భారత రాష్ట్రపతి శ్రీమతి ద్రౌపది ముర్ము ఝార్ఖండ్ లోని రాంచీ లో ఈ రోజున జరిగిన ఐసిఎఆర్-నేషనల్ ఇనిస్టిట్యూట్ ఆఫ్ సెకండరీ అగ్రికల్చర్ (ఎన్ఐఎస్ఎ) శత వార్షికోత్సవంలో పాల్గొన్నారు.

ఈ సందర్భంగా రాష్ట్రపతి ప్రసంగిస్తూ, సాగును ఒక లాభదాయకమైన వ్యాపకంగా తీర్చిదిద్దడంతో పాటుగా 21వ శతాబ్దంలో వ్యవసాయ రంగం ముంగిట ఆహార భద్రత, వనరులను దీర్ఘకాలం పాటు ఉపయోగించుకోగలగడం, వాతావరణ మార్పు అనే మూడు ప్రధాన సవాళ్ళు ఉన్నాయన్నారు. ద్వితీయ వ్యవసాయం ఈ సవాళ్ళను తట్టుకోవడంలో సహాయకారిగా ఉంటుందని తెలిపారు. ద్వితీయ వ్యవసాయం అంటే దీనిలో ప్రాథమిక వ్యవసాయ ఉత్పత్తులకు విలువలను జోడించడం, ఇంకా తేనెటీగల పెంపకం, కోళ్ళ పెంపకం, వ్యవసాయ ప్రధాన పర్యటనల వంటి ఇతరత్రా వ్యవసాయ సంబంధిత కార్యకలాపాలేనని వివరించారు.  ద్వితీయ వ్యవసాయ కార్యకలాపాలను అమలుపరచడం ద్వారా వ్యవసాయ వ్యర్థాలను ఉచిత రీతిన వినియోగించుకోవచ్చునని రాష్ట్రపతి అన్నారు. వాటిని శుద్ధి చేసి ఉపయోగకరమైన, విలువైన వస్తువులను తయారు చేసుకోవచ్చన్నారు. ఈ మార్గాన్ని అనుసరించిన పక్షంలో, పర్యావరణాన్ని పరిరక్షించవచ్చు. రైతుల ఆదాయం పెరుగుతుందని ఆమె అన్నారు. 

భారతదేశంలో లక్కను ప్రధానంగా ఆదివాసీలు ప్రాంతాల నుంచి వస్తున్నట్లు రాష్ట్రపతి చెప్పారు. అది గిరిజనులకు ప్రధాన ఆదాయ వనరుగా ఉందని ఆమె అన్నారు. పరిశోధనకు, అభివృద్ధికి సంబంధించిన అనేక చర్యలను నేషనల్ ఇనిస్టిట్యూట్ ఆఫ్ సెంకడరీ అగ్రికల్చర్ తీసుకోవడంతో పాటుగా లక్క, బంక, జిగురు వంటి వాటిని వాణిజ్య సరళిలో తయారు చేస్తోందని తెలిసి తాను సంతోషిస్తున్నట్లు ఆమె చెప్పారు. ఈ తరహా కార్యకలాపాలలో చిన్న తరహా లక్క ప్రాసెసింగ్ యూనిట్ అభివృద్ధి, ఇంటిగ్రేటెడ్ లక్క శుద్ధి విభాగం, లక్క ఆధారిత స్వాభావిక రంగులు, వార్నిషులు, సౌందర్య వర్థక ఉత్పత్తుల తయారీ, ఫలాలు, కాయగూరలు, మసాలా దినుసులను ఎక్కువ కాలం పాటు భద్రపరిచేందుకు ఉద్దేశించిన లక్క ఆధారిత కోటింగును అభివృద్ధిపరచడం వంటివి సైతం వీటిలో భాగంగా ఉన్నాయని ఆమె అన్నారు. ఈ విధమైన చర్యలన్నీ కలసి ఆదివాసీ సోదరులు, సోదరీమణుల జీవన ప్రమాణాలను మెరుగు పరచడంలో దోహదం చేయగలవన్న విశ్వాసాన్ని రాష్ట్రపతి వ్యక్తం చేశారు.

ఒక టెక్నాలజీ మరో టెక్నాలజీని అత్యంత వేగంగా మింగేస్తున్న కాలమని రాష్ట్రపతి అన్నారు. మనం ఈ సాంకేతికతల తాలూకు ప్రయోజనాలను తప్పక అందిపుచ్చుకోవాలి అని ఆమె అన్నారు. అదే కాలంలో, మనం వాటి తాలూకు దుష్ఫలితాల బారిన పడకుండా చర్యలను తీసుకొని తీరాలని ఆమె అన్నారు. ఎన్ఐఎస్ఎలో ఆటోమేషన్, ప్లాంట్ ఇంజినీరింగ్ విభాగం ఏర్పాటైందని, రోబోటిక్స్, ఇంటర్‌నెట్ కార్యకలాపాలతో పాటు కృత్రిమ మేథను ఉపయోగించుకొని విధులను నిర్వర్తించే సామగ్రిని అభివృద్ధి పరచడంపైన ఈ విభాగం శ్రద్ధ వహిస్తోందని గమనించినప్పుడు తనకు సంతోషం కలిగిందని ఆమె అన్నారు.

లక్కను సాగు చేయడంలో ఎన్ఐఎస్ఎ చక్కని ఫలితాలను సాధించింది అని రాష్ట్రపతి అన్నారు.  అయితే, ఇప్పటికీ మనం మరింత ముందుకు సాగిపోగలిగిన రంగాలు అనేకం ఉన్నాయి అని ఆమె చెప్పారు.  ఉదాహరణకు ఔషధ రంగంతో పాటు సౌందర్య వర్థక సాధనాల ఉత్పత్తి పరిశ్రమలో కూడా అధిక నాణ్యతతో కూడిన లక్క ఉపయోగానికి గిరాకీ ఉంది అని ఆమె వివరించారు. భారతదేశంలో లక్క నాణ్యతను, సరఫరా వ్యవస్థనూ, విక్రయాలను మెరుగుపరచినట్లయితే మన రైతులు లక్కను దేశ, విదేశాలకు కూడా పంపగలుగుతారనీ, అంతేకాక మంచి ధరలను కూడా పొందగలుగుతారని ఆమె అన్నారు.  

***