కస్టమ్స్ సుంకాల పై బడ్జెట్ ప్రతిపాదనలు దేశీయ తయారీకి మద్దతు ఇవ్వడానికి, స్థానిక విలువ జోడింపును పెంచడానికి, ఎగుమతి పోటీతత్వాన్ని ప్రోత్సహించడానికి , పన్నులను సరళతరం చేయడానికి ఉద్దేశించినవి, అదే సమయంలో సాధారణ ప్రజలు , వినియోగదారుల ప్రయోజనాలను పరిగణనలోకి తీసుకుంటాయి - అని కేంద్ర ఆర్థిక,  కార్పొరేట్ వ్యవహారాల మంత్రి శ్రీమతి నిర్మలా సీతారామన్ ఈ రోజు పార్లమెంటులో తన బడ్జెట్ ప్రసంగంలో తెలిపారు. ప్రాణరక్షక మందుల నుంచి అరుదైన ఎర్త్ మినరల్స్ వరకు వస్తువులపై కొత్త కస్టమ్స్ డ్యూటీ రేట్లను ప్రతిపాదించారు.

క్యాన్సర్ రోగులకు పెద్ద ఉపశమనం కలిగించే విధంగా, ట్రాస్టుజుమాబ్ డెరుక్స్టెకాన్, ఒసిమెర్టినిబ్ ,డర్వాల్యుమాబ్ అనే మూడు మందులను కస్టమ్స్ సుంకాల నుండి పూర్తిగా మినహాయించారు. అంతేకాకుండా, మెడికల్ ఎక్స్-రే యంత్రాలలో ఉపయోగించడానికి ఎక్స్-రే ట్యూబులు , ఫ్లాట్ ప్యానెల్ డిటెక్టర్లపై బిసిడి కూడా తగ్గించారు. , తద్వారా వాటిని దేశీయ సామర్థ్య పెంపుతో సమన్వయ పరచవచ్చు.

గత ఆరేళ్లలో దేశీయంగా మొబైల్ ఫోన్ల ఉత్పత్తి మూడు రెట్లు పెరిగిందని, మొబైల్ ఫోన్ల ఎగుమతులు దాదాపు వంద రెట్లు పెరిగాయని ఆర్థిక మంత్రి తెలిపారు. "వినియోగదారుల ప్రయోజనాల దృష్ట్యా, మొబైల్ ఫోన్, మొబైల్ పిసిబిఎ , మొబైల్ ఛార్జర్లపై బిసిడిని 15 శాతానికి తగ్గించాలని నేను ఇప్పుడు ప్రతిపాదిస్తున్నాను" అని ఆర్థిక మంత్రి చెప్పారు.

25 క్రిటికల్ మినరల్స్ పై కస్టమ్స్ సుంకాలను పూర్తిగా మినహాయిస్తున్నట్లు, రెండింటిపై బీసీడీని తగ్గిస్తున్నట్లు ఆర్థిక మంత్రి ప్రకటించారు. ఈ అరుదైన భూమి ఖనిజాలు కీలకమైన అంతరిక్షం, రక్షణ, టెలికమ్యూనికేషన్స్, హైటెక్ ఎలక్ట్రానిక్స్, న్యూక్లియర్ ఎనర్జీ, పునరుత్పాదక ఇంధనం వంటి రంగాలకు ప్రయోజనం చేకూరుస్తాయి. పునరుత్పాదక ఇంధన రంగానికి మరింత ఊతమిచ్చేలా దేశంలో సోలార్ సెల్స్, ప్యానెల్స్ తయారీలో ఉపయోగించడానికి మినహాయింపు పొందిన క్యాపిటల్ గూడ్స్ జాబితాను విస్తరిస్తున్నట్లు మంత్రి ప్రకటించారు. "అంతేకాకుండా, సోలార్ గ్లాస్ , టిన్నిడ్ కాపర్ ఇంటర్ కనెక్ట్ ల తగినంత దేశీయ తయారీ సామర్థ్యాన్ని దృష్టిలో ఉంచుకుని, వారికి అందించే కస్టమ్స్ సుంకాల మినహాయింపును పొడిగించకూడదని నేను ప్రతిపాదిస్తున్నాను" అని మంత్రి చెప్పారు.

దేశం నుండి సీఫుడ్ ఎగుమతుల పోటీని  పెంచడానికి, కొన్ని బ్రూడ్ స్టాక్, పాలిచెట్ పురుగులు, రొయ్యలు , చేపల దాణాపై బిసిడిని 5 శాతానికి తగ్గించాలని మంత్రి ప్రతిపాదించారు. సీఫుడ్ ఎగుమతులను మరింత పెంచడానికి రొయ్యలు, చేపల దాణా తయారీకి సంబంధించిన వివిధ ఇన్పుట్లను కస్టమ్స్ సుంకం నుంచి మినహాయించారు. తోలు, టెక్స్ టైల్ రంగాల్లో ఎగుమతుల పోటీతత్వాన్ని పెంపొందించడానికి వివిధ తోలు ముడి పదార్థాలపై కూడా ఇదే విధమైన తగ్గింపు, మినహాయింపును ప్రకటించారు. ఇంకా, ముడి చర్మాలు, చర్మాలు , తోలుపై ఎగుమతి సుంకం విధింపు విధానాన్ని సరళీకరించాలని , హేతుబద్ధీకరించాలని ప్రతిపాదించారు.

బంగారం, వెండిపై కస్టమ్స్ సుంకాన్ని 15 శాతం నుంచి 6 శాతానికి, ప్లాటినంపై సుంకాన్ని 15.4 శాతం నుంచి 6.4 శాతానికి తగ్గించారు. అంతేకాక, స్టీల్ , కాపర్ ఉత్పత్తి వ్యయాన్ని తగ్గించడానికి ఫెర్రో నికెల్ , బ్లిస్టర్ కాపర్ పై బిసిడి ని తొలగించారు. 

వాణిజ్య సౌలభ్యం, డ్యూటీ ఇన్వర్షన్ తొలగింపు, వివాదాల తగ్గింపు కోసం కస్టమ్స్ డ్యూటీ రేట్ స్ట్రక్చర్ ను హేతుబద్ధీకరించడానికి, సరళీకరించడానికి వచ్చే ఆరు నెలల్లో సమగ్ర సమీక్ష చేపట్టనున్నట్లు ఆర్థిక మంత్రి తెలిపారు.

***