প্রধান মন্ত্রী, শ্রী নরেন্দ্র মোদীনা ঙসি মহাক্কী ময়ুমদা চেস ওলিম্পিয়াদগী ৱিন্নরশিংগা ৱারী শানখ্রে‍।

চঈপ-দে-মিসন, দিব্যেন্দু বরুৱানা প্রধান মন্ত্রীগী মফমদা নুপামচাগী তীম্না পোইন্ত ২২গী মনুংদা ২১ ফংদুনা অদুগা নুপীমচাঈ তীম্না পোইন্ত ২২গী মনুংদা ১৯ ফংদুনা লৈরিবা পোইন্ত ৪৪গী মনুংদা ৪০ ফংদুনা ভারতনা সনাগী মেদল ফংলকখি হায়না পাউদমখি‍।

এরেনাদা লৈখিবা এতমোস্ফিয়রগী মতাঙদা প্রধান মন্ত্রীনা হংলকপদা চেস শান্নরোয় হরিকা দ্রোনাবল্লীনা মায় পাক্লকপদা নুংঙাইবা ফোঙদোকখি অমসুং মখোয়গী মায়োক্নবা লম্বাশিংনা ফাওবা হরাওবা ফোঙদোকপা য়াওরকখি হায়খি‍। ভিদিত গুজরাথীনা ভারত্তা চেসপু য়াম্না পাম্নরিবগী মতাঙদা ফোঙদোকখি অমসুং মীয়াম্না পীরিবা লোইনাইদ্রবা শৌগৎপদু উবদা পুক্নিংদা নুংঙাইবা ফাওই হায়খি‍। তানিয়া সচদেবনা প্রধান মন্ত্রীগী মফমদা লৈবাক ১৮০না শরুক য়াখিববু পাউদমখি‍। মহাক্না চেন্নাইদা পাঙথোকখিবা চেস ওলিম্পিয়াদগী মমাঙগী ইদিসন নীংশিংলদুনা ভারতকী তীম অনিমক্না ব্রোঞ্জ ফংখিবা, অমদি USA গী মখুত্তা মায়থিবা নংদুনা সনাগী মেদল নান্থোকখিববু নীংশিংখি‍। মহাক্না হন্দক্কী ইদিসন্দা মখোয়গা থেংনখিবদা পুক্নিং হেন্না থৌগৎপা পোকখিবা অমসুং মমৈদা মেচ অদু য়াম্না নক্ননা লম্বা তৌনদুনা দ্রো ওইনা লোইশিল্লবসু সনা ফংলকখি হায়খি‍।

প্রধান মন্ত্রীনা মখোয়গী মায় পাকপগী ৱাখল্লোনবু চাউথোকচবগা লোয়ননা শকখঙখি অমসুং পোইন্ত ২২গী মনুংদা মথঙশিৎনা পোইন্ত ২১ অমসুং ১৯ ফংলকপদা ওর্গনাইজরশিংগী মওং কমদৌখি হায়না হংখি‍। তানিয়ানা মখা তারদুনা তীমগী মায় পাকপগী, মরুওইনা ওপন তীমদা লম্বা অমত্তনা মখোয়গা নক্ননা লম্বা তৌবা ঙমখিবদা ফীভমদা লৈখিবা মতৌবু পনখি‍। মহাক্না অহান্বা মেচ তরেৎ মায় পাকখিবা, খোঙফম মনিং হন্বগী ফীভম মচা অমা মায়োক্নখিবা অমসুং হেন্না কন্না হঞ্জিল্লকখিবা খোঙচৎকী মরমদা পাউদমখি‍। গুকেস দোমারাজুনা তীম মেম্বর খুদিংমক্না মখোয়গী অথোইবা মওং মতৌ উত্তুনা অমসুং ২০২২ ওলিম্পিয়াদতা মার্জিন মচা অমদা সনাগী মেদল ফংহৌদবদুনা হেন্না পুক্নিং থৌগত্তুনা তীম অদুনা কন্না হোৎনখিববুসু তমখি‍। তুর্নামেন হেক হৌরকপদগী তীম পুম্বা য়াম্না পুক্নিং থৌগৎপা মওংদা শান্নখি হায়না মহাক্না হায়খি‍।

মখোয়না শান্নবদা অশোয়বশিং চুমথোকপদা অমসুং মায়োক্নবা লম্বীগী মশান্ন খঙদোক্নবা আর্তিফিসিএল ইন্তলিজেন্স শীজিন্নবগী মতাঙদা প্রধান মন্ত্রীনা হংবা ৱাহংদা, রামেসবাবু প্রগজ্ঞনন্ধানা অনৌবা তেক্নোলোজী অমসুং হেন্না ফবা কম্প্যুতরনা চেস মশান্নদা অনৌবা ৱাখল্লোন কয়া পুরক্তুনা চেসদা AI শীজিন্নবদগী ওল্লক্লিবা মতৌবু পনখি‍। নৌনা থোক্লক্লিবা তেক্নোলোজী অসিদগী তমশিনবা য়াবা য়াম্না লৈ হায়না মহাক্না হায়খি‍। ভিদিত গুজরাথীনা মখা তারদুনা, AI অসি মীপুম খুদিংদা ফংবনা মরম ওইরগা শেম শাবদা মসি শীজিন্নৈ হায়খি‍।

দিব্য দেশমুখনা ফাইনেল স্তেজ য়ৌবদা তীম পুম্বনা কত্থোকপগা লোয়ননা কন্না হোৎনখিববু শকখঙখি‍। শান্নরোয়শিংগী ইমুং মনুংগী ফীভমগী মতাঙদা মখা তানা চঙশিল্লদুনা, প্রধান মন্ত্রীনা শান্নরোয় অয়াম্বগী মমা মপাশিং দোক্তর ওই হায়খি‍। ৱাফম অদু ভিদিত গুজরাথীনা অচুম্বনি হায়না ফোঙদোকখি অমসুং মহাক্কীদি মচননুপীসু দোক্তরনি হায়খি‍। তানিয়া সচদেবনা প্রধান মন্ত্রীবু লৈবাকসিগী শান্নরোয় খুদিংমক্তা ঙাক্লৌ পীবিবগীদমক থাগৎপা ফোঙদোকখি অমসুং মহাক্কা শান্ন-খোৎনবগা লৈনরিবা মরীগী মরমদা হংখি‍। প্রধান মন্ত্রীনা লৈবাক অমনা চাওখৎপা হায়বসি মাগী লন-থুন, ইন্দস্ত্রী অমসুং GDP খক্তা নত্তনা ফিল্ম ইন্দস্ত্রী, সাইন্স নৎত্রগা শান্ন-খোৎনবদবু ওইরবসসু হীরম খুদিংদা খুমাঙ চাওশিন্বা মথৌ তাই হায়খি‍। মহাক্না গুজরাতকী মুখ্য মন্ত্রী ওইরিঙৈদা মহাক্না মহা কুম্ভ স্পোর্ত পাঙথোকপদা অঙাং লাখ কয়ানা শরুক য়াখিবা মতম নীংশিংলদুনা, প্রধান মন্ত্রীনা অঙাংশিংগী মরক্তা হৈথোই শিংথোইবা কয়া থোক্লকপদা নুংঙাইবা ফোঙদোকখি‍। ঐখোয়গী লৈবাক্কী নহাশিংগী মফমদা মতিং চাউনা লৈ হায়না শ্রী মোদীনা থাজবা ফোঙদোকখি‍। স্পোর্তসমেনগী ৱাখল্লোন অসি শান্নরোয়শিংদা খক্তনা নত্তনা লৈবাকসিদা খুন্নাইগী পুন্সিরোলগী অফবা ফীভম অমা পুরক্নবগীদমক খুন্নাইগী পুন্সিগী মচৎ অমা ওইনা লৌশিন্বা ফৈ হায়না মহাক্না মখা তাখি‍।

অচৌবা ফিরেপ কয়া লৌবা অদগা অমুকসু শাফু কয়াবুসু মায়োক্নবগী মতাঙদা ভিদিত গুজরাথী অমসুং তানিয়া সচদেবকী ৱাহংশিংগী পাউখুম পীরদুনা, প্রধান মন্ত্রীনা পর্ফোর্মেন্সতা মতেঙ পাংনবা হকচাঙ ফনা লৈবা অমসুং অফবা লমচৎ শেমগৎপগী মথৌ তাবা ৱাফম ফোঙদোকখি‍। “অফবা ফিরেপ লৌনবগীদমক, নহাক্না অফবা অমসুং ফত্তবা ইনফোর্মেসন কয়ামরুম মথৌ তাই‍। নুংঙাইবা ৱাফমখক্তমক তানিংবা হায়বসি মীওইবগী মচৎনি, অদুবু মসিনা ফিরেপ লৌবদা অশোয়বা লাক্কনি,” হায়না মহাক্না হায়খি‍। ইনফোর্মেসন মখল পুম্নমক নৈননবা, খেন্নবা মীৎয়েঙশিং খঙজিন্নবা অমসুং অখঙ অহৈশিংদা অকিবা লৈতনা হংনবা মহাক্না পাউতাক পীখি‍। “নখোয়না শিংনবশিং মায়োক্নবদা লায়না থোক্কনি‍। ৱাফম খরদি এক্সপিরিএন্সতগী লাকপনি, অমসুং ঐনা মমাঙদা হায়খিবগুম, য়োগ অমসুং হিরি কোন্বদা অশেংবা মতিক লৈবনি,” হায়না মহাক্না মখা তাখি‍। প্রধান মন্ত্রীনা মখা তারদুনা কনাগুম্বা অমনা করিগুম্বা হীরম অমত্তদা পেন্থোকপা তৌরোইদবনি মরমদি মতমদুদা কোমথোকপগী মচৎ লোয়নরক্কনি হায়খি‍। “মতম পুম্বদা ঐখোয়গী নুংদা করিগুম্বা অনৌবা খরা, করিগুম্বা খরে হেন্না তৌনিংবগী খৌরাংবা লৈহনগদবনি,” হায়না মহাক্না মখা তাখি‍।

দিব্যেন্দু বরুৱানা প্রধান মন্ত্রীবু মহাক্কী ঙাক্লৌগীদমক থাগৎপা ফোঙদোকখি অমসুং ভারতনা পুৱারী ওইরবা সনাগী মেদল অনি ফংলকপদা প্রধান মন্ত্রীনা লাউথোকখিবদা নুংঙাইবা ফোঙদোকখি‍। মখোয়না হল্লকপদা বসতা প্রধান মন্ত্রীগী ৱারোল থেংনখিবগী মতাঙদা মহাক্না পাউদমখি‍। ১৯৯৮দা মহাক্না অহান্বা চেস ওলিম্পিয়াদ শরুক য়াখিবা মতমদা গেরী কস্পারোব অমসুং কার্পোবনচিংবা শান্নরোয়শিংগী ওতোগ্রাফ মীয়াম্না তান্নরিঙৈ মতম নীংশিংলদুনা, শ্রী বরুৱানা হন্দক্কী ইদিসন অসিদা গুকেস, ব্রহ্মানন্দা, অর্জুন, দিব্য, হরিকা, অমসুং অতৈনা ওতোগ্রাফ পীবা উবদা য়াম্না নুংঙাইবা ফাঙখি হায়না ফোঙদোকখি‍। মহাক্না অনৌবা মীরোলগী শান্নরোয়শিংদা ফাওরিবা মশাবু থাজবগী অওনবা অসিগীদমক প্রধান মন্ত্রীগী মঙলানবু শিংথাখি‍।

প্রধান মন্ত্রীনা মহাক্কী মীৎয়েঙ শান্নরোয় পুম্নমক্তা লৈ হায়খি অমসুং মখোয়না চেস শান্নবা অতৈ শান্নরোয়শিংগী পুক্নিং থৌগৎনফম ওইরক্কনি হায়না ফোঙদোকখি‍। মহাক্না গুজরাতকী মুখ্য মন্ত্রী ওইরিঙৈদা চেস শান্নরোয় ২০,০০০না শরুক য়াখিবা অচৌবা চেসকী ইভেন্ত অমা পাঙথোকখিবগী মতাঙদা পাউদমখি অমসুং অতোপ্পনা মায় পাকপনা করিগুম্বা মতমদা পুক্নিং থৌগৎনবগী মচাক অমা ওইবসু য়াওই হায়খি‍। চেস শান্নরোয় ভন্তিকা অগ্রৱালনা প্রধান মন্ত্রীদা ইভেন্ত অদুদা মহাক্না শরুক য়াখিবগী মতাঙদা পাউদমখি অমসুং মহাক্না পুক্নিং থৌগৎপিখিবদুনা মহাকপু ভারতকীদমক মেদল হেন্না লৌরক্নবা ইনোৎ হাপখি হায়খি‍। মহাক্না প্রধান মন্ত্রীনা মঙোন্দা মনা লান্থোকখিবগী থৌরমদুগী ফোতোগ্রাফ অমসু খুদোল ওইনা পীখি‍। প্রধান মন্ত্রীনা মখোয়গী মফমদা তুংগীদমক য়াইফরোল পীরদুনা ৱারী ৱাতায় অদু লোইশিনখি‍।

*****