ইহান হান্বা নেস্নেল স্পেস দে থৌরম পাঙথোক্লদুনা, ঙসিদগী চহি তরামঙা লৈরগা, ২০৪০দা ভারত মচা অমনা থাগী লৈমায়দা খোঙদারগনি হায়না সাইন্স এন্দ তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ), আর্থ সাইন্সকী রাজ্য মন্ত্রী (ইন্দিপেন্দেন্ত চার্জ), PMO, দিপার্তমেন্ত ওফ এতোমিক ইনর্জী, দিপার্তমেন্ত ওফ স্পেস, পর্সোনেল, পব্লিক গ্রীভান্সেস অমসুং পেন্সন্সকী রাজ্য মন্ত্রী দোক্তর জিতেন্দ্র সিংহনা ঙসি মফমসিদা লাউথোকখ্রে‍।

ভারতকী রাস্ত্রপতী দ্রৌপদী মুরমু শরুক য়াবা, ভারত মন্দপমদা পাঙথোকপা চিং-লেম্লবা থৌরমদুদা লৈবাক্কী মফমদা ৱা ঙাংলদুনা, দোক্তর জিতেন্দ্র সিংহনা স্পেস এক্সপ্লোরেসন অমসুং মসিগী তুংগী মঙলান চাউবা পান্দমশিংগী শিংথানিংঙাই ওইরবা ভারতকী মায় পাকপশিং ফোঙদোকখি‍।

দোক্তর জিতেন্দ্র সিংহনা মালেমবু ঙকহনখিবা অমসুং ভারতপু স্পেস এক্সপ্লোরেসনগী লুচিংবা অমা ওইহনখিবা থাগী খাথংবা চিদাইদা চন্দ্রয়ান-৩না তাখিবা পুৱারী ওইরবা মীকুক্তুগী মরমদা ৱাফম কয়া থমখি‍।

প্রধান মন্ত্রী নরেন্দ্র মোদীনা ওগস্ত ২৩, ২০২৩দা লৈবাক শিন্বা থুংনা নেস্নেল স্পেস দে পাঙথোক্লগনি অমসুং চন্দ্রয়ান-৩না তাখিবা মফমবু ‘শিব শক্তি পোইন্ত’ হায়না মিংথোল্লগনি হায়না লাউথোকখিববু মন্ত্রীনা নৌহৌননা নীংশিংহনখি‍। অহৌবগী থৌরম অসিগী থীম “তচিং লাইব্স ৱাইল তচিং দি মুন: ইন্দিয়া’স স্পেস সাগা’ অসিগী মমি থৌরম পুম্বদা তাখি‍।

“হৌখিবা দেকেদ তরুকসিদা, ভারতনা মাগী মীয়ামগী পুন্সিদা য়ৌশিন্বতা নত্তনা থাদসু য়ৌবা ঙমখ্রে,” হায়না দোক্তর জিতেন্দ্র সিংহনা হায়খি‍। মার্স এর্বিতর মিসন মায় পাকখিবা, এস্ত্রোসেত, চন্দ্রয়ান-২, অমসুং চন্দ্রয়ান-৩ থাগৎখিবা, পায়খৎকদৌরিবা অদিত্য-এল১ সোলার মিসন, অমসুং X-Ray এস্ত্রোনোমী মিসন অমা ওইরিবা XPoSat য়াওনা হৌখিবা দেকেদ অসিদা মশক থোক্না খুমাঙ চাওশিনখিবশিংবু মহাক্না ফোঙদোকখি‍।

দোক্তর জিতেন্দ্র সিংহনা US এসস্ত্রোনোত নীল আর্মস্ত্রোংনা থাগী লৈমায়দা খোঙদাখ্রবা মতুং ১৯৬৯দগী হৌরকখিবা ভারতকী চহি ৫৫ খক্কী স্পেসকী খোঙচৎপু খোঙ্গুল লিখি‍। মহাক্না সাইন্তিফিক কম্ম্যুনিতীবু, ভারতনা থাগী খা থংবা চিদাইদা তাবা অহান্বা লৈববাক ওইহনখিবা মখোয়গী খোঙফম হন্দ্রবা কত্থোকপগীদমক থাগৎখি‍।

২০১৪দগী হৌনা প্রধান মন্ত্রী মোদীগী ফংহল্লকখিবা পোলিসী সপ্পোর্ত অমসুং লীদরসিপনা সাইন্তিফিক মিসনশিং খোঙজেল য়াঙখৎহল্লকপনি অমসুং ভারতকী সাইন্তিফিক কম্ম্যুনিতীগী মতিং ফুদোকহন্বনি হায়না স্পেসকী রাজ্য মন্ত্রীনা হায়খি‍। মহাক্না স্পেস সেক্তরবু প্রাইভেত পার্তিসিপেসনগীদমক হাংদোকখিবা মতুংদগী স্পেস স্তার্তঅপ মশিং শিংথানিংঙাই ওইনা হেনগৎলক্লিবা, হৌজিক ৩০০ লোম শুরক্লিবা অসিবুসু শিংথাখি‍। ভারতকী স্পেস ইকনমী মথঙগী দেকেদ অসিদা $৮ বিলিয়ন্দগী $৪৪ বিলিয়ন্দা কাখৎলক্লগনি হায়না শেলথুম মমন্ত্রীনা থমখিবা ৱাফম মহাক্না অমুক হন্না ফোঙদোকখি‍।

মীওই ৫০০০ হেন্বা অমসুং পাউমী ১০০০রোম্না স্রিহরিকোতাদগী চন্দ্রয়ান-৩ থাগৎখিবা লাইব ওইনা মীৎয়েঙ তাখিবনা তাক্লিবা স্পেস সেক্তরদা থাংলম্বা য়োৎহ্লিং থদৎখিবগী অমসুং মসিবু মীয়ামদা হেন্না এসেসসিবল ওইহনখিবা অদুগীদমক দোক্তর জিতেন্দ্র সিংহনা পি.এম. মোদীবু ৱাংনা থাঙ্গৎখি‍।

মাঙদা মীৎয়েঙ থমদুনা, দোক্তর জিতেন্দ্রনা, ২০৩৫ ফাওবদা ভারতিয় অন্তরিক্সা সস্তেসন (BAS) থম্বা অমসুং ২০৪০ ফাওবদা থাগী লৈমায়দা ভারতকী এস্ত্রোনেত খোঙদাবগী ৱাফম য়াওরিবা স্পেস ভিজন ২০৪৭গী চাউরাকপা শক্তম থমখি‍। লো আর্থ ওর্বিত্তা মীওইবগী স্পেসফ্লাইত ওইনা পাইবদগী হৌরকখিবা অসিনা ভারত মশাগী ওইবা ইন্দিজিনস স্পেস স্তেসন্দা ভারতকী ওইবা সাইন্তিফিক থবক থৌরমশিং পাঙথোক্তুনা মখা তানা থাগী অমসুং মসিগী ৱাংমগী এক্সপ্লোরেসন তৌবা ঙমগনি হায়না মহাক্না থাজবা ফোঙদোকখি‍।

দোক্তর জিতেন্দ্র সিংহনা ভারতকী স্পেস ত্রান্সপোর্তেসন, প্লেতফোর্মশিং, অমসুং গ্রাউন্দ স্তেসনশিংদা লৈরিবা এন্দ-তু-এন্দ কেপেবিলিতীশিংবু স্পেস সেক্তরদা লৈবাকসিগী মরোমদোম লেপচবা ঙম্বগী মরুওইবা ৱাফমশিংনি হায়না ফোঙদোকখি‍। দোক্তর সিংহনা, ভারতকী স্পেসকী লমদা খুমাঙ চাওশিন্বনা কান্নবা পীগদৌরিবা ফিজরিজ, লৌউ-শিংউ, নেচরেল রিসোর্স মেনেজমেন্ত, দিজাস্তর মেনেজমেন্ত, অমসুং সেতলাইত কম্ম্যুনিকেসন অসিনচিংবা সেক্তরশিংদা স্পেস এপ্লিকেসন্না পীরিবা শাহুমশিংসু থমখি‍।

লৈবাকসিনা মাগী অহান্বা নেস্নেল স্পেস দে পাঙথোকপগা লোয়ননা, দোক্তর জিতেন্দ্র সিংহনা চহিগী ওইবা থৌরম অসিনা ভারতকী স্পেসকী খোঙচৎ অমসুং তুংদা থাংজিল্লক্কদৌরিবা খোঙথাংশিংগী মরমদা লৈবাক মীয়ামদা হেন্না খঙনিংনবা পুক্নিং থৌগৎকনি অমসুং লাংতক্নবা পোকহনগনি হায়না থাজবা ফোঙদোকখি‍।

****