ঙসি প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা চহি অনিদা লুপা করোর ২,০০০গী শেনফম অমা কাইথোক্তুনা নোংজু-নুংশাগী হেন্না থৌরাং তৌনবা অমসুং ক্লাইমেত স্মার্দ ভাবন শেমগৎনবা ‘মিসন মৌসম’ অয়াবা পীরে।

আর্থ সাইন্সেস মিনিস্ত্রিনা লুচিংদুনা পায়খৎকদবা মিসন মৌসম অসিনা ভারতকী নোং-চিংগী ফিবম অমসুং অইং-অশাগা মরী লৈনবা সাইন্স, থিজিনবা অমসুং থবকশিং মপুংফানা ফগৎহন্নবা মখল কয়াগী অওনবা পুরক্নবা পান্দম থম্লি। মসিনা মীয়াম অমসুং মনুং-হুঞ্জিনবদা লৈরিবা মীওইশিং কা হেনবা নোংজু-নুংশাগী থৌদোকশিং থেংনবা অমসুং অইং-অশাগী খল হোংলকপগী খুদোংচাদবশিং মায়োক্নবা ঙম্নবা মীয়াম য়াওনা মরী লৈনবশিং হেন্না খুদোংচাহনগনি। থাজবা থম্লিবা থৌরম অসিনা মীয়াম মরক্তা, সেক্তরশিংদা অমসুং থবকশিংদা মতম শাংনা থবক তৌবা ঙম্বা হেনগৎহনগনি অমসুং খুদোংচাদবা কয়া মায়োক্নবা ঙমহনগনি।

মিসন মৌসমগী শরুক অমা ওইনা, নোংজু-নুংশাগী ফিবম য়েংশিনবা, মোদেল্লিং, মাঙজৌননা লাউথোকপা অমসুং শেন্নবা য়াওনা এতমোস্ফেরিক সাইন্সতা ভারতনা থিজিনবা অমসুং চাউখৎপা অঙকপা ফংনা হেনগৎহনগনি। অৱাংবা থাক্কী য়েংশিনবগী থবকশিং পুনশিন্দুনা, অৱাংবা থাক্কী কম্পুতরগী থবকশিং অমসুং এ.আই অমসুং মেছিন লার্নিংগুম্বা অনৌবা তেক্নোলোজিশিং শীজিন্নদুনা য়াম্না চুম্না নোংজু-নুংশাগী ফিবম মাঙজৌননা লাউথোকপদা মিসন মৌসমনা অনৌবা খুদোংচাবা অমা ফংহনগনি।

কুমগী নোং মাঙজৌননা লাউথোকপা, নুংশিৎ শেংবা নত্ত্রগা শেংদবগী মরমদা খঙহনবা, কা হেনবা নোং-চিংগী ফিবমশিং অমসুং নোংলৈ-নুংশিৎ মাঙজৌননা লাউথোকপা, লৈচিল থাবা, লেন তাবা অমসুং নোং তাবা থেংননবা কেপাসিতি বিল্দিং অমসুং মীয়াম ৱাখল তাহনবা য়াওনা মতম চানা অমসুং চপ চানা নোংজু-নুংশাগী ফিবম খঙহন্নবা য়েংশিনবগী থবক ফগৎহন্নবা মিসন অসিনা পান্দম থম্লি। মিসন মৌসমগী মরুওইবা মচাকশিংগী মনুংদা এদভান্স সেন্সরশিং অমসুং অফবা মখলগী সুপরকম্পুতরশিংগা লোয়ননা অনৌবা রাদারশিং অমসুং সেতেল্লাই সিস্তেমশিং, অফবা আর্থ সিস্তেম মোদেলশিং শীজিন্নবা অমসুং খুদক্তা দেতা পীনবা জি.আই.এস-বেজ ওতোমেতেদ দিসিজন সপোর্ত সিস্তেম য়াওরি।  

মিসন মৌসমনা লৌউ-শিংউ, মহৌশাগী ওইবা অমাং-অতা থেংনবা, ঙাক-শেন, মহৌশাগী অকোয়বা ফিবম, এভিএসন, ঈশিং ফংফমশিং, পৱার, তুরিজম, জহাজ হোনবা, চৎথোক-চৎশিন, ইনর্জি অমসুং হকশেলগুম্বা হিরমশিংদা হকথেংননা কান্নবা পীগনি। মসিনা সহর প্লান তৌবা, লম্বী অমসুং রেল, সমুদ্রা মপানগী থবকশিং অমসুং মহৌশাগী অকোয়বগী ফিবম য়েংশিনবা য়াওনা হিরম কয়াদা দেতাদা য়ুম্ফম ওইদুনা ৱারেপশিং লৌবা হেনগৎহনগনি।

আর্থ সাইন্সেস মিনিস্ত্রিগী ইন্সতিতুৎ অহুম হায়বদি ইন্দিয়া মেতিওরোলোজিকেল দিপার্তমেন্ত, ইন্দিয়ান ইন্সতিতুৎ ওফ ত্রোপিকেল মেতিওরোলোজিকেল অমসুং নেসনেল সেন্তর ফোর মেদিয়ম-রেঞ্জ ৱেদর ফোরকাস্তিংনা মিসন মৌসম থবক ওইনা পায়খৎকনি। হায়রিবা ইন্সতিতুৎশিং অসি মিনিস্ত্রিগী অতোপ্পা ইন্সতিতুৎশিংনা (ইন্দিয়ান নেসনেল সেন্তর ফোর ওসিন ইনফোর্মেসন সর্বিসেস, নেসনেল সেন্তর ফোর পোলার এন্দ ওসিন রিছার্স অমসুং নেসনেল ইন্সতিতুৎ ওফ ওসিন তেক্নোলোজি) শৌগৎলি অমসুং লৈবাক অসিগী অমসুং মালেমগী ইন্সিতিতুৎশিং অমসুং ইন্দস্ত্রিশিংগা পুন্না থবক তৌমিন্নরি।

*****