স্তেতিস্তিক্স অমসুং শেন্মিৎলোনগী থৌরাং য়াৎপগী লমদা লৈখিদ্রবা প্রোফেসর প্রসান্তা চন্দ্র মহালানোবিসনা তম্লম্বা মশক থোকপা থৌদাং কয়া শকখঙবা ওইনা ভারত সরকারনা মহাক্কী মপোক কুমওন নুমিৎশু তাবনা মরম ওইরগা চহি খুদিংগী জুন 29বু লৈবাক্কী থাক্তা পাংথোক্কদবা অখন্নবা নুমিৎকী থাক্কী মনুং চলহন্দুনা “স্তেতিস্তিক্স নুমিৎ” হায়না লাওথোকখ্রে। স্তেতিস্তিক্স নুমিৎ হায়না পাংথোকপগী মপুং ওইবা পান্দমদি মীয়ামদা, অখন্না হৌরক্লিবা নহা ওইরিবা চারোনশিংগী মরক্তা লৈবাক্কী চাউখৎ থৌরাংগীদমক্তা পায়খৎপা সোসিও-ইকোনোমিক প্লান্নিং অমসুং পোলিসী শেম্বগী থৌওংদা স্তেতিস্তিক্সনা য়ারিবা থৌদাং খুদিংমক খঙহনবনি।

লৈবাক্কী ওইবা মতম-মতমগা চুনবা থীমগা লোয়ননা স্তেতিস্তিক্স নুমিৎ অসি ইং 2007দগী হৌনা চহি খুদিংগী পাংথোক্তুনা লাক্লি। স্তেতিস্তিক্স নুমিৎ, 2024গী থীম অসিনা “ৱারেপ লৌবদা দেতা শিজিন্নবা” হায়বসিনি। দেতানা শাফু পীরগা ৱারেপ লৌবা হায়বা ৱাখল্লোন অসি হীরম খুদিংমক্তা মমুৎ তানা খঙলবা তুংদা ৱারেপ লৌবদা য়াম্না মরু ওই, অমসুং, ওফিসিএল স্তেতিস্তিক্সতগী থোক্লকপা স্তেতিস্তিক্সকী ওইবা ৱারোল খঙবা অমসুং খুদমদা য়ুম্ফম ওইরগা ৱারেপ লৌবগী থৌওংদা মসিনা তঙাই ফদবা মচলশিংগী মনুংদশু অমা ওইরিবনি।

স্তেতিস্তিক্স নুমিৎ 2024গী মপুং ওইবা থৌরম অসি নই দিল্লীগী দিল্লী কেন্ততা লৈবা মনেক্সো সেন্তরদা পাংথোকখিবনি। থৌরম অসিগী অথোইবা মীথুংলেন, 16শুবা ফাইনান্স কম্মিসনগী চেয়রমেন, দাঃ অর্বিন্দ পানগরিয়ানা থৌরম অসিদা তিনখিবা মীয়ামদা ৱা ঙাঙখি। ভারতকী স্তেতিস্তিক্সকী পথাপ শেম্বদা প্রোফঃ পি.সি. মহালানোবিসনা লৌখিবা থৌদাংগী মতাংদা মহাক্না পাউদমখি। ভারতনা মশাগী চাউখৎ থৌরাংদা শাহৌ লৌবগী খোঙজেল অসি ঙাক্না চৎনবগীদমক্তা দেতানা শাফু পীদুনা ৱারেপ লৌবগী থৌওং মখা চত্থগদবনি হায়না মহাক্না হায়খি।

নেস্নেল স্তেতিস্তিকেল কম্মিসনগী চেয়রমেন, প্রোফঃ রজীব লক্ষমন করন্দিকার অমসুং এম.ও.এস.পি.আই.গী সেক্রেতরী, দাঃ সৌরব গর্গশু ঙসিগী থৌরমসিদা শরুক য়াখিবা মীওইশিংদা ৱারোল থমখি। এন.এস.সি.গী চেয়রমেন্না দেতাবু হেন্না এসেসিবল ওইহনবা অমসুং হেন্না শিজিন্নবা য়াহনবা হায়বসিদা অহেনবা মিৎয়েং চঙখি অমসুং দেতা পুথোক্নবা ইনফোর্মেসন তেক্নোলোজী শিজিন্নবগী থৌওংদা মন্ত্রালয়না হোৎনরিবা খোঙথাংশিং মখা চত্থহনগদবনি হায়না মহাক্না মখা তাখি। তোঙান-তোঙানবা এজেন্সীশিংনা পুথোক্লিবা দেতাশিংবু স্তেকহোলদরশিংগী মরক্তা তেংবাংনবগী থৌওং হেনগৎহন্দুনা দেতাবেজশিং অসিবু অমগা অমগা চুনহনবা অমসুং মরী লৈনহনবগী মথৌ তারিবা অসিদশু মহাক্না অহেনবা মিৎয়েং চঙখি। এম.ও.এস.পি.আই.গী সেক্রেতরীনা ঙসিগী মীয়ামদা থমখিবা ৱারোলদা সর্ভে দেতাদা তাইম লেগ লৈরিবা অসিবু হন্থহন্নবা কম্প্যুতর এদেদ পর্সনেল ইন্তর্ভ্যু (সি.এ.পি.আই.), অনৌবা সর্ভে, য়ুজর ইনগেজমেন্ত এক্সর্সাইস অমসুং নৌনা হৌদোক্লবা ই-সংখ্যিকী পোর্তেলগুম্বা মন্ত্রালয় অসিনা হন্দক্তা পায়খৎখিবা থৌওংশিংবু পনবদা য়াওখি। স্তেতিস্তিক্স নুমিৎ অসিনা স্তেতিস্তিক্সকী মীওই অমসুং প্লান্নরশিংনা দেতানা শাফু পীবা ৱারেপ লৌবগী থৌওং মখা চত্থহন্নবা ইথিল পীগনি হায়বগী মহাক্না থাজবা থমখি।

কেন্দ্র মন্ত্রালয়/বিভাগ, রাজ্য/য়ু.তি. সরকারগী সেনিয়র ওফিসিএল, য়ু.এন. এজেন্সী, ৱর্ল্দ বেঙ্কনচিংবা মালেমগী লুপশিংগী মীহুৎ অমসুং অতোপ্পা স্তেকহোলদর কয়ানা ঙসিগী থৌরমদা শরুক য়াখি। থৌরম অসি মন্ত্রালয়গী সোসিএল মীদিয়া হেন্দলশিংদা ৱেব-কাস্ত/লাইব স্ত্রীমশু তৌখি। পোস্ত-গ্রেজুএত মহৈরোইশিংগীদমক্তা পাংথোকখিবা “ওন দি স্পোত এসে ইবগী চাংয়েংনবা, 2024”গী মকোক মথং তাখিবশিংদা ঙসিগী থৌরমসিদা মনা য়েন্থোকখি।

ভারত সরকারগী ঙাক-শেল মন্ত্রালয়গী হান্নগী সেক্রেতরী, দাঃ অজয় কুমারনা তেক্নিকেল সেসনগী মনুংদা লৈঙাকপগী থৌওংদা দেতাগী মরু ওইবা কয়া য়াম্না লৈবগে হায়বগী মতাংদা ঙসিগী মীয়ামদা পাউদমখি। খোঙজেল য়াঙনা হোংবা নাইবা দিজিতেলগী য়ুগ অসিদা দেতাগী মরু ওইবা অমসুং এম.ও.এস.পি.আই.গী হেনগৎলক্লিবা থৌদাং অমসুং থবক পাকথোক চাউথোক্লক্লিবা অসিদা মহাক্না মীয়ামগী পুক্নিং চীংশিনখি। মসিগী মতুংদা, শ্রী লুই ফিলিপ লোপেজ কালবা, ৱর্ল্দ বেঙ্ক গ্রুপকী পোভর্তী অমসুং ইকুইতী গ্লোবেল প্রেক্তিসকী গ্লোবেল দাইরেক্তরনা ৱারেপ লৌবদা দেতা শিজিন্নবগী মতাংদা মালেমগী থাক্তা থেংনখিবা থোওংশিংগী মতাংদা পীবা প্রজেন্তেসন অমনা মখা তাখি। দেতা হায়বসি হৌজিক মালেমদা চৎনরিবা থবক থৌরমশিং লান্নবগা লোয়ননা পোলিসী নীংথিনা শেম্বদা য়াম্না তঙাই ফদবা ইনফ্রাস্ত্রকচর অমনি হায়না মহাক্না মরু ওইনা পনখি।

এম.ও.এস.পি.আই.না চহি খুদিংগী অপদেত তৌরবা সস্তেনেবল দিভেলপমেন্ত গোল – নেস্নেল ইন্দিকেতর ফ্রেমৱর্ক (এস.দি.জি.-এন.আই.এফ.) অসিদা য়ুম্ফম ওইরগা স্তেতিস্তিক্স নুমিৎ (জুন 29) অসিদা তাইম সেরিজ দেতাগা লোয়নবা এস.দি.জি.গী প্রোগ্রেস রিপোর্ত অমসুং প্রোগ্রেস রিপোর্ত অসিদগী লৌথোকপা হেন্দবুক অনি চহি খুদিংগী ফোঙই। থৌওং অসিগা মরী লৈননা, মখাদা পীরিবা হেন্দবুকশিং অসিশু ঙসিগী থৌরম মনুংদা লান্থোকখিঃ

1. সস্তেনেবল দিভেলপমেন্ত গোল – নেস্নেল ইন্দিকেতর ফ্রেমৱর্ক প্রোগ্রেস রিপোর্ত, 2024
2. দেতা স্নেপশোত ওন সস্তেনেবল দিভেলপমেন্ত গোল - নেস্নেল ইন্দিকেতর ফ্রেমৱর্ক, 2024
3. সস্তেনেবল দিভেলপমেন্ত গোল - নেস্নেল ইন্দিকেতর ফ্রেমৱর্ক, 2024

রিপোর্তশিং অসি এম.ও.এস.পি.আই.গী ৱেবসাইত্তা (www.mospi.gov.in) য়েংবা য়াগনি। এস.দি.জি. ইন্দিকেতরগী তাইম সেরিজ দেতা অসি রিপোর্ত অসিদগী এম.এস. এক্সেলগী ফোর্মেত্তা দাউনলোদ তৌবা য়াগনি।

মন্ত্রালয়না লৈবাক্কী স্তেতিস্তিক্সকী ওফিসিএলশিংগী মরক্তা দেতা মেনেজমেন্ত মপুং ফানা পাংথোক্নবা অমসুং দেতা লান্নবদা লাইথোকহন্নবা অরায়বা পথাপ অমা শেম্বগী পান্দমগা লোয়ননা ই-সংখ্যিকী পোর্তেল (https://esankhyiki.mospi.gov.in)  অমশু হৌদোকখি। পোর্তেল অসি এম.ও.এস.পি.আই.গী ৱেবসাইত্তগী চঙবা য়াগনি। মসিগী পান্দমদি প্লান্নর, পোলিসী শেম্বা মীওই, রিসর্চর অমসুং মশিং য়াম্লবা মীয়ামদা মতম চানা ইনপুত ফংহনবনি। ই-সংখ্যিকী পোর্তেল অসিদা দেতা লায়না শিজিন্নবা অমসুং অমুক্কা হন্না শিজিন্নহনবা য়াহন্নবা সেক্সন অনি য়াওরি। মখোয়শিং অদুদিঃ

1. দেতা কেতলোগঃ কেতলোগ অসিদা নেস্নেল একাউন্ত স্তেতিস্তিক্স, কঞ্জ্যুমর প্রাইস ইন্দেক্স, ইন্দেক্স ওফ ইন্দস্ত্রিএল প্রদক্সন, ইন্দস্ত্রীশিংগী চহিগী সর্ভে, পেরিওদিক লেবর ফোর্স সর্ভে অমসুং হাউসহোল্দ কঞ্জম্পসন এক্সপেন্দিচর সর্ভেগুম্বা মন্ত্রালয় অসিগী মরু ওইবা দেতা এসেতশিং মফম অমত্তা ফংহল্লি।
2. মেক্রো ইন্দিকেতরঃ মসিনা ফিলতর তৌবা অমসুং ভিজুএলাইজ তৌবা য়াবগী খুদোংচাবা পীবগা লোয়ননা মেক্রো ইন্দিকেতরশিংগী তাইম সেরিজ পীরি। মসিনা য়ুজরশিংদা কস্তম দেতাসেত, ভিজুএলাইজেসন দাউনলোদ তৌবা য়াহল্লি অমসুং মখোয়বু এ.পি.আই.শিংগী খুত্থাংদা শিজিন্নবশু য়াহল্লি, মসিনা দেতাশিংবু অমুক হন্না শিজিন্নবা য়াবগী চাং হেনগৎহল্লি। হৌজিক্কী ওইনদি, সেক্সন অসি অসিদা এম.ও.এস.পি.আই.গী মরু ওইবা খোঙথাং মরি য়াওরি। মখোয়শিং অদুদি নেস্নেল একাউন্ত স্তেতিস্তিক্স, কঞ্জ্যুমর প্রাইস ইন্দেক্স, ইন্দেক্স ওফ ইন্দস্ত্রিএল প্রদক্সন অমসুং  ইন্দস্ত্রীশিংগী চহিগী সর্ভে অসিনি অমসুং মসিদা হৌখিবা চহি তরাগী দেতা য়াওরি।

***