مہاراشٹر کے گورنر جناب رمیش بیس جی، وزیر اعلیٰ ایکناتھ شندے جی، مرکزی کابینہ کے میرے ساتھی پیوش گوئل جی، رام داس اٹھاولے جی، نائب وزیر اعلیٰ دیویندر فڑنویس جی، اجیت دادا پوار جی، ریاستی حکومت کے وزراء منگل پربھات جی، دیپک کیسرکر جی اور دیگر تمام معززین، خواتین و حضرات۔

مہاراشٹر کے تمام بھائیوں اور بہنوں کو سلام!

آج مجھے مہاراشٹر اور ممبئی کے لیے 30 ہزار کروڑ روپے کے پروجیکٹس کا سنگ بنیاد رکھنے اور افتتاح کرنے کا موقع ملا ہے۔ یہ پروجیکٹس ممبئی اور آس پاس کے علاقوں کی کنکٹیوٹی کو مزید بہتر بنائیں گے۔ سڑک اور ریل پروجیکٹوں کے علاوہ، ان میں مہاراشٹر کے نوجوانوں کی مہارت کی ترقی کے لیے ایک بہت بڑی اسکیم بھی شامل ہے۔ اس سے مہاراشٹر میں بڑی تعداد میں روزگار بھی پیدا ہوگا۔ آپ نے اسے اخبارات میں پڑھا ہوگا یا ٹی وی پر دیکھا ہوگا۔ صرف دو تین ہفتے قبل مرکزی حکومت نے مہاراشٹر کے لیے ودھاون بندرگاہ کو بھی منظوری دی تھی۔ 76 ہزار کروڑ روپے کے اس پروجیکٹ سے یہاں 10 لاکھ سے زیادہ ملازمتیں پیدا ہوں گی۔

ساتھیو،

گزشتہ ایک ماہ سے ممبئی میں ہندوستان اور بیرون ملک سرمایہ کاروں کا جشن دیکھا گیا ہے۔ چھوٹے یا بڑے ہر سرمایہ کار نے ہماری حکومت کی تیسری مدت کار کا پرجوش استقبال کیا ہے۔ لوگ جانتے ہیں کہ صرف این ڈی اے حکومت ہی استحکام اور مضبوطی فراہم کر سکتی ہے۔ تیسری بار حلف لینے کے بعد میں نے کہا تھا کہ این ڈی اے حکومت تیسری میعاد میں تین گنا تیزی سے کام کرے گی۔ اور آج ہم ایسا ہوتا دیکھ رہے ہیں۔

ساتھیو،

مہاراشٹر کی ایک شاندار تاریخ ہے۔ مہاراشٹر کا ایک مضبوط حال ہے اور مہاراشٹر کا ایک خوشحال مستقبل کا خواب ہے۔ مہاراشٹرا ایک ایسی ریاست ہے جس کا ترقی یافتہ ہندوستان کی تعمیر میں بہت بڑا کردار ہے۔ مہاراشٹر میں صنعت کی طاقت ہے۔ مہاراشٹر میں زراعت کی طاقت ہے۔ مہاراشٹر کے پاس مالیاتی شعبے کی طاقت ہے۔ اس طاقت نے ممبئی کو ملک کا مالیاتی مرکز بنا دیا ہے۔ اب میرا مقصد مہاراشٹر کی اس طاقت کو استعمال کرتے ہوئے مہاراشٹر کو دنیا کا سب سے بڑا اقتصادی پاور ہاؤس بنانا ہے۔ میرا مقصد ممبئی کو دنیا کی مالیاتی ٹیکنالوجی کی راجدھانی بنانا ہے۔ میں چاہتا ہوں کہ مہاراشٹر سیاحت میں ہندوستان کی نمبر ایک ریاست بن جائے۔ یہاں بڑے بڑے قلعے ہیں جو چھترپتی شیواجی مہاراج کی بہادری کی گواہی دیتے ہیں۔ یہاں کونکن کی ساحلوں کا دلکش نظارہ ہے۔ یہاں سہیادری پہاڑیوں پر سفر کرنے کا لطف ہے۔ یہاں کانفرنس، سیاحت اور طبی سیاحت کے بے پناہ امکانات ہیں۔ مہاراشٹر ہندوستان میں ترقی کی نئی داستان لکھنے جا رہا ہے۔ اور ہم سب اس کے ساتھی مسافر ہیں۔ آج کا پروگرام مہایوتی حکومت کے ان مقاصد کے لیے وقف ہے۔

ساتھیو،

21ویں صدی کے ہندوستان کی خواہشات- ہندوستان کی آرزوئیں اس وقت بہت بلند سطح پر ہیں۔ اس صدی میں تقریباً 25 سال گزر چکے ہیں۔ ملک کے لوگ مسلسل تیز رفتار ترقی چاہتے ہیں اور چاہتے ہیں کہ ہندوستان اگلے 25 سالوں میں ترقی کرے۔ اور اس میں ممبئی اور مہاراشٹر کا رول بہت بڑا ہے۔ ہمارا مقصد مہاراشٹر اور ممبئی میں ہر ایک کے معیار زندگی کو بہتر بنانا ہے اور اس بات کو یقینی بنانا ہے کہ یہاں کا معیار زندگی بہترین ہو۔ اس لیے ممبئی کے آس پاس کے علاقوں کے رابطوں کو بہتر بنانے کی کوشش کی جا رہی ہے۔ ممبئی میں کوسٹل روڈ اور اٹل سیٹو اب مکمل ہو چکے ہیں۔ اور آپ کو یاد ہوگا کہ جب اٹل پل بن رہا تھا تو اس کے خلاف طرح طرح کی باتیں پھیلائی گئی تھیں۔ اسے روکنے کی کوشش کی گئی۔ لیکن آج سب کو اندازہ ہو رہا ہے کہ یہ کتنا فائدہ مند ہے۔ مجھے بتایا گیا کہ روزانہ تقریباً 20 ہزار گاڑیاں اسے استعمال کر رہی ہیں۔ اور اندازہ ہے کہ اٹل سیٹو کی وجہ سے روزانہ 20-25 لاکھ روپے کا ایندھن بچ رہا ہے۔ اور یہی نہیں، اب لوگوں کو پنویل جانے میں تقریباً 45 منٹ کم لگتے ہیں۔ یعنی وقت کا فائدہ اور ماحول کا فائدہ۔ اس نقطہ نظر کے ساتھ، ہم ممبئی کے ٹرانسپورٹ سسٹم کو جدید بنا رہے ہیں۔ ممبئی میٹرو کی توسیع کا کام بھی تیز رفتاری سے جاری ہے۔ 10 سال پہلے ممبئی میں صرف 8 کلومیٹر میٹرو لائنیں تھیں، 10 سال پہلے صرف 8 کلومیٹر۔ جبکہ آج یہ تقریباً 80 کلومیٹر تک پہنچ چکا ہے۔ یہی نہیں، فی الحال ممبئی میں تقریباً 200 کلومیٹر میٹرو نیٹ ورک پر کام جاری ہے۔

ساتھیو،

ممبئی اور مہاراشٹر بھی آج ہندوستانی ریلوے میں ہونے والی تبدیلی سے بہت فائدہ اٹھا رہے ہیں۔ چھترپتی شیواجی مہاراج ٹرمینس، ناگپور اور اجنی اسٹیشنوں کی دوبارہ ترقی کا کام تیز رفتاری سے جاری ہے۔ آج چھترپتی شیواجی مہاراج ٹرمینس اور لوک مانیہ تلک اسٹیشن پر بھی نئے پلیٹ فارم کا افتتاح کیا گیا ہے۔ اس کے ساتھ یہاں سے 24 بوگیوں والی ٹرینیں یعنی لمبی ٹرینیں بھی چل سکیں گی۔

ساتھیو،

پچھلے 10 سال میں مہاراشٹر میں قومی شاہراہوں کی لمبائی تین گنا بڑھ گئی ہے۔ گورگاؤں-ملوند لنک روڈ پروجیکٹ ترقی اور فطرت کے ہم آہنگی کی ایک شاندار مثال ہے۔ آج تھانے سے بوریولی تک دوہرے ٹنل پروجیکٹ پر بھی کام شروع ہو رہا ہے۔ اس سے تھانے اور بوریولی کے درمیان کا فاصلہ صرف چند منٹ رہ جائے گا۔ یہ بھی این ڈی اے حکومت کی مسلسل کوشش ہے کہ ہمارے تیرتھوں کو ترقی دی جائے اور یاترا کی سہولیات میں اضافہ کیا جائے۔ ہم سب جانتے ہیں کہ اس وقت لاکھوں عقیدت مند پندھرپور واری میں پوری عقیدت کے ساتھ شرکت کر رہے ہیں۔ این ڈی اے حکومت نے اس بات کا خیال رکھا ہے کہ پونے سے پندھر پور کا سفر آسان ہو اور عقیدت مندوں کو سہولیات فراہم کی جائیں۔ سنت دنیشور پالکھی مارگ تقریباً 200 کلومیٹر مکمل ہو چکا ہے، سنت توکارام پالکھی مارگ بھی 110 کلومیٹر سے زیادہ کا ہو چکا ہے۔ بہت جلد یہ دونوں روٹس بھی مسافروں کی سہولت کے لیے تیار ہو جائیں گے۔ میں تمام اچھے کاموں کے لیے اپنی نیک تمناؤں کا اظہار کرتا ہوں، اور میں پنڈھارچیا وتھورایالا کو خراج عقیدت پیش کرتا ہوں!

بھائیو اور بہنو،

سیاحت، زراعت اور صنعت سبھی اس طرح کے رابطے کے بنیادی ڈھانچے سے فائدہ اٹھا رہے ہیں۔ اس سے روزگار کے نئے مواقع پیدا ہو رہے ہیں۔ جب اچھی کنیکٹیوٹی ہوتی ہے تو یہ خواتین کو سہولت، تحفظ اور عزت بھی فراہم کرتی ہے۔ اس کا مطلب ہے کہ این ڈی اے حکومت کے یہ کام غریبوں، کسانوں، خواتین کی طاقت اور یوتھ پاور کو بااختیار بنا رہے ہیں۔ مہاراشٹر کی مہایوتی حکومت بھی اسی عزم کے ساتھ کام کر رہی ہے۔ مجھے خوشی ہے کہ مہاراشٹر حکومت نے ہر سال 10 لاکھ نوجوانوں کو ہنر کی تربیت فراہم کرنے کا عزم کیا ہے۔ چیف منسٹر یوتھ ورک ٹریننگ اسکیم کے تحت تربیت کے دوران اسکالرشپ بھی دی جارہی ہے۔

ساتھیو،

ہندوستان میں بڑی تعداد میں اسکل ڈیولپمنٹ اور روزگار، یہ ہماری ضرورت ہے۔ ہماری حکومت اس سمت میں مسلسل کام کر رہی ہے۔ گزشتہ 4-5 سال کے دوران، کورونا جیسے عظیم بحران کے باوجود، ہندوستان میں ریکارڈ روزگار پیدا ہوا ہے۔ حال ہی میں آر بی آئی نے روزگار پر ایک تفصیلی رپورٹ جاری کی ہے۔ اس رپورٹ کے مطابق ملک میں گزشتہ 3-4 سال میں تقریباً 8 کروڑ نئی ملازمتیں پیدا ہوئی ہیں۔ ان اعداد و شمار نے روزگار کے حوالے سے جھوٹے بیانیے بنانے والوں کو خاموش کر دیا ہے۔ جھوٹے بیانیے والے یہ لوگ سرمایہ کاری کے دشمن ہیں، انفراسٹرکچر کی تعمیر کے دشمن ہیں، ہندوستان کی ترقی کے دشمن ہیں۔ ان کی ہر پالیسی نوجوانوں کو دھوکہ دیتی ہے اور روزگار کو روکتی ہے۔ اور اب ان کے راز فاش ہو رہے ہیں۔ ہندوستان کے باشعور عوام ان کے ہر جھوٹ اور ہر چال کو مسترد کر رہے ہیں۔ جب بھی پل بنتا ہے، ریلوے ٹریک بنتا ہے، سڑک بنتی ہے، لوکل ٹرین کا ڈبہ بنتا ہے، کسی نہ کسی کو روزگار ضرور ملتا ہے۔ جیسے جیسے ہندوستان میں بنیادی ڈھانچے کی تعمیر کی رفتار بڑھ رہی ہے، روزگار پیدا کرنے کی رفتار بھی بڑھ رہی ہے۔ آنے والے وقتوں میں نئی ​​سرمایہ کاری کے ساتھ، یہ مواقع مزید بڑھنے کے لیے تیار ہیں۔

ساتھیو،

این ڈی اے حکومت کا ترقیاتی ماڈل محروم افراد کو ترجیح دینا رہا ہے۔ ہم ان لوگوں کو ترجیح دے رہے ہیں جو دہائیوں سے آخری لائن پر ہیں۔ نئی حکومت نے حلف اٹھاتے ہی غریبوں اور کسانوں کے لیے پکے مکانات سے متعلق بڑے فیصلے لیے ہیں۔ اب تک 4 کروڑ غریبوں کو مستقل مکانات مل چکے ہیں۔ آنے والے سالوں میں مزید 3 کروڑ غریب خاندانوں کو مستقل مکانات ملیں گے۔ ان میں مہاراشٹر کے لاکھوں غریب، دلت، پسماندہ اور قبائلی خاندان بھی شامل ہیں۔ اچھی رہائش نہ صرف ہر خاندان کی ضرورت ہے بلکہ عزت کا معاملہ بھی ہے۔ اس لیے ہم شہروں میں رہنے والے غریب اور متوسط ​​طبقے دونوں کے لیے ایک گھر کا مالک ہونے کا خواب پورا کرنے میں مصروف ہیں۔

ساتھیو،

یہ ہمارا عزم ہے کہ اس بات کو یقینی بنایا جائے کہ ریڑھی پٹری والوں کو بھی باوقار زندگی ملے۔ سواندھی اسکیم اس میں بہت مفید ہے۔ اس اسکیم کے تحت اب تک 90 لاکھ قرضوں کی منظوری دی گئی ہے۔ اس میں سے تقریباً 13 لاکھ قرض مہاراشٹر کے دوستوں نے حاصل کیے ہیں۔ ممبئی میں بھی 1.5 لاکھ ریڑھی پٹری والوں کو سواندھی اسکیم کا فائدہ ملا ہے۔ بینکوں سے سواندھی کی مدد ان کے کاروبار کو مضبوط کر رہی ہے۔ اور ایک تحقیق میں کہا گیا ہے کہ سواندھی یوجنا سے جڑے لوگوں کی آمدنی میں ہر ماہ تقریباً 2 ہزار روپے کا اضافہ ہوا ہے، یعنی ایک سال میں 20-25 ہزار روپے کی اضافی آمدنی بڑھی ہے۔

ساتھیو،

میں آپ کے سامنے سواندھی یوجنا کی ایک اور خصوصیت کا ذکر کرنا چاہتا ہوں۔ میرے وہ بھائی اور بہن جو گلی محلے میں دکاندار ہیں اور اس اسکیم کے تحت قرضہ لیتے ہیں ایمانداری سے پورا قرض واپس کر رہے ہیں۔ اور یہ میرے غریبوں کی عزت نفس ہے، یہ میرے غریب بھائیوں اور بہنوں کی طاقت ہے۔ اور آپ کو یہ جان کر حیرت ہوگی کہ سواندھی کے مستفیدین نے اب تک 3.25 لاکھ کروڑ روپے کے ڈیجیٹل لین دین کیے ہیں۔ اس کا مطلب ہے کہ وہ اپنے کام سے ڈیجیٹل انڈیا کو بھی تقویت دے رہے ہیں اور ہندوستان کو ایک نئی شناخت فراہم کر رہے ہیں۔

ساتھیو،

مہاراشٹر نے ہندوستان میں ثقافتی، سماجی اور قوم پرستی کے شعور کو بھی متاثر کیا ہے۔ چھترپتی شیواجی مہاراج، باباصاحب امبیڈکر، مہاتما جیوتی با پھولے، ساوتری بائی پھولے، انابھاؤ ساٹھے، لوک مانیہ تلک، ویر ساورکر جیسے کئی عظیم فرزندوں کی وراثت اس سرزمین میں موجود ہے۔ ہمیں اس طرح کے روادار معاشرے اور مضبوط قوم کی سمت میں آگے بڑھنا ہے جس کا تصور مہاراشٹر کے عظیم فرزندوں نے کیا تھا۔ ہمیں یاد رکھنا ہوگا کہ خوشحالی کا راستہ بھائی چارہ اور ہم آہنگی میں ہی مضمر ہے۔ اسی جذبے کے ساتھ ایک بار پھر آپ سب کو ان ترقیاتی کاموں کے لیے بہت بہت مبارکباد۔ بہت بہت شکریہ!

 بھارت ماتا کی جئے!

بھارت ماتا کی جئے!

بھارت ماتا کی جئے!

بہت بہت شکریہ۔

******

ش  ح۔ م ع ۔ م ر

U-NO. 8317