জয় জগন্নাথ!

জয় জগন্নাথ!

ওরিশাগী গভর্নর রঘুবর দাস জী, মফম অসিগী মীয়াম্না পামনরবা মুখ্যমন্ত্রী মোহন মাঞ্জিজী, কেন্দ্রগী মন্ত্রীমন্দলগী ঐহাক্কী মরুপ জুএল ওরামজী, ধর্মেন্দ্র প্রধানজী, অন্নপূর্না দেবীজী, ওরিশাগী দিপুতী সি.এম. ভি. সিংহদেবজী, শ্রীমতী প্রভাতী পরীদাজী, এম.পি.শিং, এম.এল.এ.শিং, লৈবাক অসিগী মফম কয়াদগী ঙসি ঐখোয়গা লোয়ননা শরুক য়ারিবা অতৈ মীথুংলেনশিং অমসুং ওরিশাগী ঐহাক্কী ইচিল ইনাওশিং।

ওরিশাগী ইচিল-ইনাওশিং,

ভগবান জগন্নাথকী কৃপাগী মতুং ইন্না ঙসি অমুক হন্না ঐহাক্না ওরিশাগী অশেংবা লমদম অসিদা লাকপগী খুদোংচাবা ফংলে। করিগুম্বা ভগবান জগন্নাথকী মঙাল লৈরবদি, করিগুম্বা ভগবান জগন্নাথকী য়াইফ-মঙ্গোল লৈরবদি, ভগবান জগন্নাথকী সেবা তৌবগা লোয়ননা মীয়ামগী সেবা তৌবগীসু খুদোংচাবা য়াম্না লৈ।

মরুপশিং,

ঙসি লৈবাক শীনবা থুংনা গনেশ উৎসব পাংথোক্লি, গনপাতিবু বিদাই পীরি। ঙসি অনন্ত চতুর্দশীগী থৌরমসু পাংথোক্লি। ঙসি অসি বিশ্বকর্মা পূজাসুনি। ভারত অসি মালেমদা শিন্মী অমসুং হৈ-শিংববু বিশ্বকর্মাগী মওংদা শকখঙবা অমত্তা ঙাইরবা লৈবাক অমনি। ঐহাক্না লৈবাক মীয়াম পুম্নমকপু বিশ্বকর্মা জয়ন্তীগী য়াইফ-পাউজেলসু পীজরি।

মরুপশিং,

অসিগুম্বা অখন্নবা নুমিৎ অসিদা, ঐহাক্না ওরিশাগী মমাশিং অমসুং ইচিল-ইনাওশিংগীদমক্তা সুভদ্রা য়োজনা হৌদোকপগী খুদোংচাবা ফংলে। অমসুং মসি মহাপ্রভুগী কৃপাসুনি মদুদি স্কিম অসি মাতা সুভদ্রাগী মিংদা হৌদোক্লিবসি অমসুং লোর্দ ইন্দ্র মশামক্না য়াইফ-পাউজেল পীনবা লাক্লি। ঙসিদি, লৈবাক অসিগী ইমুং লাখ 30 হেনবদা ভগবান জগন্নাথজীগী লমদগী লৈবাক অসিগী তোঙান-তোঙানবা খুঙ্গংশিংদা পক্কাগী য়ুমশিং ফংহনখ্রে। মসিগী মনুংদা, ঐখোয়গী লৈবাক অসিগী খুঙ্গংশিংদা য়ুম লাখ 26 অমসুং ঐখোয়গী লৈবাক অসিগী তোঙান তোঙানবা শহরশিংদা য়ুম লাখ 4 পীখ্রে। লুপা করোর লিশিং কয়াগী দিবেলপমেন্ত প্রোজেক্তশিং শঙ্গাখ্রে অমসুং ওরিশাগী চাউখৎ থৌরাংগীদমক উরেপ উয়ুংসু তমখ্রে। ঐহাক্না পুম্নমকপু, ওরিশাগী মীয়াম পুম্নমকপু, লৈবাক অসিগী মীওই পুম্নমকপু থৌরম অসিগীদমক থাগৎচরি।

ইচিল-ইনাওশিং,

ঐহাক বিজেপিগী লুচিং মখাদা অনৌবা সরকার শেমখিবা মতমদা ৱাশক লৌবগী থৌরমগীদমক ওরিশাদা লাকখি। মদুগী মতুংদা মসি ঐগী অহানবা খোঙচৎনি। মীখল পাঙথোকপা মতমদা ঐহাক্না অদোমদা হায়জখি মদুদি করিগুম্বা মফম অসিদা দবল ইঞ্জিন সরকার অমা শেম্লবদি, ওরিশা চাউখৎপগী অনৌবা খোঙজং অমা চংশিনগনি। খুঙ্গংশিংদা লৈরিবা লায়রবশিং, দলিতশিং, ত্রাইবেলশিং অমসুং ঐখোয়গী শোত্থরবা ইমুংশিংনা মংউখিবা মঙলানশিং, ঐখোয়গী মমাশিং, ইচানুপীশিং, নুপীশিংনা মংখিবা মঙলানশিং, ঐখোয়গী নহারোলশিংনা মংখিবা মঙলানশিং, ঐখোয়গী নহা ওইরিবা নুপীশিংনা মংখিবা মঙলানশিং, ঐখোয়গী থবক কন্না তৌরিবা মিদল ক্লাসকী মীওইশিংনা মংখিবা মঙলানশিং অদু মপুং ফাহনগনি, মসি ঐহাক্কী থাজবনি অমসুং মহাপ্রভুগী য়াইফ-মঙ্গোলনি। ঙসিদি ঐখোয়না পীখিবা ৱাশকশিং অসি মমাংদা অমুক্তা ওইখিদ্রিবা মওংদা মপুং ফানা পাংথোক্লি হায়বসি অদোম্না উবা ফংলি। ঐখোয়না হায়খি মদুদি সরকার শেম্লবা মতুংদা, ঐখোয়না ভগবান জগন্নাথকী লাইশঙগী থোঙ মরি অসি হাংদোক্কনি। সরকার শেম্লবা মতুংদা, ঐখোয়না ভগবান জগন্নাথকী লাইশঙগী কমপ্লেক্সকী থোঙ হাংদোক্লে। ঐখোয়না হায়খিবগুম্না, লাইশং অসিগী রত্ন বন্দরসু হাংদোকখি। বি.জে.পি. সরকারনা মীয়ামগী সেবাগীদমক অয়ুক নুংথিল থবক তৌরি। ঐখোয়গী মোহন জী, কে. ভি.গী লুচিং মখাদা সিংহ দেব জী, ভগ্নী প্রভাতি পরিদা জী, অমসুং মন্ত্রী পুম্নমক, সরকার মশামক্না মীয়ামদা চৎলি অমসুং মখোয়গী সমস্যাশিং কোকহন্নবা হোৎনরি। মসিগীদমক্তা ঐহাক্না মফম অসিদা লৈরিবা ঐহাক্কী তীম পুম্নমকপু, ঐহাক্কী কলিগ পুম্নমকপু থাগৎচরি। ঐহাক্না মখোয়বু থাগৎচরি।

ইচিল-ইনাওশিং,

ঙসিগী নুমিৎ অসি অতোপ্পা মরম অমনা অখন্নবা নুমিৎ অমনি। ঙসি অসি কেন্দ্রদা NDA সরকার লৈঙাক পায়রকপগী 100শুবা নুমিৎনি। হায়রিবা মতম অসিদা, লাইরবশিং, লৌমীশিং, নহাশিং অমসুং নুপীশিংগী শক্তি লৈহন্নবা মরুওইবা ৱারেপশিং লৌখ্রে। হৌখিবা নুমিৎ 100 অসিদা লায়রবশিংগীদমক য়ুম করোর 3 শানবা ৱারেপ লৌখ্রে। হৌখিবা নুমিৎ 100 অসিদা নহারোলশিংগীদমক লুপা করোর লাখ 2গী পি.এম. পেকেজ অমা লাউথোকখ্রে। নহা ওইরিবা মরুপশিং অসি মসিগীদমক্তা য়াম্না কান্নবা ফংগনি। মসিগী মখাদা সরকারনা নহারোলশিংদা প্রাইবেৎ কম্পনীশিংদা অহানবা থবক ফংলবা মতমদা অহানবা শেনফম পীগনি। ওরিশা য়াওনা লৈবাক শীনবা থুংনা অনৌবা মেদিকেল সিৎ লিশিং 75 হাপচিনবা ৱারেপ লৌখ্রে। নুমিৎ খরনিগী মমাংদা, খুঙ্গং লিশিং 25বু কোইলা থাবা লম্বীশিংগা শম্নহন্নবা থৌরাংসু অয়াবা পীখ্রে। ঐগী ওরিশাগী খুঙ্গংশিং অসিসু মসিগী কান্নবা ফংলগনি। বজেৎ অসিদা ত্রাইবেল মন্ত্রালয়গী বজেৎ অসি শরুক অনি হেনগৎহনখ্রে। লৈবাক শিনবা থুংনা ত্রাইবেল খুঙ্গং লিশিং 60গী চাউখৎ থৌরাংগীদমক অখন্নবা স্কিম অমা লাউথোকখ্রে। হৌখিবা নুমিৎ 100 অসিদা, সরকারগী এমপ্লোয়ীশিংগীদমক অঙকপা পেন্সন স্কিম অমা লাউথোকখ্রে। ইমপ্লোয়িশিং, দুকান ফম্লিবশিং অমসুং মিদ্দল ক্লাস ওন্তপ্রিনোরশিংগী ইনকম তেক্সসু হন্থহনখ্রে।

মরুপশিং,

হৌখিবা নুমিৎ 100 অসিদা, ওরিশা য়াওনা লৈবাক শীনবা থুংনা অনৌবা লাখ 11 লাখ দিদি শেমখ্রে। ইকুই কুইদ্রিঙৈদা, ফো থাবা লৌমীশিং, ওইল সিদশিং অমসুং তিলহৌগী লৌমীশিংগীদমক অচৌবা ৱারেপ অমা লৌখ্রে। লৈবাক অসিগী লৌমীশিংদগী অহেনবা মমলদা পোৎ-চৈ লৌবা ঙম্নবগীদমক্তা মপান্দগী পোৎ-চৈ পুশিল্লকপগী দ্যুতী হেনগৎহনখ্রে। মসিগী মথক্তা, বস্মতীগী এক্সপোর্ত তৌবগী দ্যুতী হন্থহনখ্রে। মসিনা চেংগী এক্সপোর্ত হেনগৎহল্লগনি অমসুং বস্মতী থারিবা লৌমীশিংনা হেন্না কান্নবা ফংগনি। খারিফ মহৈ-মরোংশিংগী MSP হেনগৎখ্রে। মসিনা লৈবাক অসিগী লৌমী করোর কয়াদা চাউরাক্না লুপা করোর লাখ 2গী কান্নবা ফংহল্লগনি। হৌখিবা নুমিৎ 100 অসিদা, অসিগুম্বা অচৌবা খোঙথাং কয়া অমা পুম্নমক্কী য়াইফনবগীদমক লৌখৎখ্রে।

মরুপশিং,

লৈবাক অমহেক্ত, রাজ্য অমহেক্তগী চাউখৎপা অসি মাগী মীশিং শরুক অমা, হায়বদি ঐখোয়গী নারী শক্তি, অসিনা চাউখৎপদা মান্নবা মওংদা শরুক য়াবা ঙম্লবদি ওইগনি। মরম অদুনা, নুপীশিংগী খুমাং চাউশিনবা, নুপীশিংগী মপাঙ্গল হেনগৎহনবা অসি ওরিশাগী চাউখৎপগী মরুওইবা মন্ত্র ওইরগনি। মফম অসিদা ভগবান জগন্নাথজীগা লোয়ননা দেবী সুভদ্রাগী মফম অসিদা লৈরকপা অসিনা ঐখোয়দা মসি তাক্লি, ঐখোয়দা মসি তাক্লি। ঐহাক্না ঈশ্বরী সুভদ্রাগী মওংদা লৈরিবা মমাশিং, ইচিল-ইনাওশিং অমসুং মচানুপী পুম্নমকপু ইকায় খুম্নবা উৎচরি। অনৌবা বিজেপি সরকার অসিনা ঐখোয়গী ইমাশিং অমসুং ইচিল-ইনাওশিংদা সুভদ্রা য়োজনাগী খুদোংচাবা পীবদা ঐহাক নুংঙাইবা ফাওই। ওদিশাগী নুপী করোর অমা হেন্না মসিগী কান্নবা ফংগনি। স্কিম অসিগী মখাদা, নুপীশিংদা অপুনবা লুপা লিশিং 50 পীগনি। মতম মতমগী ওইনা নহাক্না শেল অসি ফংগনি। মসিগী শেনফম অসি মমাশিং অমসুং ইচিল-ইনাওশিংগী বেঙ্ক একাউন্তশিংদা হকথেংননা থাদোক্লগনি। মসিগী মরক্তা মিদ্দলমেন লৈহন্দনা, হকথেংননা অদোমদা পীগনি। স্কিম অসি RBIগী দিজিতেল কারেন্সি পাইলোৎ প্রোজেক্তকা মরী লৈনহনখ্রে। অদোমগী ইচিল-ইনাও পুম্নমক্না দিজিতেল ওইনা শেনফম অসি মতম চানা দিজিতেল ওইনা শিজিন্নবা য়াগনি। লৈবাক অসিদা মসিগী মখলগী অহানবা দিজিতেল কারেন্সি স্কিম অসিদা শরুক য়াবগীদমক্তা ওরিশাগী মমাশিং, ইচিল-ইনাওশিং, মচানুপীশিং অমসুং নুপী পুম্নমকপু ঐনা থাগৎপা ফোংদোকচরি। সুভদ্রা জোজোনা মা ও  ভৌনি মানাঙ্কু সাশক্ত কারু, মা সুভদ্রঙ্কা নিকত-রে ইহা মাই রায়।

ইচিল-ইনাওশিং,

সুভদ্রা য়োজনা অসি ওরিশাগী মমা, ইচানুপী অমসুং মচানুপী খুদিংমক্তা য়ৌহন্নবা রাজ্য শীনবা থুংনা য়াত্রা কয়া অমা পাংথোক্লি হায়না ঐনা খঙলে। মমাশিং অমসুং ইচিল-ইনাওশিংদা মসিগী মতাংদা খঙহনখ্রে। স্কিম অসিগা মরী লৈনবা ঈ-পাউ পুম্নমক পীরি। ভারত জনতা পার্তীগী থবক তৌরিবা মীওই লাখ কয়ানা মসিগী সর্ভিস কেম্পেন অসিদা মপুং ফানা শরুক য়ারি। মসিগী মীয়ামদা খঙহনবা অসিগীদমক্তা ঐনা সরকার, এদমিনিস্ত্রেসন অমসুং বিজেপিগী এম.এল.এ.শিং, বিজেপিগী এম.পি.শিং অমসুং বিজেপিগী পার্তী ৱার্কর লাখ কয়াবু থাগৎপা ফোংদোকচরি।

মরুপশিং,

ভারত্তা নুপীশিংদা শক্তি পীনবগী অতোপ্পা খুদম অমদি প্রধান মন্ত্রী অৱাস য়োজনা অসিনি। স্কিম অসিনা মরম ওইদুনা, অপীকপা খুঙ্গংশিংদসু প্রোপর্তী অসি নুপীশিংনা মপু ওইরক্লি। ঙসিদি, লৈবাক শীনবা থুংনা লৈরিবা ইমুং লাখ 30 রোমদা গ্রীহ প্রবেস পীখ্রে। ঐখোয়গী সরকার অসিনা অহুমশুবা তর্ম পায়রকপা থা খরা খক্তনি, অমসুং অসিগুম্বা অতেনবা মতমগী মনুংদা, অনৌবা বেনিফিসরী লাখ 15দা ঙসি অয়াবা পীরকখ্রে। কান্নবা ফংলবা মীওই লাখ 10 হেনবগী বেঙ্ক একাউন্তশিংদা শেল থাদোক্লে। ঐখোয়না ওদিশাদগী, মহাপ্রভুগী মফম অসিদগী অফবা থবক অসি পাংথোক্লে। অমসুং ঐগী ওরিশাগী লায়রবা ইমুং কয়া অমসু মসিগী মনুংদা য়াওরি। ঙসি পর্মিনেন্ত য়ুম অমা ফংখ্রবা, নৎত্রগা পর্মিনেন্ত য়ুম অমা ফংলগনি হায়বগী থাজবা ফংখ্রবা ইমুং লাখ কয়াগীদমক, মসি পুন্সিগী অনৌবা হৌরকফম অমসুং মপাঙ্গল কনবা হৌরকফম অমনি।

ইচিল-ইনাওশিং,

ঐহাক মফমসিদা লাক্নদ্রিঙৈ মমাংদা, ঐহাক ঐখোয়গী ত্রাইবেল ইমুং অমগী য়ুমদা গৃহাপ্রবেস থৌরমগীদমক চৎখি। ইমুং অদুদসু মখোয়গী অনৌবা প্রধান মন্ত্রী অৱাস ফংলে। ঐহাক্না ইমুং অদুগী নুংঙাইবা, মখোয়গী মমিৎতা উবা ফংখি নুংঙাইবা অদু কৈদৌঙৈদসু কাউরোই। ঐগী ইচানুপীনা ঐঙোন্দা ত্রাইবেলগী ইমুং অদুদগী খের পীজরকপদা নুংঙাইবা ফাওখি! অমসুং ঐহাক্না খের চাবা মতমদা, ঐহাক্না ঐহাক্কী ইমাবু নীংশিংলকপা অসি মহৌশানি, মরমদি ঐহাক্কী ইমা হিংলিঙৈ মতমদা, ঐহাক্না মতম পুম্নমক্তা ঐহাক্কী ইপোক নুমিৎকী য়াইফ পাউজেল লৌনবা চৎখি, অমসুং মহাক্না ঐহাকপু জগরী পীজখি। অদুবু ঐগী মমা মফম অসিদা লৈত্রে, ঙসি ত্রাইবেলগী মমা অমনা ঐঙোন্দা খের পীজখি অমসুং ঐগী ইপোক নুমিৎতা য়াইফ-পাউজেল পীখি। মসিগী এক্সপরিয়েন্স অসি, মসিগী ফীভম অসি ঐহাক্কী পুন্সিগী কেপিতেলনি। খুঙ্গংগী লায়রবশিং, দলিতশিং, শোত্থরবশিং, ত্রাইবেলশিংগী পুন্সিদা অহোংবা অসি লাকপা, মখোয়গী নুংঙাইবা অসিনা ঐঙোন্দা হেন্না কন্না থবক তৌনবগী ইনর্জী পীরি।

মরুপশিং,

ওরিশাদা চাউখৎলবা রাজ্য অমগী মথৌ তাবা পুম্নমক লৈ। মাগী নহারোলশিংগী তেলেন্ত, নুপীশিংগী পাঙ্গল, মহৌশাগী রিসোর্সশিং, ইন্দস্ত্রীশিংগী খুদোংচাবশিং, তুরিজমগী অচৌবা ওইথোকপা য়াবশিং, মফম অসিদা লৈতবা করিগুম্বা অমত্তা লৈব্রা? হৌখিবা চহি 10 অসিদা, সেন্তরদা লৈদুনা ঐখোয়না ওরিশা অসি ঐখোয়গীদমক মতৌ করম্না মরু ওইবা মফম অমা ওইবগে হায়বদু উৎখ্রে। ঙসিদি ওরিশানা চহি 10গী মমাংদা কেন্দ্রদগী ফংবা শেনফম অদুদগী শরুক অহুম হেন্না ফংলি। ঐহাক্না নুংঙাইবা ফাওই মদুদি মমাংদা পায়খৎপা ঙমখিদ্রবা স্কিমশিং অসি হৌজিক ওরিশাদা পায়খৎলি। আয়ুশ্মান য়োজনাগী মখাদা, ওরিশাগী মীয়ামদা লুপা লাখ 5 ফাওবগী লেম্না লায়েংবগী কান্নবা ফংলগনি। অমসুং মসি খক্তা নত্তনা, হৌজিক কেন্দ্র সরকারনা চহি 70গী মথক্তা লৈবা সেনিয়র সিতিজনশিংগীদমক লুপা লাখ 5 ফাওবগী ওইবা লায়েং অসি লেম্না ফংহল্লে। অদোমগী ইনকম করিনো, অদোমগী য়ুমদা চহি 70গী মথক্তা লৈবা সেনিয়র সিতিজেনশিং লৈরবদি, মখোয়গী লায়েং অদু মোদীনা য়েংশিনগনি। লোক সভাগী মীখলগী মতমদা মোদীনা অদোমদা ৱাফম অসি থাজবা পীরম্মি অমসুং মোদীনা মহাক্কী থাজবা অদু মপুং ফাহনখ্রে।

মরুপশিং,

বিজেপিনা লায়রবগী মায়োক্তা চংশিল্লিবা কেম্পেন অসিগী খ্বাইদগী চাউবা কান্নবা অসি ওরিশাদা লৈবা দলিত, লায়রবা অমসুং ত্রাইবেল কম্ম্যুনিতিনা ফংলি। ত্রাইবেল কম্ম্যুনিতীগী য়াইফনবগীদমক তোঙানবা মন্ত্রালয় অমা শেম্বা, ত্রাইবেল কম্ম্যুনিতীদা মখোয়গী লমদা হক পীবা, ত্রাইবেল নহাশিংদা মহৈ-মশিং অমসুং থবক পীবা নৎত্রগা ওদিশাগী ত্রাইবেল নুপী অমবু লৈবাক অসিগী ইকাই খুম্নরবা রাস্ত্রপতি ওইহনবা ওইরো, ঐখোয়না অহানবা ওইনা থবকশিং অসি পাংথোক্লে।

মরুপশিং,

ওরিশাদা ত্রাইবেল এরিয়া অমসুং ত্রাইবেল কাংলুপ কয়া অমা লৈরম্মি অমসুং মখোয়শিং অসি চহি কয়াদগী চাউখৎপা ফংদ্রি। কেন্দ্র সরকারনা পি.এম. জনমন য়োজনা অসি ত্রাইবশিংগী মরক্তা খ্বাইদগী মতিক চাদবা ত্রাইবশিংগীদমক্তা হৌদোকখ্রে। ওরিশাদা অসিগুম্বা ত্রাইব 13 মশক খঙদোকখ্রে। জনমান য়োজনাগী মখাদা সরকারনা হায়রিবা কম্ম্যুনিতী পুম্নমক্তা দিবেলপমেন্ত স্কিমশিংগী কান্নবা ফংহল্লি। ত্রাইবেলগী মফমশিং অসি সিকল সেল এনেমিয়াদগী মনিংতম্ননবা কেম্পেন অমা চত্থরি। হৌখিবা থা অহুম অসিদা, মীওই লাখ ১৩ হেন্না মসিগী কেম্পেন অসিগী মখাদা স্ক্রিনিং তৌখ্রে।

ইচিল-ইনাওশিং,

ঙসিদি, ঐখোয়গী লৈবাক অসিনা মমাংদা অমুক্তা ওইখিদ্রিবা মওংদা ত্রেদিস্নেল স্কিলশিং ঙাক-শেন্দুনা থম্বদা মীৎয়েং থম্লি। চহি চা কয়া অমসুং লিশিং কয়াগী মমাংদগী, ঐখোয়গী মফমদা য়োৎ শুবা, চফু শাবা, সনা শাবা, খুৎহৈবগী থবক তৌরিবা মীওইশিং লৈরক্লি। অসিগুম্বা তোঙান-তোঙানবা শিনফম 18 অসি ৱাখলদা থমদুনা, বিশ্বকর্মা য়োজনা অসি হৌখিবা চহিদা বিশ্বকর্মা নুমিৎতা হৌদোকখি। সরকারনা স্কিম অসিগীদমক লুপা করোর লিশিং 13 চাদিং তৌরি। হৌজিক ফাওবদা, মীওই লাখ 20না মসিদা রেজিস্তর তৌখ্রে। মসিগী মখাদা বিশ্বকর্মা কম্মপেনিয়নশিং ত্রেন তৌরি। অনৌবা খুৎলাইশিং লৌনবা লুপা লিশিং কয়া পীরি। মসিগা লোয়ননা বেঙ্কশিংনা গরেন্তী য়াওদনা মমল হোংবা লোনশিং পীরি। লায়রবশিংগী হকশেলগী সেক্যুরিতীদগী হৌরগা খুন্নাইগী অমসুং শেন্মিৎলোনগী সেক্যুরিতী ফাওবদা, মখোয়গী পুন্সিদা অহোংবা পুরকপা অসি চাউখৎলবা ভারতকী অশেংবা শক্তি ওইগনি।

মরুপশিং,

ওরিশাগী কোস্তলাইন অসি য়াম্না চাউই। মসিদা মিনরেল রিচার্জ, নেচরেল রিচার্জ কয়া অমা লৈ। ঐখোয়না মসিগী রিসোর্সশিং অসি ওরিশাগী শক্তি ওইহনগদবনি। লাক্কদৌরিবা চহি 5 অসিদা ঐখোয়না ওরিশাগী লম্বী অমসুং রেলগী কন্নেক্তিবিতীবু অনৌবা অৱাংবা থাক্তা পুখৎকদবনি। ঙসিসু মফম অসিদা রেল অমসুং লম্বীগা মরী লৈনবা প্রোজেক্ত কয়া অমা শঙ্গাখ্রে। ঙসি ঐহাক্না লঞ্জিগর রোদ-অম্বোদলা-দোইকালু রেলৱে লাইন লৈবাক অসিদা কৎথোকপগী খুদোংচাবা ফংলে। লক্ষ্মীপুর রোদ-সিঙ্গরাম-তিক্রি রেলৱে লাইনসু ঙসি লৈবাক অসিদা কত্থোকখ্রে। মসিগা লোইননা, ধেঙ্কানল-সাদাশিবপুর-হিন্দোল রোদ রেলৱে লাইনসু লৈবাক মীয়ামদা কত্থোক্লগনি। পেরাদীপকী কনেক্তিবিতী হেঙ্গৎহন্নবা থবক কয়া অমসু ঙসিদগী হৌখ্রে। ঐহাক্না জয়পুর-নৱরঙ্গপুর অনৌবা রেলৱে লাইনগী উরেপ উয়ুংসু তমবগী খুদোংচাবা ফংজখি। প্রোজেক্তশিং অসিনা ওরিশাগী নহারোলশিংদা থবক ফংহন্নবা অনৌবা খুদোংচাবা কয়া অমা পীগনি। পুরীদগী কোনার্ক ফাওবগী রেলৱে লাইনগী থবকসু খোঙজেল য়াংনা হৌগদৌরিবা নুমিৎ অদু লাক্কদবা কুইদ্রে। ওরিশাদা য়াম্না থুনা হাই-তেক 'নমো ভারত রেপিদ রেল' ফংলগনি। মসিগী মোদর্ন ইনফ্রাস্ত্রকচর অসিনা ওরিশাদা অনৌবা খুদোংচাবশিং ফংহল্লগনি।

মরুপশিং,

ঙসি, সেপ্তেম্বর 17দা লৈবাক অসিনা হায়দ্রাবাদ লিবরেসন দেসু পাংথোক্লি। ঐখোয়গী লৈবাক অসি নীংতম্লবা মতুংদা ওইরকখিবা ফিভমশিং, মপানগী শক্তিশিংনা লৈবাক অসিবু শরুক কয়া থোক্না খায়দোকপা পাম্বা মওংশিং। মতৌ করম্না ওপোর্চুনিস্তশিংনা শক্তি ফংনবগীদমক্তা লৈবাক অসিবু শরুক য়ামথোক্নবা শেম-শাদুনা লৈখিবনো। সর্দার পতেলনা অসিগুম্বা ফিভমশিংদা মাংলোমদা চংশিনখি। অখন্নবা ৱারেপ লৌবগী থৌনা উৎতুনা মহাক্না লৈবাক অসিবু অমত্তা ওইনা পুনশিনখি। সেপ্তেম্বর 17দা হায়দ্রাবাদতা ভারতকী মায়োক্তা লৈবা ফন্দামেন্তেলিস্ত ফোর্সশিংবু থিংদুনা হায়দ্রাবাদ অসি নীংখা তম্বা ঙমখি। মরম অদুনা, হায়দ্রাবাদ লিবরেসন দে অসি তাং অমখক্তমক নত্তে। মসিনা লৈবাক অসিগী ইন্তিগ্রিতিগীদমক, লৈবাক অসিগীদমক ঐখোয়গী থৌদাংশিং অসিগীদমক্তা ইথিল পীরি।

মরুপশিং,

মরুওইবা নুমিৎ অসিদা, ঐখোয়না লৈবাক অসিবু মাংলোমদা চংশিনবা হোৎনরিবা শীংনবশিংদসু পুক্নিং চংবা মথৌ তাই। ঙসি, ঐখোয়না গনপতি বাপ্পাবু থাগৎচরিঙৈদা, ঐহাক্না মসিগা মরী লৈনবা হীরম অমা পুথোরক্লি। গনেশ উৎসব অসি ঐখোয়গী লৈবাক অসিগী থাজবগী কুহ্মৈ খক্তা নত্তে। গনেশ উৎসাবসু ঐখোয়গী লৈবাক অসিগী নীংতম্বা ফংবদা য়াম্না মরু ওইবা থৌদাং অমা লৌখি। বৃতিশশিংনা মখোয়গী শক্তিগী অপাম্বা লৈবদগী লৈবাক অসিবু খায়দোক্নবা হোৎনরিঙৈদা। কাস্তকী মিংদা লৈবাক অসি লান্থেংহনবা, খুন্নাই অসিবু মৈ থাদোকপা, ‘দিবাইদ এন্দ রুল’ অসি বৃতিশকী খুৎলায় ওইরকখি, অদুগা লোকমান্য তিলকনা গনেশ উৎসবকী মীয়ামগী থৌরমগী খুত্থাংদা ভারতকী থম্মোয়বু চিংশিনখি। অৱাংবা-অনেম্বা, খেন্নবা, কাংলুপ খায়বগী ৱাংমদা লৈদুনা, ঐখোয়গী ধর্মনা ঐখোয়বু অমত্তা ওইনবা তাকপীরি, গনেশ উৎসব অসি মসিগী খুদম অমা ওইখি। ঙসিসু, গনেশ উৎসব পাংথোকপা মতমদা, মীপুম খুদিংমক্না শরুক য়ারি। খেন্নবা অমত্তা লৈতে, খেন্নবা অমত্তা লৈতে, খুন্নাই পুম্বনা শক্তি অমা ওইনা, শক্তি লৈরবা অমা ওইনা লেপ্লি।

ইচিল-ইনাওশিং,

মতম অদুদসু, ‘দিবাইদ এন্দ রুল হায়বা পোলিসী অদু ঙাক্লিবা বৃতিশশিনা 'গনেশ উৎসাব'বু নুংঙাইতবা ওইনা লৌখি। ঙসিসু, খুন্নাই অসিবু খায়দোকপা অমসুং থুগাইবদা থৱায় য়াওরিবা, শক্তি পামজবা মীওইশিংনা গনেশ পূজাগী খুদোংচাদবা কয়া থেংনরি। অদোম্না কংগ্রেসকী মীয়াম অমসুং মসিগী ইকোসিস্তেম অসি হৌখিবা নুমিৎ খরনি অসিদা ঐহাক্না গনপতি পূজাদা শরুক য়াখিবদগী নুংঙাইতবা ফোংদোকখিবা অদু উবা ফংলমনি। অমসুং কর্নাতকাদা, মখোয়দা সরকার অমা লৈ, হায়রিবা মীওইশিং অসিনা হেন্না চাউবা ক্রাইম অমা তৌখি। হায়রিবা মীওইশিং অসিনা ভগবান গনেশকী মীতমবু শো লোনশিনখি। লৈবাক শীনবা থুংনা ফোতোশিং অদু য়েংদুনা অৱাবা ফোংদোকখি। অসিগুম্বা য়েক্নবগা মরী লৈনবা ৱাখল্লোন অসি, খুন্নাই অসিবু শোকহন্নবা ৱাখল্লোন অসি ঐখোয়গী লৈবাক অসিগীদমক্তা য়াম্না খুদোংথিনিংঙাইনি। মরম অদুনা, ঐখোয়না অসিগুম্বা নুংশিদবা পুক্নিংগী থৌওংশিং অসিবু মাংলোমদা চংশিনবা থীংবা তাই।

মরুপশিং,

ঐখোয় পুন্না হোৎনমিন্নরগা ঐখোয়না অচৌবা মাইপাকফম কয়া অমা ফংবা ঙমগনি। ঐখোয়না ওদিশা, ঐখোয়গী লৈবাক অসিবু মাই পাকপগী অনৌবা থাক্তা পুখৎকদবনি। ওরিশাগী মীয়াম্না ঐবু শৌগৎলি, মোদী-রো অসা, সারা ভারত কোহিবো, সুন্না-রো ওরিশা। চাউখৎপগী খোঙজেল অসি লাক্কদৌরিবা মতমশিংদা মখা তানা হেনগৎলগনি হায়না ঐনা থাজবা থম্লি। ঐনা অমুক্কা হন্না ময়াম পুম্নমকপু থাগৎচরি। ঐগা লোয়ননা হায়বিয়ু-

জয় জগন্নাথ!

জয় জগন্নাথ!

জয় জগন্নাথ!

ভারত ইমানা য়াইফরে।

ভারত ইমানা য়াইফরে।

হন্না-হন্না থাগৎচরি!

***