ঙসি প্রধান মন্ত্রী শ্রী নরেন্দ্র মোদীনা লুচিংদুনা ৭, লোক কলয়ান মার্গতা লৈবা মহাক্কী য়ুমদা সেমিকন্দক্তর ইজুক্যুতিপশিংগী মীফম পাংথোকখ্রে।

মীফম মনুংদা প্রধান মন্ত্রীনা হায়খি মদুদি মখোয়গী অনৌবা ৱাখল্লোনশিংনা মখোয়গী ললোন-ইতিক্কী ফিবম লেপ্পা খক নত্তনা ভারতকী তুংগী ফিবমশু লেপকনি। লাক্লিবা মতম অসি তেক্নোলোজিনা লমজিংগনি। সেমিকন্দক্তরশিং দিজিতেল এজগী য়ুম্ফমনি অমসুং ঐখোয়গী তঙাইফবা পোৎলমশিং ফাওবা সেমিকন্দক্তর ইন্দস্ত্রিদা য়ুম্ফম ওইগদবা নুমিৎ অদু পংকুই কুইদ্রে।

প্রধান মন্ত্রীনা হায়খি, গনতন্ত্র অমসুং তেক্নোলোজিনা পুন্না মীওইবা খুন্নাই নুংঙাইহনবা ঙমগনি অমসুং সেমিকন্দক্তর সেক্তরদা লৈবাক অসিগী মালেমগী থৌদাং অদু খঙবগা লোয়ননা লম্বী অসিদা ভারত মাঙলোমদা চঙশিল্লি।

প্রধান মন্ত্রীনা হায়খি মদুদি চাউখৎপগী য়ুম্বীশিংগী মনুংদা খুন্নাই, দিজিতেল অমসুং ফিজিকেল ইনফ্রাস্ত্রকচর শেমগৎপা, মীওই খুদিংমক কোনশিনবা চাউখৎপা, চৎন-কাংলোনশিং ঙাক্না চৎপগী অৱাবা হন্থহনবা, মেনুফেকচরিং অমসুং ইন্নোবেসনশিংদা শেন থাদবা হেনগৎহনবা য়াওরি। মখল কয়াগী সেমিকন্দক্তর সপ্লাই চেন অমদা থাজবা মরুপ অমা ওইবা ঙম্বগী থৌনা ভারতকী লৈরি।

ভারতকী হৈশিং মীওই কয়া লৈরিবা অমসুং উদ্যোগ অসিগী ত্রেন তৌরবা শিন্মীশিং ফংহন্নবা স্কিল লৈহন্নবা সরকারনা পায়খৎলিবা থবকশিংগী মতাংদা প্রধান মন্ত্রীনা হায়খি মদুদি  মালেমগী ওইনা চাংদম্নবা ঙমগদবা পোৎথোকশিং পুথোক্নবা ভারতনা মীৎয়েং চঙলে। ভারত অসি অৱাংবা তেক্নোলোজিগী ইনফ্রাস্ত্রকচরদা শেন থাদনবা অচৌবা কৈথেল অমনি অমসুং ঙসি সেমিকন্দক্তর সেক্তরদা লুচিংবশিংনা ফোঙদোক্লিবা হরাওবা অসিনা সেক্তর অসিদা থবক কন্না শুনবা সরকারগী পুক্নিং থৌগৎলগনি।

মাংজৌন্না খঙবা ঙম্বা অমসুং তুংদু লৈতাবা থৌশিলগী লৈঙাক অমা সরকারনা লৈহনগনি হায়না প্রধান মন্ত্রীনা লুচিংবশিংদা থাজবা পীখ্রে। প্রধান মন্ত্রীনা হায়খি, মেক ইন ইন্দিয়া অমসুং মেক ফোর ৱার্ল্দদা মীৎয়েং থমদুনা, খোঙথাং খুদিংমক্তা সরকারনা মখা তানা উদ্যোগ অসি শৌগৎকনি।

সেমিকন্দক্তর সেক্তর চাউখৎনবা ভারতনা পীরিবা থাজবা অসিদা সি.ই.ওশিংনা থাগৎপা ফোঙদোকখি অমসুং হায়খি মদুদি অপুনবা সেমিকন্দক্তর সেক্তরগী লুচিংবশিং মফম অমদা পুনবা ঙসিগী মীফম অসি মমাঙদা অমুক্তা পাংথোকখিদ্রি। সেমিকন্দক্তর ইন্দস্ত্রিগী তুংগী খুদোংচাবশিং অমসুং চাউখৎলক্নবগী খুদোংচাবশিংগী মরমদা মখোয়না ফোঙদোকখি। মখোয়না হায়খি লৈবাক অসিদা উদ্যোগ অসিগী চুনবা ফিবম লৈবদগী সেমিকন্দক্তর ইন্দস্ত্রিগী মাইওন অসি ভারত্তা ওনবা হৌরক্লে। সেমিকন্দক্তর সেক্তরদা ভারত মালেমগী মেপ্তা য়াওদুনা হৌজিক লৈবাক অসিদা উদ্যোগ অসিগী চুনবা ফিবম অমা লৈরে। মখোয়না থম্লিবা থাজবশিং ফোঙদোক্লদুনা মখোয়না হায়খি মদুদি ভারতকী অফবা অদু মালেমগী অফবা ওইগনি। সেমিকন্দক্তর সেক্তরদা রো মেতরিয়েলশিংগী মালেমগী মফম অমা ওইরক্নবা ভারতকী অঙকপা খুদোংচাবা লৈরি।

ভারত্তা লৈরিবা ললোন-ইতিক্কী নুংঙাইরবা ফিবম অসি থাগৎলদুনা, মখোয়না হায়খি মদুদি মালেমগী হৌজিক ওইরিবা রাজনিতিগী অরুবা ফিবম অসিদা, ভারত তুংদু লৈতানা লৈরি।  উদ্যোগ অসিদা ভারত অসি শেন থাদনবগী মফম অমনি হায়বা অমতা ওইনা য়ানরে। মমাঙদা প্রধান মন্ত্রী মোদীনা পুক্নিং থৌগৎখিবা অদু নিংশিংলদুনা, মখোয়না হায়খি মদুদি ঙসি ভারত্তা লৈরিবা মশিং য়াম্লবা খুদোংচাবশিং অসি মমাঙদা লৈরমদে অমসুং ভারতকা লোয়ননা থবক তৌমিন্নবদা মখোয়দা চাউথোকচবা ফাওরে।

মীফম অদুদা শরুক য়াখিবা সি.ই.ওশিং, তোঙান-তোঙানবা লুপশিংগী লুচিংবশিং অমসুং মীহুৎশিংগী মনুংদা সেমি, মাইক্রোন, এন.এক্স.পি, আই.এম.ই.সি, রেনেসাস, তি.ই.পি.এল, তোকিয়ো ইলেক্ত্রোনিক লিমিতেদ, তৱার, সিনোপসিস, কাদেন্স, রাপিদস, জেকোবস, জে.এস.আর, ইনফিনিয়োন, এদভানতেস্ত, তেরাদাইনে, এপ্লাইদ মেতরিয়েলস, লাম রিছাসঘ, মার্ক, সি.জি পৱার অমসুং কাইনেস তেক্নোলোজি য়াওখি। মীফম অদুদা স্তেনফোর্দ য়ুনিভর্সিতি, কালিফোর্নিয়া সান দাইগো য়ুনিভর্সিতি অমসুং আই.আই.তি ভুবানেশ্বরগী প্রোফেসারশিংশু শরুক য়াখি।

***