ಮೊದಲ ರಾಷ್ಟ್ರೀಯ ಬಾಹ್ಯಾಕಾಶ ದಿನವನ್ನು ಸ್ಮರಿಸುವ ಮಹತ್ವದ ಆಚರಣೆಯ ಸಂದರ್ಭದಲ್ಲಿ, ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ರಾಜ್ಯ ಸಚಿವರಾದ (ಸ್ವತಂತ್ರ ಉಸ್ತುವಾರಿ), ಭೂ ವಿಜ್ಞಾನಗಳ ರಾಜ್ಯ ಸಚಿವರಾದ (ಸ್ವತಂತ್ರ ಉಸ್ತುವಾರಿ), ಪ್ರಧಾನ ಮಂತ್ರಿ ಕಾರ್ಯಾಲಯ, ಅಣುಶಕ್ತಿ ಇಲಾಖೆ, ಬಾಹ್ಯಾಕಾಶ ಇಲಾಖೆ, ಸಿಬ್ಬಂದಿ, ಸಾರ್ವಜನಿಕ ಕುಂದುಕೊರತೆಗಳು ಮತ್ತು ಪಿಂಚಣಿಗಳ ರಾಜ್ಯ ಸಚಿವರಾದ ಡಾ. ಜಿತೇಂದ್ರ ಸಿಂಗ್ ಅವರು ಇನ್ನು ಹದಿನೈದು ವರ್ಷಗಳ ನಂತರ ಅಂದರೆ 2040ರಲ್ಲಿ ಭಾರತೀಯನೊಬ್ಬ ಚಂದ್ರನ ಮೇಲೆ ಇಳಿಯುತ್ತಾನೆ ಎಂದು ಘೋಷಿಸಿದರು.

‌

ಭಾರತ ಮಂಟಪದಲ್ಲಿ ನಡೆದ ಭವ್ಯ ಸಮಾರಂಭದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರ ಸಮ್ಮುಖದಲ್ಲಿ ರಾಷ್ಟ್ರವನ್ನು ಉದ್ದೇಶಿಸಿ ಮಾತನಾಡಿದ ಡಾ. ಜಿತೇಂದ್ರ ಸಿಂಗ್, ಬಾಹ್ಯಾಕಾಶ ಪರಿಶೋಧನೆಯಲ್ಲಿ ಭಾರತದ ಗಮನಾರ್ಹ ಸಾಧನೆಗಳು ಮತ್ತು ಅದರ ಮಹತ್ವಾಕಾಂಕ್ಷೆಯ ಭವಿಷ್ಯದ ಗುರಿಗಳನ್ನು ಎತ್ತಿ ತೋರಿಸಿದರು.

ಚಂದ್ರನ ದಕ್ಷಿಣ ಧ್ರುವದಲ್ಲಿ ಚಂದ್ರಯಾನ-3 ರ ಐತಿಹಾಸಿಕ ಲ್ಯಾಂಡಿಂಗ್ ಅನ್ನು ಡಾ ಜಿತೇಂದ್ರ ಸಿಂಗ್ ಎತ್ತಿ ತೋರಿಸಿದರು, ಇದು ಜಗತ್ತನ್ನು ಬೆರಗುಗೊಳಿಸಿತು ಮತ್ತು ಭಾರತವನ್ನು ಬಾಹ್ಯಾಕಾಶ ಪರಿಶೋಧನೆಯಲ್ಲಿ ನಾಯಕನಾಗಿ ಸ್ಥಾಪಿಸಿತು ಎಂದು ಹೇಳಿದರು.

ಆಗಸ್ಟ್ 23, 2023 ರಂದು ದೇಶಾದ್ಯಂತ ರಾಷ್ಟ್ರೀಯ ಬಾಹ್ಯಾಕಾಶ ದಿನವಾಗಿ ಆಚರಿಸಲಾಗುವುದು ಮತ್ತು ಚಂದ್ರಯಾನ-3 ರ ಲ್ಯಾಂಡಿಂಗ್ ಸ್ಥಳವನ್ನು 'ಶಿವಶಕ್ತಿ ಪಾಯಿಂಟ್' ಎಂದು ಹೆಸರಿಸಲಾಗುವುದು ಎಂದು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಘೋಷಿಸಿದ್ದನ್ನು ಸಚಿವರು ಸ್ಮರಿಸಿದರು. ಉದ್ಘಾಟನಾ ಸಮಾರಂಭದ ಥೀಮ್, "ಚಂದ್ರನನ್ನು ಸ್ಪರ್ಶಿಸುವ ಮೂಲಕ ಜೀವನವನ್ನು ಸ್ಪರ್ಶಿಸುವುದು: ಭಾರತದ ಬಾಹ್ಯಾಕಾಶ ಸಾಹಸಗಾಥೆ", ಸಮಾರಂಭದಲ್ಲಿ ಪ್ರತಿಧ್ವನಿಸಿತು.

ಕಳೆದ ಆರು ದಶಕಗಳಲ್ಲಿ ಭಾರತ ತನ್ನ ನಾಗರಿಕರ ಬದುಕನ್ನು ತಲುಪಿದ್ದು ಮಾತ್ರವಲ್ಲದೆ ಚಂದ್ರನನ್ನೂ ತಲುಪಿದೆ ಎಂದು ಡಾ. ಜಿತೇಂದ್ರ ಸಿಂಗ್ ಹೇಳಿದರು. ಯಶಸ್ವಿ ಮಾರ್ಸ್ ಆರ್ಬಿಟರ್ ಮಿಷನ್, ಆಸ್ಟ್ರೋಸ್ಯಾಟ್, ಚಂದ್ರಯಾನ-2 ಮತ್ತು ಚಂದ್ರಯಾನ-3, ಮುಂಬರುವ ಆದಿತ್ಯ-ಎಲ್ 1 ಸೌರ ಮಿಷನ್ ಮತ್ತು ಎಕ್ಸ್-ರೇ ಖಗೋಳ ಮಿಷನ್ ಎಕ್ಸೋಸ್ಯಾಟ್ ಸೇರಿದಂತೆ ಕಳೆದ ದಶಕದಲ್ಲಿ ಮಾಡಿದ ಮಹತ್ವದ ಪ್ರಗತಿಯನ್ನು ಅವರು ಎತ್ತಿ ತೋರಿಸಿದರು.

55 ವರ್ಷಗಳ ಹಿಂದೆ 1969ರಲ್ಲಿ ಅಮೆರಿಕದ ಗಗನಯಾತ್ರಿ ನೀಲ್ ಆರ್ಮ್‌ಸ್ಟ್ರಾಂಗ್ ಚಂದ್ರನ ಮೇಲೆ ಕಾಲಿಟ್ಟಾಗ ಭಾರತದ ಬಾಹ್ಯಾಕಾಶ ಯಾನ ಆರಂಭವಾಯಿತು ಎಂದು ಡಾ.ಜಿತೇಂದ್ರ ಸಿಂಗ್ ಹೇಳಿದರು. ವೈಜ್ಞಾನಿಕ ಸಮುದಾಯದ ಅಚಲ ಸಮರ್ಪಣೆಗಾಗಿ ಅವರು ಶ್ಲಾಘಿಸಿದರು, ಇದರ ಪರಿಣಾಮವಾಗಿ ಭಾರತವು ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿದ ಮೊದಲ ದೇಶವಾಯಿತು ಎಂದು ಅವರು ಹೇಳಿದರು.

ವೈಜ್ಞಾನಿಕ ಕಾರ್ಯಾಚರಣೆಗಳನ್ನು ವೇಗಗೊಳಿಸಲು ಮತ್ತು ಭಾರತದ ವೈಜ್ಞಾನಿಕ ಸಮುದಾಯದ ಸಾಮರ್ಥ್ಯವನ್ನು ಬಳಸಿಕೊಳ್ಳಲು 2014 ರಿಂದ ಒದಗಿಸಿದ ನೀತಿ ಬೆಂಬಲ ಮತ್ತು ನಾಯಕತ್ವದ ಶ್ರೇಯವನ್ನು ಬಾಹ್ಯಾಕಾಶ ಖಾತೆಯ ರಾಜ್ಯ ಸಚಿವರು ಪ್ರಧಾನ ಮಂತ್ರಿ ಮೋದಿಯವರಿಗೆ ನೀಡಿದರು. ಬಾಹ್ಯಾಕಾಶ ಕ್ಷೇತ್ರವನ್ನು ಖಾಸಗಿ ಸಹಭಾಗಿತ್ವಕ್ಕೆ ತೆರೆದ ನಂತರ ಬಾಹ್ಯಾಕಾಶ ಸ್ಟಾರ್ಟ್‌ಅಪ್‌ಗಳಲ್ಲಿನ ಗಮನಾರ್ಹ ಬೆಳವಣಿಗೆಯಾಗಿದೆ, ಅವು ಈಗ ಸುಮಾರು 300 ರಷ್ಟಿವೆ ಎಂದರು. ಮುಂದಿನ ದಶಕದಲ್ಲಿ ಭಾರತದ ಬಾಹ್ಯಾಕಾಶ ಆರ್ಥಿಕತೆಯು $8 ಶತಕೋಟಿಯಿಂದ $44 ಶತಕೋಟಿಗೆ ಬೆಳೆಯಲಿದೆ ಎಂಬ ಹಣಕಾಸು ಸಚಿವರ ಅಂದಾಜನ್ನು ಅವರು ಪುನರುಚ್ಚರಿಸಿದರು.

ಶ್ರೀಹರಿಕೋಟಾದಲ್ಲಿ ಚಂದ್ರಯಾನ-3 ಉಡಾವಣೆ ನೇರಪ್ರಸಾರವನ್ನು ವೀಕ್ಷಿಸಿದ 5,000 ಕ್ಕೂ ಹೆಚ್ಚು ಪ್ರೇಕ್ಷಕರು ಮತ್ತು ಸುಮಾರು 1,000 ಮಾಧ್ಯಮ ಸಿಬ್ಬಂದಿಯು ಸಾಕ್ಷಿಯಾದರು ಎಂದ ಅವರು, ಬಾಹ್ಯಾಕಾಶ ಕ್ಷೇತ್ರವನ್ನು "ಮುಕ್ತಗೊಳಿಸಿದ" ಮತ್ತು ಸಾರ್ವಜನಿಕರಿಗೆ ಹೆಚ್ಚು ಪ್ರವೇಶಿಸುವಂತೆ ಮಾಡಿದ ಪ್ರಧಾನಿ ಮೋದಿಯವರನ್ನು ಶ್ಲಾಘಿಸಿದರು.

ಡಾ. ಜಿತೇಂದ್ರ ಸಿಂಗ್ ಅವರು ಭವಿಷ್ಯದ ಬಾಹ್ಯಾಕಾಶ ವಿಷನ್ 2047 ಅನ್ನು ವಿವರಿಸಿದರು, ಇದರಲ್ಲಿ 2035 ರ ವೇಳೆಗೆ ಭಾರತೀಯ ಬಾಹ್ಯಾಕಾಶ ನಿಲ್ದಾಣ (ಬಿಎಎಸ್) ಸ್ಥಾಪನೆ ಮತ್ತು 2040 ರ ವೇಳೆಗೆ ಭಾರತೀಯ ಗಗನಯಾತ್ರಿಗಳು ಚಂದ್ರನ ಮೇಲೆ ಇಳಿಯುವುದನ್ನು ಒಳಗೊಂಡಿದೆ ಎಂದರು. ಕಡಿಮೆ ಭೂಮಿಯ ಕಕ್ಷೆಯಲ್ಲಿ ಮಾನವ ಬಾಹ್ಯಾಕಾಶ ಯಾನದಿಂದ ಪ್ರಾರಂಭವಾಗಿ, ದೇಶೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಭಾರತದ ಸ್ವಂತ ವೈಜ್ಞಾನಿಕ ಚಟುವಟಿಕೆಗಳಿಗೆ ವಿಸ್ತರಿಸುತ್ತದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು, ಇದು ಚಂದ್ರನ ಮತ್ತಷ್ಟು ಪರಿಶೋಧನೆ ಮತ್ತು ಅದರಾಚೆಗೂ ವಿಸ್ತರಿಸುತ್ತದೆ ಎಂದು ಅವರು ಹೇಳಿದರು.

ಬಾಹ್ಯಾಕಾಶ ಕ್ಷೇತ್ರದಲ್ಲಿ ದೇಶದ ಸ್ವಾವಲಂಬನೆಯ ಪ್ರಮುಖ ಅಂಶವಾಗಿ ಬಾಹ್ಯಾಕಾಶ ಸಾರಿಗೆ, ಪ್ಲಾಟ್‌ಫಾರ್ಮ್‌ ಗಳು ಮತ್ತು ನೆಲದ ನಿಲ್ದಾಣಗಳಲ್ಲಿ ಭಾರತದ ಒಟ್ಟಾರೆ ಸಾಮರ್ಥ್ಯಗಳನ್ನು ಡಾ. ಜಿತೇಂದ್ರ ಸಿಂಗ್ ಎತ್ತಿ ತೋರಿಸಿದರು. ಭಾರತದ ಬಾಹ್ಯಾಕಾಶ ಪ್ರಗತಿಯಿಂದ ಪ್ರಯೋಜನ ಪಡೆದಿರುವ ಮೀನುಗಾರಿಕೆ, ಕೃಷಿ, ನೈಸರ್ಗಿಕ ಸಂಪನ್ಮೂಲ ನಿರ್ವಹಣೆ, ವಿಪತ್ತು ನಿರ್ವಹಣೆ ಮತ್ತು ಉಪಗ್ರಹ ಸಂವಹನಗಳಂತಹ ಕ್ಷೇತ್ರಗಳ ಮೇಲೆ ಬಾಹ್ಯಾಕಾಶ ಅನ್ವಯಗಳ ಪ್ರಭಾವವನ್ನು ಡಾ. ಸಿಂಗ್ ಒತ್ತಿ ಹೇಳಿದರು.

ರಾಷ್ಟ್ರವು ತನ್ನ ಮೊದಲ ರಾಷ್ಟ್ರೀಯ ಬಾಹ್ಯಾಕಾಶ ದಿನವನ್ನು ಆಚರಿಸುತ್ತಿರುವಾಗ, ಈ ವಾರ್ಷಿಕ ಕಾರ್ಯಕ್ರಮವು ಭಾರತದ ಬಾಹ್ಯಾಕಾಶ ಪ್ರಯಾಣ ಮತ್ತು ಅದರ ಭವಿಷ್ಯದ ಪ್ರಯತ್ನಗಳ ಬಗ್ಗೆ ನಾಗರಿಕರಲ್ಲಿ ಹೆಚ್ಚಿನ ಜಾಗೃತಿ ಮತ್ತು ಉತ್ಸಾಹವನ್ನು ಉಂಟುಮಾಡುತ್ತದೆ ಎಂದು ಡಾ. ಜಿತೇಂದ್ರ ಸಿಂಗ್ ವಿಶ್ವಾಸ ವ್ಯಕ್ತಪಡಿಸಿದರು.

*****