నాడు పోస్టు చేయడమైనది:
20 SEP 2024 12:30PM by PIB Hyderabad
ఛత్తీస్‌గఢ్ నుంచి తరలి వచ్చిన వామపక్ష తీవ్రవాద బాధితులతో కేంద్ర హోం, సహకార శాఖ మంత్రి శ్రీ అమిత్ షా న్యూఢిల్లీలోని తన నివాసంలో సమావేశమయ్యారు. ఛత్తీస్‌గఢ్ లో వామపక్ష తీవ్రవాద ప్రభావిత ప్రాంతాల నుంచి తీవ్రవాదుల హింసకు గురైన 55 మంది బాధితులు బస్తర్ శాంతి సంఘం ఆధ్వర్యంలో మంత్రిని కలుసుకొన్నారు.
నక్సలిజం బారిన పడిన ఛత్తీస్‌గఢ్ ప్రజల దురవస్థల గురించి ప్రముఖంగా చాటిచెప్పిన ఒక డాక్యుమెంటరీని ఈ సందర్భంగా బస్తర్ శాంతి సంఘం ప్రదర్శించింది. బాధితులలో కొందరు వారి గోడును హోం మంత్రితో చెప్పుకున్నారు.
నక్సలైట్ల హింసాకాండకు గురైన వారితో కేంద్ర హోం మంత్రి శ్రీ అమిత్ షా మాట్లాడుతూ... 2026 మార్చి నెల కల్లా నక్సలిజాన్ని నామరూపాలు లేకుండా చేయడానికి ప్రధాన మంత్రి శ్రీ నరేంద్ర మోదీ నాయకత్వంలోని కేంద్ర ప్రభుత్వం కట్టుబడి ఉందన్నారు. మోదీ ప్రభుత్వ విధానాలు వామపక్ష తీవ్రవాదాన్ని ప్రస్తుతం ఛత్తీస్‌గఢ్ లో కొన్ని జిల్లాలకు పరిమితం చేయగలిగినట్లు మంత్రి తెలిపారు. నక్సలిజమ్ ఇటు మానవజాతికీ, అటు దేశ ఆంతరంగిక భద్రతకూ ముప్పుగా పరిణమించిందని శ్రీ అమిత్ షా అన్నారు.
వామపక్ష తీవ్రవాద ప్రభావిత ప్రాంతాల్లోని ప్రజల సమగ్రాభివృద్ధిని దృష్టిలో పెట్టుకొని మూడు నెలల లోపల ఒక సమగ్ర పథకాన్ని ప్రధాని శ్రీ నరేంద్ర మోదీ నాయకత్వంలో భారత ప్రభుత్వం, ఛత్తీస్‌గఢ్ ప్రభుత్వం కలిసికట్టుగా తీసుకు వస్తాయని కూడా శ్రీ అమిత్ షా తెలిపారు. దేశవ్యాప్తంగా వామపక్ష తీవ్రవాద బాధిత ప్రజలు ఈ ప్రణాళిక ద్వారా ఆరోగ్య సంరక్షణ సదుపాయాలు, ఉద్యోగ అవకాశాలతో పాటు ఇతర సంక్షేమ పథకాల ప్రయోజనాలను కూడా అందుకోనున్నారని ఆయన అన్నారు.
వామపక్ష తీవ్రవాద ప్రభావిత ప్రాంతాల్లో అభివృద్ధి పథకాలను మోదీ ప్రభుత్వం అమలు చేయడం ద్వారా ఒక సందేశాన్ని ఉగ్రవాదులకు ఇచ్చిందని అన్నారు. ప్రాణాలు తీసే వారి కన్నా ప్రాణాలను రక్షించే వారే గొప్ప వారన్నదే ఆ సందేశమని కేంద్ర హోం మంత్రి అన్నారు. నక్సలైట్ల మానవ హక్కుల సంగతేమిటంటూ వారి పక్షాన వకాల్తా పుచ్చుకొనే వ్యక్తులు, నక్సలిజం కారణంగా యాతన పడే వారి మానవ హక్కులను గురించి కూడా ఆలోచించాలని కేంద్ర హోం మంత్రి అన్నారు.
వామపక్ష తీవ్రవాదులు హింసామార్గంలో నడవకుండా, సమాజ జనజీవన స్రవంతిలో చేరాల్సిందిగా హోం మంత్రి విజ్ఞప్తి చేశారు. 2026 మార్చి నెల కల్లా వామపక్ష తీవ్రవాదం పూర్తిగా అంతం అవుతుందని, బస్తర్ మళ్ళీ సుందరమైందిగాను, శాంతియుతమైందిగాను, అభివృద్ధి ప్రధానమైందిగాను మారగలదన్న విశ్వాసాన్ని ఆయన వ్యక్తం చేశారు.
***