প্রধানমন্ত্রীগী লোইশঙ
জোধপুরদা পাংথোকখিবা রাজস্থান হায় কোর্তকী প্লেনিতম জুবিলী পালন থৌরমদা থমখিবা পি.এম.গী ৱারোল
Posted On:
25 AUG 2024 6:53PM by PIB Imphal
থৌরম অদুদা রাজস্থানগী রাজ্যপাল শ্রী হরিবাউ কৃষ্ণরাও বাগদেজী, রাজস্থানগী মীয়ামনা পাম্নরিবা মুখ্য মন্ত্রী শ্রী ভজনলাল শর্মা, জস্তিস শ্রী সঞ্জীব খান্নাজী, লৈবাক অসিগী লো মন্ত্রী শ্রী অর্জুনরাম মেঘৱালজী, রাজস্থান হায় কোর্তকী চীফ জস্তিস শ্রী মনীন্দ্র মোহন শ্রীবাস্তবজী, অতৈ ইকাই খুম্নরবা জজশিং, জস্তিসকী লম অসিদগী শক্নাইরবা মীওইশিং, নুপী অমসুং নুপাশিং!
অহানবদা, ঐহাক্না ময়াম পুম্নমক্কী মফমদা নুংঙাইতবা ফোংদোকচরি মরমদি ঐহাক্না মফম অসিদা লাকপদা চাউরাক্না মিনিত ১০ য়ৈথখি। মরমদি ঐহাক মহারাস্ত্রদগী থোকরখি, অদুবু ৱেদর ফত্তবনা মরম ওইদুনা মতম চানা লাকপা ঙমখিদে অমসুং মসিগীদমক্তা ঐহাক্না পুম্নমক্কী মফমদা ঙাকপীনবা হায়জরি।
মরুপশিং,
ঐহাক্না নুংঙাইবা ফাওই মদুদি ঙসি রাজস্থান হায় কোর্তকী প্লাতিনম জুব্লিগী থৌরমদা পুম্নমক্কী মরক্তা শরুক য়াবগী খুদোংচাবা ফংজরে। ঐখোয়গী সম্বিধানসু চহি ৭৫ মপুং ফারকপা মতম অসিদা রাজস্থান হায় কোর্তনা চহি ৭৫ মপুং ফারক্লি। মরম অদুনা, মসিসু অচৌবা মীওই কয়াগী কত্থোকপা অমসুং থৌদাংশিংবু নীংশিংনবগী থৌরম অমনি। মসিসু সম্বিধানদা ঐখোয়গী থাজবগী খুদম অমনি। ঐহাক্না পুম্নমক, আইনগী শক্নাইরবশিং অমসুং রাজস্থানগী মীয়াম্বু থৌরম অসিগী নুংঙাইবা ফোংদোকচরি অমসুং য়াইফ-পাউজেল পীজরি।
মরুপশিং,
ঐখোয়গী জাতিগী অমত্তা ওইবগী পুৱারী অসি রাজস্থান হায় কোর্ত লৈরকপগা মরী লৈনৈ। পুম্নমক্না খঙনরবনি, সরদার বল্লভভাই পতেলনা লৈবাক অসিগী নীংথৌ পানবা লৈবাক ৫০০ হেন্না পুনশিন্দুনা লৈবাক অসিবু অমত্তা ওইনা পুনশিনখিবা অদুদা রাজস্থানগী নীংথৌ পানবা লৈবাক কয়াসু য়াওখি। জয়পুর, উদয়পুর অমসুং কোতাগুম্বা নীংথৌ পানবা লৈবাক কয়াদসু মখোয় মশাগী হায় কোর্তশিং লৈরম্মি। মখোয়বু পুনশিনবনা মরম ওইদুনা রাজস্থান হায় কোর্ত লৈরকখি। হায়বদি, নেস্নেল য়ুনিতী অসি ঐখোয়গী জুদিসিএল সিস্তেমগী ফাউন্দেসন স্তোনসু ওইরি। মসিগী য়ুম্ফম অসি হেন্না মপাঙ্গল কনখৎলক্লিবমখৈ, ঐখোয়গী লৈবাক অমসুং লৈবাক অসিগী সিস্তেমশিং অদু হেন্না মপাঙ্গল কনখৎলগনি।
মরুপশিং,
ঐহাক্না থাজৈ মদুদি অচুম্বা ৱায়েল অসি মতম পুম্নমক্তা অচম্বা অমসুং ময়েক শেংবনি। অদুবু করিগুম্বা মতমদা থৌওংশিং অসিনা মসিবু অরুবা ওইহল্লি। অচুম্বা ৱায়েলবু য়ারিবমখৈ লায়থোকহনবা অমসুং ময়েক শেংহনবা হায়বসি ঐখোয়গী অপুনবা থৌদাংনি। অমসুং লৈবাক অসিনা মসিগী মাইকৈ অসিদা পুৱারী ওইরবা অমসুং ৱারেপ লৌবা য়াবা খোংথাং কয়া অমা লৌখৎলকপদা ঐহাক্না নুংঙাইবা ফাওই। ঐখোয়না কোলোনিএলগী আইন চাম্মরোম মুত্থৎখ্রে মদুদি মপুং ফানা চৎনহনখিদ্রে। নীংতম্বা ফংলবা চহি কয়াগী মতুংদা, লৈবাক অসিনা ইন্দিয়ন পেনেল কোদকী মহুৎ শিন্দুনা ইন্দিয়ন জুদিসিএল কোদ চৎনহনখ্রে। চৈরাক পীবগী মহুত্তা অচুম্বা ৱায়েল অসি ভারতকী ৱাখল্লোনগী য়ুম্ফমসু ওইরি। ভারতকী জুদিসিএল কোদ অসিনা মীওইবগী ৱাখল্লোন অসিবু মাংলোমদা পুখৎলি। ইন্দিয়ন জুদিসিএল কোদনা ঐখোয়গী দেমোক্রেসীবু কোলোনিএলগী ৱাখল্লোনদগী লায়থোকহল্লি। হৌজিক্তি, জুদিসিএল কোদকী মরুওইবা ৱাখল্লোন অসি য়ারিবমখৈ মপাঙ্গল কলহন্নবা ঐখোয় পুম্নমক্কী থৌদাং ওইরে।
মরুপশিং,
ঐখোয়গী লৈবাক অসি হৌখিবা চহী তরা অসিদা য়াম্না থুনা হোংলক্লি। ঐখোয়না চহি ১০গী মমাংদা ১০শুবা মফমদগী মালেমগী খ্বাইদগী চাউবা ইকনোমীগী মঙাশুবা মফমদা হায়খৎলে। ঙসি লৈবাক অসিগী মঙলানশিং অদুসু অচৌবা ওইরে, লৈবাক মীয়ামগী অপাম্বশিং অদুসু অচৌবা ওইরে। মরম অদুনা ঐখোয়না অনৌবা ভারতকী মতুং ইন্না অনৌবা খোংথাংশিং লৌখৎপা অমসুং ঐখোয়গী সিস্তেমশিং অসি মোদর্নাইজ তৌবা অসি য়াম্না মরু ওই। মসি জস্তিস ফোর ওলগীদমকসু চপ মান্ননা মরু ওই। ঙসি ঐখোয়গী জুদিসিএল সিস্তেমদা তেক্নোলোজীনা য়াম্না মরু ওইবা থৌদাং অমা লৌরি হায়বসি ঐখোয়না উবা ফংলি। ঐখোয়গী ই-কোর্তস প্রোজেক্ত অসি আই.তি. রিভোলুসনগী খুত্থাংদা অচৌবা অহোংবা কয়া অমা লাকপা য়াবগী খ্বাইদগী চাউবা খুদম্নি। ঙসি লৈবাক অসিদা কোর্ত ১৮,০০০ হেন্না কম্প্যুতরাইজ তৌখ্রে। নেশনেল জুদিসিএল দেতা গ্রিদকী সেন্ত্রেলাইজ তৌরবা ওনলাইন প্লেৎফোর্মদা কেস কোতি ২৬ হেনবগী ইনফোর্মেসন লিঙ্ক তৌখ্রে হায়না ঐনা খঙলে। ঙসিদি লৈবাক পুম্বগী কোর্ত কমপ্লেক্স লিশিং অহুম অমসুং জেল লিশিং ১২০০ হেন্না ভিদিও কনফরেন্সিংগী খুত্থাংদা শম্নখ্রে। অমসুং রাজস্থানসু মসিগী মাইকৈ অসিদা য়াম্না থুনা থবক পায়খৎলিবা অসিদা ঐহাক নুংঙাইবা ফাওই। মফমসিদা লৈবা কোর্ত চাম্মরোমদি কম্প্যুতরাইজ তৌখ্রে। পেপরলেস কোর্তশিং, ই-ফাইলিং, সিমনেসনগী ইলেক্ত্রোনিক সর্বিস, ভর্চুএল হিয়রিংগীদমক এরেঞ্জমেন্ত, মসি মহৌশানা অহোংবা লাকপা নত্তে। করিগুম্বা ঐখোয়না মীচম প্রজাগী মীৎয়েংদগী খল্লবদি, চহ কয়াগী মমাংদগী কোর্তকী মমাংদা 'চাক্কর' হায়বা ৱাহৈ অসি, করিসু লৈতে, চাক্কর হায়বা ৱাহৈ অসি তঙাইফদবা ওইরকখি। কোর্তকী রাউন্দ, কেসকী রাউন্দ, হায়বদি, করিগুম্বা নহাক্না চিংশিনখ্রবদি, নহাক্না কদাইদা ফংগদগে হায়বা খঙবা ঙম্লোই! ঙসিদি, দিকেদ কয়াগী মতুংদা, লৈবাক অসিনা মীচম প্রজাগী পোৎলুম লোইশিন্নবা, হায়রিবা রাউন্দ অসি লোইশিন্নবগীদমক ইফেক্তিব ওইবা খোংথাংশিং লৌখৎলে। মসিনা অচুম্বা ৱায়েলগী মতাংদা অনৌবা আশা অমা পোকহল্লি। ঐখোয়না মসিগী আশা অসি ঙাক্না চৎকদবনি, ঐখোয়না লেপ্পা লৈতনা ঐখোয়গী জুদিসিএল সিস্তেম অসি রিফোর্ম তৌগদবনি।
মরুপশিং,
হৌখিবা প্রোগ্রাম কয়াদা, ঐহাক্না পুম্নমক্কী মমাংদা ঐখোয়গী চহি চা কয়াগী মমাংগী মেদিএসন সিস্তেম অসি অমুক হন্না পনখ্রে। ঙসিদি, অল্তর্নেতিব দিসপ্যুত মেকানিজম অসি লৈবাক অসিদা শেল চঙদবা অমসুং অথুবা মতমদা ৱারেপ লৌনবগী য়াম্না মরু ওইবা পাম্বৈ অমা ওইরক্লি। অল্তর্নেতিব দিসপ্যুত মেকানিজমগী সিস্তেম অসিনা লৈবাক অসিদা ইজ ওফ লিভিং অমসুং ইজ ওফ জস্তিসবু হেন্না চাউখৎহল্লগনি। সরকারনা আইনশিং হোংদোক্তুনা অমসুং অনৌবা প্রোভিজনশিং হাপচিন্দুনা মসিগী মাইকৈ অসিদা খোংথাং কয়া অমা লৌখৎলি। জুদিসিএরিগী মতেং পাংবগা লোয়ননা, হায়রিবা সিস্তেমশিং অসি হেন্না শক্তি লৈহল্লগনি।
মরুপশিং,
ঐখোয়গী জুদিসিয়রিনা লেপ্পা লৈতনা নেস্নেল হীরমশিংদা ভিজিলেন্ অমসুং এক্তিবিতীগী মওং মতৌ উৎলি। কাশ্মীরদগী আর্তিকল ৩৭০ লৌথোকপা অমসুং লৈবাক অসিবু সংম্বিধানগী ওইবা মওংদা পুনশিনবগী খুদম অমা ঐখোয়গী মাংদা লৈরে। সি.এ.এ.গুম্বা হ্যুমেনিতরিয়ন লোশিংগী খুদম অমা ঐখোয়গী মাংদা লৈরি। অসিগুম্বা ইসুশিংদা লৈবাক্কী য়াইফনবগীদমক মহৌশাগী ওইবা ৱায়েল-পথাপ্না করি হায়রিবগে হায়বদু ঐখোয়গী কোর্তশিংগী ৱারেপশিংদগী ময়েক শেংনা উবা ফংই। হাই কোর্ততগী সুপ্রিম কোর্ত ফাওবদা, জুদিসিয়রিনা অসিগুম্বা হিরমশিংদা 'নেসন ফর্স্ত'কী ৱারেপশিং অসিবু মরক মরক্তা মপাঙ্গল কনখৎহল্লি। অদোম্না খংলিবদুনা ওগস্ত ১৫দা লাল কিল্লীদগী ঐনা সেকুলর সিভিল কোদকী মতাংদা ঙাংখি। ইসু অসিগী মতাংদা সরকার অমনা অহানবা ওইনা ৱা ঙাংখিবা ওইরবসু ঐখোয়গী জুদিসিয়রীনা চহী কয়াগী মমাংদগী ৱা ঙাংদুনা লাক্লি। লৈবাক্কী অপুনবগী মতাংদা জুদিসিয়রি ময়েক শেংবা ৱাফম অসিনা লৈবাক মীয়ামদা জুদিসিয়রিগী মতাংদা থাজবা হেনগৎহনগনি।
মরুপশিং,
২১শুবা চহিচাগী ভারতপু মাংলোমদা পুখৎপদা অচৌবা থৌদাং লৌগদবা ৱাহৈ অসি ইন্তিগ্রেসননি। ত্রান্সপোর্তকী মওংশিং পুনশিনবা, দেতা পুনশিনবা, হেল্থ সিস্তেম পুনশিনবা। ঐখোয়গী মীৎয়েংদি লৈবাক অসিগী তোঙান্না থবক তৌরিবা আই.তি. সিস্তেম পুম্নমকপু পুনশিনবা হায়বসিনি। পুলিস, ফোরেন্সিক্স, প্রোসেস সর্ভিস মেকানিজম অমসুং সুপ্রিম কোর্ততগী দিস্ত্রিক্ত কোর্ত ফাওবা পুম্নমক্না পুন্না থবক তৌমিন্নগদবনি। ঙসি অসিগুম্বা ইন্তিগ্রেসন প্রোজেক্ত অসি রাজস্থানগী দিস্ত্রিক্ত কোর্ত পুম্নমক্তা হৌখ্রে। প্রোজেক্ত অসি মাই পাক্না পাংথোক্নবা ঐনা অদোম পুম্নমকপু য়াইফ-পাউজেল পীজরি।
মরুপশিং,
তেক্নোলোজী শীজিন্নবা অসি ঙসিগী ভারত্তা লায়রবশিংবু শক্তি পীনবা হোৎনবদা চাংয়েং তৌরবা পাম্বৈ অমা ওইরক্লি। হৌখিবা চহি ১০ অসিদা, মালেমগী এজেন্সী অমসুং ওর্গনাইজেসন কয়ানা মসিগীদমক ভারতপু থাগৎপা ফোংদোকখ্রে। দি.বি.তি.দগী হৌরগা য়ু.পি.আই. ফাওবা, হীরম কয়াদা ভারতনা পায়খৎলিবা থবকশিং অসি মালেমগী মোদেল অমা ওইরক্লি। ঐখোয়না চপ মান্নবা এক্সপরিয়েন্স অসি জস্তিস সিস্তেমদসু চৎনহনগদবনি। মসিগী মাইকৈ অসিদা, তেক্নোলোজী অমসুং মশাগী লোলদা লিগেল দোক্যুমেন্তশিং ফংহনবা অসি লাইরবশিংবু শক্তি পীনবগী খ্বাইদগী ইফেক্তিব ওইবা পাম্বৈ ওইগনি। মসিগীদমক্তা দিশা কৌবা অনৌবা সোলুসন অমা সরকারনা প্রমোৎ তৌরি। ঐখোয়গী লো মহৈরোয়শিং অমসুং অতোপ্পা আইনগী এক্সপর্তশিংনা হায়রিবা কেম্পেন অসিদা ঐখোয়বু মতেং পাংবা য়াই। মসিগী মথক্তা, লোকেল লোলশিংদা লিগেল দোক্যুমেন্তশিং অমসুং জজমেন্তশিং মীয়ামদা ফংহন্নবা থবক পায়খৎপা মথৌ তাই। ঐখোয়গী সুপ্রিম কোর্তনা মসি হৌদোক্লে। সুপ্রিম কোর্তকী লমজিং মখাদা সোফৱেয়র অমা পুথোকখ্রে। মসিগী খুত্থাংদা জুরিসিএল দোকুমেন্তশিং অসি লোন ১৮দা হন্দোকপা ঙমগনি। অসিগুম্বা হোৎনরিবশিং অসিগীদমক্তা ঐহাক্না ঐখোয়গী জুদিসিয়রিসু থাগৎচরি।
মরুপশিং,
ঐহাক্না থাজবা থম্লি মদুদি ঐখোয়গী কোর্তশিংনা ইজ ওফ জস্তিসতা অহেনবা মরুওইবা পীদুনা চৎকনি। ঐখোয়না মাংলোমদা চংশিল্লিবা চাউখৎলবা ভারতকী মঙলান অসিদা, মীপুম খুদিংমক্কীদমক অচম্বা, ফংফম থোকপা অমসুং লায়না ৱায়েল-পথাপকী গেরেন্তী লৈহনবা অসি য়াম্না মরু ওই। অসিগুম্বা মঙলান অসিগা লোয়ননা, ঐহাক্না অমুক্কা হন্না পুম্নমকপু রাজস্থান হায় কোর্ৎকী প্লাতিনম জুবিলীগীদমক থম্মোয় শেংনা নুংঙাইবা ফোংদোকচরি অমসুং য়াইফ-পাউজেল পীজরি। হন্না-হন্না থাগৎচরি!
****
(Release ID: 2048797)
Visitor Counter : 8