ଶ୍ରୀମତି ନିର୍ମଳା ସୀତାରମଣ ଆଜି ନୂଆଦିଲ୍ଲୀରେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଛନ୍ତି ।

ନର୍ଥ ବ୍ଲକରେ ଥିବା କାର୍ଯ୍ୟାଳୟରେ ଅର୍ଥ ସଚିବ ଡ. ଟି.ଭି. ସୋମନାଥନ୍ ଏବଂ ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରଣାଳୟର ଅନ୍ୟ ସଚିବମାନେ ଶ୍ରୀମତି ସୀତାରମଣଙ୍କୁ ସ୍ୱାଗତ କରିଥିଲେ ।

ତାଙ୍କୁ ପୁଣି ଥରେ କେନ୍ଦ୍ର ଅର୍ଥ ଏବଂ କର୍ପୋରେଟ୍ ବ୍ୟାପାର ମନ୍ତ୍ରୀ ଭାବରେ କାର୍ଯ୍ୟ କରିବାକୁ ସୁଯୋଗ ଦେଇଥିବାରୁ ସେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ଅଶେଷ କୃତଜ୍ଞତା ଜଣାଇଥିଲେ । ପ୍ରଧାନମନ୍ତ୍ରୀଙ୍କ ମାର୍ଗଦର୍ଶନରେ ଭାରତ ଏବଂ ଏହାର ଲୋକମାନଙ୍କର ସେବା କରିବାକୁ ସୁଯୋଗ ପାଇଥିବାରୁ ଧନ୍ୟବାଦ ଦେଇଥିଲେ ।

ଶ୍ରୀମତି ସୀତାରମଣ ଗତ ୧୦ ବର୍ଷ ମଧ୍ୟରେ ଦୃଢ଼ ନେତୃତ୍ୱ ଏବଂ ବିକାଶମୂଖୀ ଶାସନକୁ ଗ୍ରହଣ କରିଛନ୍ତି, ଯାହା ବିଭିନ୍ନ କ୍ଷେତ୍ରରେ ବ୍ୟାପକ ପରିବର୍ତ୍ତନ ଆଣି ଏକ ଦୃଢ଼ ତଥା ସ୍ଥିର ଅର୍ଥନୀତି ସୃଷ୍ଟି କରିଛି ।

ଦାୟିତ୍ୱ ଗ୍ରହଣ କରିବା ପରେ ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରଣାଳୟର ବିଭିନ୍ନ ବିଭାଗର ସଚିବମାନେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀଙ୍କୁ ଜାରି ରହିଥିବା ନୀତି ସମ୍ପର୍କରେ ସୂଚନା ପ୍ରଦାନ କରିଥିଲେ ।

ଏହି ଅବସରରେ ସେ କହିଥିଲେ ଯେ, ନାଗରିକମାନଙ୍କ ପାଇଁ ‘ସହଜ ଜୀବନ’ ନିଶ୍ଚିତ କରିବାକୁ ସରକାର ପ୍ରତିଶୃତିବଦ୍ଧ ଏବଂ ଏ ଦିଗରେ ଆଗାମୀ ଦିନମାନଙ୍କରେ ଅଧିକ ପଦକ୍ଷେପ ଗ୍ରହଣ କରାଯିବ ।

ଶ୍ରୀମତି ସୀତାରମଣ ଏହା ମଧ୍ୟ କହିଛନ୍ତି ଯେ, ୨୦୧୪ ରୁ ଆରମ୍ଭ କରାଯାଇଥିବା ସଂସ୍କାର ଜାରି ରହିବ, ଯାହା ଭାରତ ପାଇଁ ବ୍ୟାପକ ଆର୍ଥିକ ସ୍ଥିରତା ଏବଂ ବିକାଶ ଆଣିଦେବ । ନିକଟ ଅତୀତରେ ବିଭିନ୍ନ ବିଶ୍ୱସ୍ତରୀୟ ଚ୍ୟାଲେଞ୍ଜ ସତ୍ତ୍ୱେ ଭାରତର ବିକାଶର ପ୍ରଶଂସନୀୟ କାହାଣୀ ଉପରେ ମଧ୍ୟ ସେ ଆଲୋକପାତ କରିଥିଲେ ଏବଂ କହିଥିଲେ ଯେ, ଆଗାମୀ ବର୍ଷଗୁଡିକ ପାଇଁ ଏକ ଆଶାବାଦୀ ଅର୍ଥନୈତିକ ଦୃଷ୍ଟିକୋଣ ମଧ୍ୟ ରହିଛି ।

ଏନ୍‌ଡିଏ ସରକାରଙ୍କ ବିକାଶ ଏଜେଣ୍ଡାକୁ ନୂତନ ଉତ୍ସାହରେ ଆଗକୁ ବଢ଼ାଇବା ସହ ପ୍ରଧାନମନ୍ତ୍ରୀଙ୍କ ‘ବିକଶିତ ଭାରତ’ ଦୃଷ୍ଟିକୋଣକୁ ହାସଲ କରିବାକୁ ପ୍ରତିକ୍ରିୟାଶୀଳ ନୀତି ନିଶ୍ଚିତ କରିବାକୁ ସେ ବିଭାଗଗୁଡିକୁ ଅନୁରୋଧ କରିଥିଲେ ।

କେନ୍ଦ୍ର ଅର୍ଥମନ୍ତ୍ରୀ ମଧ୍ୟ କହିଥିଲେ ଯେ, ସରକାର ‘ସବ୍‌କା ସାଥ୍‌, ସବ୍‌କା ବିକାଶ, ସବ୍‌କା ବିଶ୍ୱାସ, ସବ୍‌କା ପ୍ରୟାସ’ ରେ ବିଶ୍ୱାସ କରନ୍ତି । ଏକ ସଦୃଢ଼ ଓ ସ୍ଥିର ଅର୍ଥନୀତି ନିଶ୍ଚିତ କରିବାକୁ ଶିଳ୍ପପତି, ନିୟାମକ ତଥା ନାଗରିକମାନଙ୍କ ସମେତ ସମସ୍ତ ହିତାଧିକାରୀଙ୍କର ନିରନ୍ତର ସହଯୋଗ ଓ ସମର୍ଥନ ପାଇଁ ସେ ଆହ୍ୱାନ ଦେଇଥିଲେ ।

  SR/Swadhin/PIB Bhubaneswar