Ka Kynhun Myntri ba la khlieh da u Myntri Rangbah duh Narendra Modi, ka la mynjur ia ka skhim “PM-eBus Sewa-Payment Security Mechanism (PSM)” ban thied bad pyntreikam ia ki e-bus da ki Public Transport Authority (PTA) ha ka jingmang kaba T. 3,435.33 klur.

Kane ka skhim kan kyrshan ia ka jingpyntreikam palat 38,000 tylli ki electric bus (e-Bus) naduh u snem mang tyngka 2024-25 haduh u snem mang tyngka 2028-29. Ka skhim kan kyrshan ia ka jingpyntreikam ia ki e-bus na ka bynta ka samoi haduh 12 snem naduh ka tarik ba la pyntreikam.

Mynta, bun na ki bus la pyntreikam da ki Public Transport Authority (PTA) ki dei kiba iaid da ka diesel/CNG, kaba ktah ia ka mariang. Ha kawei pat ka liang, ki e-bus kilong kiba iahap bad ka mariang bad ka duna jinglut. Hynrei la antad ba ki Public Transport Authority (PTA) kin shem jingeh ban thied bad pyntreikam ia ki e-bus namar ka jinglut jingsep kaba bun bad ka jingduna ka jingioh jingkamai haba la pyntreikam.

Ban weng ia ka jinglut kaba bun jong ki e-bus, ki Public Transport Authority (PTA) ki la wanrah ia kine ki bus lyngba ka Public Private Partnership ha ka rukom Gross Cost Contract (GCC). Ki PTA kim donkam ban siew ia ka jinglut jong ka bus hapoh ka rukom GCC, hynrei ki OEM/ ki nongpyniaid ki thied bad pyntreikam ia ki e-bus na ka bynta ki PTA ha ka jingsiew kaba man ka bnai. Hynrei, ki OEM/ ki nongpyniaid ki artatien ban trei ha kane ka rukom namar ki jingsngewkhia shaphang ki jingma jong ka jing bym ioh jingsiew.

Ka skhim ka weng ia kane ka jingsngewkhia da kaba pynthikna ia ki jingsiew ha ka por sha ki OEM/ ki nongpyniaid lyngba ka fund kaba dei na ka bynta kane. Lada don ka jingbym siew da ki PTA, ka CESL, ka kynhun kaba pyntreikam, ka lah ban siew na ka fund jong ka skhim ia ka ban sa siew pat hadien da ki PTA/Jylla/UT.

Kane ka sienjam ka pynsuk ban pyntreikam ia ki e-bus da kaba pynshlur ia ka jingiashim bynta ki riewshimet. Ka skhim kan ialam ruh sha ka jing duna ka jingpyllait ia ka greenhouse gas bad pynduna ruh ka jingdonkam fossil fuel. Ka skhim kan ai jingmyntoi ia baroh ki Public Transport Authority (PTA) ba don ha ka Jylla/UT kiba shim ia ka skhim.

*****