কেন্দ্ৰীয় বিত্ত আৰু কৰ্পোৰেট পৰিক্ৰমা দপ্তৰৰ মন্ত্ৰী শ্ৰীমতী নিৰ্মলা সীতাৰমণে ২০২৪-২৫ চনৰ কেন্দ্ৰীয় বাজেট উপস্থাপন কৰি কয়, "দেশক শক্তিশালী উন্নয়ন আৰু সৰ্বাংগীন সমৃদ্ধিৰ পথলৈ লৈ যোৱাৰ বাবে জনসাধাৰণে আমাৰ চৰকাৰক এক অনন্য সুযোগ প্ৰদান কৰিছে"।

বাজেট ভাষণত পৰ্যটন সন্দৰ্ভত মন্তব্য কৰি কেন্দ্ৰীয় মন্ত্ৰীগৰাকীয়ে কয়, "পৰ্যটন সদায় আমাৰ সভ্যতাৰ অংশ হৈ আহিছে। ভাৰতক এক গোলকীয় পৰ্যটন স্থল হিচাপে গঢ়ি তোলাৰ ক্ষেত্ৰত আমাৰ প্ৰচেষ্টাই নিয়োগ সম্ভাৱনা সৃষ্টি কৰিব, বিনিয়োগক উৎসাহিত কৰিব আৰু অন্যান্য খণ্ডৰ বাবে অৰ্থনৈতিক সুযোগ উন্মুক্ত কৰিব"।

শ্ৰীমতী নিৰ্মলা সীতাৰমণে কয় যে গয়াত ‘বিষ্ণুপদ মন্দিৰ’ আৰু বিহাৰৰ বোধগয়াত ‘মহাবোধী মন্দিৰ’ৰ অপৰিসীম আধ্যাত্মিক গুৰুত্ব আছে। তেওঁ ঘোষণা কৰে, "বিষ্ণুপদ মন্দিৰ কৰিডৰ আৰু মহাবোধি মন্দিৰ কৰিডৰৰ ব্যাপক উন্নয়নলৈ সহযোগিতা আগবঢ়োৱা হ'ব, সফল ‘কাশী বিশ্বনাথ মন্দিৰ কৰিডৰ’ৰ আৰ্হিত এইকেইটা মন্দিৰকো বিশ্বমানৰ তীৰ্থস্থল আৰু পৰ্যটন স্থলীলৈ ৰূপান্তৰিত কৰা হ’ব"।

কেন্দ্ৰীয় মন্ত্ৰীগৰাকীয়ে তেওঁৰ বাজেট ভাষণত কয় যে ৰাজগীৰে হিন্দু, বৌদ্ধ আৰু জৈনসকলৰ বাবে অপৰিসীম ধৰ্মীয় গুৰুত্ব বহন কৰে আৰু জৈন মন্দিৰ চৌহদৰ ২০ সংখ্যক তীৰ্থংকৰ মুনিসুভ্ৰতা মন্দিৰ হৈছে নিতান্তই প্ৰাচীন মন্দিৰ। তেওঁ লগতে কয় যে সপ্তঋষি বা ব্ৰহ্মকুণ্ডৰ পৰা ওলোৱা ৭টা গৰমপানীৰ নিজৰা হৈছে পৱিত্ৰ। কেন্দ্ৰীয় মন্ত্ৰীগৰাকীয়ে কয় যে ৰাজগীৰৰ বাবে এক ব্যাপক উন্নয়নমূলক পদক্ষেপ গ্ৰহণ কৰা হ'ব।

তেওঁ লগতে কয় যে কেন্দ্ৰীয় চৰকাৰে নালন্দা বিশ্ববিদ্যালয়ক ইয়াৰ গৌৰৱময় মৰ্যাদালৈ পুনৰুজ্জীৱিত কৰাৰ উপৰিও নালন্দাক পৰ্যটন কেন্দ্ৰ হিচাপে বিকাশত সহায় কৰিব।

কেন্দ্ৰীয় মন্ত্ৰীগৰাকীয়ে কয় যে উৰিষ্যাৰ মনোৰম সৌন্দৰ্য, মন্দিৰ, স্মাৰক, কাৰুশিল্প, বন্যপ্ৰাণী অভয়াৰণ্য, প্ৰাকৃতিক দৃশ্য আৰু প্ৰাচীন সমুদ্ৰতীৰে ইয়াক এক চূড়ান্ত পৰ্যটন স্থল হিচাপে গঢ়ি তুলিছে। "আমাৰ চৰকাৰে এইসমূহ সম্পদৰ উন্নয়নৰ বাবে সহায় আগবঢ়াব", তেওঁ লগতে কয়।

***

NB/SS/SK/KB