প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা উত্তর প্রদেসকী বারানসীদা আর.জে সঙ্করা আই হোস্পিতাল শঙ্গাখ্রে
হোস্পিতাল অসিনা বারানসী অমসুং লমদম অসিগী মীওই কয়া অমম্বা কোকহল্লগনি, মখোয় মঙাল ফংহল্লগনি: প্রধান মন্ত্রী
উত্তর প্রদেসকী পুর্বাঞ্চলদা হৌজিক কাসি হকশেল অমসুং অনা-লায়েংগী অচৌবা মফম অমা ওইরক্লে: প্রধান মন্ত্রী
ঙসিদি, ভারতকী হকশেলগী য়ুম্বী মঙা লৈরে- মাঙজৌননা ঙাকথোক্নবা থবকশিং, লায়নাশিং মতম চানা খঙদোকপা, লেম্না অমসুং শেন য়াম্না চঙদনা লায়েংবা, অপীকপা সহরশিংদা অফবা লায়েং ফংহনবা অমসুং অনা-লায়েংগী তেক্নোলোজি পাকথোক-চাউথোকহনবা: প্রধান মন্ত্রী
Posted On:
20 OCT 2024 5:24PM by PIB Imphal
ঙসি প্রধান মন্ত্রী শ্রী নরেন্দ্র মোদীনা উত্তর প্রদেসকী বারানসীদা আর.জে সঙ্করা আই হোস্পিতাল শঙ্গাখ্রে। হোস্পিতাল অসিদা তোঙান-তোঙানবা মীৎকী অনাবশিং লায়েংবগী খুদোংচাবশিং পীরি। থৌরম অদুদা শ্রী মোদীনা একজিবিসন অমশু য়েংখি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি মদুদি শেংলবা মতম অসি অফবা থবক পাংথোক্নবগী খুদোংচাবা অমনি। থৌরম অসিদা কাসিগী মীয়াম, সাধুশিং অমসুং মীয়ামগী য়াইফনবা থবক তৌবা মীওইশিং শরুক য়ারি অমসুং মহাক্না দর্সন পাংথোকখ্রে অমসুং প্রাসাদম ফংলে অমসুং পরাম পুজ্যা সঙ্করাচার্য়াগী থৌজাল ফংলে। ঙসি কাসি অমসুং উত্তরচালদা অতোপ্পা অনৌবা হোস্পিতাল অমা ফংলে। ভগবান সঙ্করগী লমদম অসিদা আর.জে সঙ্করা আই হোস্পিতাল কৎথোক্লে।
ভারতকী অরিবা লাইরিকশিংদা পনখিবা ৱাহৈ অমা লৌখৎলদুনা, প্রধান মন্ত্রীনা হায়খি আর.জে সঙ্করা আই হোস্পিতালনা বারানসী অমসুং লমদম অসিগী মীওই কয়া অমম্বা কোকহল্লগনি, মখোয় মঙাল ফংহল্লগনি। মহাক আই হোস্পিতালনা অসি য়েংলে অমসুং মসি অধ্যতিক অমসুং অনৌবা অনি পুনশিনবনি হায়না মহাক্না পুক্নিংদা ফাওখি অমসুং হোস্পিতালনা অসিনা অহল অমসুং নহারোল অনিমক মীৎ উবা ঙম্নবা সেবা তৌগনি। হোস্পিতাল অসিদা মশিং য়াম্লবা লায়রবা মীওইশিং লেম্না লায়েংবগী খুদোংচাবা ফংগনি। আই হোস্পিতালনা অসিনা নহারোল কয়াদা থবক ফংহনগনি অমসুং সপোর্ত স্তাফশিং থবক ফংহনবগা লোয়ননা মেদিকেলগী মহৈরোয়শিংদা ইন্তর্নসিপকী খুদোংচাবশিং ফংহল্লগনি।
প্রধান মন্ত্রীনা হায়খি মহাক্না গুজরাতকী চীফ মিনিস্তর ওইরিঙৈদা সঙ্করা আই হোস্পিতালগা থবক কয়া পাংথোকখি অমসুং শ্রী সঙ্করা বিজায়েন্দ্র সরশ্বাতিগী গুরু শরুক য়াবা থৌরম অমদা সঙ্করা আই হোস্পিতালনা শঙ্গারে। শ্রী কানচি কমাকোতি পীথাদিপতি, জগদগুরু সঙ্করাচার্য়া চন্দ্রসেখারেন্দ্র সরশ্বতি শ্বামীগালগী থৌজাল ফংবা অসিদা অপেনবা পোক্লে। পরাম পুজ্যা জগদগুরু শ্রী জয়েন্দ্র সরশ্বতিগী লমজিং মখাদা থবক কয়া মাইপাক্না পাংথোক্লে। তোঙান-তোঙানবা চৎনবী অহুমগী গুরুশিংগা লোয়ননবা ফংবা অসি মহাক মশাগী ওইনা অপেনবা অমনি। থৌরম অসিদা থৌজাল পীবগীদমক প্রধান মন্ত্রীনা শ্রী সঙ্করা বিজায়েন্দ্র সরশ্বতি থাগৎপা ফোঙদোকখি অমসুং বারানসী মীয়ামগী মীহুৎ ওইনা মহাক তরাম্না ওকখি।
প্রধান মন্ত্রী মোদীনা শক্নাইরবা ওন্ত্রেপ্রেন্যুয়র, লৈখিদ্রবা শ্রী রাকেস ঝুনঝুনৱালাগী থবকশিং নিংশিংখি। শ্রী ঝুনঝুনৱালাগী থবকশিং মখা চৎথবগীদমক মহাক্না লৈখিদ্রবগী লোয়নবী শ্রীমতি রেখা ঝুনঝুনৱালা থাগৎপা ফোঙদোকখি। বারানসীদা মখোয়গী হোস্পিতালশিং লিংখৎনবা সঙ্করা আই হোস্পিতাল অমসুং চিত্রাকুতি আই হোস্পিতাল অনিমক্তা মহাক্না হায়জখিবা অদু প্রধান মন্ত্রীনা পনখি। মহাক্না হায়খি কাসিগী মীয়ামগীদমক হায়জখিবা অদু থবক ওইনা পাংথোকপগীদমক হোস্পিতাল অনিমক থাগৎপা ফোঙদোকচরি। মমাঙদা মহাক্কী পর্লিয়ামেন্তরি কেন্দ্রদগী মীওই লিশিং কয়া চিত্রাকুত আই হোস্পিতালদা লায়েংখি অমসুং হৌজিক বারানসীদা মখোয়না য়ৌবা ঙম্বা মনুংদা অনৌবা আই হোস্পিতাল অনি লৈরে।
প্রধান মন্ত্রীনা হায়খি মদুদি নিংশিংবা থোক্ত্রিঙৈ মতমদগী, বারানসী অসি লাইনিং অমসুং নাতকী কোনুং ওইনা খঙনরকখি। উত্তর প্রদেসকী পুর্বাঞ্চলদা হৌজিক কাসি হকশেল অমসুং অনা-লায়েংগী অচৌবা মফম অমা ওইরক্লে। মসি বি.ঐচ.য়ু ত্রোমা সেন্তর নত্ত্রগা সুপরস্পিসিএলিতি হোস্পিতাল নত্ত্রগা দীন দয়াল উপাধ্যায় হোস্পিতাল ওইবা য়াই নত্ত্রগা কবির চাউরা হোস্পিতালগী খুদোংচাবশিং ফগৎহনবা নত্ত্রগা অহলশিং, সরকারগী থবক তৌবা মীওইশিংগী অখন্নবা হোস্পিতাল অমা শেমগৎপা নত্ত্রগা মেদিকেল কলেজশিং লিংখৎপা ওইবা য়াই। হৌখিবা চহি ১০ অসিদা অনা-লায়েংগী লমদা থবক কয়া পায়খৎলে। বারানসীদা কেন্সর অনাবশিং লায়েংনবা অনৌবা খুদোংচাবশিং ফংলবা হকশেলগী খুদোংচাবা অমা লৈরে। মমাংদা দিল্লি নত্ত্রগা মুম্বাইদা চৎলম্বা অদু তোক্লগা হৌজিক বারানসীদা অফবা অনা-লায়েংগী খুদোংচাবশিং অনাবশিংনা ফংলে। বিহার, ঝারখন্দ অমসুং অতোপ্পা মফমশিংদগী মীওই লিশিং কয়া বারানসীদা লায়েংনবা লাক্নরে। মতম অমগী “মোক্ষদায়িনী” (লানবীবা ) বারানসী অসি “নবজিবনদায়িনী: (অনৌবা মপোক পোকপীবা) বারানসী অমা অমসুং অনৌবা থৌনা অমসুং খুদোংচাবশিংগী মফম অমা ওইরে। হৌখিবা সরকারশিং পল্লদুনা, শ্রী মোদীনা হায়খি বারানসী য়াওনা পুর্বাঞ্চলদা অনা-লায়েংগী খুদোংচাবশিং মীরাইখি। হৌখিবা চহি ১০গী মমাংদা পুর্বাঞ্চলদা ব্রেন ফেবরগী ব্লোক থাক্কী লায়েংনবা সেন্তরশিং লৈতবদগী অঙাংশিং শিবদগী মেদিদা অচৌবা ৱাথোক ওইনখি। হৌখিবা চহি ১০ অসিদা কাসি খক নত্তনা পুর্বাঞ্চল লমদম শীনবা থুংনা মমাংদা অমুক্ত ওইখিদ্রিবা মওংদা হকশেলগী খুদোংচাবশিং পাকথোক-চাউথোকহল্লে।
মহাক্না হায়খি মদুদি ঙসিদি পুর্বাঞ্চলদা ব্রেন ফেবর লায়েংনবা সেন্তর ১০০ হেন্না লৈরে অমসুং হৌখিবা চহি ১০দা পুর্বাঞ্চলদা প্রাইমারি অমসুং কম্মুনিতি হেল্থ সেন্তরশিংদা অনৌবা ফমুং লিশিং ১০ হেন্না হাপচিনখ্রে। হৌখিবা চহি ১০দা পুর্বাঞ্চলগী খুঙ্গংশিংদা অয়ুস্মান অরোগ্যা মন্দির লিশিং ৫.৫ রোম হেন্না শাখ্রে। হৌখিবা চহি ১০দা পুর্বাঞ্চলগী দিস্ত্রিক হোস্পিতালশিংদা দাইলাইসিসকী খুদোংচাবা অমতা লৈরমদবা অদু হৌজিক দাইলাইসিস য়ুনিত ২০ হেন্না থবক তৌদুনা অনাবশিংদা লেম্না লায়েংবগী খুদোংচাবশিং ফংহল্লে।
প্রধান মন্ত্রীনা হায়খি ২১শুবা চহিচাগী ভারতনা অনা-লায়েংগী লমদা অরিবা ৱাখল্লোন অমসুং থবকশিং থাদোক্লে। ঙসিদি, ভারতকী হকশেলগী য়ুম্বী মঙা লৈরে- মাঙজৌননা ঙাকথোক্নবা থবকশিং, লায়নাশিং মতম চানা খঙদোকপা, লেম্না অমসুং শেন য়াম্না চঙদনা লায়েংবা, অপীকপা সহরশিংদা দোক্তরশিং মতিক চানা থম্বা অমসুং অনা-লায়েংগী তেক্নোলোজি পাকথোক-চাউথোকহনবা অসিনি। মীয়াম অনাবশিংদগী মাঙজৌননা ঙাকথোকপা অসি ভারতকী হকশেলগী থৌশিলগী খ্বাইদগী মরুওইবা অমসুং অহানবা য়ুম্বীনি। লায়নাশিংনা মীয়াম লায়রহল্লি। হৌখিবা চহি ১০দা মীওই করোর ২৫ লায়রবা কোক্লে। অরুবা অনাবা অমনা মখোয় লায়রহনবনি। মরম অদুনা, লু-নানবা, য়োগ, অয়ুর্বেদা অমসুং মচি ওইবা চীঞ্জাক্তা সরকারনা অখন্নবা মীৎয়েং চঙলে।
পাক-শন্না তিকা থাবগী থবক পায়খৎলিবা অসিগী মতাংদা, প্রধান মন্ত্রীনা হায়খি মদুদি চহি ১০গী মমাঙদা তিক থাবগী চাং চাদা ৬০ রোমতা ওইখি, মতম অদুদা অঙাং করোর কয়া তিকা থাখিদে। তিকা থাবগী চাং অসি চহি অমদা চাদা ১ দগী চাদা ১.৫ গী চাংদা হেনগৎখি অমসুং মসিনা মরম ওইদুনা অঙাং খুদিংমক মপুংফানা তিকা থাবদা চহি ৪০-৫০ চঙগনি। হৌজিক পাল্লিবা সরকার অসিনা অঙাংশিং তিকা থাবা হেনগৎহল্লে অমসুং মিনিস্ত্রি কয়া পুন্না থবক তৌমিন্নদুনা মিসন ইন্দ্রধনুস পায়খৎপদগী তিকা থাবগী চাং হেনগৎলক্লে অমসুং মীরোনবী অমসুং অঙাং করোর কয়া তিকা থারে। তিকা থানবা সরকারনা পায়খৎলিবা থবক্কী কান্নবশিং কোবিদ লাইচৎ মনুংদা উবা ফংখি অমসুং ঙসিদি লৈবাক শীনবা থুংনা তিকা থাবগী কেম্পেন য়াংনা পায়খৎলি।
প্রধান মন্ত্রীনা হায়খি মদুদি লায়নাশিং ঙল্লিঙৈদা খঙদোকপা অসি য়াম্না মরুওই অমসুং কেন্সর অমসুং দাইবেতিসগুম্বা লায়নাশিং য়াম্না ঙন্না খঙদোক্নবা লৈবাক শীনবা থুংনা অয়ুস্মান অরোগ্যা মন্দির লাখ কয়া লিংখৎলে। ঙসি লৈবাক অসিদা ক্রিতিএক কিয়ার ব্লোকশিং অমসুং অনৌবা লেবশিংগী নেতৱার্ক অমা শেমগৎলে। মসিগী অনা-লায়েংগী অনিশুবা য়ুম্বী অসিনা মীওই লাখ কয়াগী থৱায় কনবা ঙম্লে। শেন য়াম্না চঙদবা লায়েং অমসুং মমল হোংবা হিদাক-লাংথকশিংগী হকশেলগী অহুমশুবা য়ুম্বীগী মতাংদা প্রধান মন্ত্রীনা হায়খি লায়নাশিং লায়েংবদা চঙবা শেনফম চাদা ২৫ হন্থরে অমসুং পি.এম জন ঔসাধি কেন্দ্রশিংদা মমল চাদা ৮০ তানা হিদাক-লাংথকশিং ফংহল্লে। হার্ত স্তেন্তশিং, নী ইমপ্লান্তশিং অমসুং কেন্সরগী হিদাকশিংগী মমল হন্থরে অমসুং অয়ু্স্মান য়োজননা লায়রবশিংদা লুপা লাখ ৫ ফাওবা লেম্না লায়েংবগী খুদোংচাবা পীরে। অয়ুস্মান য়োজনাগী মখাদা হৌজিক ফাওবদা অনৌবা করোর ৭.৫ হেন্না লেম্না লায়েংবগী খুদোংচাবা ফংলে।
হকশেলগী মরিশুবা য়ুম্বী শন্দোক্না তাক্লদুনা, শ্রী মোদীনা হায়খি মদুদি মসিনা লায়েংনবা দিল্লি-মুম্বাইগুম্বা অচৌবা সহরশিংগী মখা পোনবা অদু হন্থরে। হৌখিবা চহি ১০দা অপীকপা সহরশিংদা সরকারনা এ.আই.আই.এম.এসগুম্বা হোস্পিতালশিং, মেদিকেল কলেজশিং অমসুং সুপর স্পিসিএলিতি হোস্পিতালশিং লিংখৎলে। লৈবাক অসিদা দোক্তরশিং ৱাৎলিবা অসি মেনখৎনবা হৌখিবা চহি অসিদা অনৌবা মেদিকেল সিত লিশিং কয়া হাপচিল্লে। মথং চহি ৫ দা অহেনবা সিত লিশিং ৭৫ হাপচিন্নবা সরকারনা ৱারেপ লৌরে।
হকশেলগী মঙাশুবা য়ুম্বীগী মতাংদা, প্রধান মন্ত্রীনা হায়খি মসিগী পান্দমদি তেক্নোলোজিগী খুৎথাংদা হকশেলগী খুদোংচাবশিং হেন্না ফংহনবনি। ঙসিদি দিজিতেল হেল্থ আই.দিশিং শেম্লে অমসুং ই-সঞ্জিবনি এপ্পগুম্বা পাম্বৈগী খুৎথাংদা য়ুমদা ফম্লগা দোক্তরশিংগা তানবগী খুদোংচাবা অনাবশিংদা ফংহল্লে। হৌজিক ফাওবদা মীওই করোর ৩০ হেন্না ই-সঞ্জিবনি এপ্পকী মতেংদগী দোক্তরশিংগা ৱা তানখ্রে। হকশেলগী থবকশিং দ্রোন তেক্নোলোজিগা শম্নহন্নবা ভারতনা থবক পায়খৎপা হৌরে।
লোইশিল্লকপদা, প্রধান মন্ত্রীনা হায়খি মদুদি মশা ফবা অমসুং থবক ঙম্বা নহারোলশিংগী মীরোলনা বিকসিত ভারত অমগী মঙলান মঙফাওনবা ঙমগনি। প্রধান মন্ত্রীনা ভারতকী দোক্তরশিং, পেরামেদিকশিং অমসুং অতোপ্পা স্তাফশিংদা মহাক্কী য়াইফ-পাউজেল পীখি।
থৌরম অদুদা শরুক য়াখিবশিংগী মনুংদা উত্তর প্রদেসকী রাজ্যপাল শ্রীমতি অনন্দিবেন পতেল অমসুং উত্তর প্রদেসকী চীফ মিনিস্তর শ্রী য়োগী অদিত্যানাথ অমসুং কাঞ্চি কমাকোতি পীথম, কাঞ্চিপুরমগী জগদগুরু পীতাদিপতি, শ্রী সঙ্করা বিজায়েন্দ্র সরশ্বতি য়াওখি।
***
(Release ID: 2066576)
Visitor Counter : 8