্ৰীয় শাসিত প্ৰদেশৰ বাবে জলবায়ু পৰিৱৰ্তন আৰু মানৱ স্বাস্থ্যৰ ওপৰত ৰাজ্য নিৰ্দিষ্ট কাৰ্য পৰিকল্পনাও আৰম্ভ কৰে, যিয়ে জলবায়ু পৰিৱৰ্তনৰ অনুকূল স্বাস্থ্য সেৱা বিকাশৰ বাবে ৰণনীতি প্ৰস্তুত কৰিব।

**********

MJPS/SR/TS