দোক্তর জিতেন্দ্র সিংহনা ঙসি নই দিল্লীগী নোর্থ ব্লোক্তা থংন-থংননা অহুম্লকশুবা তর্মগী ওইনা পর্সোনেল, পব্লিক গ্রীভান্সেস, অমসুং পেন্সন্স মন্ত্রালয়গী রাজ্য মন্ত্রী ওইনা ফম লৌখ্রে‍। ফম লৌরবা মতুংদা, দোক্তর জিতেন্দ্র সিংহনা হায়খি, “হৌখিবা চহি ১০সিদা পি.এম. মোদীগী লুচিং মখাদা অনৌবা য়াওলগী ওইবা লৈঙাক্কী অহোংবা কয়া পুরকপা উখ্রে অমসুং হায়রিবশিং অসি তর্ম অসিদসু মখা চত্থখিগনি‍।”

দোক্তর জিতেন্দ্র সিংহনা পর্সোনেল, পব্লিক গ্রীভান্সেস অমসুং পেন্সন্স মন্ত্রালয়গী রাজ্য মন্ত্রী ওইনা ফম লৌবা

দোক্তর জিতেন্দ্র সিংহনা পি.এম. মোদীবু মহাক্কী মফমদা অমুক হন্না থাজবা থম্বিবা অমসুং থংন-থংননা অহুম্লকশুবা তর্মসিদসু থৌদাং শিন্নবিবগীদমক থাগৎপা ফোঙদোকখি‍। দোক্তর সিংহনা পোর্তফোলিও অসি ২০১৪দগী হৌনা পায়দুনা লাকখিবনি‍। মহাক উধমপুর লোক সভা কন্সতিত্যুএন্সীদগী কারকপা মেম্বর ওফ পার্লিয়ামেন্ত অমনি‍।

দিপার্তমেন্ত ওফ পর্সোনেল এন্দ ত্রেনিংগী সেক্রেতরী শ্রীমতী এস. রাধা চৌহান্না কেন্দ্র মন্ত্রী দোক্তর জিতেন্দ্র সিংহবু তরাম্না ওক্লি

ফম লৌরবা মতুংদা মীদিয়াদা ৱা ঙাঙলদুনা, মিসন বিক্সিত ভারতকী পান্দম ফংদ্রিবফাওবা অওনবা পুদুনা লাকখিগনি হায়না দোক্তর জিতেন্দ্র সিংহনা হায়খি‍। মসি হৌখিবা চহি ১০সিদা তৌদুনা লাক্লিবা থবকশিংগী মখা চত্থরকপা ওইগনি হায়না মহাক্না মখা তাখি‍। DoPTগী মায় পাক্লবশিংবু পল্লদুনা, দোক্তর জিতেন্দ্র সিংহনা পি.এম. মোদীগী লমজিং মখাদা হৌখিবা চহি ১০সিদা পুরকখিবা লৈঙাক্লোনগী অওন্বশিং অসি হান্না চৎনরম্বা মতৌশিংদগী নাথৈদুনা লাকপনি অমসুং মিনিমম গভর্নমেন্ত অমসুং মেক্সিমম গভর্নেন্সকী ৱাখল্লোন্ন মখাদা লৈবাকসিগী মীওই খুদিংগী পুন্সি মহিং নুংঙাইহন্ননবা মীয়ামদা য়ুম্ফম ওইবা থৌরাংশিং য়াৎপগী থৌওংনা লমজিংদুনা চৎপনি‍ হায়খ‍ি‍। লুখ্রাবী অমসুং মপুরোইবা খাইনরবা নুপীশিংগী পেন্সন্দা পুরকপা অওন্বা, তোঙান তোঙানবা লৈঙাক্কী দিপার্তমেন্তশিংগী থবক তৌবগগী চৎন-কাঙলোনশিংদা পুরকপা অওন্বা, থবক খন্বদা ইন্তরভিউ তৌবগী থৌওং লৌথোকখিবা, মনুং হঞ্জিন্বা মফমশিংদা লৈবা এস্পিরেন্তশিংদা থোং মান্নবা ফম্পাক অমা ফংহন্বা অমসুং অরিবা মতমগী চৎন-কাঙলোনশিং মুত্থৎখিবনচিংবা ৱাফমশিং মহাক্না পনখি‍‍। এদমিনিস্ত্রেতিব রিফোর্মশিং অমসুং মশক নাইরবা কর্ময়োগী মিসন হায়রিবশিং অসি মমাঙগী তর্ম অনিদা পায়খৎখিবা য়াওলগী মশক ওইবা অওন্বশিংনি হায়না দোক্তর জিতেন্দ্র সিংহনা মখা তাখি‍। CPGRAMS অসি মালেম পুম্বগী ওইনা মীয়ামগী ৱাকৎ ৱাখৈনবগী ফিদম্নিংঙাই ওইবা মতৌনি হায়বা ৱাফমসু মহাক্না পনখি‍।

দিপার্তমেন্ত ওফ এদমিনিস্ত্রেতিব রিফোর্ম্স এন্দ পব্লিক গ্রীভান্সেসকী সেক্রেতরী শ্রী ভি. স্রিনিবাস, লোয়ননা দিপার্তমেন্ত ওফ পর্সোনেল এন্দ ত্রেনিংগী সেক্রেতরী শ্রীমতী এস. রাধা চৌহান, অমসুং অতৈ মকোক থোংবা ওফিসিএলশিংসু কেন্দ্র মন্ত্রীনা ফম লৌবগী থৌরমদুদা শরুক য়াখি‍।

***