অনুষ্ঠানত উপস্থিত ৰাজস্থানৰ ৰাজ্যপাল শ্ৰীযুত হৰিভাও কৃষ্ণৰাও বাগড়ে জী, ৰাজস্থানৰ জনপ্ৰিয় মুখ্যমন্ত্ৰী শ্ৰী ভজনলাল শৰ্মা, ন্যায়াধীশ শ্ৰী সঞ্জীৱ খান্না জী, দেশৰ আইন মন্ত্ৰী শ্ৰীযুত অৰ্জুন ৰাম মেঘৱাল জী, ৰাজস্থান উচ্চ ন্যায়ালয়ৰ মুখ্য ন্যায়াধীশ শ্ৰীযুত মনিন্দ্ৰ মোহন শ্ৰীবাস্তৱ জী, আন সকলো সন্মানীয় বিচাৰক, ন্যায় জগতৰ সকলো গণ্যমান্য ব্যক্তি, উপস্থিত থকা ভদ্ৰমহিলা আৰু সুধীসকল!

সৰ্বপ্ৰথমে মই আপোনালোক সকলোৰে ওচৰত ক্ষমা বিচাৰিছোঁ। কাৰণ মই ইয়াত উপস্থিত হোৱাত প্ৰায় ১০ মিনিট পলম হৈছিল। কাৰণ মই মহাৰাষ্ট্ৰৰ পৰা ওলাই আহিছিলোঁ, কিন্তু বতৰৰ বাবে সময়মতে উপস্থিত হ'ব পৰা নাছিলোঁ আৰু ইয়াৰ বাবে মই আপোনালোক সকলোৰে ওচৰত ক্ষমা বিচাৰিছোঁ।

বন্ধুসকল,

মই আনন্দিত যে মই আজি ৰাজস্থান উচ্চ ন্যায়ালয়ৰ প্লেটিনাম জুবিলী সমাৰোহত আপোনালোকৰ মাজত থকাৰ সুযোগ পাইছোঁ। ৰাজস্থান উচ্চ ন্যায়ালয়ৰ ৭৫ বছৰ এনে সময়ত হৈছে, যি সময়ত আমাৰ সংবিধানেও ৭৫ বছৰ সম্পূৰ্ণ কৰিবলৈ গৈ আছে। সেয়ে এয়া বহু মহান ব্যক্তিৰ সততা-নিষ্ঠা আৰু অৱদানক উদযাপন কৰাৰো উৎসৱ। এয়া সংবিধানৰ প্ৰতি আমাৰ বিশ্বাসৰো নিদৰ্শন। মই আপোনালোক সকলো ন্যায়বিদক আৰু ৰাজস্থানৰ জনসাধাৰণক এই উপলক্ষে অভিনন্দন জনাইছোঁ আৰু আন্তৰিক শুভেচ্ছা জনাইছোঁ।

বন্ধুসকল,

ৰাজস্থান উচ্চ ন্যায়ালয়ৰ অস্তিত্বৰ সৈতে আমাৰ ৰাষ্ট্ৰৰ ঐক্যৰ ইতিহাসো জড়িত। আপোনালোক সকলোৱে জানে, চৰ্দাৰ বল্লভভাই পেটেলে যেতিয়া ৫০০ৰো অধিক ৰাজকীয় ৰাজ্যক একত্ৰিত কৰি দেশক একত্ৰিত কৰিছিল, তেতিয়া ৰাজস্থানৰ বহু ৰাজকীয় ৰাজ্যও তাত অন্তৰ্ভুক্ত হৈছিল। জয়পুৰ, উদয়পুৰ, কোটাৰ দৰে বহু ৰাজকীয় ৰাজ্যতো নিজাকৈ উচ্চ ন্যায়ালয় আছিল। তেওঁলোকৰ সংহতিৰ লগে লগে ৰাজস্থান উচ্চ ন্যায়ালয়ৰ অস্তিত্ব আহিল। অৰ্থাৎ, ৰাষ্ট্ৰীয় ঐক্য আমাৰ ন্যায়িক ব্যৱস্থাৰো আধাৰশিলা। এই আধাৰশিলা যিমানেই শক্তিশালী হ’ব, সিমানেই আমাৰ দেশ আৰু ইয়াৰ ব্যৱস্থাবোৰ শক্তিশালী হ’ব।

বন্ধুসকল,

মোৰ বিশ্বাস ন্যায় সদায় সহজ আৰু স্পষ্ট। কিন্তু কেতিয়াবা প্ৰক্ৰিয়াবোৰে কঠিন কৰি তোলে। ন্যায়ক যিমান পাৰি সহজ আৰু স্পষ্ট কৰি তোলাটো আমাৰ সকলোৰে সামূহিক দায়িত্ব। আৰু মই সন্তুষ্ট যে দেশে এই দিশত বহু ঐতিহাসিক আৰু নিৰ্ণায়ক পদক্ষেপ গ্ৰহণ কৰিছে। আমি শ শ ঔপনিৱেশিক আইন বাতিল কৰিছোঁ যিবোৰ সম্পূৰ্ণ অপ্রাসংগিক হৈ পৰিছে৷ স্বাধীনতাৰ ইমান দশকৰ পাছত দাসত্বৰ মানসিকতাৰ পৰা উদ্ধাৰ হৈ ভাৰতীয় দণ্ডবিধিৰ ঠাইত ভাৰতীয় ন্যায়িক সংহিতা গ্রহণ কৰিছোঁ৷ শাস্তিৰ সলনি ন্যায়, এইটোৱেই ভাৰতীয় চিন্তাৰ আধাৰো। ভাৰতীয় ন্যায়িক সংহিতাই এই মানৱীয় চিন্তাধাৰাক আগুৱাই লৈ যায়। ভাৰতীয় ন্যায়িক সংহিতাই আমাৰ গণতন্ত্ৰক ঔপনিৱেশিক মানসিকতাৰ পৰা মুক্ত কৰে। ন্যায় সংহিতাৰ নীতিসমূহক যিমান পাৰি ফলপ্ৰসূ কৰি তোলাটো এতিয়া আমাৰ সকলোৰে দায়িত্ব।

বন্ধুসকল,

যোৱা দশকত আমাৰ দেশৰ পৰিৱৰ্তন দ্ৰুতগতিত হৈছে। ১০ বছৰ পূৰ্বে দশম স্থানৰ পৰা উন্নীত হৈ আমি বিশ্বৰ পঞ্চম বৃহত্তম অৰ্থনীতি হিচাপে পৰিগণিত হৈছোঁ। আজি দেশৰ সপোন ডাঙৰ, দেশবাসীৰ আকাংক্ষাও ডাঙৰ। সেয়ে এয়া জৰুৰী যে আমি নতুন ভাৰত অনুযায়ী নতুন নতুন উদ্ভাৱন কৰিব লাগে, আৰু আমাৰ ব্যৱস্থা আধুনিকীকৰণ কৰিব লাগে। ইয়াৰ বাবে সকলোৰে বাবে এই ন্যায় সমানেই গুৰুত্বপূৰ্ণ। আমি দেখিবলৈ পাইছোঁ যে আজি আমাৰ ন্যায়িক ব্যৱস্থাত প্ৰযুক্তিয়ে ইমান গুৰুত্বপূৰ্ণ ভূমিকা পালন কৰিছে। আই টি বিপ্লৱে কিমান ডাঙৰ পৰিৱৰ্তন আনিব পাৰে তাৰ আটাইতকৈ ডাঙৰ উদাহৰণ হৈছে আমাৰ ই-ক’ৰ্টছ প্ৰজেক্ট। আজি দেশৰ ১৮ হাজাৰৰো অধিক আদালত কম্পিউটাৰাইজ কৰা হৈছে। মোক কোৱা হৈছে যে ২৬ কোটিৰো অধিক গোচৰৰ তথ্য কেন্দ্ৰীভূত অনলাইন প্লেটফৰ্মত ৰাষ্ট্ৰীয় ন্যায়িক তথ্য গ্ৰীডৰ সৈতে সংযোগ কৰা হৈছে। আজি সমগ্ৰ দেশৰ ৩ হাজাৰৰো অধিক আদালত কমপ্লেক্স আৰু ১২০০ৰো অধিক কাৰাগাৰ ভিডিঅ’ কনফাৰেন্সিঙৰ জৰিয়তে সংযোগ কৰা হৈছে। আৰু মই সুখী যে ৰাজস্থানেও এই দিশত অতি দ্ৰুত গতিত কাম কৰি আছে। ইয়াৰ শ শ আদালত কম্পিউটাৰাইজ কৰা হৈছে। কাগজবিহীন আদালত, ই-ফাইলিং, চমনৰ বাবে ইলেক্ট্ৰনিক সেৱা, ভাৰ্চুৱেল শুনানিৰ ব্যৱস্থা, এইবোৰ সাধাৰণ পৰিৱৰ্তন নহয়। এজন সাধাৰণ নাগৰিকৰ দৃষ্টিকোণৰ পৰা যদি আমি ভাবোঁ, দশক দশক ধৰি আদালতৰ সন্মুখত ‘চক্কৰ’ শব্দটো বাধ্যতামূলক হৈ পৰিছিল। আদালতৰ এফেয়াৰ, কেছৰ এফেয়াৰ, অৰ্থাৎ এনেকুৱা এটা এফেয়াৰ য’ত যদি আপুনি আবদ্ধ হৈ পৰে তেতিয়া আপুনি কেতিয়া ওলাই যাব নাজানে। আজি দশক দশক পিছত সেই সাধাৰণ নাগৰিকৰ দুখ-কষ্টৰ অন্ত পেলাবলৈ আৰু সেই চক্ৰৰ অন্ত পেলাবলৈ দেশে ফলপ্ৰসূ পদক্ষেপ গ্ৰহণ কৰিছে। ইয়াৰ ফলত ন্যায় সন্দৰ্ভত নতুন আশাৰ সৃষ্টি হৈছে। আমি এই আশা বজাই ৰাখিব লাগিব আৰু আমাৰ ন্যায়িক ব্যৱস্থাৰ সংস্কাৰ কৰি থাকিব লাগিব।

বন্ধুসকল,

বিগত কেইবাটাও কাৰ্যসূচীত আপোনালোক সকলোৰে মাজত আমাৰ যুগ যুগ ধৰি চলি অহা মধ্যস্থতা ব্যৱস্থাৰ কথা বাৰে বাৰে উল্লেখ কৰি আহিছোঁ। আজি দেশত কম খৰচী আৰু ক্ষীপ্ৰ সিদ্ধান্তৰ বাবে বিকল্প বিবাদ ব্যৱস্থা এক অতি গুৰুত্বপূৰ্ণ উপায় হৈ পৰিছে। বিকল্প বিবাদ ব্যৱস্থাৰ এই ব্যৱস্থাই দেশত জীৱন-যাপনৰ সহজতাৰ লগতে ন্যায়ৰ সহজতা বৃদ্ধি কৰিব। এই দিশত চৰকাৰে আইনৰ পৰিৱৰ্তন কৰি নতুন বিধান সংযোজন কৰি বহু পদক্ষেপ গ্ৰহণ কৰিছে। ন্যায়পালিকাৰ সহযোগত এই ব্যৱস্থাসমূহ অধিক শক্তিশালী হৈ উঠিব।

বন্ধুসকল,

আমাৰ ন্যায়পালিকাই ৰাষ্ট্ৰীয় বিষয়ত সজাগ আৰু সক্ৰিয় হোৱাৰ নৈতিক দায়িত্ব ধাৰাবাহিকভাৱে প্ৰয়োগ কৰি আহিছে। কাশ্মীৰৰ পৰা ৩৭০ অনুচ্ছেদ আঁতৰাই দেশৰ সাংবিধানিক একত্ৰীকৰণৰ উদাহৰণ আমাৰ সন্মুখত। CAA ৰ দৰে মানৱীয় আইন এখনৰ উদাহৰণ আমাৰ সন্মুখত। এনে বিষয়ত প্ৰাকৃতিক ন্যায়ে ৰাষ্ট্ৰীয় স্বাৰ্থত কি কয় সেয়া আমাৰ আদালতৰ সিদ্ধান্তৰ পৰা সম্পূৰ্ণ স্পষ্ট হৈ পৰিছে। উচ্চ ন্যায়ালয়ৰ পৰা উচ্চতম ন্যায়ালয়লৈকে ন্যায়পালিকাই এনেবোৰ বিষয়ত ‘ৰাষ্ট্ৰ প্ৰথম’ৰ সংকল্প বহুবাৰ শক্তিশালী কৰি তুলিছে। আপোনালোকৰ মনত আছেনে, অলপতে ১৫ আগষ্টত মই লালকিল্লাৰ পৰাই চেকুলাৰ চিভিল কোডৰ কথা কৈছিলোঁ। এই বিষয়ত যদিও কোনো চৰকাৰে প্ৰথমবাৰৰ বাবে ইমান সৰব হৈছে, কিন্তু আমাৰ ন্যায়পালিকাই দশক দশক ধৰি এই বিষয়ৰ ওকালতি কৰি আহিছে। ৰাষ্ট্ৰীয় একতাৰ বিষয়ত ন্যায়পালিকাৰ এই স্পষ্ট স্থিতিয়ে ন্যায়পালিকাৰ ওপৰত দেশবাসীৰ ভৰসা আৰু বঢ়াব।

বন্ধুসকল,

একবিংশ শতিকাৰ ভাৰতক আগুৱাই নিয়াৰ ক্ষেত্ৰত যিটো শব্দই বহুত ডাঙৰ ভূমিকা ল’বলৈ গৈ আছে সেয়া হ’ল সংহতি। পৰিবহণৰ ধৰণৰ সংহতি, তথ্যৰ সংহতি, স্বাস্থ্য ব্যৱস্থাৰ সংহতি। আমাৰ দৃষ্টিভংগী হ’ল দেশৰ যিবোৰ আইটি ব্যৱস্থাই পৃথকে পৃথকে কাম কৰি আছে, সেইবোৰ একত্ৰিত হ’ব লাগে। আৰক্ষী, ফৰেনছিক, প্ৰক্ৰিয়া সেৱা ব্যৱস্থা আৰু উচ্চতম ন্যায়ালয়ৰ পৰা জিলা আদালতলৈকে সকলোৱে একেলগে কাম কৰিব লাগে। আজি ৰাজস্থানৰ সকলো জিলা আদালতত এই সংহতি প্ৰকল্প আৰম্ভ কৰা হৈছে। এই প্ৰকল্পৰ সফলতাৰ বাবে আপোনালোকক আন্তৰিক শুভেচ্ছা জনাইছোঁ।

বন্ধুসকল,

প্ৰযুক্তিৰ ব্যৱহাৰ আজিৰ ভাৰতত দৰিদ্ৰ লোকৰ সবলীকৰণৰ এক পৰীক্ষা-নিৰীক্ষা কৰা সূত্ৰত পৰিণত হৈছে। বিগত ১০ বছৰত বিশ্বৰ বহু সংস্থা আৰু এজেঞ্চীয়ে ইয়াৰ বাবে ভাৰতক প্ৰশংসা কৰিছে। ডিবিটিৰ পৰা ইউপিআইলৈকে বহু ক্ষেত্ৰত ভাৰতৰ কাম-কাজে এক বিশ্বব্যাপী আৰ্হি হিচাপে আত্মপ্ৰকাশ কৰিছে। আমি ন্যায় ব্যৱস্থাতো আমাৰ একে অভিজ্ঞতা কাৰ্যকৰী কৰিব লাগিব। এই দিশত প্ৰযুক্তিবিদ্যা আৰু নিজৰ ভাষাত আইনী নথি-পত্ৰ লাভ কৰাটো দৰিদ্ৰ লোকৰ সৱলীকৰণৰ আটাইতকৈ ফলপ্ৰসূ মাধ্যম হৈ পৰিব। ইয়াৰ বাবেও দিশা নামৰ এক অভিনৱ সমাধানৰ প্ৰচাৰ চলাইছে চৰকাৰে। আমাৰ আইনৰ ছাত্ৰ-ছাত্ৰী আৰু অন্যান্য আইনী বিশেষজ্ঞসকলে এই অভিযানত আমাক সহায় কৰিব পাৰে। ইয়াৰ উপৰিও, এনে কামো কৰিব লাগিব যাতে মানুহে দেশৰ স্থানীয় ভাষাত আইনী নথি-পত্ৰ আৰু ৰায়দান লাভ কৰিব পাৰে। আমাৰ উচ্চতম ন্যায়ালয়ে এই কাম আৰম্ভ কৰিছে। উচ্চতম ন্যায়ালয়ৰ নিৰ্দেশনাত এটা ছফটৱেৰ তৈয়াৰ কৰা হৈছে, যাৰ জৰিয়তে ন্যায়িক নথি-পত্ৰ ১৮টা ভাষালৈ অনুবাদ কৰিব পৰা যাব। আমাৰ ন্যায়পালিকাৰ এনে সকলো প্ৰচেষ্টাৰ বাবেও মই শলাগ লৈছোঁ।

বন্ধুসকল,

মোৰ বিশ্বাস যে আমাৰ আদালতে ইজ অৱ জাষ্টিচক শীৰ্ষ অগ্ৰাধিকাৰ দি থাকিব। যিখন উন্নত ভাৰতৰ সপোনত আমি আগবাঢ়িছোঁ, সেই সপোনত সকলোৰে বাবে সৰল, সুলভ আৰু সহজ ন্যায় নিশ্চিত হোৱাটো অতি প্ৰয়োজনীয়। এই আশাৰে পুনৰবাৰ আপোনালোক সকলোকে ৰাজস্থান উচ্চ ন্যায়ালয়ৰ প্লেটিনাম জুবিলী উপলক্ষে অভিনন্দন জনাইছোঁ আৰু আপোনালোকক বহুত বহুত শুভেচ্ছা জনাইছোঁ। বহুত বহুত ধন্যবাদ!

MJPS/ST/DK

**********