প্রধানমন্ত্রীগী লোইশঙ
মহারাস্ত্রাদা তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তম্বা থৌরমদা প্রধান মন্ত্রীনা ফোঙদোকখিবা ৱারোল
Posted On:
09 OCT 2024 3:36PM by PIB Imphal
খুরুমজরি!
মহারাস্ত্রাগী রাজ্যপাল সি.পি রাধাকৃষ্ণন জি, চীফ মিনিস্তর একনাথ সিন্দে জি, কেন্দ্রগী মন্ত্রীমন্দলগী ঐগী মরুপশিং, মহারাস্ত্রাগী দিপুতি চীফ মিনিস্তর শ্রী দেবেন্দ্র ফদনাবিস জি, অজিত পৱার জি, অতোপ্পা শক্নাইরবশিং অমসুং মহারাস্ত্রা ঐগী নুংশিজরবা ইনাওশিং অমসুং ইচলশিং ….
মহারাস্ত্রাগী সিবা ভক্তশিংদা ঐনা য়াইফ-পাউজেল পীজরি।
ঙসি মহারাস্ত্রানা মেদিকেল কলেজ ১০গী খুদোল ফংলে। ঙসি, মরুওইবা ইনফ্রাস্ত্রকচর প্রোজেক অনি, নাগপুর এয়রপোর্ত পাকথোক-চাউথোক্নবা অমসুং সির্দি এয়রপোর্তকী অনৌবা তর্মিনেল অমা শানবা উরেপ-উয়ুং তম্লে। হায়রিবা চাউখৎ-থৌরাংগী থবকশিং অসিগীদমক ঐনা মহারাস্ত্রাগী মীয়ামদা হরাওবা ফোঙদোকচরি। হৌখিবা চয়োলদা, ঐ থানে অমসুং মুম্বাইদা চৎখি। মফম অদুদা ঐনা মেত্রো য়াওনা লুপা করোর ৩০,০০০গী প্রোজেকশিং শঙ্গাবগী খুদোংচাবা ফংখি। মসিগী মমাঙদা, তোঙান-তোঙানবা জিলাশিংদা লুপা করোর লিশিং কয়াগী চাউখৎ-থৌরাংগী প্রোজেকশিং হৌদোকখ্রে। সহর কয়াদা মেত্রো পাকথোক-চাউথোকহল্লে। মফম খরদা এয়রপোর্ত ফগৎহল্লে, মফম খরদা লম্বীশিং অমসুং হায়ৱেশিংগা মরী লৈনবা প্রোজেকশিং য়াংনা পায়খৎলে। ইনফ্রাস্ত্রকচর, সোলার ইনর্জি, তেক্সতাইল পার্ককা মরী লৈনবা প্রোজেকশিং হৌদোক্লে। লৌমীশিং অমসুং শা-ষন লোইবা লৌমীশিংগী য়াইফনবা অনৌবা থবক কয়া পায়খৎলে। লৈবাক অসিদা খ্বাইদগী চাউবা কন্তেন্নর পোর্ত, বধাবন হিথাংফম শানবা উরেপ-উয়ুং তমখ্রে। মহারাস্ত্রাগী পুৱারিদা, তোঙান-তোঙানবা হিরমশিংদা, অশুক য়াম্না পাক-চাউনা, অশুক য়াম্না য়াংনা কৈদৌঙৈদা চাউখৎ-থৌরাং পায়খৎত্রি। তোঙানবা ৱাফম অমদা, কংগ্রেসনা পানবা মতমদা, তোঙান-তোঙানবা হিরমশিংদা, য়াম্না পাক-চাউনা, য়াম্না য়াংনা শেঞ্জা-থুমজাগী থবকশিং পাংথোকখি।
ইনাওশিং অমসুং ইচলশিং,
নুমিৎ খরনিগী মমাঙদা ঐখোয়না মরাথি লোল ক্লাসিকেল লোলগী থাক্তা পুখৎখ্রে। লোল অমা ক্লাসিকেল লোল ওইরকপদা, মসি ৱাহৈশিং খক নত্তনা অপুনবা মীরোলগী খোঞ্জেল অমা তারগনি। মসিনা মরাথি ইচিন-ইনাও করোর কয়াগী মঙলান মঙফাওনহল্লে। মহারাস্ত্রাগী খুঙ্গং শীনবগী থুংবগী মীয়ামদগী হরাওবা অমসুং থাগৎপগী পাউজেল মহাক্না ফংখি। মরাথি অসি ক্লাসিকেল লোল অমা ওইনা পুখৎপা অসি মহাক্কী থবক নত্তে, মসি মহারাস্ত্রাগী মীয়ামগী থৌজালদগী ওইরকপনি। ছত্রপতি সিবাজী মহারাজ, বাবা সাহবে অম্বেদকার, জয়তিবা ফুলে অমসুং সাবিত্রিবাই ফুলেগুম্বা শক্নাইরবশিংগী থৌজালদগী মহারাস্ত্রাদা চাউখৎ-থৌরাংগী থবকশিং পায়খৎলিবনি।
মরুপশিং,
ঙরাং হরিয়ানা অমসুং জম্মু অমসুং কাস্মিরগী মীখলগী ফলশিং লাউথোকখ্রে। লৈবাক অসিগী মীয়াম্না করি খল্লিবগে হায়বা হরিয়ানা তাক্লে। তার্ম অনি মপুংফারবা মতুংদা অহুমশুবা তার্মগীদমক খল্লকপা অসি পুৱারি ওইরে। মীয়াম লান্না লমজিংনবা কংগ্রেস অমসুং অর্বান নেক্সালশিং থবক য়াম্না চিল্লি। অদুবু কংগ্রেসকী লৌতুনবা খুদিংমক অরেম্বদা তাহল্লে। মখোয়গী দলিতশিংগী মরক্তা অরানবা শন্দোক্লি অদুবু মখোয়গী ফত্তবা ৱাখল্লোলশিং অদু দলিত খুন্নাইনা খঙলে। মখোয়গী রিজার্বেসন মুন্দুনা মখোয়গী ভোৎ বেঙ্ক তোখায় তাহনবা কংগ্রেসনা পাম্মী হায়বা দলিতশিংনা খঙলে। হরিয়ানাগী দলিতশিংনা রেকোর্দ ওইনা বি.জে.পি শৌগৎলে। চাউখৎ-থৌরাংগী থবকশিং উবদগী হরিয়ানগী দলিতশিংনা বি.জে.পীগা চৎমিন্নরে। কংগ্রেসনা লৌমীশিং শাওহনখি। অদুবু কনানা মখোয়দা মহৈ-মরোংশিংগী এম.এস.পি ফংহনবগে হায়বা মখোয় খঙই। বি.জে.পিগী কিষান কলয়ান য়োজনাশিংদা হরিয়ানাগী লৌমীশিং য়াম্না হরাওখি। মখোয়গী অফবা তুংলমচৎকীদমক হরিয়ানগী নহারোলসিং, ঐখোয়গী ইচলশিং অমসুং ইচানুপীশিংনা বি.জে.পি থাজখি। কংগ্রেসনা খদ্রকশিং শীজিন্নখি, অদুবু কংগ্রেস অমসুং অর্বান নেক্সালশিংগী লৌতুনবদা মখোয় মখা তানা পংথদ্রে হায়বা হরিয়ানাগী মীয়াম্না উৎলে।
মরুপশিং,
কংগ্রেসনা মতম পুম্নমক্তা তোখাই তাহনবা অমসুং শক্তি পায়বগী ফোর্মুলা শীজিন্নরি। দাইত্ব খঙদবা দল অমনি হায়বা কংগ্রেসনা হঞ্জিন-হঞ্জিন উৎলে। দল অসিনা হৌজিক ফাওবা লৈবাক অসি থুগাইনবা অরানবা কয়া ঙাংলি। খুন্নাই তোখাই তাহন্নবা ফোর্মুলাশিং কংগ্রেসনা শীজিন্নরি। লৈবাক অসিগী ভোত্তরশিং লান্না লমজিংবগী থবক কংগ্রেসনা তোক্ত্রি। কংগ্রেসকী ফোর্মুলা খঙলে- মুস্লিমশিং কিহনবা, মখোয়গী ভোৎ বেঙ্ক ওইহনবা অমসুং ভোৎ বেঙ্ক মপাঙ্গল কনখৎহনবনি। ঐখোয়গী মুস্লিম ইনাওশিং অমসুং ইচলশিংগী কাস্ত কয়া লৈবগে হায়বা হৌজিক ফাওবা কংগ্রেসকী লুচিংবা অমতনা হায়খিদ্রি। মুস্লিম কাস্তকী ৱাফম লাকপদা, কংগ্রেসকী লুচিংবশিং তুমিন্না লৈখ্রে। অদুবু হিন্দু খুন্নাইগী ৱাফম লাকপদা, কংগ্রেসনা কাস্ত খক্তগী ৱা খন্নবা হৌখি। কংগ্রেসকী থৌশিলদি হিন্দুগী কাস্ত অমগা অতোপ্পা কাস্ত অমগা খৎনহনবনি। হিন্দুশিং হেন্না তোখাই তাহল্লিবমখৈ, মখোয়না হেন্না কান্নবা ফংগনি হায়বা কংগ্রেসনা খঙই। পাম্বৈ অমা হেক্তা শীজিন্নদুনা হিন্দু খুন্নাই মৈ চাকহনবা কংগ্রেসনা পাম্মী, মসিনা রাজনিতিগী খুদোংচাবা কয়া ফংগনি। ভারত্তা মীখল পাংথোকপা খুদিংগী, কংগ্রেসনা মসিগী ফোর্মুলা অসি পাল্লি। দল অসিগী ভোৎ বেঙ্ক মাঙদনবা, খুন্নাইদা হু চাইবগী খদ্রক অমা কংগ্রেসনা শীজিন্নরি। কাংলুপ অমসুং কাস্ততা য়ুম্ফম ওইদুনা কংগ্রেসনা মীখল থেংনরি।
হিন্দু খুন্নাই থুগাইবা অমসুং মসিনা মাইপাক্নবগী ফোর্মুলা ওইনা শীজিন্নবা হায়বসি কংগ্রেসকী রাজনিতিগী য়ুম্ফমনি। ভারতকী ‘সরভাজন হিতে সরভাজন সুখে’ হায়রিবা ৱাখল্লোন অসি কংগ্রেসনা নমথরি, সনাতন চৎনবী নমথরি। লৈবাক অসি চহি কয়া পান্দুনা লাক্লবা কংগ্রেসনা অমুক হন্না সরকার পায়নবা অশুক্কী মতিক লৈতাদ্রে, দল অসিনা নুমিৎ খুদিংগী নাতৈ চাদবা রাজনিতি তৌদুনা লৈরে। কংগ্রেসকী অরিবা মীরোলশিংগী লুচিংবশিংশু উপায় লৈত্রে, মখোয়গী দলগী ফিবম অসিদা উপায় লৈত্রে। কংগ্রেস অসি অরানবা শন্দোকপগী খ্বাইদগী চাউবা ফেক্তরি অমা ওইরক্লে। নিংতম্বা ফংলবা মতুংদা গান্ধীজিনা মসি খঙখি। মরম অদুনা গান্ধীজিনা হায়খি মদুদি কংগ্রেস মুৎথৎকদবনি। কংগ্রেস ঙসিদি মুৎত্রে অদুবু দল অসিনা ভারত মুৎথৎলে। মরম অদুনা ঐখোয় চেকশিনগদবনি, ঐখোয় মিকুপ-নাহুম শিংগদবনি।
মরুপশিং,
খুন্নাই অসি তোখাই তাহন্নবা হোৎনরকপা খুদিংমক মহারাস্ত্রাগী মীয়াম্না অরেম্বা তাহনগনি হায়বগী ঐগী অচেৎপা থাজবা থম্লি। লৈবাক অসি চাউখৎহনবনা মরুওইনা লৌসি, মহারাস্ত্রাগী মীয়াম্না বি.জে.পি-মহায়ুতিদা অমতা ওইনা ভোৎ পীগদবনি। বি.জে.পিনা মহারাস্ত্রাদগী হেন্না হরিয়ানাদা চাউনা মাইপাক্লে।
মরুপশিং,
হৌখিবা চহি ১০দা, লৈবাক অসি চাউখৎনবগীদমক মতমগা চুনবা ইনফ্রাস্ত্রকচর শেমগৎনবা সরকারনা ‘মহাযজ্ঞ’ অমা পাংথোকপা হৌরে। ঙসি ঐখোয়না বিল্দিং শাবা খক নত্তনা, ঐখোয়না মশা ফবা অমসুং নুংঙাই-য়াইফবা মহারাস্ত্রা অমগী উরেপ-উয়ুং তম্লে। অমুক্তদা অনৌবা সরকারগী মেদিকেল কলেজ ১০ থবক হৌবা অসি অনৌবা ইন্সতিতুসন ১০ শাবা খক নত্তে। মসি মীওই কয়াগী পুন্সিগী ফিবম ফগৎহন্নবা ‘মহাযজ্ঞ’ অমনি। থানে-অম্বরনাথ, মুম্বাই, নাসিক, জলনা, বুলদনা, হিঙ্গোলি, ৱাসিম, অমরাবতি, ভন্দারা অমসুং গাদচিরোলিগী মেদিকেল কলেজশিং অসি জিলাশিং অমসুং অকোয়বদা লৈরিবা মফমশিংগী ইমুং মিল্লিয়ন কয়া লায়েংনবগী মফম অমা ওইরগনি। হৌজিক মহারাস্ত্রাদা মেদিকেল সিত ৯০০ হেনগৎলে। হৌজিক মহারাস্ত্রাদা অপুনবা মেদিকেল সিত লিশিং ৬ রোম য়ৌরে। লৈবাক অসিদা অনৌবা সিত লিশিং ৭৫ হাপচিনগনি হায়না লাল কিলাদা লাউথোকখিবনি। ঙসিগী থৌরম অসি মাইকৈ অদুদা থাংজিনবা অচৌবা খোঙথাং অমনি।
মরুপশিং,
ঐখোয়না মেদিকেল তম্বা লাইথোকহল্লে। মসিনা মহারাস্ত্রাগী নহারোলশিংগী অনৌবা খুদোংচাবা কয়া পীরে। লায়রবা অমসুং মিদল ক্লাস ইমুংশিংগী অঙাংশিং দোক্তরশিং ওইরক্নবা অমসুং মখোয়গী মঙলানশিং মঙফাওনবা ঙম্নবা ঐখোয়গী সরকারনা থবক পায়খৎলে। মতম অমদা, মমালোলদা মেদিকেল তম্নবা লাইরকশিং লৈরমদে, মসিনা অচৌবা শিংনবা অমা ওইখি। মহারাস্ত্রাগী নহারোলশিংগী য়াইফনবা খন্দুনা, মসিগী অৱাবা অসি ঐখোয়না কোকহল্লে। হৌজিক মহারাস্ত্রাগী নহারোলশিংনা মরাথি লোলদা মেদিসিন তম্বা য়ারগনি। মরাথি লোলদা তমদুনা, দোক্তর ওইনবা মখোয়গী মঙলানশিং মঙফাওনবা ঙম্লগনি।
মরুপশিং,
হেন্না নুংঙাইবা পুন্সি অমা ওইহন্নবা ঐখোয়না পায়খৎলিবা থবকশিং অসি লায়রবা কোকহন্নবগী অচৌবা পাম্বৈ অমনি। কংগ্রেসগুম্বা দলনা লায়রবা অসি মখোয়গী রাজনিতিগী থাউ ওইনা শীজিন্নখি। মরম অদুনা মখোয়না মীয়াম লায়রনা হিংহনখি। চহি ১০গী মনুংদা ঐখোয়গী সরকারনা মীওই করোর ২৫ লায়রবা কোকহনখ্রে। লৈবাক অসিদা হকশেলগী থবকশিংদা অওনবা পুরকখিবা অসিনা লায়রবা কোকহনখিবগী অচৌবা য়ুম্ফম অমনি। ঙসিদি লায়রবা মীওই খুদিংমক লেম্না লায়েংনবা অয়ুস্মান কার্দ অমা পায়রে। হৌজিক চহি ৭০গী মথক্তা লৈবা মীওইশিং লেম্না লায়েংবা য়ারে। তঙাই-ফদবা হিদাক-লাংথকশিং অহোংবা মমলদা জন ঔসাধি কেন্দ্রশিংদা ফংলে। থম্মোয়গী অনাবা লৈবা মীওইশিংগীদমক স্তেন্তশিংগী মমল চাদা ৮০-৮৫ দা হন্থরে। কেন্সর লায়েংবগী হিদাকশিংগী মমলশু ঐখোয়না হন্থরে। সরকারগী মেদিকেল কলেজশিং অমসুং হোস্পিতালশিং মশিং হেনগৎলকপদগী লায়েংবশু মমল হোংদোক্লে। ঙসিদি, মোদী সরকারনা খুন্নাইগী লায়রবশিংগী মনুংদা খ্বাইদগী লায়রবশিংদা খুন্নাইগী অকনবা চুঙ্গোই অমা পীরে।
মরুপশিং,
লৈবাক অমগী নহারোলশিং মপুংফানা থাজবা লৈরবা মতম খক্ততা লৈবাক অমনা মালেম্না থাজবা থম্মী। ঙসিদি, ভারতকী নহারোলগী থাজবা অসি ভারতকী অফবা তুংলমচৎকী অনৌবা ৱারি ওইরে। ঙসিদি, মালেমগী অচৌবা লৈবাকশিংনা ভারত অসি হুমেন রিছোর্সকী অচৌবা মফম অমা ওইনা উরে। লাইরিক-লাইশু, হকশেল অমসুং সোফৱায়ারগী হিরমদা মালেম শীনবা থুংনা ঐখোয়গী নহারোলশিংগী খুদোংচাবা কয়া মরাংকাইনা লৈরে। মরম অদুনা ঐখোয়গী নহারোলশিংগী হৈথোই-শিংথোইবা ঐখোয়না মালেমগী থাকশিং য়ৌনবা শেমগৎলিবনি। ঙসি ঐখোয়না মহারাস্ত্রাদা বিদ্যা সমিক্ষা কেন্দ্রগুম্বা প্রোজেকশিংশু হৌদোক্লে। ঙসি ঐখোয়না মহারাস্ত্রাদা ইন্দিয়ান ইন্সতিতুৎ ওফ স্কিলস শঙ্গারে। ইন্সতিতুৎ অসিদা, নহারোলশিংগী তুংগীদমক য়েংদুনা ত্রেনিং পীগনি। দরকার ওইবা থবক্কী মতুংইন্না মখোয়গী হৈথোই-শিংথোইবা শেমগৎকনি। নহারোলশিংদা শেন ফংবা ইন্তর্নশিপ শরুক য়াহন্নবা ঐখোয়গী সরকারনা থবক পায়খৎলে। মসিগী থবক অসি ভারতকী পুৱারিদা অহানবা ওইনা পায়খৎপনি। হৌজিক নহারোলশিং ইন্তর্নশিপ ওইনা লুপা লিশিং ৫ ফংলগনি। ইন্তর্নশিপদা নহারোলশিংগী মতেং পাংনবা, খোঙজং অসিদা শরুক য়ানবা কম্পেনি লিশিং কয়া শরুক য়ারকপা অসিদা ঐ হরাওই। থবক অসিনা নহারোলশিংগী য়ুম্ফম মপাঙ্গল কনখৎহনগনি , মখোয়না অনৌবা কয়া তমগনি অমসুং মখোয়না অনৌবা খুদোংচাবশিংগী লম্বী ফংলগনি। নহারোলশিংগীদমক ভারতনা পায়খৎলিবা থবকশিং ফলশিং উবা ফংলে। ঙসিদি ঐখোয়গী মহৈলোয়শঙশিং মালেমগী মকোকথোংবা ইন্সতিতুসনশিংগা চাংদম্নরে। ঙরাং, ৱার্ল্দ য়ুনিভর্সিতি রেঙ্কিংশিং ফোঙলে। রেঙ্কিং অসিগী মতুংইন্না, ভারত্তা নহারোলশিংগীদমক অৱাংবা থাক্কী লাইরিক-লাইশু তম্বা অমসুং থিজিনবগী থবক্তা অহোংবা লাক্লে।
মরুপশিং,
ঙসিদি মালেম পুম্নমক্না ভারত্তা য়েংলে। ভারত মালেমদা খ্বাইদগী চাউবা ৫শুবা ইকোনোমি ওইরে। ঙসিদি মালেমগী তুংগী ইকোনোমি অসি ভারতকা মরী লৈনরে। ভারতকী শেন-থুম চাউখৎলকপা অসিনা অনৌবা খুদোংচাবা কয়া পীরে। চহি কয়া কংগ্রেসনা মীরাইরম্লবা হিরমশিং ঙসিদি মপান নাইদ্রবা খুদোংচাবা কয়াগী হৌরকফম অমা ওইরে। তুরিজম অসি খুদম অমনি, মহারাস্ত্রাদা মমল নাইদ্রবা অরিবা পোৎলম কয়া লৈরি। মহারাস্ত্রাদা মহৌশাগী ওইনা ফবা মফম কয়া, অধ্যাতিক্কী মফমশিং লৈরি, মখোয়গী অকোয়বদা লুপা করোর লিশিং কয়াগী শেন্মিৎলোন অমা শেমগৎপা য়াগনি। অদুবু, হায়রিবা খুদোংচাবশিং অসি শীজিন্নদনা থম্লি। কংগ্রেসনা চাউখৎ-থৌরাং নত্ত্রগা হেরিতেচ থৱায় য়াওদে। ঐখোয়গী সরকারনা চাউখৎ-থৌরাং অমসুং হেরিতেচ অনিমক থবক পায়খৎলি। ঐখোয়গী ইনাকখুল্লবা হৌখ্রবা মতমদগী ইথিল ফংদুনা ঐখোয়গী অফবা তুংলমচৎ অমা শেমগৎলি। মরম অদুনা ঙসি মহারাস্ত্রাদা লেপ্তনা সির্দি এয়রপোর্তকী অনৌবা তর্মিনেল বিল্দিং শানবা, নাগপুর এয়রপোর্ত শেমগৎনবা ,অসিগুম্বা চাউখৎ-থৌরাংগী থবক কয়া উরেপ-উয়ুং তম্লিবনি। সির্দি এয়রপোর্তকী অনৌবা তর্মিনেল অসিনা সাই বাবাগী ভক্তশিংদা খুদোংচাবা কয়া পীরগনি। লৈবাক অসিগী অমসুং মপান লৈবাকশিংগী মশিং য়াম্লবা ভক্তশিং মফম অসিদা লাকপা ঙমহল্লগনি। নুমিৎ খরগী মমাংদা, ঐনা অমুক হেন্না ফগৎহল্লবা সোলারপুর এয়রপোর্ত শঙ্গাখ্রে। ভক্তশিংনা মফম অমদা হেক থুংলবগা, মখোয়না শোইদনা অনকপা মফমশিং হায়বদি সানি শিঙ্গানাপুর, তুলজা ভাবনি, কাইলাস লাইশঙদা চৎকনি। মসিনা মহারাস্ত্রাগী শেন্মিৎলোন ফগৎহনগনি অমসুং থবক ফংনবগী খুদোংচাবা কয়া পীগনি।
মরুপশিং,
ঐখোয়গী সরকারগী ৱারেপ খুদিংমক অমসুং থৌশিল খুদিংমক পান্দম অমদা কৎথোক্লে অমসুং পান্দম অদুদি-বিকসিত ভারত!। লায়রবশিং, লৌমীশিং, নহারোলশিং অমসুং নুপীশিং নুংঙাইহনবা হায়বসি ঐখোয়গী পান্দমনি। মরম অদুনা চাউখৎ-থৌরাংগী প্রোজেকশিং লায়রবশিং, লৌমীশিং, নহারোলশিং অমসুং নুপীশিংদা কৎথোক্লে। সির্দি এয়রপোর্তদা শাগদৌরিবা তোখাইবা কার্গো কমপ্লেক্স অসিনা লৌমীশিংদা য়াম্না চাউনা মতেং পাংলগনি। কমপ্লেক্স অসিগী খুৎথাংদা, লৌউ-শিংউগী পোৎথোক কয়া লৈবাক অসিগী অমসুং মপান লৈবাকশিংদা থাবা ঙম্লগনি। সির্দি, লাসালগাউন, অহিল্যানগর অমসুং নাসিক্কী লৌমীশিং কমপ্লেক্স অসিগী কান্নবশিং ফংলগনি। লৌমীশিং অসিনা তিলহৌ, অঙ্গুর, সেজ, পুংদোল অমসুং কফোই অচৌবা কৈথেলশিংদা য়াম্না লাইনা য়ৌহনবা ঙম্লগনি।
ইনাওশিং অমসুং ইচলশিং,
ঐখোয়গী সরকারনা লেপ্তনা লৌমীশিংগী য়াইফনবা থবকশিং পায়খৎলি। ঐখোয়না বাসমতিগী মিনিমম এক্সপোর্ত প্রাইজ লৌথোক্লে। বাসমতি নত্তবা চেঙ মপান্দা য়োনবদা অথিংবা থম্লম্বা অদু লৌথোক্লে। পারবোইল্দ রাইজদা লৌরম্বা এক্সপোর্ত দ্যুতি তঙ্খায়দা হন্থরে। মপান্দগী অচাথাউশিং পুশিল্লকপদা তেক্স চাদা ২০ লৌনবা ঐখোয়না ৱারেপ লৌরে। রিফাইন তৌরবা নুঙহৱাই, নুমিৎলৈ অমসুং প্লামগী অচাথাউশিংদা লৌবা কস্তম দ্যুতি হেনগৎলে। মসিদা কনা কান্নবা ফংগনি? ঐখোয়গী লৈবাক্কী লৌমীশিং কান্নবা ফংগনি। মখোয়না হঙ্গাম, নুঙহৱাই অমসুং নুমিৎলৈগুম্বা মহৈ-মরোংশিংগী মমল ৱাংনা য়োনবা ফংলগনি। ঙসি সরকারনা তেক্সতাইল উদ্যোগ শৌগৎলিবা ফিবম অসিনা, মহারাস্ত্রাগী লশিং থাবা লৌমীশিং কান্নবা য়াম্না ফংলগনি।
মরুপশিং,
অদোম্না মতম পুম্নমক্তা নিংশিংগদবা ৱাফম অমা লৈরি, মহারাস্ত্রা মপাঙ্গল শোন্থহল্লগা মহা-অঘাদিনা সরকার পায়বা পাম্লি, অদু্গা মহায়ুতিগী ৱাশক্তি মহারাস্ত্রা মপাঙ্গল কনখৎহনবনি। লৈবাক অসি চাউখৎনবা মাংজিল থানবগীদমক ঙসি মহারাস্ত্রানা অমুক হন্না মাঙলোমদা চঙশিনবদা ঐ হরাওই। চাউখৎ-থৌরাংগী থবকশিং অসিগীদমক ঐনা অমুক হন্না মহারাস্ত্রাগী মীয়ামদা হরাওবা ফোঙদোকচরি।
অদোম ঙমখৈ লৈতনা থাগৎপা ফোঙদোকচরি।
***
(Release ID: 2063644)
Visitor Counter : 6