Ka Kynhun Myntri jong ka sorkar pdeng ba la khlieh da u Myntri Rangbah duh Narendra Modi ka la mynjur ban plie ia ka National Centre of Excellence (NCoE) na ka bynta ka Animation, Visual Effects, Gaming, Comics and Extended Reality (AVGC-XR) kum ka Section 8 Company hapoh ka Companies Act, 2013 ha India bad ka Federation of Indian Chambers of Commerce & Industry bad Confederation of Indian Industry kin mihkhmat  kum ki nongiatreilang bad ka Sorkar India. Ia ka NCoE yn plie ha Mumbai, Maharashtra bad ka jingbud ia ka jingpynbna jong ka tnad Kam Pla Tyngka ia ka Mang Tyngka 2022-23ban sdang ia ka AVGC Task Force ha ka ri.

Ka kam AVGC-XR mynta ka don ka bynta kaba heh ha ka kam Media bad kam Entertainment ba kynthup ka kam shna phlim, ki rynsan Over The Top (OTT), gaming, ki jingpynbna bad shibun kiwei kiwei ki bynta ba kynthup ia ka koit ka khiah, ka pule puthi bad kiwei kiwei ki kam ba iadei bad ka imlang sahlang kaba iadei bad baroh kawei ka jinglong jingman jong ka kam roi ka par jong ka ri. Namar ka jingkylla sted ka teknoloji bad ka jingkiew ka jingpoi ka internet ha kylleng ka ri, ryngkat bad jingduna dor ka data, ka jingpyndonkam ia ka AVGC-XR ha kylleng ka pyrthei kan kiew bun bun shah.

Ka jingtrei borbah ban kyntiew ia ka AVGC-XR sector

Ban pyniahap bad kane ka jingsted, la seng ia ka National Centre of Excellence ban long kum ka jaka treikam ba halor tam ban pyniaid ia ka AVGC-XR ha ka ri. Ryngkat bad ka jingai jinghikai pyntbit bad ki prokram ai jinghikai ban pynkupbor ia kiba dang sdang ba kiba la tbit da kaba ai ki jinghikai halor ki teknoloji AVGC-XR katkum ka juk ba mynta, kane ka NCoE kan kyntiew ruh ia ka jingwad bniah bad ka jingkiew shaphrang bad yn wanrah lang ia ki riewshemphang na ki bynta bapher bapher kum computer science, engineering, design and art ki ban ialam sha ki jingshem ba thymmai ha ka AVGC-XR. Kane ka National Centre of Excellence kan phaikhmat ruh halor ka jingshna ia ka IP jong ka India na ka bynta ka jingdonkam hapoh ri bad shabar ri, ka ban ialam sha ki prokram kiba don nongrim ha ka deiriti ba riewspah jong ka India. Shuh shuh, ka NCoE kan treikam kum ka incubation centre ka ban pynbiang ia ki jingdon jingem ban kyntiew ia ki startup bad ki kompani ba dang sdang ha ka AVGC-XR. Kumjuh ruh, ka NCoE kan trei yn tang kum ka jingpynsted ha ki jingpule hynrei ruh ka jingpynsted ia ka jingpynmih bad ruh ki kam.

Lyngba ka jingbuh ia ka NCoE kum ka bor kaba pyniaid ia ka jingkiew jong ka kam AVGC-XR kan long kum kawei na ki tyllong ba heh tam ha ka jingioh kam ki samla na baroh ki bynta jong ka ri. Kane kan pynkhlain shisha ia ka kam saindur bad pynlong ia ka India ka jaka pdeng jong ki kam AVGC-XR ka ban kyntiew shuh shuh ia ki thong jong ka sienjam Atmanirbhar Bharat.

Ka NCoE na ka bynta ka AVGC-XR kan buh ruh ia ka India kum ka jaka pdeng jong ka jingpynmih prokram da kaba pynbiang ia ki jingshakri katkum ka juk mynta bad jingkyntiew ia ka bor jong ka India ha ka pyrthei bad khring ia ka jingbei tyngka nabar ri sha ka kam Media & Entertainment.

*****