மகாராஷ்டிர ஆளுநர் திரு ரமேஷ் பயஸ் அவர்களே, முதலமைச்சர் ஏக்நாத் ஷிண்டே அவர்களே, எனது அமைச்சரவை சகாக்கள் பியூஷ் கோயல் அவர்களே, ராம்தாஸ் அத்வாலே அவர்களே, துணை முதலமைச்சர் திரு தேவேந்திர பட்னாவிஸ் அவர்களே, அஜித் தாதா பவார் அவர்களே, மாநில அமைச்சர்களே, தாய்மார்களே, பெரியோர்களே! அனைவருக்கும் வாழ்த்துக்கள்

இன்று, மகாராஷ்டிரா மற்றும் மும்பைக்கு ரூ. 30,000 கோடி மதிப்புள்ள திட்டங்களுக்கு அடிக்கல் நாட்டி தொடங்கி வைக்கும் பெருமையை நான் பெற்றுள்ளேன். இந்தத் திட்டங்கள் மும்பை மற்றும் அதன் சுற்றுப்புறப் பகுதிகளின் இணைப்பை கணிசமாக மேம்படுத்தும். சாலை மற்றும் ரயில் திட்டங்களைத் தவிர, மகாராஷ்டிராவில் இளைஞர்களின் திறன் மேம்பாட்டிற்கான ஒரு பெரிய திட்டமும் உள்ளது. இது ஏராளமான வேலை வாய்ப்புகளை உருவாக்கும். இரண்டு மூன்று வாரங்களுக்கு முன்புதான் மகாராஷ்டிர மாநிலம் வதவான் துறைமுகம் அமைக்க மத்திய அரசு ஒப்புதல் அளித்தது. இந்த ரூ. 76,000 கோடி திட்டம் இப்பகுதியில் 10 லட்சத்துக்கும் மேற்பட்ட வேலைகளை உருவாக்கும்.

நண்பர்களே,

கடந்த ஒரு மாதமாக மும்பையில் இந்தியா மற்றும் வெளிநாடுகளைச் சேர்ந்த முதலீட்டாளர்கள் கொண்டாட்டத்துடன் உள்ளனர். ஒவ்வொரு முதலீட்டாளரும் எங்கள் அரசின் மூன்றாவது பதவிக்காலத்தை உற்சாகத்துடன் வரவேற்றுள்ளனர். தேசிய ஜனநாயகக் கூட்டணி அரசால் மட்டுமே ஸ்திரத்தன்மையை ஏற்படுத்த முடியும் என்பதை மக்கள் அறிவார்கள். மூன்றாவது முறையாக பதவியேற்ற பிறகு, இந்த மூன்றாவது பதவிக்காலத்தில், தேசிய ஜனநாயக கூட்டணி அரசு மூன்று மடங்கு வேகமாக செயல்படும் என்று நான் உறுதியளித்தேன். இன்று, இந்த வாக்குறுதி நிறைவேறுவதை நாம் காண்கிறோம்.

நண்பர்களே,

மகாராஷ்டிராவுக்கு ஒரு புகழ்பெற்ற வரலாறு, வலுவான நிகழ்காலம் மற்றும் வளமான எதிர்காலத்திற்கான கனவு உள்ளது. வளர்ந்த இந்தியாவை கட்டமைப்பதில் மகாராஷ்டிரா முக்கிய பங்கு வகிக்கிறது. இது தொழில்துறை வலிமை, விவசாய சக்தி மற்றும் ஒரு வலிமையான நிதித் துறையைக் கொண்டுள்ளது. இந்த சக்தி மும்பையை நாட்டின் நிதி மையமாக நிறுவியுள்ளது. இந்த சக்தியைப் பயன்படுத்தி மகாராஷ்டிராவை உலகின் மிகப்பெரிய பொருளாதார சக்தியாக மாற்றுவதும், மும்பையை உலகின் நிதிநுட்பத் தலைநகராக மாற்றுவதும் எனது குறிக்கோள். சுற்றுலாவைப் பொறுத்தவரை மகாராஷ்டிரா இந்தியாவின் சிறந்த மாநிலமாக மாற வேண்டும் என்று நான் விரும்புகிறேன். சத்ரபதி சிவாஜி மகாராஜின் வீரம், கொங்கனின் மயக்கும் கடற்கரைகள் மற்றும் சஹ்யாத்ரி மலைகள் வழியாக சிலிர்ப்பூட்டும் பயணங்களுக்கு சாட்சியாக விளங்கும் அற்புதமான கோட்டைகளை இது கொண்டுள்ளது. சுற்றுலா மற்றும் மருத்துவ சுற்றுலாவுக்கு இங்கு ஏராளமான வாய்ப்புகள் உள்ளன. பாரதத்தின் வளர்ச்சியில் புதிய அத்தியாயத்தை எழுத மகாராஷ்டிரா தயாராக உள்ளது. நாம் அனைவரும் இந்த பயணத்தின் ஒரு பகுதியாக இருக்கிறோம்.

நண்பர்களே,

21 ஆம் நூற்றாண்டின் இந்தியாவின் அபிலாஷைகள் தற்போது முன்னெப்போதும் இல்லாத அளவுக்கு உயர்ந்துள்ளன. இந்த நூற்றாண்டின் சுமார் 25 ஆண்டுகள் கடந்துவிட்டன, அடுத்த 25 ஆண்டுகளுக்குள் பாரதத்தை வளர்ந்த நாடாக மாற்றுவதை நோக்கமாகக் கொண்டு, நம் நாட்டு மக்கள் விரைவான வளர்ச்சியை விரும்புகிறார்கள். குறிப்பாக மும்பையும், பொதுவாக மகாராஷ்டிராவும் இந்த முயற்சியில் குறிப்பிடத்தக்க பங்கைக் கொண்டுள்ளன. மகாராஷ்டிரா மற்றும் மும்பையில் உள்ள அனைவரது வாழ்க்கைத் தரத்தை மேம்படுத்துவதே எங்கள் குறிக்கோள். எனவே, மும்பையைச் சுற்றியுள்ள பகுதிகளில் இணைப்பை மேம்படுத்த நாங்கள் ஒருங்கிணைந்த முயற்சிகளை மேற்கொண்டு வருகிறோம். மும்பையில் கடலோரச் சாலை மற்றும் அடல் சேது பணிகள் தற்போது நிறைவடைந்துள்ளன. அடல் சேது கட்டுமானத்தின் போது, அதை தாமதப்படுத்த அதிக எதிர்ப்புகளும், முயற்சிகளும் மேற்கொள்ளப்பட்டன என்பதை நீங்கள் அறிவீர்கள். இருப்பினும், இன்று, அனைவரும் அதன் மகத்தான நன்மைகளைக் காணலாம். தினமும் சுமார் 20,000 வாகனங்கள் இதைப் பயன்படுத்துவதாகவும், இதனால், ஒவ்வொரு நாளும் 20 முதல் 25 லட்சம் ரூபாய் மதிப்பிலான எரிபொருள் சேமிக்கப்படுவதாகவும் எனக்குத் தெரிவிக்கப்பட்டது. மேலும், பன்வெல் நகரை அடைய இப்போது சுமார் 45 நிமிடங்கள் குறைவாக ஆகிறது. இதன் விளைவாக நேர சேமிப்பு மற்றும் சுற்றுச்சூழல் நன்மைகள் கிடைக்கும். இந்த அணுகுமுறையுடன், மும்பையின் போக்குவரத்து முறையை நவீனமயமாக்கி வருகிறோம். மும்பை மெட்ரோ விரிவாக்கப் பணிகளும் வேகமாக நடைபெற்று வருகின்றன. 10 ஆண்டுகளுக்கு முன்பு மும்பையில் 8 கிலோ மீட்டர் தூரத்துக்கு மட்டுமே மெட்ரோ ரயில் பாதை இருந்தது. ஆனால் இன்று அது 80 கிலோ மீட்டர் வரை செயல்படுகிறது. கூடுதலாக, மும்பையில் சுமார் 200 கி.மீ மெட்ரோ கட்டமைப்புப் பணிகள் நடந்து வருகின்றன.

நண்பர்களே,

இந்திய ரயில்வேயின் மாற்றம் மும்பை மற்றும் மகாராஷ்டிராவுக்கு பெரிதும் பயனளிக்கிறது. நாக்பூர் சத்ரபதி சிவாஜி மகாராஜ் முனையம் மற்றும் அஜ்னி நிலையங்களின் மறுவடிவமைப்புப் பணிகள் விரைவாக நடந்து வருகின்றன. இன்று, சத்ரபதி சிவாஜி மகாராஜ் முனையம் மற்றும் லோக்மான்ய திலக் நிலையத்தில் புதிய நடைமேடைகள் தொடங்கப்பட்டுள்ளன. இந்த நிலையங்களில் இருந்து 24 பெட்டிகளுடன் நீண்ட ரயில்களை இயக்க இது உதவும்.

நண்பர்களே,

கடந்த பத்தாண்டுகளில் மகாராஷ்டிராவில் தேசிய நெடுஞ்சாலைகளின் நீளம் மூன்று மடங்கு அதிகரித்துள்ளது. கோரேகான்-முலுந்த் இணைப்புச் சாலை திட்டம் வளர்ச்சிக்கும் சுற்றுச்சூழலுக்கும் இடையிலான நல்லிணக்கத்திற்கு எடுத்துக்காட்டாக விளங்குகிறது. இன்று, தானேவிலிருந்து போரிவலி வரையிலான இரட்டை சுரங்கப்பாதை திட்டத்தின் பணிகளும் தொடங்குகின்றன. இது இந்த இரண்டு இடங்களுக்கும் இடையிலான பயண நேரத்தை சில நிமிடங்களாகக் குறைக்கும். நமது புனித யாத்திரை தலங்களை மேம்படுத்தவும், யாத்ரீகர்களுக்கு கிடைக்கும் வசதிகளை மேம்படுத்தவும் தேசிய ஜனநாயக கூட்டணி அரசு தொடர்ந்து முயற்சி செய்து வருகிறது. புனேயிலிருந்து பந்தர்பூர் வரையிலான பயணம் சுமூகமாக இருப்பதையும், பக்தர்களுக்கு போதுமான வசதிகள் கிடைப்பதையும் தேசிய ஜனநாயக கூட்டணி அரசு உறுதி செய்துள்ளது.

சகோதர, சகோதரிகளே,

இத்தகைய இணைப்பு உள்கட்டமைப்பு சுற்றுலா, விவசாயம் மற்றும் தொழில்துறைக்கு பயனளித்து, புதிய வேலைவாய்ப்புகளை உருவாக்குகிறது. மேம்படுத்தப்பட்ட இணைப்பு பெண்களுக்கு வசதியையும் பாதுகாப்பையும் வழங்குவதுடன் அவர்களின் கண்ணியத்தை மேம்படுத்துகிறது. தேசிய ஜனநாயகக் கூட்டணி அரசின் இந்த முன்முயற்சிகள் ஏழைகள், விவசாயிகள், பெண்கள் மற்றும் இளைஞர்களுக்கு அதிகாரம் அளிக்கின்றன. மகாராஷ்டிராவின் அரசும் இதே உறுதிப்பாட்டைப் பகிர்ந்து கொள்கிறது. ஒவ்வொரு ஆண்டும் 10 லட்சம் இளைஞர்களுக்கு திறன் பயிற்சி அளிக்க மகாராஷ்டிர அரசு உறுதி பூண்டுள்ளது எனக்கு மகிழ்ச்சி அளிக்கிறது.

நண்பர்களே,

திறன் மேம்பாடு மற்றும் பெரிய அளவிலான வேலைவாய்ப்பு இந்தியாவுக்கு அவசியம். இந்த இலக்குகளை நோக்கி எங்கள் அரசு தொடர்ந்து செயல்பட்டு வருகிறது. கடந்த 4-5 ஆண்டுகளில், கோவிட் -19 போன்ற ஒரு பெரிய நெருக்கடியை எதிர்கொண்ட போதிலும், இந்தியா சாதனை அளவிலான வேலைவாய்ப்பை அடைந்துள்ளது. சமீபத்தில், இந்திய ரிசர்வ் வங்கி வேலைவாய்ப்பு குறித்த விரிவான அறிக்கையை வெளியிட்டது, இது கடந்த 3-4 ஆண்டுகளில் நாட்டில் சுமார் 8 கோடி புதிய வேலைகள் உருவாக்கப்பட்டுள்ளன என்று கூறுகிறது. வேலைவாய்ப்பு குறித்து தவறான கதைகளை பரப்புபவர்களை இந்த புள்ளிவிவரங்கள் மௌனமாக்கியுள்ளன. இதுபோன்ற பொய்யான கதைகள் முதலீடு, உள்கட்டமைப்பு மேம்பாடு மற்றும் இந்தியாவின் முன்னேற்றத்திற்கு தீங்கு விளைவிக்கும். அவர்களின் கொள்கைகள் ஒவ்வொன்றும் இளைஞர்களுக்கு துரோகம் இழைப்பதையும், வேலைவாய்ப்பை தடுப்பதையும் நோக்கமாகக் கொண்டுள்ளன. எவ்வாறாயினும், அவர்களின் உண்மையான நோக்கங்கள் இப்போது அம்பலமாகிக் கொண்டிருக்கின்றன, இந்தியர்கள் புத்திசாலிகள், எனவே அவர்களின் பொய்களையும் ஏமாற்றுகளையும் நிராகரிக்கின்றனர். எப்போதெல்லாம் பாலம் கட்டப்படுகிறதோ, ரயில் பாதை போடப்படுகிறதோ, சாலை போடப்படுகிறதோ, உள்ளூர் ரயில் பெட்டி தயாரிக்கப்படுகிறதோ அப்போதெல்லாம் வேலை வாய்ப்புகள் உருவாக்கப்படுகின்றன. இந்தியாவில் உள்கட்டமைப்பு வளர்ச்சியின் வேகம் அதிகரிக்கும் போது, வேலைவாய்ப்பு உருவாக்கும் விகிதமும் அதிகரிக்கிறது. வரும் காலங்களில் புதிய முதலீடுகள் வந்தால், இந்த வாய்ப்புகள் மேலும் அதிகரிக்கும்.

நண்பர்களே,

தேசிய ஜனநாயக கூட்டணி அரசின் வளர்ச்சி மாதிரி சமூகத்தின் பின்தங்கிய பிரிவினருக்கு முன்னுரிமை அளிக்கிறது. பல தசாப்தங்களாக சமூக ஏணியின் அடிப்பகுதியில் இருந்தவர்கள் மீது நாங்கள் கவனம் செலுத்துகிறோம். புதிய அரசு பதவியேற்றவுடன், ஏழைகளுக்கான உறுதியான வீடுகள் தொடர்பாக நாங்கள் குறிப்பிடத்தக்க முடிவுகளை எடுத்தோம், விவசாயிகளின் நலனுக்காக முக்கியமான நடவடிக்கைகளை எடுத்தோம். இதுவரை, 4 கோடி ஏழைகள் உறுதியான வீடுகளைப் பெற்றுள்ளனர். வரவிருக்கும் ஆண்டுகளில், மகாராஷ்டிராவில் லட்சக்கணக்கான ஏழைகள், தலித், பின்தங்கிய மற்றும் பழங்குடி குடும்பங்கள் உட்பட 3 கோடி ஏழை குடும்பங்கள் உறுதியான வீடுகளைப் பெறும். ஒரு நல்ல வீடு என்பது ஒவ்வொரு குடும்பத்திற்கும் இன்றியமையாதது மட்டுமல்ல, கௌரவமான விஷயமும் கூட. எனவே, நகரங்களில் வசிக்கும் ஏழை மற்றும் நடுத்தர மக்களுக்கான வீடு என்ற கனவை நனவாக்க நாங்கள் பணியாற்றி வருகிறோம்.

நண்பர்களே,

தெருவோர வியாபாரிகள் கண்ணியமான வாழ்க்கையை வாழ்வதை உறுதி செய்ய நாங்கள் கடமைப்பட்டுள்ளோம். இந்த வகையில் 'ஸ்வநிதி யோஜனா' மிகவும் பயனளித்துள்ளது. இந்தத் திட்டத்தின் கீழ் இதுவரை 90 லட்சம் கடன்கள் அனுமதிக்கப்பட்டுள்ளன. இவற்றில் சுமார் 13 லட்சம் கடன்கள் மகாராஷ்டிராவில் உள்ள விற்பனையாளர்களுக்குச் செல்கின்றன. மும்பையில் மட்டும், 1.5 லட்சம் தெருவோர வியாபாரிகள் ஸ்வநிதி யோஜனா மூலம் பயனடைந்துள்ளனர்.

நண்பர்களே,

'ஸ்வநிதி திட்டத்தின் மற்றொரு முக்கிய அம்சத்தை நான் சுட்டிக்காட்ட விரும்புகிறேன். இந்தக் கடன்களைப் பெற்றவர்கள் விடாமுயற்சியுடன் அவற்றை முழுமையாகத் திருப்பிச் செலுத்துகிறார்கள். இது எனது ஏழை சகோதர, சகோதரிகளின் சுயமரியாதை மற்றும் நேர்மையை பிரதிபலிக்கிறது. குறிப்பிடத்தக்க வகையில், ஸ்வநிதி திட்டத்தின் பயனாளிகள் இதுவரை ரூ.3.25 லட்சம் கோடி மதிப்பிலான டிஜிட்டல் பரிவர்த்தனைகளை மேற்கொண்டுள்ளனர். இது டிஜிட்டல் இந்தியாவுக்கு அதிகாரம் அளிப்பது மட்டுமின்றி, நமது தேசத்திற்கு புதிய அடையாளத்தையும் அளிக்கிறது.

நண்பர்களே,

இந்தியாவில் கலாச்சார, சமூக மற்றும் தேசிய உணர்வுக்கு மகாராஷ்டிரா குறிப்பிடத்தக்க பங்களிப்பை வழங்கியுள்ளது. இந்த மண் சத்ரபதி சிவாஜி மகாராஜ், பாபாசாகேப் அம்பேத்கர், மகாத்மா ஜோதிபா புலே, சாவித்ரிபாய் புலே, அன்னாபாவ் சாதே, லோக்மான்ய திலகர், வீர சாவர்க்கர் உள்ளிட்ட பல பெரிய நபர்களின் மரபுகளை கொண்டுள்ளது. இந்தப் புகழ்பெற்ற நபர்கள் கனவு கண்ட நல்லிணக்கமான சமூகம் மற்றும் வலுவான தேசத்தை நோக்கி நாம் பாடுபட வேண்டும். செழிப்புக்கான பாதை நல்லிணக்கம் மற்றும் நல்லெண்ணத்தில் உள்ளது என்பதை நினைவில் கொள்வது முக்கியம். இந்த உணர்வுடன், இந்த வளர்ச்சித் திட்டங்களுக்காக உங்கள் அனைவருக்கும் எனது மனமார்ந்த வாழ்த்துக்களைத் தெரிவித்துக் கொள்கிறேன். மிகவும் நன்றி!

பாரத் மாதா கி ஜே!

பாரத் மாதா கி ஜே!

பாரத் மாதா கி ஜே!

மிகவும் நன்றி.

***

PKV/KV/KR

(Release ID: 2033023)